ဆွစ်ဇလန်မှာပြုလုပ်တဲ့ လေ့လာမှုတစ်ခုအရ အသက် ၆၀ ကျော်တဲ့ သူတွေဟာ တခြားနေ့မှာထက် မွေးနေ့မှာသေဆုံးနိုင်ခြေ ၁၄ ရာခိုင်နှုန်း ပိုများနေတယ်။ မွေးနေ့မှာ အသက်အန္တရာယ်ရှိလောက်တဲ့ နှလုံးဖောက်မှုက ပုံမှန်ထက် ၁၈ ရာခိုင်နှုန်းပိုများတယ်။ အမျိုးသမီးတွေ လေဖြတ်နိုင်ခြေ ပုံမှန်ထက် ၂၁ ရာခိုင်နှုန်းပိုများပြီး အမျိုးသားတွေ ကိုယ့်ကိုယ်ကိုယ် အဆုံးစီရင်နိုင်ခြေ ၃၅ ရာခိုင်နှုန်းပိုများတယ်။ ဖိစီးမှုနဲ့ အရက်ယမကာသောက်သုံးခြင်းက ကိုယ့်ကိုယ်ကိုယ် အဆုံးစီရင်မှုနဲ့ မတော်တဆဖြစ်မှုတွေကို တိုးပွားစေတဲ့အရာတွေဖြစ်တယ်လို့ ပညာရှင်တွေ ယူမှတ်ကြတယ်။ တချို့ပညာရှင်တွေက ဒီတွေ့ ရှိမှုကို လက်မခံကြဘူး။ မွေးဖွားတဲ့နေ့နဲ့ သေဆုံးတဲ့နေ့ တူနေရတာက မှတ်တမ်းတင်တဲ့အခါ ရေးမှားသွားတာဖြစ်နိုင်တယ်လို့ ယူမှတ်ကြတယ်။

ကိုယ်ရေးအကျဉ်းနဲ့အတူ ဓာတ်ပုံတွဲတင်တဲ့အခါ အလုပ်အင်တာဗျူးဖြေရတဲ့သူ အများစုက ရုပ်ဖြောင့်တဲ့အမျိုးသားတွေဖြစ်ပြီး ရုပ်ချောတဲ့အမျိုးသမီး နည်းနေတာကို တွေ့ရတယ်။ ဘာကြောင့်လဲဆိုတော့ အင်တာဗျူးဖြေခွင့်ပေးသင့်မသင့်ဆုံးဖြတ်တဲ့ ဝန်ထမ်းရေးရာဌာနမှာ အများစုက အမျိုးသမီးတွေဖြစ်တဲ့အတွက်ကြောင့် ဖြစ်နိုင်တယ်လို့ သုတေသီတွေ ခန့်မှန်းကြတယ်။ ဝမ်းနည်းစရာကောင်းတဲ့ အမှန်တရားကတော့ အဲဒီအမျိုးသမီးတွေက ရုပ်ချောတဲ့အမျိုးသမီးတွေကို မနာလိုတဲ့အတွက်ကြောင့်လို့ မဂ္ဂဇင်းတစ်စောင် (The Economist) က ရှင်းပြတယ်။

အကြမ်းဖက်မှုနဲ့ စစ်ဆန့်ကျင်ရေးဝါဒီတွေဖြစ်ကြတဲ့ အသက် ၈၂ နှစ်အရွယ် ခရစ်ယာန်သီလရှင်တစ်ဦးနဲ့ အသက် ၆၃ နှစ် နဲ့ ၅၇ နှစ် အမျိုးသားနှစ်ဦးဟာ မကြာသေးခင်က တက်နက်စီပြည်နယ်၊ အောခ် ရစ်ဂျ် မြို့မှာရှိတဲ့ နျူးကလီး ယားပစ္စည်း တန် ၁၀၀ သိုလှောင်ထား တဲ့ အဆောက်အအုံတွေရှိတဲ့နေရာကို ဖောက်ဝင်ပြီး အဆောက်အအုံတစ်ခုရဲ့ နံရံမှာ စစ်ဆန့်ကျင်ရေးဆောင်ပုဒ်တွေ ရေးသားခဲ့ကြတယ်။ “ကမ္ဘာ့လုံခြုံရေးအတင်းကျပ်ဆုံး နေရာတစ်ခုလို့ ယူမှတ်ထားတဲ့” နေရာမှာ လုံခြုံရေးလစ်ဟင်းနေမှုဟာ “ကြောက်ခမန်းလိလိ ဒုက္ခရောက်မယ့်ကိန်းပဲ” လို့ စွမ်းအင်ဝန်ကြီးဌာနရဲ့ အတွင်းရေးမှူး စတီဗင်ချူးက ပြောတယ်။

နိုင်ငံရဲ့ ဗဟိုတရားရုံးက ဆေးလိပ်ကုမ္ပဏီတွေကို စီးကရက်ဗူးတွေမှာ အရောင်တွေ၊ အမှတ်တံဆိပ်တွေဖြုတ်ပြီး စီးကရက်ဗူးအားလုံးက လူအများစုမကြိုက်တဲ့ ညိုမှိုင်းတဲ့အရောင်ဖြစ်ပြီး ဆေးလိပ်သောက်ခြင်းရဲ့ဆိုးကျိုးကို ဖော်ပြထားတဲ့ပုံ ဖြစ်ရမယ်လို့ အမိန့်ထုတ်ပြန်တယ်။