JESÚS tlanauatik ma kiilnamikikaj imikilis o “toTeko iTlakualis” (1 Corintios 11:20). ¿Kenke tlauel ipati? ¿Kema uan kenijkatsa moneki moilnamikis?

Jesús kipeualtik ipan youali kema judeaeuanij kichiuayayaj nopa Pascua ipan xiuitl 33 y.u.J. Nopa Pascua mochiuayaya sampatsi sejse xiuitl ipan tonali 14 tlen mestli nisán (ni nesi ipan judeaeuanij inincalendario). Kema peuayaya monextia Mestli, peuayaya nopa achtoui tonali tlen mestli nisán. Uan kema panoyaya 13 tonali, kipeualtiyayaj Pascua.

Ipan nopa youali, Jesús kiiljuik Judas Iscariote ma kisa uan teipa kipeualtik toTeko iTlakualis ininuaya apóstoles. Ni kipatlak nopa Pascua tlen kichiuayayaj judeaeuanij, yeka Cristo imikilis moilnamiki sampatsi ipan se xiuitl.

Biblia kiijtoua: “Jesús kiitskik se pantsi uan kitlaskamatki  iTata uan kitlapanki, uan techmajmakak tiimomachtijkauaj uan techiljuik: ‘Xijkuikaj ni pantsi uan xijkuakaj. Ni notlakayo’. Teipa kikuik se taza ika xokomekatl iayo uan kitlaskamatki iTata uan techmajmakak, techiljuik: ‘Nochi inmojuantij xikikaj ipan ni taza, pampa ni noeso tlen nijtoyauas para nijpeualtis nopa yankuik tlajtolsenkauali tlen toTeko kichiua ika tlakamej [uan kiampa ma kintlapojpoljuikaj miakej maseualmej]’” (Mateo 26:26-28).

Sekij kiijtouaj nopa pantsi, Jesús nelia kikuepki inakayo, uan vino kikuepki ieso. Maske moiljuiaj nopa, kema Jesús kinmajmakak nopa pantsi, itlakayo nejmaxtik eltoya. Uan nopa apóstoles amo kikuajkej Jesús inakayo yon kiikej ieso, pampa ika nopa kiixpanotoskiaj toTeotsij itlanauatiljuaj (Génesis 9:3, 4; Levítico 17:10). Ipan Lucas 22:20 kiijtoua: “Kiitskik se taza uan kiniljuik. Ni noeso. Ika noeso tlen nijtoyauas inmopampa nijpeualtis itekiuejkayo nopa yankuik tlajtolsenkauali ika tlakamej uan toTeko”. ¿Nelia nopa estli mochijki “nopa yankuik tlajtolsenkauali”? Amo, pampa se tlajtolsenkaualistli kiijtosneki kema se mokaua kichiuas se tlenijki iuaya seyok, uan amo se tlamantli tlen se uelis kiitskis.

Nopa pantsi kiixnextia Cristo itlakayo tlen amo tlajtlakole. Yeka Jesús kitekiuik nopa pantsi tlen mokajki ipan Pascua katli amo kixokoltijtoyaj ika tlasonejkayotl (Éxodo 12:8). Biblia kiijtoua nopa tlasonejkayotl kiixnextia tlajtlakoli. Yeka, nopa pantsi tlen kitekiuik Jesús kiixnextia itlakayo tlen amo tlajtlakole katli temaktilik kej se tlakajkaualistli (Mateo 16:11, 12; 1 Corintios 5:6, 7; 1 Pedro 2:22; 1 Juan 2:1, 2).

Nopa vino kiixnextia Jesús ieso, ika ni kipia ipati nopa yankuik tlajtolsenkaualistli uan ika ni kintlapojpoljuiskiaj maseualmej. Yeka, itstokej se keskij tlen amo sokiyojkej iixpa Jehová, inijuantij nojkia itstosej ipan nopa  yankuik tlajtolsenkaualistli (Hebreos 9:14; 10:16, 17). Ika ni, nopa 144,000 katli temachmej, uelis yasej iluikak. Nepa elisej tlanauatianij uan sacerdotes, uan kinpaleuisej maseualmej (Génesis 22:18; Jeremías 31:31-33; 1 Pedro 2:9; Apocalipsis [Revelación] 5:9, 10; 14:1-3).

¿Ajkia kikuaj nopa pantsi uan kiijij nopa vino? San katli itstokej ipan nopa yankuik tlajtolsenkaualistli uan motemachiaj itstosej ne iluikak. ToTeotsij itonal kichiua ma motemachikaj elisej tlanauatianij ne iluikak (Romanos 8:16). Inijuantij tekichiuasej iuaya Jesús (Lucas 22:29).

Uan, ¿tlake kichiuaj katli motemachiaj itstosej ipan Tlaltipaktli? Monechikouaj kema moilnamiki toTeko iTlakualis. Maske amo kikuaj nopa pantsi uan amo kiiji nopa vino, kinextiaj kitlepanitaj ni tonali. ToTeko iTlakualis moilnamiki sampatsi ipan se xiuitl, ipan tonali 14 tlen mestli nisán, kema ya kalaki Tonati. Maske ayokmo miakej mokajtokej tlen motemachiaj itstosej ne iluikak, nochi Cristo itokilijkauaj tlauel kipatiitaj ni tonali, pampa techpaleuia ma timoyoliljuikaj kenijkatsa Jehová uan Jesucristo tlauel techikneliaj (Juan 3:16).