1. ¿Tlake tikixtomasej tlen Jesús kiijtok ipan se tlamaijtoli?

IPAN nochi Tlaltipaktli tlauel miakej kimatij tlen Jesús kiijtok ipan se tlamaijtoli. Nopaya Jesucristo techmachtik tlake tlen tlauel ipati uelis titlajtlanisej kema timomaijtosej. Ma tikitakaj nopa achtoui eyi tlamantli, uan kej nopa kuali tijkuamachilis tlen Biblia tlamachtia.

2. ¿Tlake eyi tlamantli kiniljuik Jesús nopa itokilijkauaj ma tlajtlanikaj kema momaijtoskiaj?

² Kema Jesús pejki momaijtoua, kiijtok: “Kema inmomaijtosej ipan toTeko, xikiljuikaj kej ni: ‘ToTeko toTata tlen tiitstok nepa iluikak. Nochi tlakamej ma kiueyichiuakaj motoka. Xiuala, xitlanauatiki nikaj. Ma kichiuakaj mopakilis nochi ipan ni Tlaltipaktli keja mochijtok nepa iluikak’” (Mateo 6:9-13). ¿Tlake kiijtosneki ni eyi tlamantli?

3. ¿Tlake tlamantli tlen toTeotsij iTlanauatijkayo moneki ma tikixmatikaj?

³ Timomachtijkej toTeotsij itoka Jehová, tlake kineki ma mochiua ipan Tlaltipaktli, tlen ya mochijtok uan tlen kiijtoua techmakas teipa. Uan, ¿tlake kiijtosneki kema Jesús kiijtok “Xiuala, xitlanauatiki nikaj”? ¿Tlake nopa toTeotsij  iTlanauatijkayo? ¿Kenijkatsa kiueyichiuas toTeotsij itoka? ¿Uan kenke kema tekichiuas moaxitis tlen toTeotsij mosentlalijtok?

4. ¿Tlake nopa toTeotsij iTlanauatijkayo, uan ajkia eliskia Tlanauatijketl?

⁴ Jehová kitlalijtok iTlanauatijkayo ma tekichiua ipan Tlaltipaktli uan kitlapejpenijtok Jesucristo ma tekichiua. Ya se Tlanauatijketl tlen tlauel pankisa uan amo kej katli nama tlanauatiaj, yeka kiiljuiaj “Tlanauatijketl tlen kinnauatia nochi tlanauatianij ipan Tlaltipaktli uan yajaya ininTeko nochi tekojmej” (1 Timoteo 6:15). Jesús kena uelis kichiuas miak kuali tlamantli, amo kej sekinok tekichiuanij o tlen tlauel kuali tlanauatiaj.

5. ¿Kanke tekichiuas toTeotsij iTlanauatijkayo uan kanke nojkia tlanauatis?

⁵ ¿Kanke tekichiuas toTeotsij iTlanauatijkayo? ¿Kanke itstok Jesús? Kej tikitakej, ya kimiktijkej uan kema panotoya se keski tonali moyolkuik uan sampa yajki iluikak (Hechos 2:33). Uajka, toTeotsij iTlanauatijkayo tekichiuas ne iluikak. Yeka Biblia kiijtoua “iluikak kampa yajaya tlanauatia” (2 Timoteo 4:18). Maske tekichiuas nepa iluikak nojkia tlanauatis ipan Tlaltipaktli (xijpoua Apocalipsis [Revelación] 11:15).

6, 7. ¿Kenke Jesús se tlauel kuali Tlanauatijketl?

⁶ Jesús se tlauel kuali Tlanauatijketl. ¿Kenke? Pampa ya amo kema mikis. Uan Biblia kiijtoua ya amo kej katli tekichiuaj, pampa “san yajaya kipia yolistli para nochipa ipan ya. Yajaya mokaua ipan nopa tlauili tlen chikauak tlauia hasta axaka uelis monechkauis” (1 Timoteo 6:16). Uajka nochi tlen Jesús kichiuas amo kema tlamis.

⁷ Biblia kiijtoua Jesús kipanoskia ni: “Itonal toTeko  motlalis ipan ya. Uan [...] kimakas tlamachilistli, tlalnamikilistli, uan kichiualtis se kuali consejomakaketl. [...] Ika pakilistli kineltokilis toTeko. Axtetlajtolsenkauas san keja nesis para melauak, pero axmelauak. Uan axtetlajtolsenkauas keja tlen ueli tlajtoli tlen nemi ipan tekamak. Yajaya kintlajtolsenkauas keja xitlauak para yajuantij tlen teikneltsitsij uan kinmanauis” (Isaías 11:2-4). Ni kinextia Jesús tlanauatis kuali uan ika tlaiknelili. ¿Mitspaktiskia ma tekichiua se akajya kej ya?

8. ¿Ajkia inijuantij tekichiuasej iuaya Jesús?

⁸ Ma tikitakaj seyok tlamantli. Jesús tekichiuas ininuaya sekinok tlanauatianij. Yeka apóstol Pablo kiiljuik Timoteo: “Intla tikijiyouiaj tlaouijkayotl [...], se tonal titlanauatisej iuaya” (2 Timoteo 2:12). Uajka Pablo, Timoteo uan sekinok katli toTeotsij kintlapejpenijtok tekichiuasej iuaya Jesús ipan iTlanauatijkayo. ¿Keskij tekichiuasej iuaya?

9. ¿Keskij tekichiuasej iuaya Jesús, uan kema pejki kintlapejpenia toTeotsij?

⁹ Ipan tlamachtili chikome, tikitakej nopa apóstol Juan kiitak “nopa Pilborregojtsi [Jesucristo] moketsayaya ipan tepetl Sión [kampa kitekitlalijkej ne iluikak] uan iuaya moketsayayaj ciento cuarenta y cuatro mil tlakamej tlen kipixtoyaj itoka nopa Pilborregojtsi uan itoka iTata ijkuilijtok ipan ininkuaixpa”. ¿Ajkia inijuantij nopa 144,000? Juan kiijtok: “Nopa tlakamej kitokiliaj nopa Pilborregojtsi kampa ueli kampa yaui. ToTeko kinkojki [...] ipan Tlaltipaktli para ma elikaj keja nopa tlen achtoui elisej ininaxkauaj toTeko uan nopa Pilborregojtsi” (Apocalipsis 14:1, 4). Uajka, toTeotsij kintlapejpenia Jesús itokilijkauaj katli temachmej. Teipa kema mikisej uan moyolkuisej ‘tlanauatisej ipan Tlaltipaktli’ iuaya Jesús (Apocalipsis 5:10). Ipan xiuitl 33 y.u.J. toTeotsij pejki kintlapejpenia nopa 144,000.

10. ¿Kenke Jehová kinextia tlauel techiknelia kema kintlalik Jesús uan nopa 144,000 ma tlanauatikaj?

 ¹⁰ Jehová kintlalik Jesús uan nopa 144,000 ma tlanauatikaj pampa tlauel techiknelia. Jesús kimati kenijkatsa titlaijiyouiaj pampa nojkia elki se tlakatl. Yeka Pablo kiijtok tlen Jesús: “Nopa [sumo sacerdote] techtlasojtla kema axtijpiaj fuerza para tijchiuasej tlen xitlauak, pampa nochi tlamantli tlajtlakoli nojkia kiyoltilanki Jesús keja tojuantij techyoltilana mojmostla, pero yajaya axkema tlajtlakolchijki” (Hebreos 4:15; 5:8). Katli tlanauatisej iuaya nojkia tlajtlakolejkej, tlaijiyouiaj uan kipiaj tlen ueli kokolistli. Yeka kimatij kenijkatsa tijyolmatij kema titlaijiyouiaj.

11. ¿Kenke Jesús kiniljuik itokilijkauaj ma kitlajtlanikaj toTeotsij ma mochiua tlen ya kineki ne iluikak?

¹¹ Jesús kiniljuik itokilijkauaj ma tlajtlanikaj ma tlanauatiki toTeotsij iTlanauatijkayo uan ma mochiua tlen Jehová kineki ipan “Tlaltipaktli keja mochijtok nepa iluikak”. Ne iluikak, nopa iluikaeuanij nochipa kichiuaj tlen toTeotsij kineki. Ipan tlamachtili eyi tikitakej se iluikaejketl ayokmo tlaneltokak uan kichijki ma tlajtlakolchiuakaj Adán uan Eva. Ipan tlamachtili matlaktli tikitasej tlake techmachtia Biblia tlen nopa Satanás. ToTeotsij kinkajki Satanás uan amo kuali iajakauaj ma itstokaj se keski xiuitl ne iluikak. Uajka, kema Jesús itstoya ipan Tlaltipaktli, amo nochi iluikaeuanij kichijtoyaj tlen toTeotsij kineki. Ni mopatlaskia kema Jesucristo kipeualtiskia tekichiuas uan moteuiskia iuaya Satanás (xijpoua Apocalipsis 12:7-9).

12. ¿Tlake ome tlamantli tlen tlauel ipati kiijtoua ipan Apocalipsis 12:10?

¹² Ipan Biblia kiijtoua panoskia ni: “Nijkajki se tlen tsajtsiyaya chikauak tlen iluikak uan kiijtouayaya: ‘Ya  mochijtok. ToTeko ya kinmakixtijtok itlakauaj. Ya nestok ichikaualis toTeko Dios uan nelia kuajkualtsi nochi kampa yajaya tlanauatia. Ya neski itekiuejkayo Cristo yajaya tlen kitlapejpenijtoya toTeko, pampa kikuamajkajtokej tlatsintla Axkualtlakatl [Satanás] tlen kinteiljuiyaya toikniuaj. Yajaya elki tlen kinteiljuiyaya toikniuaj iixpa toTeko youali uan tonali’” (Apocalipsis 12:10). ¿Tikitak ipan ni versículo kiijtoua moaxitijtok ome tlamantli? Kiijtoua pejki tekichiua Jesucristo uan nojkia kikuamajkajkej Satanás ipan Tlaltipaktli.

13. ¿Tlake panotok pampa Satanás kikixtijkej ne iluikak?

¹³ ¿Tlake panotok pampa moaxitijtok ni ome tlamantli? Ne iluikak panok ni: “Ma pakikaj nochi tlen itstokej iluikak” (Apocalipsis 12:12). Kena, nopa iluikaeuanij yolpakij pampa Satanás uan amo kuali ajakamej kinkixtijkej ne iluikak. Nochi iluikaeuanij amo kikauaj Jehová, kuali mouikaj uan itstokej ika tlayolseuilistli. Uajka, ne iluikak ya mochijtok tlen toTeotsij kineki.

14. ¿Tlake panotok pampa Satanás kikuamajkajkej ipan Tlaltipaktli?

¹⁴ ¿Uan tlake panotok ipan Tlaltipaktli? Biblia kiijtoua: “Ipan Tlaltipaktli tlauel temajmati [...], pampa ya asiko nopa Axkualtlakatl [Satanás] inmouaya. Yajaya nelia mokualankamaka pampa kimati axpoliui miak tonali para toTeko kitlajtolsenkauas” (Apocalipsis 12:12). Satanás tlauel mokualankamakatok pampa kikixtijkej ne iluikak uan kimati nechka kitsontlamiltisej, yeka kichiua ma onka kuesoli. Ipan nopa seyok tlamachtili tikitasej tlake tlaouijkayotl kichijtok ma onka. Uajka, ¿kenijkatsa kichiuas toTeotsij iTlanauatijkayo ma moaxiti tlen toTeotsij mosentlalijtok?

15. ¿Tlake kineki toTeotsij ma mochiua ipan Tlaltipaktli?

¹⁵ Xikilnamiki ipan tlamachtili eyi, tikitakej Jehová kinekiyaya Tlaltipaktli ma mochiua se xochimili kampa  itstoskiaj katli kichiuaj tlen xitlauak uan amo kema mikiskiaj. Maske Satanás kichijki ma tlaixpanokaj Adán uan Eva uan ayokmo ma moaxiti tlen toTeotsij kinekiyaya, ya amo kipatlak tlen mosentlalijtoya kichiuas. Jehová kineki ma moaxiti ni: “Tlen itstokej xitlauakej iixpa toTeko moaxkatisej nopa tlali tlen yajaya kinmakas, uan nepa itstosej para nochipa” (Salmo 37:29). ¿Kenijkatsa kichiuas toTeotsij iTlanauatijkayo ma moaxiti?

16, 17. ¿Tlake kiijtoua ipan Daniel 2:44 tlen toTeotsij iTlanauatijkayo?

¹⁶ Ipan Daniel 2:44 kiijtoua: “Kema tlanauatijtosej nopa tlanauatianij [...], toTeko Dios tlen itstok iluikak kiketsas se tlanauatilistli kampa itlakauaj tlen axaka uelis kisemanas, niyon axkikauas nopa itlanauatilis ika seyok. [...] kintlamiltis nochi sekinok tlanauatianij uan inintlanauatijkayo, uan ayok tleno mokauas tlen ne sekinok. Nopa tlanauatilistli [...] uejkauas para nochipa”. ¿Tlake kinextia ni tlajtolpanextili?

¹⁷ Kinextia toTeotsij iTlanauatijkayo tekichiuas “kema tlanauatijtosej nopa tlanauatianij”, o kema nojua itstosej sekinok tlanauatianij. Nojkia kinextia nochipa tekichiuas uan yon se tlanauatijketl amo uelis kitlanis yon kitekipatlas. Uan kinextia toTeotsij iTlanauatijkayo kichiuas se tlauilankayotl ika tekichiuanij. Uan kema tlatlanis, san toTeotsij iTlanauatijkayo tlauel kuali tlanauatis.

18. ¿Kenijkatsa kitokaxtiaj nopa tlauilankayotl katli toTeotsij kichiuas ika tlanauatianij?

¹⁸ Biblia kiijtoua kenijkatsa mochiuas nopa tlauilankayotl katli toTeotsij kichiuas ika tekichiuanij. Kiijtoua ipan itlamia tonali, nopa amo kuali ajakamej istlakatisej uan kinkajkayauasej nochi “tlanauatianij”. ¿Kenke? “Para kinsentilisej [...] kema peuas nopa ueyi tlateuijkayotl ika toTeko tlen kipia nochi Chikaualistli.” Nopa tlanauatianij  kinsentilisej kampa “Armagedón ika tlajtoli hebreo” (Apocalipsis 16:14, 16). Uajka, nopa tlauilankayotl katli kichiuas toTeotsij iTlanauatijkayo ika tlanauatianij kitokaxtiaj Armagedón.

19, 20. ¿Kenke amo mochijtok tlen toTeotsij kineki ipan Tlaltipaktli?

¹⁹ ¿Tlake kichiuas toTeotsij iTlanauatijkayo kema panos nopa tlauilankayotl Armagedón? ToTeotsij kineki Tlaltipaktli ma mochiua se xochimili kampa itstosej itekipanojkauaj katli amo tlajtlakolejkej uan katli kichiuaj tlen xitlauak. ¿Kenke amo mochijtok tlen toTeotsij kineki? Pampa titlajtlakolejkej. Yeka tijpiaj kokolistli uan timikij. Ipan tlamachtili makuili tikitakej uelis nochipa tiitstosej pampa Jesús motemaktilik. Uelis tikilnamiki ipan Juan kiijtoua: “ToTeko nelia miak kiniknelia nochi [...] yeka kititlanki iKone iyojtsi para mikis ininpampa. Uan keja nopa nochi tlen kineltokasej, axpoliuisej, pero kipiasej yolistli tlen yankuik para nochipa” (Juan 3:16).

²⁰ Miakej amo kuali monejnemiltiaj, istlakatij, tekajkayauaj uan momekatiaj. Amo kinekij kichiuasej tlen toTeotsij tlanauatia. Nochi katli kichiuaj tlen amo kuali kintsontlamiltisej ipan Armagedón (xijpoua Salmo 37:10). Uan nojkia amo mochijtok tlen toTeotsij kineki pampa tlanauatianij mokuapolouaj, san tlemach techiuiliaj uan pampa amo kiniljuiaj maseualmej ma kichiuakaj tlen toTeotsij tlanauatia. Yeka Biblia kiijtoua: “Tlakamej tlauel kipiaj chikaualistli para mochiuilisej tlen axkuali se ika seyok” (Eclesiastés 8:9).

21. ¿Kenijkatsa toTeotsij iTlanauatijkayo kichiuas ipan Tlaltipaktli ma mochiua tlen mosentlalijtoya toTeotsij?

²¹ Kema panos Armagedón san toTeotsij tlanauatis, kichiuas tlen mosentlalijtoya, onkas miak tlateochiualistli uan kintsontlamiltis Satanás uan nopa amo kuali iajakauaj (Apocalipsis 20:1-3). Uan pampa Jesús temaktilik  inemilis, ayokmo tijpiasej kokolistli yon timikisej uan uelis nochipa tiitstosej (xijpoua Apocalipsis 22:1-3). Ni Tlaltipaktli nojkia mochiuas se xochimili. Kej nopa toTeotsij iTlanauatijkayo kichiuas ipan Tlaltipaktli ma mochiua tlen mosentlalijtoya toTeotsij uan nochi ma kiueyichiuakaj uan ma kitlepanitakaj Jehová itoka.

22. ¿Kenke tijmatij toTeotsij iTlanauatijkayo amo pejki tekichiua kema Jesús itstoya ipan Tlaltipaktli yon kema moyolkuik?

²² Jesús kiniljuik itokilijkauaj ma kitlajtlanikaj toTeotsij “Xiuala, xitlanauatiki nikaj” pampa ayamo tekichijtoya toTeotsij iTlanauatijkayo. Uajka, ¿pejki tekichiua kema Jesús tlejkok iluikak? Amo, pampa apóstol Pedro uan Pablo kiijtojkej ipan Jesús moaxitik tlen ijkuilijtok ipan Hechos 2:34 uan 35: “ToTeko Dios kiiljuik noTeko Cristo: ‘Ximoseui nikaj ipan nonejmatl’” (Hebreos 10:12, 13). Uajka Jesucristo monekiskia mochias se kentsi uan teipa kitekitlaliskiaj.

23. 1) ¿Kema pejki tekichiua toTeotsij iTlanauatijkayo? 2) ¿Tlake tikixtomasej ipan nopa seyok tlamachtili?

²³ ¿Keski xiuitl mochiaskia? Kema panoyaya xiuitl 1870, se keskij katli momachtiyayaj Biblia kikuamachilijkej tlamiskia mochias ipan xiuitl 1914. (Tlaj nojua tijneki tijmatis tlake panok ipan ni xiuitl, xikita ipan sekinok tlamachtili  “¿Kenke tlauel pankiski xiuitl 1914?”.) Tlen pejki pano kampa ueli ipan 1914 kinextia nelnelia tlen kiijtojkej katli momachtiyayaj Biblia. Uan nopa tlajtolpanextili tlen moaxitijtok kinextia Jehová kitekitlalik Cristo ipan 1914 uan toTeotsij iTlanauatijkayo pejki tlanauatia. Uajka “axpoliui miak tonali” kema kitsontlamiltisej Satanás (Apocalipsis 12:12; Salmo 110:2). ToTeotsij iTlanauatijkayo nechka kichiuas ipan Tlaltipaktli tlen toTeotsij mosentlalijtok. ¡Tlauel kuali tlen mochiuas! ¿Timoiljuia nelnelia moaxitis? Ipan nopa seyok tlamachtili tikitas Biblia nelnelia techmachtia nopa.