ကာနတ်မြို့က ရှေးခေတ် အီဂျစ်လူမျိုးတို့ရဲ့ အာမုန်နတ်ဘုရား ဗိမာန်အဝင်ဝနားမှာ ရှစ်မီတာ (၂၆ ပေ) မြင့်တဲ့ အရုပ်စာ ရုပ်ကြွပုံ ရှိတယ်။ ပညာရှင်တွေအဆိုအရ ယုဒပြည်နဲ့ မြောက်ပိုင်း အစ္စရေးနိုင်ငံ အပါအဝင် အီဂျစ်အရှေ့မြောက်ပိုင်း နယ်မြေတွေကို ဖာရောဘုရင် ရှိရှက် အောင်ပွဲခံတဲ့အကြောင်းကို သရုပ်ဖော်ထားတယ်။

 ရုပ်ကြွပုံမှာ အာမုန်က သုံ့ပန်း ၁၅၀ ကျော်ကို ရှိရှက် ဒါမှမဟုတ် ရှိရှုန့်ဆီ ဆက်သပါတယ်။ a သုံ့ပန်းတိုင်းက အောင်ပွဲခံတဲ့ မြို့တွေ၊ ပြည်သူတွေကို ကိုယ်စားပြုပါတယ်။ မြို့နာမည်တွေကို သုံ့ပန်းခန္ဓာကိုယ်မှာ ဘဲဥပုံတွေ ထွင်းထားပါတယ်။ နာမည်တွေဟာ ရှင်းလင်းပီသနေဆဲဖြစ်ကာ တချို့နာမည်တွေကို ကျမ်းစာဖတ်သူတွေ အကျွမ်းတဝင်ရှိကြတယ်။ ဗက်ရှန်၊ ဂိဗောင်၊ မေဂိဒေါ၊ ရှုနင်မြို့တို့ ပါဝင်တယ်။

 ယုဒပြည်ကို ကျူးကျော်တိုက်ခိုက်မှုအကြောင်း ကျမ်းစာမှာ ပါတယ်။ (၁ ဘုရင်များ ၁၄:၂၅၊ ၂၆) ရှိရှက်ရဲ့ ကျူးကျော်မှုအကြောင်း အသေးစိတ်ကို ကျမ်းစာမှာ ဖော်ပြတယ်။ “ရောဗောင်နန်းစံ ငါးနှစ်မှာ အီဂျစ်ဘုရင် ရှိရှက်က ဂျေရုဆလင်မြို့ကို တိုက်ဖို့ ချီတက်လာတယ်။ ရှိရှက်မင်းဆီမှာ မြင်းရထား ၁,၂၀၀၊ မြင်းစီးသူရဲ ၆၀,၀၀၀ ရှိတယ်။ များပြားလှတဲ့ ... စစ်သည်တွေလည်း အီဂျစ်ပြည်ကနေ သူနဲ့အတူ လိုက်လာတယ်။ သူက ယုဒပြည်ရဲ့ ခံတပ်မြို့တွေကို သိမ်းပိုက်ပြီး နောက်ဆုံးမှာ ဂျေရုဆလင်မြို့ကို ရောက်လာတယ်။”—၂ ရာဇဝင်ချုပ် ၁၂:၂-၄။

 ကာနတ်ရုပ်ကြွဟာ အစ္စရေးနယ်ကို ရှိရှက်ကျူးကျော်တိုက်ခိုက်မှုအကြောင်း တစ်ခုတည်းသော ရှေးဟောင်းသုတေသန အထောက်အထား မဟုတ်ပါဘူး။ ကျမ်းစာမှတ်တမ်းပါ မေဂိဒေါမြို့မှာ တွေ့ရတဲ့ ကျောက်တိုင်အပိုင်းအစမှာလည်း “ရှိရှုန့်” နာမည် တွေ့ရတယ်။

 ယုဒပြည်ကို ရှိရှက် သိမ်းပိုက်မှုအကြောင်း ကျမ်းစာရဲ့ တိကျမှန်ကန်တဲ့ မှတ်တမ်းဟာ ကျမ်းရေးသူတွေရဲ့ တည်ကြည်ဖြောင့်မတ်မှု စံနမူနာတစ်ရပ်ပါပဲ။ မိမိတို့နိုင်ငံရဲ့ အောင်ပွဲတွေနဲ့ ကျရှုံးမှုတွေကို မှန်မှန်ကန်ကန် မှတ်တမ်းတင်ခဲ့ကြတယ်။ ဒီလိုရိုးသားမှုကို ရှေးခေတ် တခြားစာရေးသူတွေမှာ တွေ့ရလေ့မရှိပါဘူး။