1, 2. 1) ¿Kenke kema san tijmatij se akajya itoka amo kiijtosneki kuali tikixmatij? 2) ¿Tlake tlamantli tlen Jesús miakej amo kikuamachilijtokej?

IPAN Tlaltipaktli itstokej miakej katli tlauel kinixmatij. Sekij tlauel kinixmatij kampa euaj uan sekinok ipan nochi Tlaltipaktli. Kema tijmati itoka se akajya tlen tlauel kiixmatij, amo kiijtosneki kuali tikixmati, pampa amo tijmati nochi tlen kichijtok o kenijkatsa monejnemiltia.

² Maske ya panotok se 2,000 xiuitl kema Jesucristo itstoya ipan Tlaltipaktli, kampa ueli kiilnamiktokej. Miakej amo kimatij ajkia eliyaya. Sekij kiijtouaj san eliyaya se kuali tlakatl o se tlajtolpanextijketl. Uan sekij kineltokaj Jesús yaya toTeotsij uan moneki ma tijueyichiuakaj. ¿Nelnelia ni?

3. ¿Kenke tlauel moneki tikixmatisej toTeotsij Jehová uan Jesucristo?

³ ¿Kenke tlauel moneki xijmati katli melauak tlen Jesús? Pampa Biblia kiijtoua: “Inijuantij kipiaj yolistli yankuik para nochipa intla mitsixmatij ta tlen melauak tiDios uan axaka seyok, uan nojkia nechixmatij na niJesucristo tlen tinechtitlantok” (Juan 17:3). Kena, tlaj nelnelia tikixmatisej toTeotsij Jehová uan Jesucristo, kichiuas ma tiitstokaj nochipa ipan Xochimili (Juan 14:6). Uan  Jesús kuali technextilik kenijkatsa kinamiki ma timonejnemiltikaj uan ma timouikakaj ininuaya sekinok (Juan 13:34, 35). Ipan tlamachtili se tlen ni amochtli tikitakej tlake nelnelia tlamachtia Biblia tlen toTeotsij. Nama ma tikitakaj tlake tlamachtia Biblia tlen Jesucristo.

4. ¿Tlake kiijtosneki tokajyotl Mesías uan Cristo?

⁴ Kema poliuiyaya miak xiuitl kema tlakatiskia Jesús, Biblia kiijtok toTeotsij kititlaniskia Mesías o Cristo.  Mesías (ipan tlajtoli hebreo) uan Cristo (ipan tlajtoli griego) kiijtosneki “Tlapejpenili”. Uajka katli toTeotsij kititlaniskia, yaya kitlapejpeniskia uan kimakaskia se tekitl tlen tlauel ipati. Ipan sekinok tlamachtili tlen ni amochtli tikitasej kenijkatsa nopa Mesías kichiuas se tlauel kuali tekitl kema toTeotsij kichiuas tlen mosentlalijtok. Nojkia tikitasej kenijkatsa Jesús uelis techteochiuas ipan ni tonali. Uelis kema Jesús ayamo tlakatiyaya, miakej motlajtlaniyayaj: “¿Ajkia elis Mesías?”.

5. ¿Ipan tlake kuali motemachijtoyaj Jesús itokilijkauaj?

⁵ Jesús itokilijkauaj motemachijtoyaj yaya eliyaya nopa Mesías katli ualaskia (Juan 1:41). Se itokilijka tlen itoka Simón Pedro kiiljuik: “Ta tiCristo” (Mateo 16:16). ¿Kenke Jesús itokilijkauaj motemachijtoyaj Jesús eliyaya nopa Mesías? ¿Kenke tojuantij nojkia uelis timotemachisej yaya Mesías?

6. ¿Kenijkatsa kinpaleuik Jehová ma kimatikaj itekipanojkauaj ajkia eliskia Mesías?

⁶ Nopa tlajtolpanextianij katli itstoyaj kema Jesús ayamo tlakatiyaya kiijtojkej miak tlamantli tlen kinpaleuiskia kimatisej ajkia eliskia Mesías. Ximoiljui: tlaj monekiskia tijtemoti se akajya tlen amo tikixmati kampa itstokej tlauel miakej, mitspaleuiskia tijmatis kenijkatsa nopa maseuali. Ika Mesías nojkia kej nopa panok, pampa ika tlajtolpanextianij Jehová tematiltik tlake kichiuaskia uan tlake kipanoskia. Kej ni, toTeotsij itekipanojkauaj kimatiskiaj ajkia eliskia Mesías kema kiitaskiaj moaxitia nochi nopa tlajtolpanextili.

7. ¿Tlake ome tlajtolpanextili moaxitik ipan Jesús?

⁷ Ma tikitakaj ome tlajtolpanextili. Kema poliuiyaya kipano 700 xiuitl kema asiskia Mesías, nopa tlajtolpanextijketl Miqueas kiijtok tlakatiskia ipan se pilaltepetsi tlen itoka Belén ipan tlali Judá (Miqueas 5:2). Uan,  ¿kanke tlakatki Jesús? Ipan pilaltepetsi Belén (Mateo 2:1, 3-9). Ipan Daniel 9:25, tikitaj nopa seyok tlajtolpanextili tlen moijkuilok kipano 500 xiuitl kema Jesús ayamo tlakatiyaya, uan ni kinpaleuik xitlauak kimatiskiaj Mesías asiskia ipan xiuitl 29 y.u.J. * Kej moaxitik ni ome uan sekinok tlajtolpanextili kinextia Jesús yaya nopa Mesías katli kiijtojtoyaj ualaskia.

8, 9. ¿Kenijkatsa neski Jesús eliyaya Mesías kema moatsonpoliuiltik?

⁸ Kema nechka tlamiskia xiuitl 29 kimatkej Jesús eliyaya nopa Mesías. Ipan nopa tonali Jesús kiiljuik Juan teAtsonpoliuiltijketl ma kiatsonpoliuilti ipan ueyatl Jordán. Kema se akajya kichiua ni, nochi itlakayo atsonpoliui atitla, kej nopa kinextia motemaktilia iixpa toTeotsij. Jehová kiiljuijtoya Juan kichiuaskia ma kiita tlen ika kimatiskia ajkia eliskia Mesías, uan ni kiitak kema moatsonpoliuiltik Jesús. Biblia kiijtoua: “Teipa kema Jesús kiatsonpoliuiltijkej uan kisayaya ipan atl; ¡xikita!, tlapojki iluikaktli, uan ya kiitak temotiualayaya itsonpak toTeotsij itonal kej se paloma. ¡Xikita! Nojkia kakistik ne iluikak se tlen kiijtok: ‘Ya noKone, tlen nikiknelia uan nechpaktia tlen kichiua’” (Mateo 3:16, 17, TNM). Kema Juan kiitak uan kikajki nopa, nimantsi kineltokak Jesús eliyaya katli toTeotsij kititlantoya (Juan 1:32-34). Uajka kema toTeotsij itonal o ichikaualis temok ipan ya, Jesús mochijki Mesías o Cristo, katli toTeotsij kitlalijtoya kej Tlayakanketl uan Tlanauatijketl (Isaías 55:4).

⁹ Nopa tlajtolpanextili tlen moaxitijtok uan tlen Jehová kiijtok, kinextia Jesús yaya Mesías katli ualaskia. Biblia nojua kinankilia ome tlajtlanili tlen tlauel ipati: ¿Kanke euayaya Jesucristo? ¿Uan kenijkatsa eliyaya?

10. ¿Kenijkatsa ipan Biblia techmachtia Jesús ipa itstoya ne iluikak kema ayamo ualajtoya ipan Tlaltipaktli?

¹⁰ Ipan Biblia techmachtia Jesús itstoya ne iluikak kema ayamo ualayaya ipan Tlaltipaktli. Nopa tlajtolpanextijketl Miqueas kiijtok Mesías tlakatiskia ne Belén, uan nojkia kiijtok ya “nejnentiualajtok hasta uejkajkia” (Miqueas 5:2). Kema Jesús ayamo ualajtoya ipan Tlaltipaktli miakpa kiijtok ipa itstoya ne iluikak (xijpoua Juan 3:13 uan 6:38 uan 62; 17:4, 5). Nepa eliyaya se iluikaejketl uan tlauel kuali mouikayaya iuaya Jehová.

11. ¿Kenijkatsa kinextia Biblia Jehová tlauel kiiknelia iKone Jesús?

¹¹ Jehová tlauel kiiknelia iKone Jesús. Biblia kiijtoua Jehová achtoui kichijki Jesús “kema aya tleno onkayaya tlen tlachijchiuali” (Colosenses 1:15). * Jesús amo sanse kej sekinok pampa ya “iKone iyojtsi” (Juan 3:16). Ni kiijtosneki kema toTeotsij kichijki Jesús amo aka kipaleuik. Uan kema Jehová kichijki nochi nopa sekinok tlamantli san Jesús kipaleuik (Colosenses 1:16). Nojkia kitokaxtiaj “Tlajtoli” (Apocalipsis 19:13). Ni tokajyotl kinextia Jesús tematiltiyaya tlen iTata kinauatiyaya. Uelis kinmatiltiyaya o kiniljuiyaya tlake monekiyaya kichiuaskiaj sekinok iluikaeuanij uan maseualmej.

12. ¿Tlake tlamantli kinextia toTeotsij amo sanse kej iAchtouikone?

¹² ¿Timoiljuia toTeotsij sanse kej iAchtouikone kej sekij moiljuiaj? Biblia amo ya nopa tlamachtia. Kej tikitakej ipan párrafo 11, Jehová yaya kichijki iKone. Uajka iKone kipixki ipejya uan Jehová amo kipia ipejya yon itlamia (Salmo 90:2). ToTeotsij iAchtouikone amo kema  moiljuik mochiuaskia sanse kej iTata. Biblia tlamachtia teTata tlauel ueyi amo kej iKone (xijpoua Juan 14:28; 1 Corintios 11:3). San Jehová “kipia nochi Chikaualistli” (Génesis 17:1). Uajka amo itstok seyok kej ya. *

13. ¿Kenke Biblia kiijtoua toTeotsij iKone “iixkopinka toTeko Dios tlen axaka ueli kiita”?

¹³ Uejkajkia, Jehová uan iAchtouikone ipa tlauel kuali mouikayayaj kema ayamo kichiuayayaj Tlaltipaktli uan sitlalimej. ¡Nelia tlauel moikneliaj! (Juan 3:35; 14:31.) Jesús eliyaya kej iTata. Yeka Biblia kiijtoua ya “iixkopinka toTeko Dios tlen axaka ueli kiita” (Colosenses 1:15). Kej konemej sanse tlachiaj kej inintatauaj, toTeotsij iKone tlen itstok ne iluikak nojkia kinextia kuajkuali tlamantli kej iTata.

14. ¿Kenijkatsa Jehová iAchtouikone tlakatki kej se maseuali?

¹⁴ Jehová iAchtouikone kinejki kikauas iluikaktli, yeka ualajki ipan Tlaltipaktli uan mochiuako se maseuali. Uelis timoiljuia: “¿Kenijkatsa se iluikaejketl tlakatki kej se maseuali?”. Jehová kipanoltik Jesús inemilis ipan María itlakayo katli eliyaya se ichpokatl judeaejketl tlen amo monamiktijtoya. Ni konetl tlen kipixki María amo tlajtlakole eliyaya pampa itata amo eliyaya se maseuali (Lucas 1:30-35).

15. ¿Kenijkatsa techpaleuia Jesús nojua kuali ma tikixmatikaj Jehová?

¹⁵ Nochi tlen kichijki uan tlen kiijtok Jesús kema itstoya ipan Tlaltipaktli techpaleuia kuali ma tikixmatikaj ya uan iTata Jehová. ¿Kenke? Pampa Jesús kichiua kej iTata. Yeka kiiljuik se itokilijka: “Yajaya tlen nechitstok, ya kiitstok noTata” (Juan 14:9). Ipan nopa naui pilamochtsitsij  tlen uala ipan Biblia kej Mateo, Marcos, Lucas uan Juan, katli kiixmatij kej Evangelios, tikitaj miak tlamantli tlen Jesucristo kichijki uan nopa kuajkuali tlamantli tlen kinextik ipan inemilis.

16. ¿Tlake temachtiyaya Jesús, uan ajkia kiiljuiyaya tlake tlamachtiskia?

¹⁶ Jesús kitokaxtiyayaj “Tlamachtijketl” (Juan 1:38; 13:13). ¿Tlake temachtiyaya? Kimoyauayaya nopa “kuali tlajtoli tlen kejatsa eltos kema toTeko Tlanauatis” o kuali tlamachtili tlen toTeotsij iTlanauatijkayo. Ni tekichiuas ipan nochi Tlaltipaktli uan toTeotsij tlauel kinteochiuas katli amo kikauaj (Mateo 4:23). ¿Ajkia kiiljuiyaya tlake tlamachtiskia? ITata Jehová, pampa kiijtok: “Axnitlamachtia san tlen na nimoiljuia. Nitlamachtia tlen kiijtoua noTata tlen nechtitlantok” (Juan 7:16). Jesús kimatiyaya iTata kinekiyaya maseualmej ma kimatikaj nopa kuali tlamachtili tlen toTeotsij iTlanauatijkayo. Ipan tlamachtili chikueyi tikitasej tlake sekinok tlamantli kichiuas iTlanauatijkayo.

17. ¿Kanke temachtiyaya Jesús, uan kenke kichijki ika nochi iyolo?

¹⁷ ¿Kanke temachtiyaya Jesús? Kampa ueli: ipan pilaltepetsitsij, ipan uejueyi altepemej, kampa tlanamakayayaj uan kajkalpa. Jesús amo san kinchiayaya maseualmej ma kinechkauikaj, ya kintemouayaya (Marcos 6:56; Lucas 19:5, 6). ¿Kenke kitekiuik miak tonali uan chikaualistli kema tlajtolmoyajki uan tlamachtik? Pampa ya nopa kinekiyaya iTata ma kichiua, uan Jesús nochipa kineltokak (Juan 8:28, 29). Nojkia pampa tlauel kinikneliyaya katli kinmachtiyaya (xijpoua Mateo 9:35 uan 36). Jesús kimatiyaya tlauel monekiyaya ma kitlakakilikaj nopa tlamachtili tlen toTeotsij iTlanauatijkayo, pampa katli tlayakanayayaj ipan religiones amo kinmachtiyayaj katli melauak tlen toTeotsij uan tlen mosentlalijtok kichiuas.

18. ¿Tlake tlauel mitspaktia tlen Jesús kinextik ipan inemilis?

 ¹⁸ Jesús eliyaya se kuali tlakatl, tlauel teikneliyaya uan kipixtoya kuali iyolo. Tenojnotsayaya ika kuali uan konemej kuali kiyolmatiyayaj kema itstoyaj iuaya (Marcos 10:13-16). Amo techikoikneliyaya. Kinkualankaitayaya katli kichiuayayaj tlen amo xitlauak uan katli tetlachtekiliyayaj (Mateo 21:12, 13). Jesús kintlepanitak siuamej maske sekinok amo kintlepanitayayaj yon kinpatiitayayaj (Juan 4:9, 27). Ya nelnelia amo moueyimatiyaya. Se tonali kinikxipajpajki apóstoles, maske nopa kichiuayayaj san tlapaleuianij.

19. ¿Kenijkatsa kinextik Jesús tlauel kiyolkokouayaya kema kinitayaya tlaijiyouiyayaj?

¹⁹ Jesús kiyolkokouayaya kema kinitayaya tlaijiyouiyayaj maseualmej, yeka kitekiuik toTeotsij itonal uan kinchikajki (Mateo 14:14). Se tonali, se tlakatl tlen tlakayopalaniyaya kitemoto uan kiiljuik: “Intla tijneki, uelis tinechchikauas”. Kema Jesús kiitak kiyolkokok, yeka kitlalanki  ima, kiitskik uan kiiljuik: “Kena, nijneki. Ximochikaua amantsi”. ¡Uan nopa tlakatl mochikajki! (Marcos 1:40-42.) ¡Ximoiljui kenijkatsa tlauel yolpajki!

20, 21. ¿Kenke Jesús tlauel kuali kinextik kenijkatsa moneki tijneltokasej uan amo kema tijkauasej toTeotsij?

²⁰ Jesús tlauel kuali kinextik kenijkatsa tijneltokasej uan amo kema tijkauasej toTeotsij. Maske Jesús tlauel kikualankaitakej uan kitlaijiyouiltijkej amo kema kikajki iTata katli itstok iluikak. Uan nojkia amo kikajki ma kikajkayaua Satanás (Mateo 4:1-11). Se keskij ichampoyouaj amo nochipa kineltokakej uan kiiljuiyayaj amo tlalnamikiyaya (Marcos 3:21). Maske Jesús kipanok nopa, amo moyolkokok uan amo kikajki kitekipanok toTeotsij. Jesús kiijiyouik kema ikualankaitakauaj kitlaijiljuijkej uan kipinaualtijkej uan amo kinejki momakuepas (1 Pedro 2:21-23).

 ²¹ Jesús amo kema kikajki toTeotsij maske ikualankaitakauaj tlauel kitlaijiyouiltijkej (xijpoua Filipenses 2:8). Ximoiljui kenijkatsa tlaijiyouik kema kimiktijkej. Kiijiyouik kema tlanauatianij kiitskijkej, kema kiistlakauijkej, kema tlanauatijkej ma kimiktikaj, kema kipinaualtijkej uan kema soldados kitlaijiyouiltijkej. Kema kiuiyonijtoyaj ipan kuauitl uan nechka mikiskia kiijtok: “¡Ya tlanki noteki!” (Juan 19:30). Kema ya panotoya eyi tonali, iTata tlen itstok iluikak kiyolkuik kej se iluikaejketl (1 Pedro 3:18). Uan teipa kema panok se keski semanas sampa yajki iluikak, uan nepa “moseuik inejmatl toTeko Dios” kampa kichiaskia ma kitekimaka toTeotsij (Hebreos 10:12, 13).

22. ¿Tlake uelki kichijki Jesús pampa amo kema kikajki toTeotsij?

²² ¿Tlake uelki kichijki Jesús pampa amo kema kikajki toTeotsij? Imikilis kichiua ma timotemachikaj uelis tiitstosej nochipa ipan Xochimili tlen mochiuas ipan Tlaltipaktli, kej uejkajkia mosentlalijtoya Jehová. Ipan nopa seyok tlamachtili tikitasej kenijkatsa ika Jesús imikilis nelnelia mochiuas ni.