Paulub: Kaisem ge gere ǃgâiaǂgao. Novemberi 1985 ǃnâm ge sim ǂguro sîsabe ǁgaumâisa ǃoa gere ī o Liberiab, Wes Afrikaba ǃoa. Anikunis ge Senegals ǃnâ ge mâ. Annes, ge ge mî: “ǀGam īrgu ǃnâ da ge ǀase Liberiab ǃnâ nî sī.” ǁNāpaxu da ge ǂanǂansa ge māhe: “Liberiaba ǃoa ra ī khoen ge anikunisa xu nî ǁgôa.” ǀNî khoen ge gere dītsâ în ǁnāba hâ ǂhanuba gaoǂam, ǁnā amaga da ge Liberiaba ǃoa ge ǁkhana ǁoa ī. Sao ra disi tsēde da ge sīsaben ǀkha Senegals ǃnâ ge hâ tsî ǂhôan ǃnâ ge ǁnâu kaise ǂgui khoen ge ǃgamhesa. Tsîb ge ǂhanuba mā-am tama hâ îsa în khoena tā ǁîn omde xu ǂoa. ǁNāsan ga dī tama ī on ge ǂhanub xa nî ǃgamhe.

Anne: ǁNā tsēsa xu da ge kaise gere ǂâiǂhânsen. Tsîn ge khoena tita ǀonsa ge mā, ǃnāsa ǁaeba ta gere ǃao amaga, daoba ǃgâus tsîna ta ge gere ǃao. Xawem ge noxoba sîm ǁgaumâisa ǃoa gere ī ǂgao.

Paulub: Annes tsî tita tsîn ge ǀgui ǀkhab ai ge kai Englandi westes ǀkhab ǃnâ. Ti ǁgûra tsî Annes ǁgûs tsîn ge hoaǁae gere ǂkhâǃnâ mî, îm aimâba-ao kai tsîm ge hoama ǀgapi skoli khaoǃgâ ge aimâba-ao kai. ǁÎra ge sîm di turab aoǁnâ sîsen-e ǀoasa ǁaeba dīsa gere ǂkhâǃnâ. Tita ge 19 kurin ǀkha betels ai sī ǃoabas aiǂhanuba ge ūhâ i. Sîm ge 1982 ǃnâ a ǃgamme toas khaoǃgâs ge Annes tsîna Betels tawa ge sī.

Anne: Betelsam ge ge ǀnam ī xawem ge ǂhâsib a ǃnāsaba gere ǃoaba ǂgao. Betels ai ge hâ ǃgâsan hîna ge ǁnās aiǃâ sîsabese gere ǃoaban ǀkha hâ ǀhaos ge ǁnā turaba ge ǀgaiǀgai. ǃNona kurigam ge mâǃoes hoasa nēs xa gere ǀgore. ǁNā-amagam ge ge ǂkhî ī 1985 ǃnâm ge ǁkhauhe o îm 79ǁî klas Giliadi disa hâǃnâ. Liberiaba ǃoam ge ge ǁgâumâi-e, Afrikab westes ǃnâ.

Paulub: ǂGuro anikunis Liberiaba ǃoa īsa ge mā-amhes aim ge ge ǂoa. Khoen ge kaise gere ǃao tsî noxoba ge mā-amhe tama hâ i ǁîn omde  xu ǂoasa ǀnî ǃkhaigu ai. Tsîn ge audo i ga ǀgaisase ǂkhubi, o ǃau tsî gere ǃkhoebē. ǃNomǃnomsens ǃaroman ge Psamldi ǂkhanisa mâ ǃoes hoasa gere khomai. Xawem ge kaise sîm ǁgaumâisa ge ǀnam ī. Tita ge Betels tawa John Charuki ǀkha ǀguiba gere sîsen. ǁÎba xu ta ge ǂgui xūna ge ǁkhāǁkhāsen ǁîb ge gāxu ǁaeba Liberiab ǃnâ hâ i amaga. ǁÎb ge ǃgâsan gere hōǃâ ǃgomsina ge ǂan i.

Anne: Tae-i ǃaromam ge Liberiaba ǁnātikō ǃkhaese ǀnam? Sîm di ǃgâsan ǃaroma. ǁÎn ge ǀnamma ǁgau mî tsî ge ǂgomǂgomsa ī sîm ǃoagu. ǁÎn ǀkham ge ǀgū ǀhōsagusisa ge omkhâi tsîm ge ge ǁîn omaris ǃâ kai. ǁÎn di ǀapemādi ge gagasise gere ǀgai kai mî. Aoǁnâ sîsenni ge kaise ge ǁkhoaxa i. Oms khoen ge gere ǁaixa ǁîn ǂhaba hâ ǁaeb kōse da ge hâ tama hâ i ǃkhais ǃaroma. ǁÎn ge Elobmîs xa mâ ǃkhai i hoa i ai gere ǃhoa. Supu i ge ge ī ǁîn ǁgamǀhaodi ǃnâ ǁhaosa. Kaisem ge ǂgui khoena ge ūhâ i Elobmîsam gere ǁkhāǁkhāna tsî i ge ge ǃgom ī hoana Elobmîsa ǁkhāǁkhāsa.

Paulub: Haka kurin ǀgaiba i ge ǃnomsasiba ge hâ i ǃhūb ǃnâ. Xawe i ge 1989 toroba ge tsoatsoa tsî ge hoa xūna ge dawa. Khoen hîna ge ǂhanuba gere mâǃoan ge betels ǂnamipe ge hâ i ǃkhaiba ge ū Julib 2, 1990 ǃnâ. ǃNona ǁkhâga da ge ǃhūb ǃauga hâ khoen sida omaridi tamas ka io dana beros ǀkha ge ǃhoa ǁoa i. ǂKhabadīb, ǂûǃnubusib tsîn ge ge hâ i tsî i ge ge ǂgui tarakhoedi tsîna ge ǀgaiǃkhōhe. Nē ǁgâiǀāb ge 14 kurina ge hâ ī tsî hoa ǃhūba ge tsâǀkhā.

Anne: ǀNî ǃhaodi khoen ge gere ǃkham tsî nau ǃhaodi khoena gere ǃgamgu. Hoa ǃkhain ai i ge ǃgangu ǃnâ soldana ge hâ i ǃapudi ǀkha tsî ǃgâi tama sarana ge ana hâ i. ǀNîn ge khoena ǃgamsa, “anina ǃgams ǀkha gere ǀgopeǀnō.” ǃKham-aogu ge ǁîgu ra dī ǂgao xūna dīs ǃaroma daoga gere ǂgānam tsî ǃkharu ǂgao gere khoena gere ǃgam. ǁNās khaoǃgâ gu ge khoen sorode gere ǁguiǂam-ai gu, nēs ge betels ǀgūses tsîna gere ī. ǂGomǂgomsa Jehovab ǃoaba-aon tsîn ge ge ǃgam-e, ǀgam sîsaben tsîna ǃkhōǂgā hâse.

ǁÎn ûiba ǁkhōǁkhōsa mâsib ǃnâ mâi tsîn ge nau ǃhaodi khoena gere sâu, hîna ge ôahe tsî gere ǃgamhe ǂgaona. Sîsaben tsî betels ǁanin tsîn ge ǁkhā xū-e gere dī. ǀNî ǃgâsan hîna ge ǃkhūn ge betels tawa ǃnaga gere ǁgoe tsî nauna sida ǀkha kamerdi ǃnâ. Sîm kamersam ge hû omaris ǁanin ǀkha gere ǀgoragu.

 Paulub: Mâ tsēs hoasa gu ge ǃkham-aoga ǂgâ tsî gere kō khoena da sâu tamasa. Haka ǃûi-aona da ge ge ūhâ i, ǀgam ra ge venstersa xu gere kō tsî nau ǀgamna heks ǃauga. ǁNā ǀgaman heks dawa mân ga ǁîn ǃomga aisǀkhāb ai ūhâ, o i ge gere ǂâibasen hoan a ǃgâisa. Xawe gu ga ǃomga ǃgâbǀkhāb ai ūhâ, o i ge gere ǂâibasen ǃkham aogu gere ǁgaosa. O î ge venstersa xu ra kō khoena ǃkhoe tsî ǃgâsana gere sâu.

Anne: ǀGuitsē gu ge ǃgâsaga ǁaixa hâ ǃkham-aoga ge ǁkhae ǁoa i ǂgâxasa. Tita tsî ǀnî ǃgâsas tsîna ta ge ǂkhari-oms ǃnâ ge ǂgānam ǂgā. ǁNāpa i ge ǂkhari sâuǃnâ ǃkhaiba ge hâ ī, ǃnākaba ūhâ tama khami gere mûsena, ǃgâsas ge ǁnāba ge ǀēǂgāsen. ǃKham-aogu ge tita ge sao ǀgapikab ǀkha, ǃabun ǀkha ǁâtanisen hâse tsî ǁaixa hâse daos dawa gere ǂnau. Paulub ge ge “ǀkhomma ti taras ge ǂkhari omsa ra sîsenū.” ǃGâsas gauǃnâ hâ kaba ta ge ǂganam, o i ge ge ǂkhubi tsî i ge xūna mâi-oasa gaxu ǁaeba ge ū. Tsî ta ge danasa xu ǂaidi ǀkha gere ǀkhū. Mati ta ǁnā daosa nî ǁkhowa-am? ǃNomsa ǀgoresa ta ge ge dī tsî ta ge Jehovaba ge ǀkhoma îb huite. Tsî ta ge daosa ǁkhowa-am tsî ǁîna ge tawede. Tita ǂhā ǃkharu tsî i ge ǁîn di ǀgui-e ǁnā kaba sī ǁkhowa-am tsî kabi mâ xūn hoana gere ôaǃnâ. ǁÎb ge ge ǂgom tama hâ i xū-eb ge hō tama hâ īsa. ǁÎb tsî nau ǃkham-aogu tsîn ge nau kamerdi tsî daks ǂamǃâb ǃnâ hâ soab tsîna ge ôaǃnâ xawe ǁkhawan ge xu-e ge hō tama hâ i.

Paulub: ǁKhâga da ge ǂû-i ǃnubusiga ge ūhâ i xawe gagasi ǂû-i ge ge hui da. Betels di ǁgoa ǃoabas ge ge sida ǁgoas ǂû ī tsî da ge hoada gere ǃgôaǃgâ ǀgaib hîna i gere māda ba.

ǂAn da ge ge ī ǁgammi tsî ǂû-e da ga ôa, o da nauna ǁkhauba hō tidesa tsîn nî ǃgamhe ǃkhaisa. ǃNāsa ǁaebab ge Jehovaba ǂhâ da hâ xuna buruburuxa ǀgaub ai gere māda. Jehovab ge gere kōǃgâ da tsî ge hui da î da ǃnomsase hâ.

ǃHūb ǃnâ hâ mâsib gere ǁgaiǂoa xaweb ge amaba ǃaubasensa gere māda. ǂGui ǃgâsan sida din ge ǁîn ûiga sâus ǃaroma gere ǃkhoe. Xawen ge ǁîn ǂgomsa ǀgaisase ge ūhâ ǀgara tsî ǃnomsase ǃgom ǁaegu ǃnâ ge hâ ǀgara. ǀNîn ge gere mî torob ǃnân ge hōǃâ xūn ge kaiǁgâiǀāb ǃaroma gere aiǂhomi nîsa. ǀHaohâb ǃûi-aogu tsî ǂkham ǃgâsagu hoagu ge ǁkhā gu an hoana ge dī tsî ǁîgu ǃgâsana ge hui. ǀKhara ǃhūga ǃoa ge ī ǃgâsan ge gere hui gu tsî gu ge ǁnāpa ge aoǁnâ tsoatsoa. Hōn gere xū-i hoa-en ge ǃgarob ǃnâ gere sîsenū în ǁîn ǀhaoden nî ūhâ ǃnâ ǃkhai-e om. ǁNā ǃgom ǁaegu ǃnâ i ge ǀhaode ǃoa īs tsî aoǁnâs tsîna ǃgâsana ǃâubasens tsî ǂkhâǃnâs tsîna gere mā. ǂÛn tsî saran tsîna da gere ǀgoraǂui, on ge ǃgâsana aoǁnâ-ūn nî ǁgaruna gere ǂgan tsî sarana ge ǂgan tama hâ i. Torob ǃnâ ge ǂgui ǁgai xūna hōǃâ khoen ge ǃgâiǂhôasa gere ǁnâu ǂgao. Khoen ge ge mû ǁkhā ī Jehovab ǃoaba-aon ge ǀkhara īsa, ǁîn ge ǀnammi tsî ǃgâiaǂgaob  tsîna ǁîn ǁaegu nē ǃgomǁaegu ǃnâ ūhâ i amaga. ǃGâsan ge ǃnâb khami ge i-ī ǃkhaeb ǃnâ. (Mat. 5:​14-16) ǃGâsan ôasasiban ge mû, on ge ǃkham gere khoen tsîna Jehovaba ge ǃoaba tsoatsoa.

Paulub: ǀNî ǁaegam ge Liberiaba xu gere oa. ǃNona ǃnādem ge ǃnubu ǁaeba ge ǂoa tsî ǀgam ǃnāra ǀoasa kuriba. ǀGui sîsabe ǃgâsas ge sîm ra tsâ ǀgauba ge ǁguiǃā, ǁîs ge ge mî: “Giliadi ǃnâ da ge ge ǁkhāǁkhāhe, î da sida ǁgaumâisa ǂgaob hoab ǀkha ǀnam.” Tsîm ge ǁnāsa ge dī. ǁAeb ge ge hā îm sîm ǃgâsana xu ǀgora, os ge ǁnāsa kaise ge ǃgom ī, sîm ǂgaob khôahe khamîm ge gere tsâ. Xawem ge noxoba ge ǂkhî ī ǃgâsan tsî aoǁnâ sîsenni Liberiab ǃnâ hâ-em ge ǂkhâǃnâ ǁkhā īsa.

Anne: Meib 1996ǁî kuri da ge hakase betels audos ǀkha ǂhâǂhâsa ǂkhanin Liberiab sîsenni xa hâna gere ī-ū. ǃNōrasa ǃkhaiba ǃoa da ge gere ǃnari. ǂgao 16 kilometerga ǃās ǃauga, ǁnā ǁaeb aib ge sida hâ ǃnâ ǃkhaiba ge ǁnāǂamhe. ǁAixa hâ ǃkham-aogu ge ǃapude ǂoab ǃnâ ǂoa tsî ge ǁkhae da, hoa khoeda audosa xu ǂgaeǂui tsî Paulub ǀkha ge ǃnari. Kaise da ge ge ǃhuri. ǁAe-e ǃkharu tsî da ge Pauluba ge mû sida ǃoagub ǃgôaxase tsî i ge ǁîb ǃūsa xu ǀaoba gere ǂnâ. ǂGuro da ge ge ǂâi hâ-i ǂnoa-eb ge ti xawe da ge ge mûǂan ǂnoaheb ga hâ ob ga ǃgû tama hâsa. ǀGui ǃkham-aob ge audosa xub gere ǂhā ǂuibi, o ge ǂnaubi. Ganganxaseb ge kaise ge tsû tama hâ i.

Toro ǃkham audob ge ǀgūse ge mâ i tsî ǃao hâ khoen xa ge ǀoa hâ ī. Mîǁgui da ge ge î da ǂoa xawe i ge soa-e ge ǀkhai ī tsî da ge audos ǃaugaba xu ǃkhōbasen tsî ge mā i. ǃNari-aob ge kaise ǃgarise gere ǃnari tsî da ge ge ǁnā ǁkhā. ǃNari-aoba da ge gere ǀkhoma îb mâ xaweb ge gere ǃao tsî ge mâ tama hâ ī. Xawe da ge ge ǁnā tama hâ ī, mâ da nî ǃkhais kōse. Kaise da ge ge tsâu hâ ī ǃkhōbasensa tsî di ge sida sorode gere ǀkhū ǃaob xa.

Paulub: Xū ōse, ǀurixa tsî doa hâ saran ǀkha da ge kō gu tsî gere ǂhâ mati da ûitsamasa. Sida xōǀkhās ge ǂgui ǁhādi ǀkha ǂnoasa anikunisa ge hâ ī, ǀae nî ǁnāǃā khami gere mûsensa. ǁNā anikunis ǀkha da ge saora tsēs ai Sierra Leonesa ǃoa ge ī. Tsî da ge ǁnāpa ǃauga ge ǁom, kaise da ge gere ǃgôaǃgâ ûitsama da ge īsa xawe da ge sida ǃgâsan ǃaroma gere ǂâiǂhânsen.

Anne: ǃNōrasase da ge betels tawa Freetowni ǃnâ ge sī, ǁnāpan ge ǃgâsana ǃgâise gere kōǃgâ da. Xawe i ge ǃâubasen tama ta hâ xū-e ge ī, Liberiab ǃnâ ta gere ǃkharuǃnâ ǁgai xūna ta ge gere mûnan-ai. Mâ tsēs hoasa ta ge gere ǂâiǂhâsen ǁnā xū-i nî īsa tsî ta ge ǃgāsase ge ǂâi ǁoa i. Ti ǂnamipe ge hâ i xūn hoan ge ǀkharase gere mûsenbate. ǃUi-a ta ge ǃnāsa ǁaeba ǀkhū rase gere ǂkhai tsî ta ge gere ǃao ǀnîsi ī ǁgai xū-e nî īsa. ǃGomse ta ge gere ǀom. Paulub ge ǃkhōte tsî tita ǀkha gere ǀgore. Gaosib ǁnae-amdem ge gere ǁnae ǀkhū toa ta nîs kōse. ǃKhaura khami ta ge gere tsâ tsî ǃaruǀî sîsabese ge ǃoaba ǁoa ī.

Tātsē ta ge ǀuru tite tae-i ge sao rase īsa. ǁNā wekheb ǃnâ da ge ǀgam ǂkhanikha ge hō, ǀguib ge ge Awake! 8 Junib, 1996 i “Coping With Panic Attacks” ti hâ ǃâba ge ūhâ îba. Nēsi ta ge ra ǁnâuǃā tae-i ge tita ǀkha īsa. ǀGamǁîs ge Meib 15, 1996 ǃKhē xu ǂgō-ommi ǃnâ ge hâ ī “Where Do They Get Their Strength?” ti hâba. ǃKhē xu ǂgō-ommi ǃnâb ge ai-īsib tsû hâ gurtsilapes ǀkha ra ǀgopeǀnō da, ǁîs ge ǁgaises ga tsû xawe aiǃgû tsî ra ǁkhana. Sida tsîn ge aiǃgû ǁkhā sida ûib ǃnâ ge ī xūn ga ǂkhabu kai da xawe. Jehovab ge a hui da ǁkhā î da aiǃgû tsî nauna hui. Nē khomaiǃâdi ǃnâ-ūb ge Jehovaba ǂhâ ta hâ huiba ǂhanu ǁaeb ai ge māte. (Mat. 24:45) Ôaǃnâte dī tsî ǁkhā xūna ūhâ ǁkhāǁkhāǃâde ǀhaoǀhaos ge kaise ge huite. ǁAeba ǃkharu tsî di ge ū ta ge hâ ī ǂâiǂhânsende ge bē.

Paulub: Liberiaba ǃoam ge oasī ǃnās hoasam ge kaise gere ǃgâiaǂgao. Sîm ǁgaumâis ǃnâm ge ǁaubexa 20 kuriga ge hâ i. Torob ge ǀam, o i ge ǀapede ge hâ i ǁnâub berosa dī-unusa. Xawe ǃâubasen tamam hâ hînam ge ǀasa ǁgâumâisa ūǃoasa ge ǂganhe.

 Nēs ge kaise sîma ge ǃgomba ī. Kaisem ge sîm di gagasi omaris ǀkha ǀgū ǀhōsagusisa ge ūhâ i tsîm ge ǁîna ge ǁnāxu ǂgao tama hâ i. Xawem ge ǀnai ge mû hâ ī matib ge Jehovaba ǀkhae mîsa sîm ǀaokhoena ǁnāxu tsîm ge Giliada ǃoa ī o. ǁNā-amagam ge ǀasa ǁgaumâisa ge ûǃoa, sîm di ǀasa ǁgaumâis ge Ganab ǀgūse ge hâ i.

Anne: Kaisem ge gere ā Liberiaba xum ge ī o. Burum ge ge Frank ti ǀon hâ gā-ai kaira ǃgâsab ge mî o, “sida xa ro ge nî ǀuru ti.” ǁNāpaxub ge ge ǁguiǃā: “ǂAn da ge a tātsē ro ǀuru da tide ǃkhaisa, xawe ro ge saro ǀasa ǁgaumâisa saro ǂgaob hoab ǀkha nî ǀnam. Jehovaba xu hâ ǁgaumâis ge, ǁnā-amaga saro ǃgâsan ǁnāba hân ai ǂâisa ǂnûi re.” ǃGâsab ge mî xu-i ge ge hui mî, îm ǀasa ǀhōsana ǁnā ǃhūb ǃnâ kuru ǀoro khoen xam ge ǂanhe i tsîn ge hoa xuna ǀasa i amaga.

Paulub: Gaxuse i ge ge ū tama hâ i sîm di ǀasa omarisa Ganab ǃnâ ǀnamsa. ǁNāpan ge ǂgui ǃoaba-aon Jehovab dina ge hâ i. Sîm di ǀasa ǀhōsan di ǂgomǂgomsasib tsî ǀgaisa ǂgomsa xūm ge ǂgui xūna ge ǁkhāǁkhāsen. Tsîm ge Ganab ǃnâm 13 kuriga ǃoaba hâs khaoǃgâ ǀnî hâ buruburuxa xū-e ge ǃkhōǃoa. ǂGan-em ge ge îm Keniab ǁnâub Afrikab-oostes tawa sī ǃoaba. Sîm ǃgâsan Liberiab tsî Ganab ǃnâ hâ nam gere ǁkhore xawem ge ǀasa ǀhōsaguside Keniab ǃnâ hâ ǂgomǂgomsa ǃgâsan ǀkha ge kuru. Ganab tsî Liberiab ǃnâ i ge ǂgui sîsenna hâ ī, khami i ge Keniab ǃnâ ǂgui aoǁnâ sîsen-e ge hâ ī.

Anne: Ti ûib ǃnâ ta ge kaise ǂgui ǃgomsina gere hōǃâ tsî ǀnī ǁaegu ai kaise gere ǃao. ǃAoǃaosa ǃkhain tamas ka io ǃgom mâsin ǃnâ da gâ hâ, o i ge ǀaesen, ǃao tsî ra ǂâiǂhânsen kai da. ǃÂubasen tama da ge hâ Jehovab nē xūna xu nî ǁkhauba da ǃkhaisa. Nēsis tsîna ta ga ǃabu-i di ǀōba ǁnâu, o ta ge ra ǃhuri tsî ti ǃomra hōǃâ tama hâ. Xawe ta ge ge ǁkhāǁkhāsen Jehovab ra mā ǀgaib hoaba sîsen-ūsa, ǁnās ge ǃgâsan ǂkhâǃnâs tsîna ǃkhōǂgā hâ. Xawe ta ge ge mû aiǃgû tsîm ga Elobmîsa khomai, ǀgore, ǀhaode hâǃnâ tsî aoǁnâ ob ge Jehovaba nî hui mî îm sîm di ǁgaumâis ǃnâ hâ.

Paulub: ǀNî ǁaegan ge khoena ra dî, “saro ǁgaumâisa ro ǀnam?” ǃHūgu ge a îxa ǁkhā xawe î ge ǁkhā ǁaeb ai ǃâubasen tama da hâ ǃaorosa xūna a īǁkhā. Tae-e da ǃhūb xa ǃnāsase a ǀnam? ǀŌ-aisa ǃgâsan sida omaris din. ǃKharagagu ǂâidi tsî khaoǃhūga xu da ga ǀkhī xawe da ge ǁkhā ǀgaub ǃnâ Jehovab xa ǃhoa tsî ra ǂâi. ǃGâsanam sī nî ǀgaiǀgai tîm ge ge ǂâi hâ ī xawen ge ǁîna sîma ge ǀgaiǀgai.

ǃHūbaib ǂhawase hâ ǃgâsan ge buruxa ǀkhaeba Jehovaba xu, hoa ǃkhain ai da ge gagasi ǃgâsana ūhâ. ǀHaohâb ǃâda as kōse da ge ǃnōrasase tsâ ǁkhā. Jehovab ge ǀgaiba nî māda î da mâǃkharu tae-i ǀgui-i ga ī xawe.—Fil. 4:13.