နှစ်ခြင်းပေးသူ ယောဟန်ဆိုတာ ဘယ်သူလဲ
ကျမ်းစာအဖြေ
နှစ်ခြင်းပေးသူ ယောဟန်ဆိုတာ ဘုရားသခင်ရဲ့ ပရောဖက်ပါ။ (လုကာ ၁:၇၆) ဘီစီ ပထမရာစု နှစ်ကုန်ပိုင်းမှာ မွေးလာပြီး အေဒီ ပထမရာစုအတွင်း အသက်ရှင်ခဲ့သူ ဖြစ်တယ်။ မေရှိယ ဒါမှမဟုတ် ခရစ်တော်အတွက် လမ်းခရီးကို အသင့်ပြင်ဆင်ပေးဖို့ သူ့ကို ဘုရားသခင် တာဝန်ပေးတယ်။ ဂျူးတွေ ဘုရားဆီ ပြန်လှည့်လာအောင် ဘုရားရဲ့ သတင်းတရားကို ဟောပြောခြင်းအားဖြင့် ဒီတာဝန်ကို ယောဟန် ထမ်းဆောင်ခဲ့တယ်။—မာကု ၁:၁-၄။ လုကာ ၁:၁၃၊ ၁၆၊ ၁၇။
ယောဟန် ဟောတဲ့ သတင်းကြောင့် နာဇရက်မြို့သား ယေရှုဟာ ကတိထားရာ မေရှိယ ဖြစ်ကြောင်း စိတ်ရင်းမှန်တဲ့ ဂျူးတွေ သဘောပေါက်သွားတယ်။ (မဿဲ ၁၁:၁၀) နောင်တယူကြဖို့၊ နောင်တရတဲ့အနေနဲ့ နှစ်ခြင်းခံကြဖို့ ယောဟန် အားပေးတယ်။ (လုကာ ၃:၃-၆) လူများစွာကို နှစ်ခြင်းပေးတဲ့အတွက် နှစ်ခြင်းပေးသူ ယောဟန်လို့ အမည်တွင်တယ်။ ယောဟန် ပေးတဲ့ နှစ်ခြင်းတွေထဲမှာ အရေးကြီးဆုံးကတော့ ယေရှုရဲ့ နှစ်ခြင်း ဖြစ်တယ်။ a—မာကု ၁:၉။
ဒီဆောင်းပါးမှာ
နှစ်ခြင်းပေးသူ ယောဟန်ရဲ့ ထူးခြားချက်က ဘာလဲ
သူ့လုပ်ဆောင်မှုကို ကြိုဟောထား။ ယောဟန်က ဟောပြောခြင်းအားဖြင့် ယေဟောဝါရဲ့ စေတမန်နဲ့ပတ်သက်တဲ့ ကြိုဟောချက်ကို ပြည့်စုံစေတယ်။ (မာလခိ ၃:၁။ မဿဲ ၃:၁-၃) ဂျူးတွေကို “ယေဟောဝါအတွက် အသင့်ပြင်ထားတဲ့ လူမျိုး ဖြစ်စေ” တယ်။ ယေဟောဝါဘုရားရဲ့ ကိုယ်စားလှယ်ချုပ် ယေရှု ဟောတဲ့ သတင်းတရားကို လက်ခံလာအောင် အသင့်ပြင်ဆင်ပေးခြင်း ဖြစ်တယ်။—လုကာ ၁:၁၇။
တရားဝင်ဖြစ်မှု။ “အသက်ရှင်ခဲ့သမျှ လူတွေထဲမှာ နှစ်ခြင်းပေးသူ ယောဟန်ထက် ကြီးမြတ်တဲ့သူ မပေါ်သေးဘူး။ ဒါပေမဲ့ ကောင်းကင်နိုင်ငံမှာ အဆင့်နိမ့်တဲ့သူဟာ ယောဟန်ထက် ကြီးမြတ်တယ်” လို့ ယေရှု ပြောတယ်။ (မဿဲ ၁၁:၁၁) ယောဟန်ဟာ ပရောဖက် ဖြစ်တဲ့အပြင် ကြိုဟောထားတဲ့ “စေတမန်” လည်း ဖြစ်တယ်။ ဒီ့မတိုင်ခင် ဘုရားကျေးကျွန်တွေထဲမှာ အခုလိုမျိုး ကြီးမြတ်သူလို့ အခေါ်ခံရတဲ့သူ မရှိဘူး။ ယောဟန် ကောင်းကင်သွားမှာ မဟုတ်ကြောင်း ယေရှုစကားတွေက ဖော်ပြတယ်။ b လူတွေ ကောင်းကင် တက်ဖို့ ခရစ်တော် လမ်းဖွင့်ပေးချိန် မတိုင်ခင် ဒီသစ္စာရှိ ပရောဖက် သေဆုံးခဲ့တယ်။ (ဟီဘရူး ၁၀:၁၉၊ ၂၀) ယောဟန်က ဘုရားနိုင်ငံတော် အုပ်ချုပ်မှုအောက် ကမ္ဘာ့ပရဒိသုမှာ ထာဝစဉ် အသက်ရှင်ဖို့ မျှော်လင့်ချက် ရှိတယ်။—ဆာလံ ၃၇:၂၉။ လုကာ ၂၃:၄၃။
နှစ်ခြင်းပေးသူ ယောဟန်ရဲ့ မိဘတွေက ဘယ်သူတွေလဲ
ယောဟန်ရဲ့ မိဘတွေက ဇာခရိနဲ့ ဧလိရှဗက်ပါ။ ဇာခရိက ဂျူးပုရောဟိတ် ဖြစ်တယ်။ ဧလိရှဗက်က ကလေး မရနိုင်ဘဲ မြုံနေသူ ဖြစ်လို့ ယောဟန် မွေးလာတာဟာ တကယ့် အံ့ဖွယ်ပဲ။ ဒါ့အပြင် ဇာခရိနဲ့ ဧလိရှဗက်တို့ နှစ်ယောက်စလုံး “အသက်ကြီးနေပြီ။”—လုကာ ၁:၅-၇၊ ၁၃။
နှစ်ခြင်းပေးသူ ယောဟန်ကို ဘယ်သူ ကွပ်မျက်သလဲ
ဟေရုဒ် အန္တိပမင်းက ဇနီး ဟေရောဒိရဲ့ သွေးထိုးမှုကြောင့် ယောဟန်ကို ခေါင်းဖြတ်ကွပ်မျက်ခဲ့တယ်။ ဂျူးအမည်ခံထားတဲ့ ဟေရုဒ်က ဟေရောဒိနဲ့ လက်ထပ်တာ ဂျူးပညတ်အရ တရားမဝင်ဘူး ပြောလို့ ယောဟန်ကို ဟေရောဒိ သိပ်မုန်းတယ်။—မဿဲ ၁၄:၁-၁၂။ မာကု ၆:၁၆-၁၉။
နှစ်ခြင်းပေးသူ ယောဟန်က ယေရှုရဲ့ ပြိုင်ဖက်လား
သူတို့ဟာ ပြိုင်ဖက်တွေဆိုတဲ့ အယူအဆ ကျမ်းစာနဲ့ မညီဘူး။ (ယောဟန် ၃:၂၅-၃၀) ယောဟန်က မိမိရဲ့ တာဝန်ဟာ မေရှိယအတွက် လမ်းခရီးကို အသင့်ပြင်ဆင်ပေးဖို့ ဖြစ်ပြီး ယေရှုရဲ့ ပြိုင်ဖက် မဟုတ်ကြောင်း သိထားတယ်။ “ကျွန်တော် ရေနဲ့ နှစ်ခြင်းပေးရတဲ့ အကြောင်းရင်းက သူ့ကို အစ္စရေးတွေ သိလာစေဖို့ပဲ” လို့ ယောဟန် ပြောတယ်။ “သူဟာ ဘုရားသခင်ရဲ့ သားပဲ” လို့လည်း ပြောတယ်။ (ယောဟန် ၁:၂၆-၃၄) ယေရှုရဲ့ အမှုဆောင်လုပ်ငန်း အောင်မြင်ကြောင်း ကြားတဲ့အခါ ယောဟန် အလွန်ပျော်တယ်။
a “ခရစ်တော်ဟာ အပြစ်မကျူးလွန်ခဲ့ဘူး။” (၁ ပေတရု ၂:၂၁၊ ၂၂) ဒါကြောင့် နောင်တယူတဲ့အနေနဲ့ ယေရှု နှစ်ခြင်းခံတာ မဟုတ်ဘူး။ ကျွန်တော်တို့အတွက် အသက်စွန့်ခဲ့ခြင်း အပါအဝင် ဘုရားအလိုတော် ဆောင်ဖို့ ကိုယ့်ကိုယ်ကိုယ် ပေးဆက်တဲ့အနေနဲ့ နှစ်ခြင်းခံတာ ဖြစ်တယ်။—ဟီဘရူး ၁၀:၇-၁၀။
b “ဘယ်သူတွေ ကောင်းကင်သွားမလဲ” ဆောင်းပါးကို ကြည့်ပါ။
ကြိုက်လို ကြိုက်ငြား အကြောင်းအရာများ
ထပ်ဆင့် အကြောင်းအရာများ
နှစ်ခြင်းပေးသူ ယောဟန်ဆိုတာ တကယ် ရှိခဲ့သလား
ပထမရာစုက သမိုင်းပညာရှင် ဂျိုစီဖတ်စ်ဟာ နှစ်ခြင်းပေးသူ ယောဟန် တကယ်ရှိခဲ့တယ်ဆိုတာကို လက်ခံတယ်။ ကျွန်တော်တို့လည်း လက်ခံနိုင်ပါတယ်။
ယေရှု—လမ်းခရီး၊ အမှန်တရား၊ အသက်
လမ်းခရီးကိုပြင်ဆင်သူ နှစ်ခြင်းပေးသူယောဟန်
ဖာရိရှဲနဲ့ ဇဒ္ဒုကဲတချို့ ရောက်လာတဲ့အခါ သူတို့ကို ယောဟန် ပြစ်တင်ရှုတ်ချခဲ့တယ်။ ဘာကြောင့်လဲ။
သမ္မာကျမ်းစာ သွန်သင်ချက်များ
ကျမ်းစာလေ့လာမှုကို စမ်းကြည့်ပါ
ကျမ်းစာသင်ပေးသူနဲ့အတူ ကျမ်းစာကို အခမဲ့ လေ့လာပါ။