MIAKEJ tlauel kitlepanitaj kuamapeli. Ipan se amochtli kiijtoua nopa cruz “kinixnextia religiones tlen tlaneltokaj ipan Cristo”. ¿Kinamikiskia nojkia ma tijtekiuikaj?

Moneki ma tijmajtokaj Jesús amo mijki ipan se kuamapeli o cruz. Nopa tlajtoli staurós ika griego tlen kitlajtolkuepaj kej “cruz”, kiijtosneki se “kuauitl xitlauak”. Ni “amo kiijtosneki ome kuauitl, se ijkatok uan se moixtlapalojtok [...]. Ika griego [Nopa Yankuik Tlajtoli] amo tleno kinextia tlaj kiijtosneki ome kuauitl” (The Companion Bible).

Ipan sekij textos kitekiuiaj tlajtoli xýlon ika griego tlen kiijtosneki “kuauitl”. Kiampa kinextijkej ipan tlake kimiktijkej Jesús (Hechos 5:30; 10:39; 13:29; Gálatas 3:13; 1 Pedro 2:24, TNM).

 Hermann Fulda kiijtoua kenke maseualmej kinmiktiyayaj ipan kuauitl: “Kampa amo onkayaya kuauitl, san kiketsayayaj se, uan nopaya kinkuapilouayayaj temiktianij, kinmailpiyayaj o kinmalavosminayayaj uan ininikxiuaj nojkia” (Das Kreuz und die Kreuzigung [Kuamapeli uan kampa kinmiktiyayaj]).

Biblia techpaleuia ma tijneltokakaj tlen nelia. Apóstol Pablo kiijtok: “Kema Cristo, kejuak techkojki, techmakixtik tlen nopa tlatelchiuali katli kiijtoua nopa Tlanauatili, yaya kitelchijkej uan amo tojuantij, pampa ijkuilijtok: ‘Tlatelchiuali katli kikuapilouaj ipan se kuauitl’” (Gálatas 3:13, TNM). Pablo kikixtik ni tlajtoli ipan Deuteronomio 21:22 uan 23, kampa kiijtoua temiktiyayaj ipan se kuauitl, uan amo ipan se kuamapeli. Katli kiampa mikiyaya, kiitayayaj kej “tlatelchiuali”, yeka amo kinamiki ma tijpiakaj tochaj se tlaixkopinkayotl kampa nesi Cristo kikuamapeloltijtokej.

Maske Cristo amo mijki ipan se kuamapeli, ¿tlake panok teipa kema ya miktoya? Ipan nopa 300 xiuitl tlen panotiajki, katli kineltokayayaj Cristo amo kitekiuijkej kuamapeli kema tlaueyichiuayayaj. Ipan xiuitl 313, tlanauatijketl Constantino mokalakik ipan se religión tlen amo melauak uan pejki tlamachtia ma motekiui kuamapeli ipan ireligión. Maske amo tijmatij kenke tlamachtik ni, Jesús amo mijki ipan se kuamapeli. Ni pejkej kitekiuiaj katli amo tlaneltokaj ipan Cristo. Ipan se amochtli tlen religión católica kiijtoua: “Nopa kuamapeli kitekiuijkej kema ayamo itstoyaj Cristo itokilijkauaj uan nojkia katli amo tlaneltokayayaj ipan Cristo” (New Catholic Encyclopedia). Uan sekij kiijtouaj ika nopa kiueyichiuayayaj Tonati uan ika iljuichiuayayaj kampa momekatiyayaj.

Uan, ¿kenke tlamachtijkej ma motekiui? Uelis pampa kinekiyayaj sekinok ma mokalakikaj ipan ininreligión. Maske tlamachtijkej nopa, Biblia kiijtoua amo kuali  tikintekiuisej tlaixkopinkayomej (2 Corintios 6:14-18). Nojkia kiijtoua amo ma tijtekiuikaj sekinok tlamantli (Éxodo 20:4, 5; 1 Corintios 10:14). Yeka, Cristo itokilijkauaj amo kitekiuiaj kuamapeli kema kiueyichiuaj toTeotsij. *