KEMA panotoya matlaktli tonali kema Jesús tlejkotoya iluikak, ipan iljuitl Pentecostés tlen kichiuayayaj ne Judá, ipan xiuitl 33, se 120 Jesús itokilijkauaj mosentilijkej ne Jerusalén ipan se kali. Teipa, chikauak tlaajakako, uan Jesús itokilijkauaj pejkej kamanaltij ika miak tlajtoli tlen amo kiixmatiyayaj. ¿Tlake panoyaya? ToTeotsij kinmakatoya itonal.

Ipan nopa altepetl yajtoyaj tlauel miakej tlen kampa ueli altepemej katli iljuichiuatoj. Nochi mokajkej san tlajtlachixtokej kema kinitakej Jesús itokilijkauaj ueliyayaj kamanaltij kej inijuantij. Pedro kinejki kiniljuis tlake panotoya, yeka kinilnamikilik tlen tlajtolpanextijketl Joel kiijtojtoya, kenijkatsa toTeotsij kinmakaskia itonal itekipanojkauaj uan kichiuaskia ma uelikaj kichiuakaj uejueyi tlamantli (Joel 2:28, 29). Ni tlen uelkej kichijkej, xitlauak kinextik kenijkatsa toTeotsij kinteochijtoya katli kineltokayayaj Cristo uan amo Israel altepetl. Yeka, katli kinekiskiaj kitekipanosej toTeotsij monekiskia mochiuasej Cristo itokilijkauaj.

Maske kej nopa panotoya, Cristo ikualankaitakauaj pejkej kintlaijiyouiltiaj itokilijkauaj. Se tonali sekij kintsajkej, uan tlayoua ualajki se iluikaejketl, kinkixtiko uan kiniljuik ma nojua tlajtolmoyauakaj. Kema san ontlaneski, kalakitoj ipan teokali uan pejkej tepouiliaj tlen Jesús. Nopa ininkualankaitakauaj tlauel kinkualankamakak, yeka kinnauatijkej ma oyokmo tlajtolmoyauakaj. Uan apóstoles amo majmajkej yeka kinnankilijkej: “Moneki tijneltokilisej toTeko Dios achtoui uan ax tlakamej” (Hechos 5:28, 29).

Ininkualankaitakauaj kitekiuijkej miak tlamantli ika kintlaijiyouiltijkej. Sekij judáeuanij kiijtojkej Esteban tlaijixnamikiyaya uan kimiktijkej. Saulo, se telpokatl tarsoejketl katli kinkualankaitayaya Cristo itokilijkauaj, no kiitak kema kimiktijkej. Teipa, yajki Damasco pampa kinekiyaya kinitskiti katli kinasiskia. Uan kema yauiyaya ojtipa, se tlauili tlen iluikak kiixtlamiltik. Uajka kikajki se akajya katli kiiljuiyaya: “Saulo, Saulo, ¿para tlen tinechtlaijiyouiltia?”. Uan amo kimatiyaya ajkia, yeka kitlajtlanik: “¿Ajkeya ta, noTeko?”. Uan ya kinankilik: “Na niJesús” (Hechos 9:3-5).

Kema nayopatik, Jesús kititlanki se itokilijka katli itoka Ananías ma kichiuati sampa ma tlachia. Saulo moatsonpoliuiltik uan pejki tlajtolmoyaua ika miak pakilistli. Teipa, kiixmatkej kej apóstol Pablo, se Cristo itokilijka katli amo kema kikauayaya tlajtolmoyaua.

Achtoui, Jesús itokilijkauaj san judáeuanij uan samariaeuanij kinpouiliyayaj tlen toTeotsij iTlanauatijkayo. Se tonali, se iluikaejketl monextik iixpa Cornelio katli kineltokayaya toTeotsij uan kinyakanayaya se keskij soldados tlen Roma, uan kititlanki ma kinotsati apóstol Pedro. Ya asito ika sekinok Jesús itokilijkauaj uan kinojnotski nopa tlayakanketl uan ichampoyouaj. Kema ni apóstol kinnojnotsayaya, toTeotsij kinmakak itonal nopa tlaneltokanij, uan Pedro tlatitlanki ma kinatsonpoliuiltikaj ipan Jesús itoka. Ni tlen panok kinextik kenijkatsa katli ueli, maske kampa ueli euaj, uelis no kipiasej nemilistli nochipa. Uajka, nopa kuali tlajtoli momoyauaskia ipan nochi altepemej.

(Mokixtijtok ipan Hechos 1:1–11:21.)