TLAMACHTILI 7
¿Tlake nopa toTeotsij iTlanauatijkayo?
1. ¿Tlake nopa toTeotsij iTlanauatijkayo?
¿Kenke Jesús se kuali Tlanauatijketl? (MARCOS 1:40-42).
Ni se Tlanauatijkayotl tlen tekichiuas ne iluikak uan nechka kintekipatlas nochi tlanauatianij ipan Tlaltipaktli, uan kichiuas tlen toTeotsij kineki ma mochiua ipan Tlaltipaktli kej mochiua ne iluikak. ToTeotsij iTlanauatijkayo tlen moneki ma kinnauati nochi maseualmej, kichiuas ma itstokaj sansejko maseualmej ipan nochi Tlaltipaktli. ¡Ni nelia se kuali tlamachtili! (Xijpoua Daniel 2:44; Mateo 6:9, 10 uan 24:14).
ToTeotsij Jehová, kitekitlalijtok iKone Jesucristo kej Tlanauatijketl ipan iTlanauatijkayo. (Xijpoua Apocalipsis (Revelación) 11:15).
Xikita nopa video ¿Tlake nopa toTeotsij iTlanauatijkayo?
2. ¿Kenke Jesús se kuali Tlanauatijketl?
ToTeotsij iKone se tlauel kuali Tlanauatijketl pampa ya kuali iyolo, uan nochipa kichiua tlen xitlauak (Mateo 11:28-30). Nojkia kipia chikaualistli tlen ika uelis kinpaleuis maseualmej, uan kitekiuis kema tekichiuas ne iluikak uan tlanauatis ipan Tlaltipaktli. Kema Jesús moyolkuik, yajki iluikak uan nepa kichixki iTata ma kimaka tlanauatili tlen ika ueliskia tlanauatis (Hebreos 10:12, 13). Teipa toTeotsij kitekimakak Jesús. (Xijpoua Daniel 7:13 uan 14).
3. ¿Ajkia inijuantij tlanauatisej iuaya Jesús?
Ipan Biblia kiijtoua se keskij toTeotsij itekipanojkauaj tlanauatisej iuaya Jesús. Ipan Daniel 7:27 kintokaxtia: “Tlatsejtseloltikatlakamej” o katli kintlapejpenijtokej. Nopa tlakamej katli toTeotsij achtoui kintlapejpenik elkej nopa Jesús iapóstoles. Uan ipan ni tonali Jehová nojua kintlapejpenia tlakamej uan siuamej tlen kuali tlaneltokaj. Uan kej Jesús, kema inijuantij mikij yauij iluikak ika se inintlakayo tlen amo nesi. (Xijpoua Juan 14:1-3 uan 1 Corintios 15:42-44).
¿Keskij yasej iluikak? Jesús kiijtok katli tlanauatisej iuaya “axmiakej” (Lucas 12:32). Biblia kiijtoua san 144,000. Inijuantij tlanauatisej ipan Tlaltipaktli iuaya Jesús. (Xijpoua Apocalipsis 14:1).
4. ¿Tlake panok kema kitekitlalijkej Jesús?
Kema Jesús kitekitlalijkej ipan xiuitl 1914, nimantsi kinkixtik Satanás uan nopa amo kuali ajakamej ne iluikak uan kinkuamajkajki ipan Tlaltipaktli. * Satanás tlauel kualanki yeka kichijki ma onka miak kuesoli ipan nochi Tlaltipaktli (Apocalipsis 12:7-10, 12). Ipan nopa xiuitl maseualmej pejkej kipiaj miak tlaouijkayotl. Nopa uejueyi tlauilankayotl, kokolistli, mayantli uan kema mojmolinia tlali kinextia toTeotsij iTlanauatijkayo nechka kinauatis Tlaltipaktli. (Xijpoua Lucas 21:7, 10, 11 uan 31).
5. ¿Tlake kichiua nama toTeotsij iTlanauatijkayo, uan tlake kichiuas teipa?
Pampa ipan ni tonali tlajtolmoyauaj ipan nochi Tlaltipaktli, toTeotsij iTlanauatijkayo kinsentilia “miak tlakamej” o maseualmej tlen kampa ueli euaj. Miakej tlakamej uan siuamej tlen kuali ininyolo mochijtokej Jesús itokilijkauaj. Nochi inijuantij momanauisej kema toTeotsij iTlanauatijkayo kitsontlamiltis nochi tlen amo kuali. Tlaj tijnekij tijselisej nochi nopa tlateochiualistli tlen toTeotsij iTlanauatijkayo kichiuas ma onka, moneki ma tijneltokakaj Jesús. (Xijpoua Apocalipsis 7:9, 14, 16 uan 17).
Ipan nopa mil xiuitl, toTeotsij iTlanauatijkayo kinmakas maseualmej tlen achtouia kinekiyaya ma kipiakaj. Tlaltipaktli mochiuas se xochimili. Kema Jesús tlamis tlanauatis ipan nopa mil xiuitl, sampa kimakas iTata nopa Tlanauatijkayotl (1 Corintios 15:24-26). ¿Mitspaktiskia tijpouilis se akajya tlen kichiuas toTeotsij iTlanauatijkayo? (Xijpoua Salmo 37:10, 11 uan 29).
^ párr. 6 Tlaj nojua tijneki tijmatis kenijkatsa moaxitik ni tlajtolpanextili ipan xiuitl 1914, xikita nopa amochtli ¿Tlake nelnelia tlamachtia Biblia? Ipan iamayo 215–218.
