ဘုရားတရားစိတ်ဓာတ် ရှိခြင်းဆိုတဲ့ အသုံးအနှုန်းကို ဘုရားနှစ်သက်မှု ရလိုစိတ် ရှိခြင်း၊ ဘုရား တွေးခေါ်သလို စဉ်းစားတွေးခေါ်ခြင်းဆိုပြီး အဓိပ္ပာယ်ဖွင့်နိုင်တယ်။ ဘုရားတရားစိတ်ဓာတ် ရှိသူဟာ ဘုရားစံနှုန်းတွေကို လိုက်နာဖို့၊ သန့်ရှင်းသော စွမ်းအားတော် a လမ်းညွှန်မှုနဲ့အညီ အသက်ရှင်နေထိုင်ဖို့ ကြိုးစားတယ်။—ရောမ ၈:၅။ ဧဖက် ၅:၁။

 ဘုရားတရားစိတ်ဓာတ် မရှိသူနဲ့ ဘုရားတရားစိတ်ဓာတ် ရှိသူရဲ့ ကွာခြားချက်ကို ကျမ်းစာမှာ ဖော်ပြထားတယ်။ ဥပမာ၊ ဘုရားတရားစိတ်ဓာတ် ရှိသူဟာ စွမ်းအားတော် လမ်းပြမှုနောက် လိုက်ပေမဲ့ “စိတ်အလိုလိုက်တဲ့သူဟာ ဘုရားသခင့်စွမ်းအားတော် ဖော်ပြတဲ့အရာတွေ[ဘုရားသွန်သင်ချက်တွေ]ကို လက်မခံဘူး။” (၁ ကောရိန္သု ၂:၁၄-၁၆) ဘုရားတရားစိတ်ဓာတ် ရှိသူက စေတနာစိတ်၊ သင့်သင့်မြတ်မြတ် နေလိုစိတ် ရှိပေမဲ့ စိတ်အလိုလိုက်တဲ့သူကတော့ “မနာလိုခြင်း၊ ရန်တွေ့ခြင်း” ရှိ ကြတယ်။ (၁ ကောရိန္သု ၃:၁-၃) အသရေဖျက်တဲ့စကား ပြောပြီး မိတ်ဆွေရင်းတွေကို စိတ်ဝမ်းကွဲစေသူတွေကို “တိရစ္ဆာန်စရိုက် ရှိသူတွေ၊ ဘုရားသခင့် စွမ်းအားတော် မရှိသူတွေ” လို့လည်း ခေါ်ထားတယ်။”—ယုဒ ၁၉။ ပညာအလိမ္မာ ၁၆:၂၈။ b

ဒီဆောင်းပါးမှာ

•  ဘုရားတရားစိတ်ဓာတ် ဘယ်ကနေ ဖြစ်ပေါ်လာသလဲ

•  ဘုရားတရားစိတ်ဓာတ် ရှိဖို့ ဘာကြောင့် အရေးကြီးသလဲ

•  ဘုရားတရားစိတ်ဓာတ် ဘယ်လို ရှိလာနိုင်သလဲ

•  ဘယ်ဘာသာထဲမှ မဝင်ဘဲ ဘုရားတရားစိတ်ဓာတ် ရှိသူ ဖြစ်နိုင်သလား

•  ဘုရားတရားစိတ်ဓာတ် ရှိခြင်းနဲ့ပတ်သက်ပြီး ယူဆချက်အမှားများ

•  ဘုရားတရားစိတ်ဓာတ် ဒါမှမဟုတ် ဘုရားနဲ့ ဆက်ဆံရေးကောင်း ရှိခြင်းအကြောင်း ဖော်ပြတဲ့ ကျမ်းပိုဒ်များ

 ဘုရားသခင့် ပုံသဏ္ဌာန်အတိုင်း ဖန်ဆင်းခံရတဲ့အတွက် ကျွန်တော်တို့မှာ ဘုရားတရားစိတ်ဓာတ် ရှိကြတယ်။ (ကမ္ဘာဦး ၁:၂၇) ဒါကြောင့် လူအများစုဟာ ကိုယ်မမြင်နိုင်၊ ထိတွေ့ကိုင်တွယ်လို့ မရနိုင်တဲ့အရာတွေကို စိတ်ဝင်စား တန်ဖိုးထားတတ်ကြတယ်။

 သင့်သင့်မြတ်မြတ် နေတာ၊ ကရုဏာရှိတာ၊ မျက်နှာမလိုက်တာစတဲ့ ယေဟောဝါ c ဘုရားမှာ ရှိတဲ့ အရည်အသွေးတွေကို ကျွန်တော်တို့လည်း ပိုင်ဆိုင်ထားကြတယ်။ (ယာကုပ် ၃:၁၇) ဘုရားက မိမိရဲ့ မိန့်မှာချက် နာခံသူတွေကို စွမ်းအားတော် ပေးသနားတယ်။—တမန်တော် ၅:၃၂။

 ဘုရားတရားစိတ်ဓာတ် ရှိတာ၊ တစ်နည်းအားဖြင့် စွမ်းအားတော် လမ်းပြမှုနောက် လိုက်တာက “အသက်ရှင်ခြင်းနဲ့ ငြိမ်သက်ခြင်းကို ရရှိစေနိုင်တယ်။” (ရောမ ၈:၆) ဒါတွေဟာ ဘုရား ပေးတဲ့ အဖိုးတန် လက်ဆောင်တွေပါ။

•   အသက်ရှင်ခြင်း။ ဘုရားတရားစိတ်ဓာတ် ရှိသူတွေကို ထာဝရအသက် ပေးမယ်လို့ ဘုရား ကတိပြုတယ်။

•   ငြိမ်သက်ခြင်း။ ဘုရားနဲ့ သင့်မြတ်ငြိမ်သက်တဲ့ ဆက်ဆံရေး ရှိခြင်းကို ဆိုလိုတယ်။ ကိုယ့်စိတ်အလိုဆန္ဒကိုပဲ အဓိကထားသူတွေဟာ ဘုရားသခင်ရဲ့ ရန်သူ ဖြစ်တယ်။ (ရောမ ၈:၇) ဘုရားတရားစိတ်ဓာတ် ရှိဖို့ ကြိုးစားသူတွေကတော့ “လူ့ဉာဏ်နဲ့ မမီနိုင်တဲ့ ဘုရားသခင့်ငြိမ်သက်ခြင်း” ရနိုင်တယ်။ (ဖိလိပ္ပိ ၄:၆၊ ၇) ဒီလိုစိတ်ငြိမ်သက်မှု ရထားသူတွေရဲ့ ဘဝဟာ ပျော်ရွှင်ချမ်းမြေ့တယ်။—မဿဲ ၅:၃။

•   ဘုရားရဲ့ ပညတ်တွေကို သင်ယူ၊ လိုက်နာပါ။ ကျမ်းစာကို ဖတ်ရှုလေ့လာပါ။ ‘သန့်ရှင်းသော စွမ်းအားတော် လှုံ့ဆော်မှု ခံရသူတွေ’ က ဘုရားရဲ့ အတွေးအခေါ်တွေကို ကျမ်းစာမှာ မှတ်တမ်းတင်ထားလို့ပါ။ (၂ ပေတရု ၁:၂၁) သိလာတာတွေက ဘုရားကို “စွမ်းအားတော် လမ်းပြမှုနဲ့အညီ၊ အမှန်တရားနဲ့အညီ” ဝတ်ပြုကိုးကွယ်ဖို့၊ စွမ်းအားတော် လမ်းပြမှုနောက် လိုက်ပြီး အလိုတော်နဲ့အညီ အသက်ရှင်ဖို့ ကူညီပေးမယ်။—ယောဟန် ၄:၂၄။

•   ဘုရားရဲ့ အကူအညီ ရဖို့ ဆုတောင်းပါ။ (လုကာ ၁၁:၁၃) ဘုရားတရားစိတ်ဓာတ် ရှိသူ ဖြစ်မှန်း သိသာစေတဲ့ အရည်အသွေးတွေ ရှိလာအောင် ဘုရား ကူညီပါလိမ့်မယ်။ (ဂလာတိ ၅:၂၂၊ ၂၃) ဘဝအခက်အခဲတွေ ရင်ဆိုင်ဖြေရှင်းဖို့ ဉာဏ်ပညာကိုလည်း ပေးနိုင်တယ်။—ယာကုပ် ၁:၅။

•   ဘုရားတရားစိတ်ဓာတ် ရှိသူတွေနဲ့ ပေါင်းပါ။ ဘုရားနဲ့ ရင်းနှီးတဲ့ ဆက်ဆံရေး ခိုင်မြဲဖို့ အားပေးထောက်မကြပါလိမ့်မယ်။ (ရောမ ၁:၁၁၊ ၁၂) ဘုရားရဲ့ အတွေးအခေါ်နဲ့ ဆန့်ကျင်သူတွေကို ပေါင်းရင်တော့ ဘုရားနဲ့ မိတ်ပျက်လာမယ်။—ယာကုပ် ၄:၄။

 ဘာသာတစ်ခုကို ယုံကြည်သက်ဝင်ရုံနဲ့ ဘုရားတရားစိတ်ဓာတ် ရှိသူ ဖြစ်သွားတာ မဟုတ်ဘူး။ “ဘုရားသခင်ကို ဝတ်ပြုနေတယ်လို့ ကိုယ့်ကိုယ်ကိုယ် ထင်နေပေမဲ့ နှုတ်ကို မစောင့်စည်းရင် ကိုယ့်ကိုယ်ကိုယ် လှည့်စားနေတာပဲ။ သူ့ရဲ့ ဝတ်ပြုမှုဟာ အချည်းနှီးပဲ” လို့ ကျမ်းစာက ဆိုတယ်။—ယာကုပ် ၁:၂၆။

 ဒါပေမဲ့ ဘုရားတရားစိတ်ဓာတ် ရှိသူတွေဟာ ဘုရား နှစ်သက်လက်ခံတဲ့နည်းနဲ့ပဲ ဝတ်ပြုကိုးကွယ်တယ်လို့ ကျမ်းစာ ဖော်ပြတယ်။ ဘုရားသခင်ရဲ့ ‘စွမ်းအားတော် တစ်ခုတည်း’ ရှိမှန်း အသိအမှတ်ပြုကြတယ်။ အဲဒီစွမ်းအားတော်က ‘ခန္ဓာကိုယ် တစ်ခုတည်း၊’ တစ်နည်းအားဖြင့် “စွမ်းအားတော်ကြောင့် ရလာတဲ့ စည်းလုံးမှုနှောင်ကြိုးကို” ကြိုးစားထိန်းသိမ်းတဲ့ အဖွဲ့အစည်းတစ်ခုအနေနဲ့ ဝတ်ပြုကိုးကွယ်ဖို့ လှုံ့ဆော်ပေးတယ်။—ဧဖက် ၄:၁-၄။

 ယူဆချက်အမှား။ သက်ရှိသတ္တဝါမှန်သမျှ ဘုရားတရားစိတ်ဓာတ် ရှိကြတယ်။

 အမှန်။ ဖန်ဆင်းခံအရာအားလုံးဟာ ဘုရားသခင်ကို ဂုဏ်တင်ချီးမွမ်းမှု ဖြစ်စေတယ်။ (ဆာလံ ၁၄၅:၁၀။ ရောမ ၁:၂၀) ဒါပေမဲ့ အသိဉာဏ်ရှိ ဖန်ဆင်းခံတွေပဲ ဘုရားတရားစိတ်ဓာတ် ရှိနိုင်တယ်။ တိရစ္ဆာန်တွေကတော့ ပင်ကိုသိစိတ်အတိုင်း၊ သဘာဝအာသာဆန္ဒအတိုင်း ပြုမူကြလို့ ဘုရားနဲ့ ရင်းနှီးဖို့ မဖြစ်နိုင်ဘူး။ (၂ ပေတရု ၂:၁၂) ဒါကြောင့် ဘုရားတရားစိတ်ဓာတ် မရှိသူ၊ တစ်နည်းအားဖြင့် စွမ်းအားတော် မရှိသူကို တိရစ္ဆာန်စရိုက် ရှိသူ၊ အပြစ်ရှိတဲ့ အလိုဆန္ဒနောက် လိုက်သူအဖြစ် ကျမ်းစာ ဖော်ပြတယ်။—ယာကုပ် ၃:၁၅။ ယုဒ ၁၉။