Tlen kiijkuilok Juan 13:1-38
13 Kema ayamo peuayaya iljuitl tlen Pascua, Jesús kimatiyaya asitoya hora para yas tlen ni Tlaltipaktli uan tlakuepilis kampa iTata. Tlauel kiniknelijtoya itokilijkauaj katli itstoyaj ipan Tlaltipaktli, uan nojua kiniknelik hasta kema mijki.
2 Kema tlakuayayaj, Diablo ya kitlalijtoya ipan iyolo Judas Iscariote, ikone Simón, para kitemaktilis Jesús.
3 Uajka Jesús, katli kimatiyaya iTata kimaktilijtoya imako nochi tlamantli, uan ualajtoya kampa Dios* uan tlakuepiliskia kampa ya,
4 moketski, kitlalik neka iyoyo tlen ika moajkoluijkomayaya,* kikuik se toalla uan moilpilik itsinkechtla.
5 Kitejki atl ipan se uajkali uan pejki kinikxipajpaka* itokilijkauaj uan kinikxiuatsa ika nopa toalla tlen moilpilijtoya ipan itsinkechtla.
6 Kema kimelajki kiikxipajpakas Simón Pedro, ya kitlatsintokik: “NoTeko, ¿ta tinechikxipajpakas?”.
7 Jesús kinankilik: “Namantsi amo tijkuamachilia tlen nijchiua, pero teipa tijkuamachilis”.
8 Pedro kiiljuik: “Ta amo kema tinechikxipajpakas”. Uan Jesús kinankilik: “Tlaj amo nimitsikxipajpakas, uajka amo tieli se tlen noaxkauaj”.
9 Simón Pedro kiiljuik: “NoTeko, uajka amo san xinechikxipajpaka, nojkia xinechmapajpaka uan xinechtsonpajpaka”.
10 Jesús kinankilik: “Katli maltijtok, itstok tlapajpaktik uan san moneki moikxipajpakas. Uan inmojuantij intlapajpaktikej, maske amo nochi”.
11 Jesús kimatiyaya ajkia kitemaktiliskia, yeka kiijtok: “Amo nochi inmojuantij intlapajpaktikej”.
12 Uajka, kema tlanki kinikxipajpaka, sampa motlalilik iyoyo tlen ika moajkoluijkomayaya, moseuik kampa mesa uan kiniljuik: “¿Inkikuamachiliaj tlen niinmechchiuilik?
13 Inmojuantij innechiljuiaj Tlamachtijketl uan noTeko, uan nelia tlen inkiijtouaj, pampa kena nieli.
14 Yeka tlaj na, niinmoTeko uan niinmoTlamachtijka, niinmechikxipajpaktok, inmojuantij nojkia moneki inmoikxipajpakasej se ika seyok.
15 Na niinmechnextilijtok para xijchiuakaj kej na niinmechchiuilik.
16 Nelnelia niinmechiljuia, se tlatekipanojketl amo kipia más tlanauatili que iteko yon katli kititlankej kipia más tlanauatili que katli kititlanki.
17 Nama, pampa inkimatij ni tlamantli, tlauel inyolpakisej tlaj inkichiuasej.
18 Amo nikamanalti tlen nochi inmojuantij; na nikinixmati katli nikintlapejpenijtok. Pero ni panok para ma moaxiti tlen iTlajkuilol Dios kiijtoua: ‘Katli tlakuayaya nouaya, nechijixnamiktok’.
19 Desde nama niinmechiljuia ni tlamantli, kema ayamo mochiua, kiampa kema mochiuas inmojuantij inkineltokasej nieli katli nikijtoua.
20 Nelnelia niinmechiljuia, katli kiselia se katli nijtitlanki, nojkia nechselia na, uan katli nechselia nojkia kiselia katli nechualtitlanki”.
21 Kema tlanki kiijtoua nopa, Jesús tlauel motekipachok uan kiijtok: “Nelnelia niinmechiljuia, se tlen inmojuantij nechtemaktilis”.
22 Itokilijkauaj pejkej san moixtlajtlachiliaj pampa amo kimatiyayaj ajkia tlen inijuantij kichiuaskia tlen kiniljuijtoya.
23 Se tlen itokilijkauaj, katli Jesús kiikneliyaya, tlakuayaya inakastla.
24 Uajka Simón Pedro motsonojolinik para kitlatsintokis: “¿Tlen ajkia kamanalti?”.
25 Uajka motejki iyolixko Jesús uan kitlatsintokik: “NoTeko, ¿ajkia eli?”.
26 Jesús tlanankilik: “Katli nijmakas se achi pantsi tlen nikakechis,* yaya eli”. Uan kema kiakechik nopa pantsi, kimakak Judas, ikone Simón Iscariote.
27 Kema Judas kikuik nopa pantsi, Satanás kalajki ipan ya. Uajka Jesús kiiljuik: “Tlen timoiljuijtok tijchiuas, nimantsi xijchiua”.
28 Pero yon se katli itstoyaj kampa mesa kimatiyaya kenke kiampa kiiljuijtoya.
29 Sekij moiljuiyayaj Jesús kiiljuiyaya Judas “Xijkoua tlen moneki para nopa iljuitl” o uelis ma kinmaka se tlenijki katli amo tleno kipiaj, pampa Judas kipixtoya nopa pilcajontsi kampa kiajokuiyayaj tomij.
30 Uajka, kema kiselik nopa pantsi, nimantsi kiski. Ya tlatlayouixtoya.
31 Kema ya yajtoya, Jesús kiijtok: “Nama kiuejkapantlaliaj katli eli iKone se Maseuali,* uan ika tlen ya kichiuas kiuejkapantlalisej Dios.
32 Dios kiuejkapantlalis, uan nimantsi kiampa kichiuas.
33 Nopilkoneuaj, san niitstos inmouaya se kentsi tonali. Innechtemosej; pero sanse kej nikiniljuik judíos, nama nojkia niinmechiljuia: ‘Amo uelis inyasej kampa na nia’.
34 Niinmechmaka se yankuik tlanauatili: ximoiknelikaj se ika seyok; sanse kej na niinmechiknelijtok, inmojuantij nojkia ximoiknelikaj.
35 Kiampa nochi kimatisej inmojuantij inelij notokilijkauaj: tlaj inmoikneliaj se ika seyok”.
36 Simón Pedro kitlatsintokik: “NoTeko, ¿kanke tia?”. Jesús kinankilik: “Kampa na nia, namantsi amo uelis tinechtokilis, pero teipa kena”.
37 Pedro kiiljuik: “NoTeko, ¿kenke amo uelis nimitstokilis nama? Na nitemaktilis nonemilis para nimitsmanauis”.
38 Jesús kinankilik: “¿Ta titemaktilis monemilis para tinechmanauis? Nelnelia nimitsiljuia, nopa kuapele* amo tsajtsis hasta kema expa tikijtos amo tinechixmati”.
Tlen ijkuilijtok tlatsintla
^ Kanajya kiijtouaj “toTeotsij”.
^ Xikita tlen ika moajkoluijkomayayaj.
^ Kanajya kiijtouaj “kinmetspajpaka”.
^ Kanajya kiijtouaj “nikapachos”.
^ Xikita katli eli iKone se Maseuali.
^ Kanajya kiijtouaj “kuanaka”.
