Nopa achtoui carta tlen kintitlanilijkej Cristo itokilijkauaj tlen Corinto 8:1-13
8 Nama niinmechtlajkuiljuilis tlen nopa tlakualistli tlen kinmaktilijtokej nopa dioses, uan nochi tijmatij tlen ni tlamantli. Se katli moiljuia kimati miak tlamantli, moueyimati, pero se katli teiknelia, kinpaleuia sekinok ma moskalti inintlaneltokilis.
2 Tlaj se akajya moiljuia kimati se tlamantli, nojua ayamo kimati nochi tlen nopa tlamantli.
3 Pero tlaj se akajya kiiknelia Dios,* uajka Dios kiixmati nopa maseuali.
4 Nama ma tikamanaltikaj tlen nopa tlakualistli tlen kinmaktilijtokej nopa dioses. Tijmatij nopa dioses amo tleno ininpati pampa itstok san setsi Dios.
5 Pampa maske kiijtouaj itstokej miakej dioses ipan iluikaktli uan ipan Tlaltipaktli, uan nelia itstokej miakej “dioses” uan “tekojmej”,
6 para tojuantij san itstok setsi Dios, katli eli toTata, pampa nochi tlamantli uala tlen ya uan tiitstokej para ya. Uan para tojuantij san itstok se toTeko, Jesucristo, uan Dios kitekiuik para kichijchiuas nochi tlamantli uan ika ya tiitstokej nochi tojuantij.
7 Pero amo nochi kikuamachiliaj ni tlamantli. Sekij achtouia kinueyichiuayayaj dioses, yeka nama kema kikuaj se tlakualistli kiitaj kejuak kinmaktilijtokej dioses. Uan inintlalnamikilis kinyolkokoua pampa amo tetik.*
8 Nopa tlakualistli amo kichiua más ma tijnechkauikaj Dios. Tlaj amo tijkuaj, amo tleno tijtlanij, uan tlaj tijkuaj, amo tleno tijpolouaj.
9 Uan maske uelis inkichiuasej se keski tlamantli, ximomokuitlauikaj para amo inkichiuasej ma uetsikaj ipan tlajtlakoli katli amo tetik inintlalnamikilis.
10 Pampa maske ta tijmati nopa dioses amo tleno ininpati, tlaj se akajya mitsitaskia titlakuajtok ipan se templo kampa kinueyichiuaj dioses, ¿amo timoiljuia uelis tijchiuas katli amo kipia tetik itlalnamikilis ma kikua nopa tlakualistli tlen kinmaktilijtokej nopa dioses?
11 Maske ta tijmati amo kenijki tlaj tijkuas nopa tlakualistli, tijnempoloua itlaneltokilis katli amo kipia tetik itlalnamikilis. Xikilnamiki, ya eli moikni uan Cristo nojkia mijki por ya.
12 Kema inkinixpanoj inmoikniuaj ika ni tlamantli uan inkichiuaj ma kinyolkoko inintlalnamikilis, intlajtlakolchiuaj ika Cristo.
13 Yeka, tlaj se tlakualistli kichiua ma kiyolkoko itlalnamikilis noikni, ayokmo kema sampa nijkuas nakatl, kiampa amo nijchiuas noikni ma kiyolkoko itlalnamikilis.
