SEKINOK TLAMACHTILI
¿Kenke tlauel pankiski xiuitl 1914?
KEMA ayamo eliyaya xiuitl 1914, se keskij katli momachtiyayaj Biblia, tematiltijkej ipan 1914 panoskia tlamantli tlen tlauel ipati. ¿Tlake panoskia? ¿Kenke tlauel pankisaskia nopa xiuitl?
Ipan Lucas 21:24 Jesús kiijtok: “Axisraelitajmej ipan mokejketsasej altepetl Jerusalén [...] hasta tlamis nopa tonali tlen toTeko kitlalijtok”. Altepetl Jerusalén eltoya ne Judea kampa tekichiuayayaj katli eliyayaj tlen David ichampoyouaj (Salmo 48:1, 2). Inijuantij amo eliyayaj kej sekinok tlanauatianij, pampa kintekitlalijtoya Jehová (2 Crónicas 1:8). Uajka, ika Jerusalén Jehová kiixnextik kenijkatsa tlanauatia.
¿Kenijkatsa uan kema pejkej ipan ‘mokejketsaj’ toTeotsij itlanauatijkayo? Ipan xiuitl 607 a.u.J., kema babiloniaeuanij moaxkatijkej Jerusalén. Ipan nopa tonali, Jehová ayokmo kinnauatik, pampa David ichampoyouaj ayokmo tekichijkej (2 Reyes 25:1-26). Jerusalén amo nochipa ipan ‘mokejketsaskiaj’, pampa Ezequiel kiijtok Sedequías kinauatijkej ni: “Xijkixti mocorona tlen yejyektsi pampa ayok tielis titlanauatijketl. Axonkas seyok tlanauatijkayotl nikaj hasta ipan nopa tonali kema ualas nopa tlakatl tlen nelia kinamiki ma eli tlanauatijketl. Uan na nijtekimakas para ma tlanauati” (Ezequiel 21:26, 27). Jesús yaya ‘nelia kinamikiyaya’ kiselis David itlanauatijkayo (Lucas 1:32, 33). Uajka, kema Jesús eliskia Tlanauatijketl, ayokmo ipan ‘mokejketsaskiaj’ Jerusalén.
¿Kema moaxitik ni? Jesús kiijtok katli amo judeaeuanij, tekichiuaskiaj san se keski xiuitl. Ipan Daniel capítulo 4 kiijtoua keski uejkauaskia. Nopaya kiijtoua Nabucodonosor, katli tlanauatiyaya Babilonia kitemijki kitsontejkej se ueyi kuauitl, kikajkej san kuatsomitl uan kiilpijkej ika se tepostli, uan kiampa ayokmo chamaniskia. Teipa, se iluikaejketl tlanauatik: “Para chikome xiuitl keja nopa ma eli” (Daniel 4:10-16).
Kemantika nopa kuauitl kinixnextia tekichiuanij (Ezequiel 17:22-24; 31:2-5). Uajka, kema kitsontejkej nopa kuauitl, kiixnextik Jehová ayokmo kintekiuiskia tekichiuanij ne Jerusalén. Ni nojkia kinextik ipan ‘mokejketsaskiaj’ “Jerusalén” se “chikome xiuitl”. ¿Uan ni panoskia san chikome xiuitl?
Ipan Traducción del Nuevo Mundo Revelación o Apocalipsis 12:6 uan 14, kiijtoua nopa eyi xiuitl uan tlajko kiijtosneki “mil doscientos sesenta tonali”. Uajka, nopa “chikome xiuitl” uejkauaskia 2,520 tonali. Kema kitsontlamiltijtoyaj Jerusalén, sekinok altepemej amo kintlaijiyouiltijkej toTeotsij itlanauatijkauaj san 2,520 tonali. Uajka, ni “chikome xiuitl” amo moaxitiskia san ipan nopa tonali. Ipan Números 14:34 uan ipan Ezequiel 4:6, kiijtoua: “Sejse tonal kiixnextis se xiuitl”. Uajka, tlaj nopa “chikome xiuitl” kej nopa tijpouaskiaj eliskia 2,520 xiuitl.
Ni 2,520 xiuitl pejki moaxitia ipan octubre tlen xiuitl 607 a.u.J., kema babiloniaeuanij moaxkatijkej Jerusalén uan ayokmo kikajkej ma tekichiua Sedequías. Ni 2,520 xiuitl tlanki moaxitia ipan octubre tlen xiuitl 1914. Uajka, ipan 1914 tlanki nopa “tonali tlen toTeko kitlalijtok”, uan toTeotsij kitekitlalik Jesús ne iluikak (Salmo 2:1-6; Daniel 7:13, 14). *
Jesús kiijtok kema ‘mokuepaskia’ uan tekichiuaskia ne iluikak, onkaskia tlauilankayotl, mayantli, kokolistli uan mojmoliniskia tlali (Mateo 24:3-8; Lucas 21:11). Ni nelia panotok. Uan kinextia ipan 1914, pejki tekichiua toTeotsij iTlanauatijkayo ne iluikak, uan pejki “itlamia tonali” (2 Timoteo 3:1-5).
^ párr. 4 Tlaj peuas tijpouasej ipan octubre tlen xiuitl 607 a.u.J. uan titlamisej ipan octubre tlen xiuitl 1 a.u.J., tijpouasej 606 xiuitl. Uan pampa amo onka xiuitl cero, tlaj peuas tijpouasej ipan octubre tlen xiuitl 1 a.u.J. uan titlamisej ipan xiuitl 1914 y.u.J., tijpouasej 1914 xiuitl. Uajka, tlaj 606 tijpouasej sansejko ika 1,914 mochiuas 2,520 xiuitl. Nojua xikita kenijkatsa kitsontlamiltijkej Jerusalén ipan xiuitl 607 a.u.J., ipan nopa tlamachtili “Cronología” ipan amochtli Perspicacia para comprender las Escrituras, tlen kichijtokej Jehová itlajtoltemakauaj.
