ယောသပ်ဟာ မွန်းကျပ်အောင်ပူတဲ့နေရာမှာ အလုပ်လုပ်ရလို့ ချွေးတစ်ပြိုက်ပြိုက်ကျရင်း မှောင်မည်းနေတဲ့ စင်္ကြံလမ်းအတိုင်း လျှောက်လာနေတယ်။ အီဂျစ်ပြည်က အရမ်းပူတာမို့ အကျဉ်းထောင်ဟာ မီးကင်ထားသလိုပဲ။ ဒီအကျဉ်းထောင်ဟာ သူ့ကမ္ဘာဖြစ်နေတော့ နံရံပေါ်က အုတ်တွေ၊ အက်ကြောင်းတွေကအစ ယောသပ် အကုန်သိထားတယ်။ ဒီမှာ သူ့ကို လေးစားကြပေမဲ့ သူကိုယ်နှိုက်ကလည်း အကျဉ်းသားပါပဲ။

ယောသပ်ဟာ ဟေဗြုန်တောင်ကုန်းမှာ အဖေ့ရဲ့သိုးတွေ ထိန်းကျောင်းခဲ့ရတဲ့ဘဝကို ခဏခဏ သတိရနေမှာ။ သူ့ကို အဖေဖြစ်သူယာကုပ်က အိမ်ကနေ မိုင်နဲ့ချီဝေးတဲ့နေရာကို သွားခိုင်းတုန်းက အသက် ၁၇ နှစ်လောက်ပဲ ရှိသေးတယ်။ အခုတော့ အဲဒီလိုလွတ်လပ်တဲ့ဘဝမျိုးက စိတ်ကူးထဲမှာပဲ ရှိတော့ပါလား။ ယောသပ်ကို မနာလိုမုန်းတီးတဲ့ အကိုတွေဟာ သူ့ကို သတ်ချင်တဲ့အထိဖြစ်ခဲ့ပေမဲ့ နောက်ဆုံး ကျွန်အဖြစ် ရောင်းစားလိုက်ကြတယ်။ ဒါနဲ့ အီဂျစ်ပြည်ကို သူရောက်သွားရှာတယ်။ ဦးဆုံး၊ အီဂျစ်နန်းတွင်းအရာရှိ ပေါတိဖာအိမ်မှာ ကျွန်ခံရတယ်။ သခင်ရဲ့ယုံကြည်ကိုးစားမှုကို ရရှိခဲ့ရတဲ့အထိဖြစ်ပြီးနောက်မှ ပေါတိဖာရဲ့မိန်းမက သားမယားပြုကျင့်ဖို့ ကြိုးစားပါတယ်လို့ စွပ်စွဲတဲ့အတွက် ထောင်ကျခဲ့ရတယ်။ *—ကမ္ဘာဦး အခန်းကြီး ၃၇၊ ၃၉။

အခု ယောသပ်ဟာ ၂၈ နှစ်ရှိနေပါပြီ။ ဒီမတိုင်ခင် ၁၀ နှစ်လောက်မှာ ကျွန်ဘဝ၊ အကျဉ်းသားဘဝတွေကို ဖြတ်သန်းခဲ့ရတယ်။ သူ့ရဲ့ဘဝက မျှော်မှန်းထားသလို ဖြစ်မလာပါလား။ လွတ်လမ်းကော ရှိပါဦးမလား။ ချစ်ရတဲ့အဖေအိုနဲ့ ညီလေးဗင်ယာမိန်ကို ပြန်တွေ့ခွင့် ရနိုင်ဦးမလား။ ဒီအကျဉ်းထောင်မှာ ဘယ်လောက်ကြာကြာ နေရဦးမှာလဲ။

သင်လည်း ယောသပ်လို ခံစားဖူးသလား။ ဘဝဟာ ကိုယ်မျှော်မှန်းထားသလို ဖြစ်မလာတဲ့အခါတွေ ရှိတတ်တယ်။ ဆင်းရဲဒုက္ခတွေဟာ အဆက်မပြတ်ဖြစ်နေပြီး သက်သာရာလမ်းလည်းမမြင်၊ ဒီထက်ပို တောင့်မခံနိုင်တော့ဘူးလို့လည်း ခံစားရနိုင်တယ်။ အဲဒီလိုဆိုရင် ယောသပ်ရဲ့ယုံကြည်ခြင်းကနေ ဘာသင်ယူနိုင်မလဲ။

ယေဟောဝါဘုရားက သူ့ကို ဘယ်တော့မှ စွန့်ပစ်မှာမဟုတ်ဘူးလို့ ယောသပ် သိထားလို့ ခံနိုင်ရည်ရှိနေတယ်။ အီဂျစ်ပြည်မှာ ထောင်ကျနေပေမဲ့ ယောသပ် ကောင်းချီးရတယ်။ “ထာဝရဘုရားသည် သူ့ဘက်၌ရှိ၍ ကယ်မသနားတော်မူသဖြင့် ထောင်မှူးထံ မျက်နှာရစေတော်မူ၏” လို့ကျမ်းစာက ဆိုတယ်။ (ကမ္ဘာဦး ၃၉:၂၁-၂၃) ထောင်ထဲမှာ ယောသပ် အလုပ်ကြိုးစားလို့ သူ့ကို ဘုရားသခင် ကောင်းချီးပေးတယ်။ ဘုရားသခင်က သူ့ကို အမြဲတမ်း ဖေးမပေးနေတာကို ယောသပ်သိထားတဲ့အတွက် စိတ်သက်သာရာရခဲ့တယ်။

ယေဟောဝါဘုရားက သူ့ကို ထောင်ထဲမှာပဲ တစ်သက်လုံးနေခိုင်းမှာလား။ ယောသပ် မသိခဲ့ပါဘူး။ ဒါကြောင့် ဒီကိစ္စကို ရင်ဖွင့်ဆုတောင်းခဲ့မှာ ကျိန်းသေတယ်။ ဆုတောင်းချက်တွေကို လုံးဝမထင်မှတ်တဲ့နည်းနဲ့ ဘုရားသခင် အဖြေပေးတတ်တယ်။ တစ်နေ့ကျတော့ ဖာရောမင်းရဲ့ နန်းတွင်းအရာရှိ နှစ်ယောက် ထောင်ထဲရောက်လာတော့ အကျဉ်းသားတွေ အံ့ဩသွားကြတယ်။ တစ်ယောက်က ဖာရောမင်းရဲ့ ဖလားတော်ဝန်၊ နောက်တစ်ယောက်က စားတော်ဝန်ဖြစ်တယ်။—ကမ္ဘာဦး ၄၀:၁-၃။

ထောင်မှူးက အဲဒီအရာရှိနှစ်ယောက်ကို ကြည့်ရှုပြုစုဖို့ ယောသပ်ကို တာဝန်ပေးလိုက်တယ်။ * တစ်ညမှာ သူတို့နှစ်ယောက်စလုံး ပဟေဠိဆန်ဆန်အိပ်မက် မက်ခဲ့ကြတယ်။ နောက်နေ့မနက် သူတို့ဆီ  ယောသပ် ရောက်သွားတဲ့အခါ တစ်ခုခုဖြစ်နေမှန်း သိလိုက်တယ်။ ဒါနဲ့ ယောသပ်က “သင်တို့သည် ယနေ့ အဘယ်ကြောင့် မျက်နှာညှိုးငယ်သနည်း” လို့မေးလိုက်တယ်။ (ကမ္ဘာဦး ၄၀:၃-၇) သူ့ရဲ့ ကြင်နာမှုကြောင့် အရာရှိနှစ်ယောက်က သူတို့ရဲ့အိပ်မက်ကို ဖွင့်ပြောလာတယ်။ သူ့ဘဝအတွက် အလှည့်အပြောင်းတစ်ခုကြုံရတော့မယ်ဆိုတာ အဲဒီအချိန်က ယောသပ်ခမျာ မသိရှာဘူး။ တကယ်လို့သာ အရာရှိနှစ်ယောက်ကို ယောသပ် ကြင်နာမှုမပြခဲ့ဘူးဆိုရင် သူတို့ ရင်ဖွင့်ပါ့မလား။ ယောသပ်ရဲ့ လုပ်ရပ်က ကိုယ့်ကိုယ်ကိုယ် ဒီလိုမေးဖို့ လှုံ့ဆော်ပေးတယ်– “လူတွေကို စိတ်ဝင်စားခြင်းအားဖြင့် ဘုရားကို ယုံကြည်ကြောင်း ငါ တင်ပြနေသလား။”

ဒီအရာရှိနှစ်ယောက်က သူတို့ရဲ့ပဟေဠိဆန်ဆန် အိပ်မက်အနက်ကို ရှင်းပြမယ့်သူမရှိတာမို့ စိတ်အနှောင့်အယှက်ဖြစ်နေရတယ်လို့ ယောသပ်ကို ပြောပြတယ်။ အီဂျစ်လူတွေက အိပ်မက်တွေကို အလေးအနက်ထားတဲ့အပြင် အနက်ဖွင့်နိုင်တဲ့သူကိုလည်း အလွန်အမင်း ယုံကြည်ကိုးစားကြတယ်။ သူတို့အိပ်မက်တွေဟာ ယေဟောဝါဘုရားဆီကလာမှန်း အရာရှိနှစ်ယောက်မသိပေမဲ့ ယောသပ်ကတော့ သိလိုက်ပါပြီ။ ဒါနဲ့ ယောသပ်က “အိပ်မက်၏အနက် ဖွင့်ပြနိုင်စွမ်းကို ထာဝရဘုရားသာ ပေးပါသည်။ သင်တို့၏အိပ်မက်များကို ကျွန်တော်အား ပြောပြပါ” လို့ ဆိုတယ်။ (ကမ္ဘာဦး ၄၀:၈၊ ခမ) ဒီနေ့ခေတ် စိတ်ရင်းမှန်နဲ့ ကျမ်းစာသင်နေသူအားလုံးအတွက် ယောသပ်ရဲ့ စကားတွေက အရေးကြီးနေတုန်းပဲ။ ဘာသာတရားကိုင်းရှိုင်းသူတိုင်းက အဲဒီလို နှိမ့်ချမှုပြရင် ဘယ်လောက်ကောင်းမလဲ။ ကျမ်းစကားတွေကို အမှန်အတိုင်း နားလည်နိုင်ဖို့ ဂုဏ်မောက်နေတဲ့ လူ့အတွေးအခေါ်တွေကို ငြင်းပယ်ပြီး ဘုရားသခင်ကို မှီခိုအားထားဖို့ လိုတယ်။—၁ သက်သာလောနိတ် ၂:၁၃; ယာကုပ် ၄:၆။

ဖလားတော်ဝန်က သူ့အိပ်မက်ကို အရင်ဆုံး ပြောပြတယ်။ စပျစ်သီးတွေသီးနေတဲ့ အခက် ၃ ခက်ရှိတဲ့ စပျစ်ပင်တစ်ပင်အကြောင်း၊ စပျစ်သီးတွေ မှည့်လာတဲ့အခါ ဖာရောမင်းရဲ့ ဖလားထဲကို သူ စပျစ်ရည်ညှစ်ထည့်ပေးတဲ့အကြောင်း ပြောပြတယ်။ ဖလားတော်ဝန်ရဲ့ အိပ်မက်ကို ယေဟောဝါဘုရားရဲ့ အကူအညီနဲ့ ယောသပ် ချက်ချင်း နားလည်သွားတယ်။ ဒါနဲ့ ယောသပ်က အခက် ၃ ခက်ဆိုတာ ၃ ရက်ဖြစ်ပြီး အဲဒီ ၃ ရက်အတွင်းမှာ ဖလားတော်ဝန်ကို ဖာရောမင်း ရာထူးပြန်ပေးမယ်လို့ ရှင်းပြလိုက်တယ်။ အဲဒီအခါ ဖလားတော်ဝန် စိတ်သက်သာသွားတယ်။ ဒါနဲ့ ယောသပ်က “သင် ပြန်၍ ကောင်းစားလာသောအခါ ကျွန်တော်ကို မမေ့ပါနှင့်။ ဘုရင့်ထံ ကျွန်တော်အတွက် သံတော်ဦးတင်” ပေးပါလို့ ဖလားတော်ဝန်ကို မေတ္တာရပ်ခံခဲ့တယ်။ သူဟာ ရောင်းစားခံရပြီး မတရားစွပ်စွဲချက်နဲ့ ထောင်ထဲရောက်နေရတာပါလို့ ယောသပ် ရှင်းပြခဲ့တယ်။—ကမ္ဘာဦး ၄၀:၉-၁၅၊ ခမ။

ဖလားတော်ဝန်ရဲ့ အိပ်မက်အဓိပ္ပာယ်ကောင်းတာကို စားတော်ဝန် သိတဲ့အခါ သူ့အိပ်မက်ကိုလည်း ရှင်းပြပါလို့ ယောသပ်ကို ပြောတယ်။ သူ့အိပ်မက်ကတော့ မုန့်တွေပါတဲ့ တောင်း ၃ လုံးကို သူရွက်ထားတဲ့အကြောင်း၊ ငှက်တွေက တောင်းတစ်တောင်းထဲက မုန့်တွေကို စားပစ်လိုက်တဲ့အကြောင်း ပြောပြတယ်။ ဒီအိပ်မက်ရဲ့အဓိပ္ပာယ်ကိုလည်း ယောသပ် သိထားတယ်။ ဒါပေမဲ့ စားတော်ဝန်ရဲ့ အိပ်မက်အဓိပ္ပာယ်ကတော့ မကောင်းရှာဘူး။ “အိပ်မက်၏အနက်ကား ဤသို့တည်း။ တောင်းသုံးလုံးသည် သုံးရက်ကိုဆိုလိုသည်။ သုံးရက်အတွင်း ဘုရင်သည် သင့်အား ထောင်ထဲမှလွှတ်၍ သင်၏ဦးခေါင်းကို ဖြတ်ပစ်စေလိမ့်မည်။ ထိုနောက် သင်၏ကိုယ်ခန္ဓာကို တိုင်ပေါ်မှာဆွဲထား၍ ငှက်တို့သည် သင်၏အသားကို စားကြလိမ့်မည်” လို့ယောသပ် ပြောပြတယ်။ (ကမ္ဘာဦး ၄၀:၁၆-၁၉၊ ခမ) သတင်းကောင်းရော၊ တရားစီရင်မယ့်သတင်းကိုပါ ကြေညာတဲ့ ဘုရားသခင်ရဲ့သစ္စာရှိကျေးကျွန်တွေလိုပဲ ယောသပ်က ဘုရားသခင်ပြောစေချင်တဲ့ စကားတွေကို ရဲရဲဝံ့ဝံ့ပြောခဲ့တယ်။—ဟေရှာယ ၆၁:၂။

 သုံးရက်ကြာတော့ ယောသပ် ပြောသလို တစ်ခုမကျန် ဖြစ်လာတယ်။ ဖာရောမင်းက သူ့မွေးနေ့ပွဲ ကျင်းပချိန်မှာ ဖလားတော်ဝန်နဲ့ စားတော်ဝန်တို့ကို စီရင်ချက်ချခဲ့တယ်။ မွေးနေ့ပွဲကို ဘုရားသခင့်လူတွေ မကျင်းပကြဘူး။ ယောသပ်ပြောသလိုပဲ စားတော်ဝန်က ကွပ်မျက်ခံလိုက်ရပြီး ဖလားတော်ဝန်ကတော့ ရာထူး ပြန်ရသွားတယ်။ ဝမ်းနည်းစရာက ဖလားတော်ဝန်ဟာ ယောသပ်ကို လုံးဝသတိမရတော့ဘူး။—ကမ္ဘာဦး ၄၀:၂၀-၂၃။

ဒီလိုနဲ့ နှစ်နှစ် ကြာသွားတယ်။ (ကမ္ဘာဦး ၄၁:၁) ယောသပ်ခမျာ ဘယ်လောက်တောင် စိတ်အားငယ်လိုက်မလဲ။ စားတော်ဝန်နဲ့ ဖလားတော်ဝန်တို့ရဲ့ အိပ်မက်အနက်အကြောင်း ယောသပ်ကို ယေဟောဝါဘုရား ရှင်းပြပြီးတဲ့နောက် သူ့အတွက် မျှော်လင့်ချက် ရှိလာပုံရတယ်။ အဲဒီနောက်ပိုင်းမှာ ယောသပ်ခမျာ မိုးလင်းလာတိုင်း ထောင်ကနေ ထွက်ရနိုးနိုး မျှော်လင့်ချက်နဲ့ အိပ်ရာကနေ နိုးထလာတယ်။ ဒါပေမဲ့ ဘာမှပြောင်းလဲမသွားဘဲ ဒီအတိုင်းက ဒီအတိုင်းပဲ။ အဲဒီ နှစ်နှစ်တာအချိန်ဟာ ယောသပ်အတွက် အခက်ခဲဆုံးဖြစ်ပေမဲ့ ယေဟောဝါဘုရားကို သူ ယုံကြည်ကိုးစားနေဆဲပါပဲ။ စိတ်ပျက်လက်ပျက်ဖြစ်ပြီး ဘဝကိုအၡုံးပေးလိုက်မယ့်အစား ကြံ့ကြံ့ခံနိုင်ဖို့ စိတ်ပိုင်းဖြတ်ထားတယ်။ ဒါကြောင့် ခံနိုင်ရည်ခွန်အား ပိုရှိလာတယ်။—ယာကုပ် ၁:၄။

ဆင်းရဲခက်ခဲတဲ့ ဒီနေ့ခေတ်မှာ ခံနိုင်ရည်ရှိဖို့ လိုတယ်။ ဘဝအခက်အခဲတွေကို ရင်ဆိုင်နိုင်ဖို့ စိတ်ဓာတ်ကြံ့ခိုင်မှု၊ စိတ်ရှည်မှုနဲ့ ဘုရားသာ ပေးနိုင်တဲ့ အတွင်းစိတ်ငြိမ်သက်မှု လိုအပ်တယ်။ ယောသပ်အဖြစ်မှာလိုပဲ ကျွန်ုပ်တို့ဟာ လက်မြှောက်အၡုံးမပေးဘဲ မျှော်လင့်ချက်ကို ဆုပ်ကိုင်ထားနိုင်ဖို့ ဘုရားသခင် ကူညီပေးနိုင်ပါတယ်။—ရောမ ၁၂:၁၂; ၁၅:၁၃။

ဖလားတော်ဝန်က ယောသပ်ကို မေ့နေပေမဲ့ ယေဟောဝါဘုရားကတော့ သတိရနေဆဲပါ။ တစ်ညမှာ ဖာရောမင်းကို ထူးခြားတဲ့အိပ်မက် နှစ်ခု ဘုရားသခင် မြင်မက်စေခဲ့တယ်။ ပထမအိပ်မက်မှာ ဝဖြိုးတဲ့ နွားမ ၇ ကောင်က နိုင်းလ်မြစ်ထဲကနေ တက်လာတယ်။ အဲဒီနောက် ပိန်ချုံးပြီးရုပ်ဆိုးတဲ့ နွားမ ၇ ကောင်လည်း မြစ်ထဲက တက်လာတယ်။ ပိန်ချုံးနေတဲ့နွားမတွေက ဝဖြိုးနေတဲ့နွားမတွေကို ဝါးမျိုလိုက်တယ်။ ဒုတိယအိပ်မက်မှာ၊ ကောက်ပင် တစ်ပင်ထဲကနေ အဆန်အောင်တဲ့ ကောက်နှံ ၇ နှံထွက်လာတာကို ဖာရောမင်း တွေ့လိုက်တယ်။ အဲဒီနောက် အရှေ့လေကြောင့် ညှိုးနေပြီး အဆန်မအောင်တဲ့ ကောက်နှံ ၇ နှံထွက်လာတယ်။ အဲဒီကောက်နှံတွေက အဆန်အောင်တဲ့ ကောက်နှံတွေကို ဝါးမျိုပစ်လိုက်တယ်။ မနက်မှာ ဖာရောမင်း နိုးလာတော့ အိပ်မက်ကြောင့် ကယောင်ချောက်ချား ဖြစ်နေပါလေရော။ ဒါကြောင့် အီဂျစ်ပြည်က ပညာရှိတွေနဲ့ မှော်ဆရာတွေကို ခေါ်ပြီး အိပ်မက်အနက်ကို ဖွင့်ပြခိုင်းတယ်။ ဘယ်သူ့မှ မဖွင့်ပြနိုင်ကြဘူး။ (ကမ္ဘာဦး ၄၁:၁-၈) အိပ်မက်အကြောင်း သူတို့ကြားပြီး ကြက်သေ,သေသွားတာလား။ ဒါမှမဟုတ် အိပ်မက်အဓိပ္ပာယ်ကို တစ်ယောက်တစ်ပေါက် ပြောနေကြတာလားဆိုတာ ကျွန်ုပ်တို့ မသိပါဘူး။ ဘာပဲဖြစ်ဖြစ် ဖာရောမင်းကတော့ သူတို့ရဲ့အဖြေကို စိတ်အလိုမကျဘဲ အဓိပ္ပာယ်ကို သိချင်လွန်းလို့ အရူးအမူးဖြစ်နေရှာတယ်။

အဲဒီအခါကျမှ ဖလားတော်ဝန်ဟာ ယောသပ်ကို သတိရသွားတယ်။ ဒါနဲ့ ယောသပ်အကြောင်း သူ မပြောဘဲ မနေနိုင်တော့ဘူး။ လွန်ခဲ့တဲ့ ၂ နှစ်က ထောင်ထဲမှာရှိနေတုန်း သူ့ရဲ့အိပ်မက်နဲ့ စားတော်ဝန်ရဲ့အိပ်မက်ကို အနက်ဖွင့်ပြပေးခဲ့တဲ့ လူငယ်အကြောင်း ဖာရောမင်းကို ပြောပြလိုက်တယ်။ အဲဒီအခါ ဖာရောက ချက်ချင်းပဲ ထောင်ထဲမှာရှိတဲ့ ယောသပ်ကို ခေါ်ခိုင်းလိုက်တယ်။—ကမ္ဘာဦး ၄၁:၉-၁၃။

နန်းတော်ကိုလာဖို့ ဖာရောမင်းရဲ့ ဆင့်ခေါ်စာကိုရတဲ့အခါ ယောသပ် ဘယ်လို ဖြစ်နေမလဲဆိုတာ မြင်ယောင်ကြည့်လိုက်ပါ။ ယောသပ်ဟာ အီဂျစ်လူမျိုးရဲ့ ရိုးရာဓလေ့အတိုင်း ချက်ချင်းပဲ မုတ်ဆိတ်မွှေး၊ နှုတ်ခမ်းမွှေးတွေရိတ်၊ ကတုံးတုံးပြီး အဝတ်အစားလဲလိုက်တယ်။ ဖာရောမင်း မေးသမျှကို ဖြေဆိုနိုင်ဖို့ ကူညီပေးပါလို့ ယေဟောဝါဘုရားကို ထက်ထက်သန်သန် ဆုတောင်းခဲ့တယ်။ ခမ်းနားထည်ဝါတဲ့ နန်းတော်ထဲက ဧကရာဇ်မင်းရှေ့မှာ အခစားဝင်နေပါလားလို့ သူ့ကိုယ်သူ သတိထားမိလိုက်တယ်။ အဲဒီအချိန်မှာ “ဖာရောမင်းကလည်း၊ ငါသည် အိပ်မက်ကိုမြင်မက်ပြီ။ အနက်ကိုအဘယ်သူမျှမဖတ်နိုင်။ သင်သည် အိပ်မက်ကိုနားလည်သောဉာဏ်နှင့် အနက်ဖတ်နိုင်သည်ကို ငါကြားရပြီဟုဆို၏။ ယောသပ်ကလည်း၊ ကျွန်တော်သည် အလိုအလျောက်မတတ်နိုင်ပါ။ ဘုရားသခင်သည် မင်္ဂလာအဖြေစကားကို ဖာရောဘုရင်အားပေးတော်မူပါစေသောဟု လျှောက်လေ၏။”—ကမ္ဘာဦး ၄၁:၁၄-၁၆။

စိတ်နှိမ့်ချသူတွေ၊ သစ္စာရှိသူတွေကို ယေဟောဝါဘုရား ချစ်မြတ်နိုးပါတယ်။ ဒါကြောင့် ပညာရှိတွေ၊ မှော်ဆရာတွေ နားမလည်တဲ့ အိပ်မက်အနက်ကို ယောသပ် ဖွင့်ပြနိုင်ဖို့ ယေဟောဝါဘုရား ကူညီပေးတယ်။ ဖာရောမင်း မက်တဲ့အိပ်မက် နှစ်ခုရဲ့အဓိပ္ပာယ်က အတူတူပဲဆိုတာ ယောသပ် ရှင်းပြခဲ့တယ်။ ယေဟောဝါဘုရားက ကိစ္စရပ်တစ်ခုကို အခိုင်အမာအတည်ပြုတဲ့အနေနဲ့ နှစ်ခါပြောတတ်တယ်။ ပြောပြီးပြီဆိုရင်လည်း မြေကြီးလက်ခတ်မလွဲ ပြည့်စုံတယ်။ ဝဖြိုးတဲ့နွားမတွေနဲ့ အဆန်အောင်တဲ့ ကောက်နှံတွေဟာ အီဂျစ်ပြည်မှာ အစားအစာ ၇ နှစ် ပေါကြွယ်ဝတာကို ဆိုလိုတယ်။ ပိန်ချုံးတဲ့နွားမတွေနဲ့ အဆန်မအောင်တဲ့ ကောက်နှံတွေက အငတ်ဘေးကျရောက်မယ့် နောက် ၇ နှစ်ကို ဆိုလိုနေတာ ဖြစ်တယ်။ အငတ်ဘေးကြောင့် တိုင်းပြည်တစ်ပြည်လုံး ဒုက္ခရောက်ရလိမ့်မယ်။—ကမ္ဘာဦး ၄၁:၂၅-၃၂။

 အိပ်မက်အနက်ကို ယောသပ် မှန်မှန်ကန်ကန်ဖွင့်ပြမှန်း ဖာရောမင်း သိလိုက်ပြီ။ ဒါဆို ဘာလုပ်ရတော့မလဲ။ အခုကတည်းက ကြိုတင်ပြင်ဆင်ဖို့ ယောသပ် အကြံပြုလိုက်တယ်။ အစားအစာ ပေါကြွယ်ဝတဲ့ ၇ နှစ်အတွင်းမှာ ပိုလျှံတဲ့ အစားအစာတွေကို သိုလှောင်မှသာ အငတ်ဘေးကျရောက်တဲ့အခါ အစားအစာ ဖူလုံနိုင်မှာဖြစ်တယ်။ ဒါဆို အဲဒါကို ကြီးကြပ်နိုင်မယ့် “ဉာဏ်အမြော်အမြင်ရှိတဲ့သူ” ကို ဖာရောမင်း ရှာရတော့မယ်။ (ကမ္ဘာဦး ၄၁:၃၃-၃၆၊ ခမ) ယောသပ်မှာ အတွေ့အကြုံရှိတဲ့အပြင် လုပ်ရည်ကိုင်ရည်လည်းရှိတဲ့အတွက် ဒီအလုပ်ကို သူ အသာလေးလုပ်နိုင်ပါတယ်။ ဒါပေမဲ့ သူလုပ်နိုင်တယ်လို့ ကြွားလုံးမထုတ်ခဲ့ဘူး။ သူ့ရဲ့နှိမ့်ချမှုနဲ့ ယုံကြည်ခြင်းကြောင့် ရောင့်တက်ဖို့မပြောနဲ့ စဉ်းစားခဲ့မှာတောင် မဟုတ်ဘူး။ တကယ်လို့သာ ယေဟောဝါဘုရားကို ကျွန်ုပ်တို့ အပြည့်အဝ ယုံကြည်စိတ်ချတယ်ဆိုရင် ရည်မှန်းချက်ကြီးတာမျိုး၊ ကိုယ့်ဂုဏ်ကိုယ်ဖော်တာမျိုး လုပ်မှာမဟုတ်ဘူး။ ကိစ္စရပ်အားလုံးကို ဘုရားသခင်ဆီ ပုံအပ်ထားမယ်ဆိုရင် စိတ်ငြိမ်သက်မှု ရရှိနိုင်ပါတယ်။

ယောသပ်ရဲ့အကြံပြုချက်က ကောင်းတယ်ဆိုတာ ဖာရောမင်းနဲ့ မှူးမတ်တွေအားလုံး သိတယ်။ ယောသပ် ကိုးကွယ်နေတဲ့ ဘုရားသခင်က ဒီလိုကောင်းတဲ့အကြံပြုချက်တွေကို ပေးနေတယ်ဆိုတာကိုလည်း ရှင်ဘုရင် သိလိုက်ပါပြီ။ ဒါနဲ့ ညီလာခံမှာ ဖာရောမင်းက “သူ့ထက်သာသောသူကို ငါတို့ရှာ၍ မတွေ့နိုင်” ဘူးလို့ မှူးမတ်တွေကို ပြောလိုက်တယ်။ ပြီးတဲ့နောက် ယောသပ်ကိုလည်း ဒီလိုပြောခဲ့တယ်– “ဘုရားက သင့်အား ဤအမှုအရာတို့ကို ဖွင့်ပြတော်မူသည်ဖြစ်၍ သင့်ထက် ဉာဏ်ပညာအမြော်အမြင်သာသူ မရှိနိုင်။ ငါသည် သင့်အား ငါ့တိုင်းပြည်ကို အုပ်ချုပ်စေမည်။ ငါ၏ပြည်သားအားလုံးတို့သည် သင်၏အမိန့်ကို နာခံရမည်။ ထီးနန်းအရိုက်အရာအားဖြင့်သာလျှင် သင့်ထက် ငါကြီးမြတ်မည်။”—ကမ္ဘာဦး ၄၁:၃၈-၄၁၊ ခမ။

ဖာရောမင်းက ကတိအတိုင်း လုပ်ဆောင်တယ်။ ယောသပ်ကို ချည်ချောထည် ဆင်မြန်းပေးတဲ့အပြင် ရွှေလည်ဆွဲ၊ တံဆိပ်လက်စွပ်ကို ဝတ်ဆင်စေတယ်။ မြင်းရထားတော်နဲ့ တိုင်းပြည်အနှံ့လှည့်လည်ပြီး အကြံပြုချက်အတိုင်း လုပ်ဆောင်စေတယ်။ (ကမ္ဘာဦး ၄၁:၄၂-၄၄) ယောသပ်ဟာ အကျဉ်းထောင်ကနေ နန်းတော်ထဲကို နေ့ချင်းညချင်း ရောက်ရှိသွားပါပြီ။ အပယ်ခံအကျဉ်းသားကနေ ချီးမြှောက်ခံရတဲ့ ဒုတိယသြဇာအရှိဆုံး ဘုရင်ခံအဖြစ်ကို ရောက်လို့နေပါပြီ။ ယေဟောဝါဘုရားအပေါ် ယောသပ်ရဲ့ယုံကြည်ခြင်းက သံမဏိလို ခိုင်မာတယ်ဆိုတာ ပေါ်လွင်သွားပြီမဟုတ်လား။ ဘုရားသခင်က နှစ်ရှည်လများ ယောသပ်ခံခဲ့ရတဲ့ မတရားမှုမှန်သမျှကို တွေ့မြင်ခဲ့ပါတယ်။ ကိစ္စရပ်တွေကို အချိန်တန်တဲ့အခါ နည်းမှန်လမ်းကျ ဖြေရှင်းပေးခဲ့ပါတယ်။ ယောသပ်ခံခဲ့ရတဲ့ မတရားမှုတွေကို ဖော်ထုတ်ဖို့၊ အစ္စရေးလူတစ်မျိုးလုံးရဲ့ အနာဂတ်ကို ကာကွယ်ဖို့ ဘုရားသခင် အမြဲစဉ်းစားခဲ့တယ်။ ဒီအကြောင်းတွေကို နောက်ပိုင်းမှာ ဆက်ပြီးဖော်ပြသွားပါမယ်။

သင်ဟာ မတရားဘူးလို့ခံစားရတဲ့ ဆင်းရဲဒုက္ခတစ်ခုခုကို နှစ်ရှည်လများ ခံစားနေရရင် စိတ်ပျက်အားလျော့ပြီး လက်မှိုင်မချလိုက်ပါနဲ့။ အဲဒီအခါ ယောသပ်အကြောင်း စဉ်းစားလိုက်ပါ။ ယောသပ်ဟာ ကြင်နာမှု၊ နှိမ့်ချမှု၊ ခံနိုင်ရည်၊ ယုံကြည်ခြင်း စတဲ့အရည်အသွေးတွေကို မပျောက်သွားအောင် ထိန်းထားတဲ့အတွက် သူ့ကို ယေဟောဝါဘုရား ကောင်းချီးပေးခဲ့ပါတယ်။