Tlen kiijkuilok Juan 10:1-42
10 “Temachtli niinmechiljuia, katli uitoni sejkanok* para kalakis ipan nopa corral kampa itstokej pilborregojtsitsij uan amo kalaki kampa puerta, eli se tlachtejketl.
2 Pero katli kalaki kampa puerta, eli katli kinmokuitlauia pilborregojtsitsij.
3 Katli kimokuitlauia puerta kikaltlapoua, uan pilborregojtsitsij kikakij itoskak. Inintlamokuitlauijka kinnotsa ipilborregojuaj ika inintoka uan kinkixtia kalixpa.
4 Kema kinkixtia nochi ipilborregojuaj, kinyakantia. Nopa pilborregojtsitsij kitokiliaj pampa kitoskamachiliaj.*
5 Amo kema kitokilisej se katli amo kiixmatij, inijuantij cholosej pampa amo kintoskamachiliaj katli amo kinixmatij”.
6 Jesús kinkamanaljuik ika ni neskayotl, pero inijuantij amo kikuamachilijkej tlen kiniljuiyaya.
7 Uajka Jesús sampa kiniljuik: “Nelnelia niinmechiljuia, na nieli nopa puerta kampa kalakij pilborregojtsitsij.
8 Nochi katli ualajtokej uan kiijtojtokej elij nopa tlapialmokuitlauijketl tlen melauak, elij tlachtekinij, pero pilborregojtsitsij amo kintlakakilijtokej.
9 Na nieli nopa puerta; katli kalakis kampa na, momakixtis;* uelis kalakis uan kisas, uan kipantis sakatl.
10 Nopa tlachtejketl uala san para tlachtekis, temiktis uan tlaxoleuas.* Na niualajtok para ma yoltokaj pilborregojtsitsij, uan para ma kipiakaj nemilistli tlen amo kema tlamis.*
11 Na nieli nopa kuali tlapialmokuitlauijketl. Uan se kuali tlapialmokuitlauijketl temaktilia inemilis para kinmanauis ipilborregojuaj.
12 Se tlatekipanojketl katli amo eli tlapialmokuitlauijketl yon ininteko nopa pilborregojtsitsij, kema kiita uala lobo, kinkajteua pilborregojtsitsij uan choloua. Uajka nopa lobo kinuika uan kinsemana.*
13 Nopa tlatekipanojketl choloua pampa tekiti san para ma kitlaxtlauikaj pero amo nelia kiniknelia pilborregojtsitsij.
14 Na nieli nopa kuali tlapialmokuitlauijketl. Nikinixmati nopilborregojuaj uan inijuantij nechixmatij,
15 sanse kej noTata nechixmati uan na nikixmati noTata; uan nitemaktilia nonemilis para nikinmakixtis pilborregojtsitsij.
16 ”Uan nikinpia sekinok pilborregojtsitsij katli amo itstokej ipan ni corral, inijuantij nojkia moneki nikinualikas, uan kikakisej notoskak. Itstosej sansejko uan kipiasej san se inintlamokuitlauijka.
17 NoTata nechiknelia pampa nitemaktilia nonemilis para teipa sampa nijselis.
18 Amo aka nechkixtilia nonemilis, na noselti nitemaktilia. Nijpia tlanauatili para nijtemaktilis uan nijpia tlanauatili para sampa nijselis. Ya nopa tlen nechnauatik noTata”.
19 Ika tlen kiijtok, judíos sampa pejkej mokualaniaj.
20 Miakej tlen inijuantij kiijtouayayaj: “Kipia se amo kuali ajakatl* uan tsonuiuitixtok. ¿Kenke inkitlakakiliaj?”.
21 Sekinok kiijtouayayaj: “Katli kipia se amo kuali ajakatl amo kiijtoskia nopa. Se amo kuali ajakatl amo ueli kinchikaua katli amo tlachiaj, ¿axke?”.
22 Ipan nopa tonali, ipan Jerusalén mochiuayaya nopa iljuitl kema judíos kiilnamikiyayaj kimaktilijtoyaj Dios* nopa teokali. Eliyaya ipoual kema tlaseseyayaya*
23 uan Jesús itstoya ipan teokali, nentinemiyaya tlamapa kampa kiiljuiyayaj Tlaketsalmej tlen Salomón.
24 Uajka judíos kiyaualojkej uan pejkej kiiljuiaj: “¿Hasta kema tijmatisej ajkia nelnelia tieli? Tlaj ta tiCristo, xitlauak xikijto”.
25 Jesús kinnankilik: “Ya niinmechiljuik, pero inmojuantij amo inkineltokaj. Nochi tlen nijchiua ika itoka noTata, kinextia ajkia nieli.
26 Pero inmojuantij amo intlaneltokaj pampa amo inelij nopilborregojuaj.
27 Nopilborregojuaj kikakij notoskak; na nikinixmati uan inijuantij nechtokiliaj.
28 Na nikinmaka nemilistli tlen amo kema tlamis;* amo kema kintsontlamiltisej, uan amo aka nechkixtilis tlen nomako.
29 Tlen noTata nechmakatok eli más ipati que nochi nopa sekinok tlamantli, uan amo aka uelis kikixtilis noTata ipilborregojuaj tlen imako.
30 Na uan noTata tielij setsi”.*
31 Nopa judíos sampa kitlanankej tetl para kitepachosej.*
32 Uajka Jesús kiniljuik: “Niinmechnextilijtok miak tlamantli tlen kuali tlen noTata nechnauatik ma nijchiua. ¿Ika tlake tlen nopa tlamantli inkinekij innechtepachosej?”.
33 Judíos kinankilijkej: “Amo timitstepachosej pampa tijchijki se kuali tlamantli, timitstepachosej pampa tikixpanok Dios ika tlen tikijtok, pampa maske timaseuali, timochiua kej se dios”.
34 Jesús kinnankilik: “Ipan inmoTlanauatil Dios kiijtoua ‘Inmojuantij inelij dioses’.
35 Tlaj yaya kiniljuik ‘dioses’ katli kinamikiyaya ma kintlatsakuiltikaj, kej itlajtol kinextik (uan iTlajkuilol Dios amo uelis kiixpolosej),
36 na, katli noTata nechiyokatlalik para nijtekipanos uan nechtitlanki ipan Tlaltipaktli, ¿inkiijtouaj nikixpanok Dios pampa nikijtok ‘nieli iKone Dios’?
37 Tlaj amo nijchiua tlen noTata kineki ma nijchiua, uajka amo xinechneltokakaj.
38 Pero tlaj nijchiua, maske amo innechneltokasej, xitlaneltokakaj ika tlen nijchiua. Kiampa inkimatisej uan inkikuamachilisej noTata itstok nouaya uan na niitstok iuaya noTata”.
39 Uan sampa kinejkej kiitskisej, pero cholojtejki.
40 Sampa yajki ipan ne seyok nali ueyatl Jordán, kampa achtouia Juan teatsonpoliuiltiyaya, uan nopaya mokajki.
41 Miakej maseualmej yajkej kiitatoj uan pejkej kiijtouaj: “Juan amo kichijki yon se milagro,* pero nochi tlen kiijtok tlen ni tlakatl, eli melauak”.
42 Uan nopaya miakej tlaneltokakej ipan Jesús.
Tlen ijkuilijtok tlatsintla
^ Kanajya kiijtouaj “oksejko”, “sejkoyok”.
^ Kanajya kiijtouaj “kikamamachiliaj”.
^ O “momanauis”.
^ O “tlasosolos”.
^ O “ma itstokaj para nochipa”.
^ O “kinxeloua”.
^ O “demonio”.
^ Kanajya kiijtouaj “toTeotsij”.
^ Kanajya kiijtouaj “seseuayaya”.
^ O “nijchiua ma itstokaj nochipa”.
^ O “tiitstokej sansejko”.
^ Kanajya kiijtouaj “kimotlasej ika tetl”.
^ Ika griego “tlaneskayotl”.
