Nopa achtoui carta tlen kintitlanilijkej Cristo itokilijkauaj tlen Tesalónica 4:1-18
4 Uan para tijtlamiltisej noikniuaj, tiinmechmachtijtokej kenijkatsa inmonejnemiltisej para inkiyolpakiltisej Dios,* uan kiampa inkichijtiualajtokej. Pero nama tiinmechiljuiaj uan tiinmechtlajtlaniaj ipan itoka toTeko Jesús para nojua más kiampa xijchiuakaj.
2 Inmojuantij inkimatij tlen tiinmechnauatijkej ipan itoka toTeko Jesús.
3 Ya ni tlen Dios kineki: xielikaj intlatsejtseloltikej* uan amo kema xiauilnemikaj.*
4 Sejse tlen inmojuantij moneki kimatis kenijkatsa kinauatis itlakayo para ma elto tlatsejtseloltik uan Dios kuali ma kiita,*
5 uan amo xijchiuakaj kej katli amo kiixmatij Dios katli tlauel kinektokej motekasej iuaya se akajya uan amo kema ixuij.*
6 Amo aka ma kichiuili iikni tlen amo kuali yon ma kikuili tlen kinamiki kipias, pampa Jehová* kintlatsakuiltis nochi katli kichiuaj nopa tlamantli, kej achtouia tiinmechiljuijkej uan xitlauak tiinmechtlakaualtijkej.
7 Pampa Dios amo technotski para ma tijchiuakaj tlen sokiyo, technotski para ma tielikaj titlatsejtseloltikej.
8 Uajka, katli amo kiselia ni tlamachtili, amo kiuejkamajkaua se tlakatl, kiuejkamajkaua Dios katli inmechmaka ichikaualis.*
9 Pero inmojuantij amo moneki tiinmechtlajkuiljuilisej para inmoiknelisej kej iniknimej, pampa Dios inmechmachtia ximoiknelikaj se ika seyok.
10 Kena, inmojuantij ya inkichijtokej ika nochi toikniuaj katli euaj Macedonia. Pero noikniuaj, tiinmechyololiniaj para nojua más xikiniknelikaj.
11 Ximosentlalikaj initstosej ika tlaseuilistli, amo inmokalakisej kampa amo inmocuenta uan chikauak intekitisej ika inmomax, kej tiinmechnauatijkej xijchiuakaj,
12 kiampa katli amo tlaneltokaj kiitasej inmojuantij inmonejnemiltiaj kej kinamiki uan nojkia inmojuantij amo tleno inmechpolos.
13 Noikniuaj, nojkia tijnekij xijmatikaj tlen kinpanos katli ya mijkej, kiampa amo inmokuesosej kej katli amo tleno kichiaj kiselisej.
14 Pampa tlaj timotemachiaj Jesús mijki uan moyolkuik,* uajka nojkia timotemachiaj Dios kinyolkuis katli kitokiliaj Jesús.
15 Ika tlen kiijtoua itlajtol Jehová* tiinmechiljuiaj ni: tojuantij katli nojua tiyoltosej kema toTeko tlakuepilis timoyolkuisej para tiasej iluikak. Pero katli ya miktokej, moyolkuisej achtoui uan teipa tojuantij.
16 Pampa toTeko ualtemos tlen iluikak ika tlanauatili, ika itoskak tlen arcángel* uan kiitskitos itrompeta Dios, uajka itokilijkauaj Cristo katli ya miktokej, achtoui moyolkuisej.*
17 Teipa, katli nojua tiitstosej uan timomanauisej, techuikasej ininuaya ipan mixtli para timopantisej ika toTeko ajakatipa, uan kiampa tiitstosej nochipa iuaya toTeko.
18 Uajka nojua ximoyolchikajtokaj se ika seyok ika ni tlajtoli.
Tlen ijkuilijtok tlatsintla
^ Kanajya kiijtouaj “toTeotsij”.
^ O “intlapajpaktikej”.
^ Ika griego pornéia. Xikita auilnemilistli.
^ O “nochi ma kitlepanitakaj”.
^ O “kinyolasi”.
^ O “iespíritu santo”.
^ Ika griego “motlananki”.
^ Ika griego “motlananasej”.
