၁၊ ၂။ မာရိရဲ့ ခရီးစဉ်​ကို ပြောပြပါ။ သူ ဘာကြောင့် မ​သက်​မ​သာ ဖြစ်နေတယ်​ဆိုတာ ရှင်းပြပါ။

မာရိဟာ မြည်း​စီး​နေရင်း ညောင်း​လာလို့ သူ့ရဲ့ မ​ပေါ့​မ​ပါး ခန္ဓာကိုယ်ကို အသာအယာ ရွှေ့လိုက်တယ်။ အချိန်​အတော်​ကြာ မြည်း​စီး​ခဲ့​ရလို့ သူ​ပင်​ပန်း ညောင်း​ညာ​နေ​ပြီ။ ယော​သပ်​က​လည်း ဝေး​လံ​တဲ့ ဘက်​သ​လီ​ဟ​င်​မြို့​ကို သွား​တဲ့​လမ်း​အတိုင်း ရှေ့​က​နေ တ​ရွေ့​ရွေ့ လမ်း​လျှောက်​နေ​တ​ယ်။ ဗိုက်​ထဲ​က ကလေးလေး လှုပ်​တာ​ကို မာရိ ထပ်​ပြီး ခံစား​လိုက်ရ​ပြန်တယ်။

^၂ မာရိရဲ့​ကိုယ်ဝန် အတော်​ရ​င့်​နေပြီ။ အဲဒီအချိန်မှာ မာရိရဲ့ “ကိုယ်ဝန် နေ့စေ့လစေ့ ဖြစ်နေပြီ” လို့ ကျမ်းစာက ဆိုတယ်။ (လု. ၂:၅) လယ်ကွင်း​တွေကို ဖြတ်ကျော်​လာတဲ့အခါ လယ်ထွန်​နေ၊ ပျိုး​ကြဲ​နေတဲ့ လယ်သမား​တချို့ သူတို့ကို တွေ့​တဲ့အခါ ဒီ​အမျိုးသမီး မ​ပေါ့​မ​ပါး​နဲ့ ဘာလို့​များ ခရီးသွား​တာလဲ​လို့ တွေးမိကြမှာပဲ။ နာဇရက်​မြို့​နဲ့ ဒီလောက်​ဝေး​တဲ့ နေရာကို မာရိ ဘာကြောင့် ထွက်လာ​ရတာလဲ။

၃။ မာရိ ဘာ​တာ​၀​န် ရခဲ့​သလဲ။ သူနဲ့​ပတ်သက်ပြီး ဘာ​အကြောင်း သုံးသပ်ကြ​မလဲ။

^၃ လူ့​သမိုင်း​မှာ အထူးခြားဆုံး​ဖြစ်တဲ့ တာဝန်ကို မာရိ ရခဲ့တဲ့ အချိန်​က​စပြီး ခုလို အခြေအနေ​တွေ ပေါ်လာ​တော့​တာ​ပဲ။ ဘုရားသခင်ရဲ့ သား၊ မေရှိယ​သခင်​ကို သူ​ဖွားမြင်​ရတော့မယ်။ (လု. ၁:၃၅) မီးဖွား​ခါနီး​မှာ​ပဲ ခရီးထွက်​ဖို့ အကြောင်း​ပေါ်လာတယ်။ ဒီလို​ဖြစ်ပျက်လာ​ချိန်​အတွင်း မာရိရဲ့​ယုံကြည်ခြင်း အမျိုးမျိုး စမ်းသပ်​ခံခဲ့ရတယ်။ သူ့​ယုံကြည်ခြင်း ခိုင်ခံ့​နေဖို့ ဘာက ကူညီ​ပေးတယ်ဆိုတာ သုံးသပ်​ကြည့်ကြစို့။

၄၊ ၅။ (က) ဘက်သလီဟင်​မြို့ကို ယောသပ်နဲ့ မာရိ ဘာကြောင့် သွား​ရတာလဲ။ (ခ) ဆီ​ဇာရဲ့​အမိန့်​က ဘယ်​ပရောဖက်ပြုချက်ကို ပြည့်စုံ​စေ​သလဲ။

^၄ ယောသပ်နဲ့ မာရိ​တို့​ပဲ ခရီးသွား​နေကြတာ မဟုတ်ဘူး။ အဲဒီအချိန်မှာ ဆီဇာ သြ​ဂတ်​စ​တပ်​က ပြည်သား​အားလုံး မှတ်ပုံတင်​ရမယ်ဆိုပြီး အမိန့်ထုတ်​ထားလို့ လူတိုင်း ကိုယ့်​ဇာတိ​မြို့ကို​ပြန်​ပြီး မှတ်ပုံတင်​ကြရတယ်။ ယောသပ် ဘယ်လို​လုပ်သလဲ။ “ယောသပ်​က ဒါဝိဒ်​မျိုးနွယ်​ဖြစ်တဲ့အတွက် ဂါလိလဲ​ပြည်၊ နာဇရက်​မြို့ကနေ ယုဒပြည်မှာ​ရှိတဲ့ ဘက်သလီဟင်​လို့​ခေါ်တဲ့ ဒါဝိဒ်​ရဲ့ နေရင်းမြို့​ဆီ သွားတယ်” လို့​မှတ်တမ်းက ဆိုတယ်။—လု. ၂:၁-၄။

^၅ အဲဒီ​အချိန်​ကျ​မှ ဆီဇာ အမိန့်ထုတ်​တာ​က တိုက်ဆိုင်မှု မဟုတ်ဘူး။ လွန်ခဲ့တဲ့ အနှစ် ၇၀၀​ လောက်​က ရေးခဲ့တဲ့ ကြိုဟောချက်​တစ်ခု​အရ မေရှိယဟာ ဘက်သလီဟင်​မြို့ငယ်​မှာ မွေးဖွား​ ရမယ်။ နာဇရက်​မြို့​နဲ့ ခုနစ်မိုင်​လောက်​ပဲ ဝေး​တဲ့ ဘက်သလီဟင် မြို့​တစ်မြို့ ရှိသေးတယ်။ ဒါပေမဲ့ မေရှိယ ဖွားမြင်​ရမယ့်​မြို့ဟာ “ဘက်သလီဟင် ဧဖရတ်​မြို့” ဖြစ်မယ်လို့ ပရောဖက်ပြုချက်​က တိတိကျကျ ဖော်ပြ​ထားတယ်။ (မိက္ခာ ၅:၂ ကိုဖတ်ပါ။) နာဇရက်​မြို့ကနေ အဲဒီမြို့​လေး​ကို ရောက်​ဖို့ ရှမာရိ​နယ်​ကို​ဖြတ်​ပြီး မိုင် ၈၀ လောက် တောင်တက်​တောင်​ဆင်း ခရီး​သွားရတယ်။ ယောသပ်​သွား​ရမှာက အဲဒီ​ဘက်သလီဟင်​မြို့ ဖြစ်နေတယ်။ အဲဒီမြို့​ဟာ ယောသပ်နဲ့ မာရိ နှစ်ယောက်​စလုံးရဲ့ ဘိုးဘေး​ဖြစ်သူ ဘုရင်​ဒါဝိဒ်​မျိုးနွယ်ရဲ့ ဇာတိ​မြို့ ဖြစ်တယ်။

၆၊ ၇။ (က) ဘက်သလီဟင်​မြို့ကို သွားတဲ့​ခရီး​က မာရိ​အတွက် ဘာကြောင့် ခက်ခဲ​နိုင်သလဲ။ (ခ) မာရိ​ဟာ ယောသပ်ရဲ့​ဇနီး​ဖြစ်လို့ သူ့ရဲ့ ဆုံးဖြတ်ချက်တွေ ဘယ်လို ပြောင်းလဲသွား​သလဲ။ (အောက်ခြေမှတ်ချက်ကို​လည်း ကြည့်ပါ။)

^၆ အဲဒီကို​သွားဖို့ ယောသပ်ရဲ့ ဆုံးဖြတ်ချက်ကို မာရိ သဘောတူ​ပါ့မလား။ ဒီ​ခရီးဟာ မာရိ​အတွက် အတော်လေး​ခက်​မှာ သေချာတယ်။ အဲဒီ​အချိန်ဟာ ဆောင်းဦး​ရာသီ အစောပိုင်းလည်း ဖြစ်ပုံရ​တ​ယ်။ အဲဒါကြောင့် ခြောက်သွေ့​ရာသီ တဖြည်းဖြည်း ကုန်​သွားတဲ့အခါ မိုး​နည်းနည်း ရွာ​နိုင်တယ်။ အဲဒီအပြင် ဘက်သလီဟင်​မြို့ဟာ ပင်လယ်ရေ မျက်နှာပြင်​အထက် ပေ ၂,၅၀​၀ ကျော်​မြင့်​ပြီး အတက်​လမ်း​ဖြစ်လို့ ရက်​အနည်းငယ်​လောက် ခရီးကြမ်း နှင်​ကြ​ရမှာ​ဖြစ်တယ်။ ဒါကြောင့်လည်း ‘ဂါလိလဲ​ပြည်​ကနေ တက်​သွားတယ်’ လို့ ကျမ်းစာက ဆိုတာ။ မာရိဟာ ကိုယ်ဝန် နေ့စေ့လစေ့ ဖြစ်နေလို့ မကြာခဏ အနားယူဖို့ လိုအပ်တဲ့​အတွက် ပုံမှန်​ထက် ခရီး​ပို​ကြန့်ကြာ​နိုင်တယ်။ အခုလို မီးဖွား​ခါနီး ဗိုက်​နာ​နေတဲ့​အချိန်မှာ သူ့ကို​ကူညီမယ့် မိသားစုနဲ့ မိတ်ဆွေ​တွေရဲ့ အနီးအနားမှာ မာရိ ရှိနေ​ချင်မှာပဲ။ ဒါကြောင့် ဒီ​ခရီး​ကို ထွက်​လာဖို့ သူ့မှာ သတ္တိ​ရှိရမယ်။

^၇ ဘယ်လိုပဲ​ဖြစ်ပါစေ မာရိဟာ “နာမည်​စာရင်း​ပေးဖို့” ယောသပ်နဲ့ လိုက်သွား​တယ်လို့ လုကာ​မှတ်တမ်းအရ သိရတယ်။ “စေ့စပ်​ထိမ်းမြား​ထားတဲ့ ဇနီး​မာရိကိုပါ ခေါ်သွားတယ်” လို့​ လည်း ဖော်ပြ​ထားတယ်။ (လု. ၂:၄၊ ၅) ယောသပ်ရဲ့ ဇနီး​ဖြစ်နေတဲ့​အတွက် မာရိ ဆုံးဖြတ်​ချက်​ချ​ပုံ​က ပြောင်းလဲ​သွားတယ်။ ခင်ပွန်းက အိမ်ထောင်ဦးစီး​ဖြစ်တဲ့အတွက် ဘုရားပေး​တာဝန်​အရ သူဟာ ထောက်မ​ပေးသူ​အဖြစ် ယောသပ်ရဲ့ ဆုံးဖြတ်ချက်တွေကို လက်ခံ​ရတော့မယ်။ * ဒါကြောင့် မာရိဟာ ခင်ပွန်းကို နာခံခြင်း​အားဖြင့် ယုံကြည်ခြင်း​ရှိကြောင်း ဖော်ပြခဲ့တယ်။

၈။ (က) ယောသပ်နဲ့​အတူ ဘက်သလီဟင်​မြို့ကို မာရိ ဘာကြောင့် လိုက်သွားတာ ဖြစ်နိုင်သလဲ။ (ခ) မာရိ​ရဲ့ စံနမူနာ​က သစ္စာ​ရှိသူတွေ​အတွက် ဘယ်လို လှုံ့ဆော်မှု ဖြစ်စေ​သလဲ။

^၈ မာရိ နာခံမှု​ပြဖို့ တခြား​အကြောင်း​တစ်ခု ရှိသေးလား။ မေရှိယဟာ ဘက်သလီဟင်​မြို့မှာ ဖွားမြင်​မ​ယ်​ဆိုတဲ့ ပရောဖက်ပြုချက်ကို မာရိ​သိပါသလား။ ကျမ်းစာ မဖော်ပြဘူး။ ဒါပေမဲ့ ဒီ​ပရောဖက်ပြုချက်ကို ဘာသာရေး​ခေါင်းဆောင်​တွေ​အပြင် သာမန်​လူတွေ​တောင်မှ သိတဲ့​အတွက် မာရိလည်း သိ​နိုင်ပါတယ်။ (မ. ၂:၁-၇။ ယော. ၇:၄၀-၄၂) ဒီ့အပြင် မာရိဟာ ကျမ်းစာ​အသိပညာ ကြွယ်ဝသူ​ဖြစ်တယ်။ (လု. ၁:၄၆-၅၅) ယောသပ်နဲ့ အတူ​ခရီးထွက်​ဖို့ မာရိ ဆုံးဖြတ်တာဟာ ခင်ပွန်းရဲ့​စကားကို နာခံဖို့လား။ ဘုရင့်​အမိန့်​ကို နာခံဖို့လား။ ယေဟောဝါ​ဘုရားရဲ့ ပရောဖက်ပြုချက် ပြည့်စုံဖို့လား။ အဲဒါတွေ အားလုံး​ကြောင့်လား။ ဘာကြောင့်​ပဲ​ဖြစ်ပါစေ သူဟာ တကယ် ပုံသက်သေ​ကောင်း​သူ​ဖြစ်တယ်။ နှိမ့်ချ​နာခံ​တတ်တဲ့ အမျိုးသား၊ အမျိုးသမီးတွေကို ယေဟောဝါ​ဘုရား တကယ်​တန်ဖိုး​ထားတယ်။ လက်​အောက်​ ခံ​တာ​ကို တန်​ဖိုး​မထား​တော့​တဲ့ ဒီ​နေ့​ခေတ်​မှာ မာ​ရိ​ရဲ့ စံနမူနာ​ဟာ လက်​အောက်​ခံ​မှု​ပြဖို့ ကျွန်တော်​တို့​ကို လှုံ့​ဆော်​ပေး​ပါ​တ​ယ်။

၉၊ ၁၀။ (က) ဘက်သလီဟင်​မြို့​နဲ့ နီး​လာတဲ့အခါ ယောသပ်နဲ့ မာရိ​တို့ ဘယ်​အကြောင်းကို စဉ်းစားမိ​နိုင်သလဲ။ (ခ) သူတို့ ဘယ်မှာ တည်း​လိုက်ရ​သလဲ၊ ဘာကြောင့်လဲ။

^၉ ဘက်သလီဟင်​ကို အဝေးကနေ လှမ်းမြင်​လိုက်ရ​ချိန်မှာ မာရိ စိတ်အေး​သွားမှာပဲ။ မာရိ​နဲ့ ယောသပ်တို့​ဟာ တောင်ကုန်း​တွေကို တက်​ရင်း ဆွတ်ခူး​စ​ရာ အသီး​တွေ ကျန်​နေ​သေး​တဲ့ သံလွင်​ခြံ​တွေကို ဖြတ်သွားတဲ့​အခါ အဲဒီ​ကျေး​ရွာလေးရဲ့ သမိုင်းကြောင်းကို တွေးမိ​ကြပါလိမ့်မယ်။ ပရောဖက်​မိက္ခာ ပြောခဲ့တဲ့​အတိုင်း ဒီ​မြို့ငယ်လေးဟာ ယုဒ​မြို့​တွေ​ထဲမှာ ထည့်​ရေတွက်​လို့ မရ​လောက်​အောင် မထင်ရှား​တဲ့​နေရာ ဖြစ်ပေမဲ့ အစောပိုင်း အနှစ်​တစ်ထောင်​ကျော်​က ဒီ​နေရာမှာ ဗောဇ၊ နောမိ၊ ဒါဝိဒ်​တို့ မွေးဖွား​ခဲ့​ကြတယ်။

^၁၀ အဲဒီကို ယောသပ်နဲ့ မာရိ​တို့ ရောက်တဲ့​အချိန်မှာ လူတွေ ပြည့်ကျပ်​နေတာ တွေ့​လိုက်ရတယ်။ တခြား​သူတွေလည်း မှတ်ပုံတင်​ဖို့ သူတို့​ထက်​အရင် ရောက်​နှင့်​နေကြ​လို့ သူတို့​တည်းခိုဖို့ နေရာ​မရှိတော့ဘူး။ * ဒါကြောင့် အဲဒီ​ညမှာ နွား​တင်းကုပ်​မှာ​ပဲ တည်း​လိုက်ရတယ်။ တစ်ခါ​မှ မခံစား​ဖူး​တဲ့ စူးရှ​ပြင်းထန်တဲ့ နာကျင်မှုကို ဇနီး​ဖြစ်သူ ခံစား​နေရတာ တွေ့​တဲ့အခါ ယောသပ် ဘယ်လောက် စိတ်ပူ​နေမယ်​ဆိုတာ မြင်ယောင်​ကြည့်ပါ။ ဒီလို​နေရာ​မျိုးမှာ​မှ သားဖွား​ဝေဒနာ​ကို မာရိ စပြီး ခံစား​လာ​ရတယ်။

၁၁။ (က) မာရိ​ကို အမျိုးသမီးတွေ ဘာကြောင့် ကိုယ်ချင်းစာ​နိုင်သလဲ။ (ခ) ယေရှုဟာ ဘယ်လို​နည်းတွေနဲ့ “သားဦး” ဖြစ်သလဲ။

^၁၁ မာရိ​ကို အမျိုးသမီးတွေ ကိုယ်ချင်းစာ​ကြ​မှာပါ။ အမွေ​ရထားတဲ့ အပြစ်​တရား​ကြောင့် အမျိုးသမီး​အားလုံး သားဖွား​ဝေဒနာ ခံစား​ရလိမ့်မယ်လို့ အစောပိုင်း အနှစ် ၄,၀​၀​၀ လောက်​က ယေဟောဝါ​ဘုရား ကြိုဟောခဲ့တယ်။ (က. ၃:၁၆) အဲဒီ​ဝေဒနာ​ကို မာရိ မခံစားခဲ့ရဘူး​ဆိုတဲ့ အထောက်အထား မရှိပါဘူး။ လုကာ​က မာရိ​ခံစား​ရတဲ့ ဝေဒနာ​ကို အသေးစိတ်​မဖော်​ပြ​ဘဲ “သားဦးလေးကို မွေးတယ်” လို့​ပဲ ဆိုတယ်။ (လု. ၂:၇) မှန်ပါတယ်၊ မာရိရဲ့ အနည်းဆုံး သားသမီး​ခုနစ်​ယောက်​ထဲ​က “သားဦးလေး” ဖွားမြင်​လာ​ပါပြီ။ (မာ. ၆:၃) ဒါပေမဲ့ ဒီ​သားဦးဟာ ထူးခြား​လိမ့်မယ်။ မာရိရဲ့ သားဦး​ဖြစ်​ရုံ​မ​က ယေဟောဝါ​ဘုရားရဲ့ “ဖန်ဆင်းရာ​အားလုံးမှာ သားဦး” ဖြစ်ပြီး ဘုရားသခင်ရဲ့ တစ်ပါးတည်းသော​သားလည်း ဖြစ်တယ်။—ကော. ၁:၁၅။

၁၂။ ကလေးကို မာရိ ဘယ်​နေရာမှာ သိပ်​ထား​ရသလဲ။ ခရစ်တော်​ဖွားမြင်ခြင်း ပြဇာတ်​တွေ၊ ပန်းချီကား​တွေ၊ ပြကွက် အ​ခင်း​အ​ကျင်း​တွေ​နဲ့ အဖြစ်မှန် ဘယ်လို ကွာခြား​သလဲ။

^၁၂ မာရိဟာ “ကလေးကို အနှီး​နဲ့​ပတ်​ပြီး နွား​စား​ခွက်​ထဲမှာ သိပ်​ထား​ရတယ်” ဆိုတဲ့ လူသိ​များတဲ့ အချက်ကို မှတ်တမ်းက ဆ​က်​ဖော်ပြတယ်။ (လု. ၂:၇) ဒီ​မှတ်တမ်း​ကို ကမ္ဘာတစ်ခုလုံး​က ခရစ်တော်​ဖွားမြင်ခြင်း ပြဇာတ်​တွေ၊ ပန်းချီကား​တွေ၊ ပြကွက် အ​ခင်း​အကျင်း​တွေ​နဲ့ စိတ်ကူးယဉ်​ဆန်​ဆန် ပုံဖော်​ကြတယ်။ ဒါပေမဲ့ အဖြစ်မှန်​ကို သုံးသပ်​ကြည့်ပါ။ ယောသပ်နဲ့ မာရိဟာ နွား​တင်းကုပ်​မှာ တည်းခို​နေရတာ​ဖြစ်ပြီး ကလေးကို​လည်း နွား​​ စားခွက်​ထဲမှာ သိပ်​ထား​ရတယ်။ နွား​တင်းကုပ်​လို နေရာဟာ အဲဒီ​အချိန်​က​ကော အခု​အချိန်​မှာပါ လေ​ကောင်း​လေ​သန့်​ရတဲ့​နေရာ မဟုတ်ဘူး။ သန့်ရှင်း​စင်ကြယ်​တဲ့ နေရာလည်း မဟုတ်ဘူး။ အဲဒါကြောင့် ဖြစ်နိုင်ရင် ဘယ်​မိဘ​ကမှ နွား​တင်းကုပ်​မှာ မီးဖွား​ချင်​မှာ မဟုတ်ဘူး။ မိဘ​တိုင်း​က ကိုယ့်​ကလေး​အတွက် အကောင်းဆုံး​ပဲ ဖြစ်စေချင်တယ်။ ယောသပ်နဲ့ မာရိလည်း ဘုရားသခင်ရဲ့ သားတော်​အတွက် အကောင်းတကာ့ အကောင်းဆုံး ဖြစ်စေချင်​မှာ​ပဲ။

၁၃။ (က) မာရိ​နဲ့ ယောသပ်တို့​ဟာ ရှိတာနဲ့ အကောင်းဆုံး​ဖြစ်အောင် ဘယ်လို လုပ်ခဲ့ကြသလဲ။ (ခ) ပညာရှိ မိဘတွေဟာ ယောသပ်နဲ့ မာရိ​တို့​လို ဘာကို ဦးစား​ထားပြီး သားသမီးတွေကို သွန်သင်​ပေးနိုင်​သလဲ။

^၁၃ ဒါပေမဲ့ သူတို့ဟာ အဆင်မပြေ​တဲ့ အခြေအနေတွေကို အာရုံစိုက်​မနေကြဘူး။ အဲဒီအစား သူတို့မှာ ရှိတာနဲ့ အကောင်းဆုံး​ဖြစ်အောင် လုပ်ဆောင်ခဲ့​ကြတယ်။ ဥပမာ၊ မာရိဟာ ကလေးကို နွေးထွေး​လုံခြုံ​နေ​စေဖို့ အနှီး​တွေ​နဲ့​ပတ်ရစ်​ပြီး နွား​စား​ခွက်​ထဲမှာ ဂရုတစိုက် သိပ်​ထားတာကို သတိပြုပါ။ မာရိဟာ လတ်တလော အခြေအနေ​ကြောင့် စိုးရိမ်​ကြောင့်ကြ​မနေ​ဘဲ ကလေးကို အတတ်နိုင်ဆုံး ကြည့်ရှု​စောင့်ရှောက်ခဲ့တယ်။ အရေး​အကြီးဆုံး​က ယေဟောဝါ​ဘုရားကို ချစ်တတ်​လာ​အောင် ကလေးကို ပြုစု​ပျိုးထောင်​ဖို့​ပဲ​ဆိုတာ မာရိ​နဲ့ ယောသပ် နှစ်ယောက်စလုံး သိတယ်။ (တရားဟောရာ ၆:၆-၈ ကိုဖတ်ပါ။) ဝတ်ပြု​ရေး​ကို တန်ဖိုး​မထား​တော့​တဲ့ အခု​အချိန်​မှာ​လည်း ပညာ​ရှိတဲ့ မိဘတွေဟာ သား​သမီး​တွေ​ကို ပြု​စု​ပျိုး​ထောင်​တဲ့​အခါ ယေဟောဝါ​ဘုရား​ကို ချစ်​လာ​အောင် ဦး​စား​ပေး သွန်သင်​နေ​ကြ​တ​ယ်။

၁၄၊ ၁၅။ (က) သိုးထိန်းတွေဟာ ကလေးကို ဘာကြောင့် သိပ်​တွေ့ချင်​နေကြတာ​လဲ။ (ခ) နွား​တင်းကုပ်​ထဲ​က ကလေးကို တွေ့ပြီးနောက် သိုးထိန်း​တွေ ဘာ​လုပ်ကြ​သလဲ။

^၁၄ အေးဆေး​ငြိမ်သက်​တဲ့ နေရာ​က ရုတ်တရက် ရုတ်ရုတ်သဲသဲ ဖြစ်သွားတယ်။ သိုးထိန်းတွေဟာ အဲဒီ​မိသားစု၊ အထူးသဖြင့် ကလေးကို တွေ့ချင်​စော​နဲ့ နွား​တင်းကုပ်​ထဲ အ​လော​တကြီး ပြေးဝင်​လာကြတယ်။ သူတို့​ရဲ့ မျက်​နှာ​မှာ စိတ်​လှုပ်​ရှား​မှု​နဲ့ ဝမ်း​သာ​မှု​တွေ​ကို ​တွေ့​နိုင်​ပါ​တ​ယ်။ တောင်ကုန်း​တွေ​ပေါ်မှာ သိုးကျောင်း​ရာ​ကနေ သူတို့ ရောက်​လာကြတာ ဖြစ်တယ်။ * အံ့​အား​သင့်​နေ​တဲ့ ​မိ​ဘ​တွေ​ကို သူတို့ အခု​လေး​တင် ကြုံတွေ့​ခဲ့​တဲ့ အံ့​သြ​စ​ရာ အဖြစ်​အပျက်​ကို ပြော​ပြ​ကြ​တ​ယ်။ ည​သန်း​ခေါင်​မှာ ကောင်း​ကင်​တ​မ​န်​တစ်ပါး ရုတ်​တ​ရက်​ပေါ်​လာ​ပြီး ဝန်းကျင်​တစ်ဝိုက်​မှာ ယေဟောဝါ​ရဲ့ ဘုန်း​အသရေ​ကြောင့် ထွ​န်း​လင်း​သွား​တ​ယ်။ ဘက်​သ​လီ​ဟ​င်​မြို့​မှာ ခရစ်​တော် ဒါ​မှ​မဟုတ် မေ​ရှိ​ယ ဖွား​မြင်​ပြီလို့ အဲဒီ​ကောင်း​ကင်​တမန်​က သူတို့​ကို ​ပြော​ပြတယ်။ အဲဒီ​အပြင် က​လေး​ကို အနှီး​နဲ့​ပတ်​ပြီး နွား​စား​ခွက်​ထဲ သိပ်​ထား​တာ​ကို တွေ့​ရ​လိမ့်​မ​ယ်​လို့​လည်း ပြော​တ​ယ်။ ပို​ပြီး​ထူး​ဆန်း​တာ​က ကောင်း​ကင်​တ​မ​န်​အများ​ကြီး ချက်​ချင်း ပေါ်​လာ​ပြီး ဘုရား​သခင်​ကို ချီး​မွမ်း​ကြ​တ​ယ်။—လု. ၂:၈-၁၄။

 ^၁၅ ဒါကြောင့်လည်း နှိမ့်ချမှု​ရှိတဲ့ အဲဒီ​သိုးထိန်းတွေဟာ ဘက်သလီဟင်​မြို့ထဲ အမြန်​ရောက်​လာကြတာ။ ကောင်းကင်တမန် ပြောတဲ့​အတိုင်း မွေးကင်းစ​ကလေးကို တွေ့​လိုက်တဲ့အခါ သူတို့ သိပ်​ဝမ်းသာ​ကြမှာပဲ။ အဲဒီ​သတင်းကောင်းကို ပြန်​ပြောပြ​ကြ​တော့ “ကြားတဲ့သူ​အားလုံး တ​အံ့​တ​ဩ ဖြစ်ကြတယ်” လို့​မှတ်တမ်းက ဆိုတယ်။ (လု. ၂:၁၇၊ ၁၈) အဲဒီ​အချိန်​က ဘာသာရေး​ခေါင်းဆောင်​တွေဟာ သိုးထိန်းတွေကို အထင်သေး​ကြတယ်။ ဒါပေမဲ့ ယေဟောဝါ​ဘုရားက​တော့ နှိမ့်ချ​ပြီး သစ္စာ​ရှိတဲ့ အဲဒီ​သိုးထိန်းတွေကို တန်ဖိုး​ထားတယ်​ဆိုတာ ထင်ရှား​ပါတယ်။ ဒီ​အဖြစ်အပျက်က မာရိ​အပေါ် ဘယ်လို အကျိုး​သက်ရောက်​သလဲ။

၁၆။ မာရိဟာ တကယ် ဆင်ခြင်​တွေးတော​တတ်​သူ ဖြစ်မှန်း ဘယ်လို ဖော်ပြခဲ့သလဲ။ သူ့​ယုံကြည်ခြင်းကို ခိုင်ခံ့​စေတဲ့ အဓိက အကြောင်းရင်း​က ဘာလဲ။

^၁၆ မာရိဟာ မီးဖွား​ပြီး​ခါ​စ​ဖြစ်လို့ နွမ်း​နယ်​နေမှာ​ပဲ။ ဒါပေမဲ့ သူတို့​ပြောသမျှ​ကို အာရုံစိုက် နားထောင်​ခဲ့​တ​ယ်။ ပြီးတော့ “မာရိ​က အဲဒီ​အကြောင်းကို စိတ်ထဲ မှတ်ထား​ပြီး ဘာကို ဆိုလိုတယ်​ဆိုတာ ဆင်ခြင်​တွေးတော” တ​ယ်။ (လု. ၂:၁၉) ဒီ​အမျိုးသမီး​ဟာ တကယ့်ကို ဆင်ခြင်​တွေးတော​တတ်သူပါ။ ကောင်းကင်တမန်​ဆီကလာ​တဲ့ သတင်း​စကားဟာ သိပ်​အရေးကြီးတယ်ဆိုတာ သူ​သိတယ်။ သူ့ရဲ့​သားဟာ ဘယ်သူဘယ်ဝါ​ဖြစ်ပြီး ဘယ်လောက် အရေး​ပါတယ်​ဆိုတာ ယေဟောဝါ​ဘုရားက သူ့ကို သိစေချင်တယ်။ ဒါကြောင့် နားထောင်​ရုံ​ထက်မက နောက်ပိုင်းမှာ ထပ်ခါထပ်ခါ ပြန် ဆင်ခြင်​တွေးတော​နိုင်ဖို့ ကြားသမျှကို မာရိ ကောင်းကောင်း မှတ်သား​ထားတယ်။ ဒါက မာရိရဲ့ ဘဝ​တစ်လျှောက်လုံးမှာ ယုံကြည်ခြင်း ခိုင်ခံ့​စေတဲ့ အဓိက​အကြောင်းရင်း​တစ်ခု​ပဲ။—ဟီဘရူး ၁၁:၁ ကိုဖတ်ပါ။

၁၇။ အရေးကြီးတဲ့ အမှန်တရား​တွေ​နဲ့ ပတ်သက်ပြီး မာရိရဲ့ စံနမူနာကို ဘယ်လို အတုယူ​နိုင်သလဲ။

^၁၇ မာရိရဲ့ စံနမူနာကို သင် အတုယူ​မလား။ ယေဟောဝါ​ဘုရားဟာ အရေးကြီးတဲ့ အမှန်တရားတွေကို ကျမ်းစာထဲမှာ ဖော်ပြ​ထားတယ်။ ဒါပေမဲ့ အဲဒီ​အမှန်တရားတွေကို အာရုံမစိုက်​ဘူးဆိုရင် ဘာ​အကျိုး​မှ ရှိ​မှာ မဟုတ်ဘူး။ ဒါကြောင့် ကျမ်းစာကို လက်ရာမြောက်​တဲ့ စာအုပ်​တစ်အုပ်​အနေနဲ့ မဟုတ်ဘဲ ဘုရားသခင်ရဲ့ နှုတ်ထွက်​စကား​အဖြစ် လက်ခံ​ပြီး မှန်မှန်​ဖတ်ရှု​ရမယ်။ (၂ တိ. ၃:၁၆) အဲဒီနောက် မာရိ​လို​ပဲ ဘုရားသခင်နဲ့ ပတ်သက်တဲ့ အမှန်တရားတွေကို သေချာ​မှတ်သား​ပြီး ဆင်ခြင်​တွေးတောဖို့ လိုတယ်။ ကျမ်း​စာ​မှာ ဖတ်​ရှု​ရ​တဲ့​အရာတွေ​ကို တွေး​တော​ဆင်​ခြင်​မ​ယ်၊ ယေဟောဝါ​ဘုရား​ရဲ့ သွန်သင်​ချက်​ကို ဘယ်​လို ပို​ပြီး​အပြည့်​အဝ ကျင့်​သုံး​နိုင်​မလဲ​ဆို​တာ လေးလေး​နက်​နက် စဉ်း​စား​မ​ယ်​ဆို​ရင် ယုံ​ကြည်​ခြင်း တိုး​များ​လာ​ပါ​လိမ့်​မ​ယ်။

၁၈။ (က) ယေရှု ငယ်ငယ်တုန်းက မာရိ​နဲ့ ယောသပ်တို့​ဟာ မောရှေ​ပညတ်ကို ဘယ်လို လိုက်နာ​ခဲ့ကြသလဲ။ (ခ) မာရိ​နဲ့ ယောသပ်​တို့ရဲ့ ပူဇော်သက္ကာ​က သူတို့ရဲ့ စီးပွားရေး အခြေအနေ​အကြောင်း ဘာ​ဖော်ပြသလဲ။

^၁၈ က​လေး ရှစ်​ရက်​ပြည့်​တဲ့​နေ့​မှာ မာ​ရိ​နဲ့​ယော​သပ်​ဟာ မော​ရှေ​ရဲ့ ပညတ်​အတိုင်း  ကလေး​ကို အရေ​ဖျား​ဖြတ်​ပေး​ပြီး မှာ​ထား​တဲ့​အတိုင်း ယေရှု​လို့ နာ​မည်​ပေး​ခဲ့​ကြ​တယ်။​ (လု. ၁:၃၁) အဲဒီနောက် ရက် ၄၀ ပြည့်တဲ့​အခါ ဘက်သလီဟင်​မြို့ကနေ ၆ မိုင်​လောက် ဝေးတဲ့ ဗိမာန်တော်​ဆီ​သွားကြတယ်။ ပြီးတော့ ပညတ်တရား​က ဆင်းရဲသား​တွေအတွက် ခွင့်ပြု​ထားတဲ့ ခို​နှစ်ကောင် ဒါမှမဟုတ် ချိုး​နှစ်ကောင်​ကို စင်ကြယ်​ရာ ပူဇော်သက္ကာ​အဖြစ် ဆက်သ​ခဲ့​ကြတယ်။ တတ်​နိုင်တဲ့ တခြား​မိဘတွေ​လို သိုးထီး​တစ်ကောင်​နဲ့ ချိုးငှက်​တစ်ကောင်​ကို မ​ပူဇော်​နိုင်​လို့ ရှက်​နေမယ်​ဆိုရင်တောင် ပညတ်တရားကို အတတ်နိုင်ဆုံး လိုက်နာကြတယ်။ အဲဒီမှာ​ရှိနေတုန်း သူတို့ တကယ်​အားရှိ​သွားတယ်။—လု. ၂:၂၁-၂၄။

၁၉။ (က) မာရိ တန်ဖိုး​ထားရတဲ့ နောက်ထပ် ဘယ်​စကားတွေကို ရှိမောင် ပြောခဲ့​သလဲ။ (ခ) အန္န​ဟာ ကလေးငယ်​ယေရှုကို တွေ့​တဲ့အခါ ဘယ်လို တုံ့ပြန်​ခဲ့သလဲ။

^၁၉ ရှိမောင်​လို့​ခေါ်တဲ့ အသက်ကြီးသူ​တစ်ယောက် သူတို့ဆီ​လာပြီး မာရိ တန်ဖိုး​ထားတဲ့ နောက်ထပ်​စကားတွေကို ပြောဆို​ခဲ့​တ​ယ်။ ရှိမောင် မသေဆုံးခင် မေရှိယကို မြင်ရ​လိမ့်မယ်​ဆိုတဲ့ ကတိ​ကို ရထားတယ်။ ယေဟောဝါ​ဘုရားကလည်း သန့်ရှင်းသော စွမ်းအားတော်​အားဖြင့် ကလေးငယ်​ယေရှုဟာ ကြို​ဟောထားတဲ့ ကယ်တင်ရှင်​ဖြစ်တယ်လို့ သူ့ကို အသိ​ပေးခဲ့တယ်။ အဲဒီအပြင် တစ်နေ့ကျရင် မာရိ​ခံစား​ရမယ့် ဝေဒနာ​အကြောင်း ရှိမောင် သတိ​ပေးတယ်။ မာရိဟာ ဓား​ရှည်​နဲ့ အ​ခွင်း​ခံရ​သလို ဖြစ်​ရလိမ့်မယ် လို့ သူပြောတယ်။ (လု. ၂:၂၅-၃၅) အနှစ်​သုံး​ဆယ်​ကျော် ကြာပြီးနောက် မာရိ​အတွက် ခက်ခဲတဲ့​အချိန် ရောက်လာတဲ့​အခါ အဲဒီ​စကားတွေက သူ့ကို ခံနိုင်ရည်ရှိစေခဲ့​မှာပါ။ အဲဒီနောက် အန္န​ဆိုတဲ့ ပရောဖက်မ​တစ်ယောက်က​လည်း ကလေးငယ်​ယေရှုကို မြင်တဲ့အခါ ဂျေရုဆလင်​မြို့ လွတ်မြောက်​ရမယ့် အချိန်နဲ့​ပတ်သက်ပြီး  စောင့်မျှော်နေ​သူ​အားလုံးကို ယေရှု​အကြောင်း ပြော​ပြတယ်။—လုကာ ၂:၃၆-၃၈ ကိုဖတ်ပါ။

၂၀။ ကလေးငယ်​ယေရှုကို ဂျေရုဆလင်​မြို့​က ဗိမာန်တော်​ဆီ ခေါ်သွားတာဟာ ဘာကြောင့် တကယ်​ကောင်းတဲ့ ဆုံးဖြတ်ချက် ဖြစ်သလဲ။

^၂၀ ယောသပ်နဲ့ မာရိ​တို့ဟာ ကလေးကို ဂျေရုဆလင်​မြို့မှာ​ရှိတဲ့ ယေဟောဝါ​ဘုရားရဲ့ ဗိမာန်တော်ကို ခေါ်လာ​ခဲ့​တာ​ဟာ တကယ်​ကောင်းတဲ့ ဆုံးဖြတ်ချက်​ပါပဲ။ ဒီလို​နည်းနဲ့ သူတို့ဟာ ယေဟောဝါ​ဘုရားရဲ့ ဗိမာန်တော်ကို တစ်သက်တာလုံး သစ္စာ​ရှိသွား​ဖို့ ကလေးကို လေ့ကျင့်​ပေးခဲ့​ကြတယ်။ အဲဒီမှာ​ရှိနေတုန်း ယေဟောဝါ​ဘုရားကို သူတို့​အတတ်နိုင်ဆုံး ပေးဆက်​ကြ​ပြီး သွန်သင်ချက်တွေ၊ အားပေး​စကားတွေ ကြားခဲ့​ရတယ်။ ဗိမာန်တော်​ကနေ ပြန်လာတဲ့​နေ့မှာ မာရိရဲ့ ယုံကြည်ခြင်း ပိုပြီး ခိုင်ခံ့​လာ​မှာ​ပဲ။ အဲဒီအပြင် သူ့ရဲ့ နှလုံး​ထဲမှာ ဆင်ခြင်​တွေးတော​စ​ရာ၊ တခြား​သူတွေကို ပြောပြ​စ​ရာ အရေးကြီးတဲ့​စကားတွေ ပြည့်နေမှာ သေချာတယ်။

၂၁။ မာရိ​လို ယုံကြည်ခြင်း ပို​ခိုင်ခံ့​လာဖို့ ဘယ်လို လုပ်နိုင်မလဲ။

^၂၁ အဲဒီ​ပုံသက်သေကို အတုယူ​တဲ့ ဒီနေ့​ခေတ် မိဘတွေကို တွေ့ရတာ အားရှိစရာ​ပါပဲ။ ယေဟောဝါ​သက်သေ မိဘတွေဟာ သားသမီးတွေကို အစည်းအဝေး​တက်ဖို့ မှန်မှန်​ခေါ်သွား​ကြတယ်။ အဲဒီလိုလုပ်တဲ့ မိဘတွေဟာ ယုံကြည်သူချင်းတွေကို အတတ်နိုင်ဆုံး အားပေး​တည်ဆောက်​ကြတယ်။ သူတို့ဟာ အစည်းအဝေးက ပြန်လာတဲ့​အခါ ယုံကြည်ခြင်း ပို​ခိုင်ခံ့​လာတယ်၊ ပို​ပျော်ရွှင်​လာတယ်၊ တခြား​သူတွေကို ပြန်​ပြောပြ​စရာတွေ အများကြီး ရလာ​ကြတယ်။ သူတို့​လို လူတွေနဲ့ တွေ့ဆုံ​ရတာ တကယ် ကြည်နူးစရာ​ပါပဲ။ ဒီလို​နည်းနဲ့ ကျွန်တော်တို့လည်း မာရိ​လို ယုံကြည်ခြင်း ပို​ခိုင်ခံ့​လာပါလိမ့်မယ်။