Sida aoǁnâ sîsenni ge māsenxa mādi hînan Jehovab di ǀHûǀguitimî-aona ra mān xa ra ǂkhâǃnâhe. Sida ǀhaodi tawa î ge mari-e ao-e tama hâ tsî ǀhaohâb ǁanin tsîn ge ǂgaoǀkhā-e tama hâ disiǁîsa māsa. (Mateub 10:7, 8) Xawe î ge mâ ǀhû-ommi hoab ǃnâ bokside mâ tsî i ge ǂhâba ga khoe-i hoa-e ū i hâ khami a aoǂgā ǁkhā. Māsenxa māde ra dī khoen ǀondi ge xoa mâihe tama hâ.

ǀGui ǀgaub sida mariǁhōga ǃgâise ra kōǃgâs ge ǁkhāǁkhā-ao-i hîna ra matare-e da ge ūhâ tama hâ. Tsî ǀHûǀguitimî-aon ge omsa xu oms ǀkha ǃgûs ǃgao matare-e tama hâ. Tsî sida di ǃoaba ǃkhaigu ge kaise a ǃamku.

Māsenxa mādi hîna Jehovab di ǀHûǀguitimî-aon di ǁnâub berode ǃoa ra sîhen ge tsūkēǃgâgu, sîsaben tsî ǃnarimâra mûǂam-aon ǃgao ra sîsen-ūhe. Tsî ǁnās ge ǃoaba ǃkhaiga oms, Elobmîdi tsî Elobmîs ai a ǃgaoǃgaosa ǂkhanin tsîna ǁgâi tsî sîs tsîna ǃkhōǂgā hâ.

Mâ khoe-i hoa-i ge nî mîǁgui tae-i ǃgao i māsenxa māde ra māsa, aiǁgause ǃoaba ǃkhaiga kōǃgâs tamas ka io ǃhūbaib ǂhawase ra dīhe sîsengu ǃnâ ǂkhâǃnâs tsîna. Mâ ǀhaohâb hoab ge mariǁhōgu ǃnuriba ra mā ǀhaohâb ǁanin ǃgao.