Tlen kiijkuilok Juan 15:1-27
15 ”Na nieli kej nopa uvatsontli tlen melauak uan noTata eli kej nopa tlatojketl.
2 Ya kitsonteki nochi nomakuayo katli amo temaka itlajka, uan nochi katli temaka itlajka kiyejyektia para nojua más ma tlaki.
3 Inmojuantij ya inmechyejyektijtokej ika nopa tlajtoli tlen niinmechiljuijtok.
4 Nojua xiitstokaj nouaya uan na nojua niitstos inmouaya. Sanse kej imakuayo se uvatsontli amo uelis tlakis iselti pampa moneki tlatskitos ipan nopa uvatsontli, inmojuantij nojkia amo uelis intemakasej inmotlajka tlaj amo initstosej nouaya.
5 Na nieli nopa uvatsontli uan inmojuantij inelij nomakuayo. Katli mokaua nouaya, uan na nimokaua iuaya, ya nopa temaka miak itlajka. Pampa tlaj amo intlatskitokej ipan na, inmojuantij amo tleno uelis inkichiuasej.
6 Tlaj se akajya amo mokaua nouaya, kikuamajkauaj kej imakuayo uvatsontli uan uaki. Teipa kisentiliaj, kimajkauaj ipan tlitl uan tlatla.
7 Tlaj inmokauaj nouaya uan notlajtol mokaua ipan inmojuantij, xitlajtlanikaj tlen inkinekij uan inkiselisej.
8 Ya ni kiueyichiua noTata: kema nochipa intemakaj miak inmotlajka uan inkinextiaj inelij notokilijkauaj.
9 Sanse kej noTata nechiknelijtok, na nojkia niinmechiknelijtok; ximokauakaj ipan notlaiknelijkayo.
10 Tlaj inkineltokaj notlanauatiljuaj, inmokauasej ipan notlaiknelijkayo, sanse kej na nijneltokatok itlanauatiljuaj noTata uan nimokaua ipan itlaiknelijkayo.
11 ”Niinmechiljuijtok ni tlamantli para inyolpakisej sanse kej na, uan para senkistok inyolpaktosej.
12 Ya ni tlen niinmechnauatia: ximoiknelikaj se ika seyok, sanse kej na niinmechiknelijtok.
13 Amo aka teiknelia más que katli temaka inemilis para kinpaleuis iuampoyouaj.*
14 Inmojuantij inelij nouampoyouaj tlaj inkichiuaj tlen niinmechnauatia.
15 Ayokmo niinmechiljuia innotlatekipanojkauaj, pampa se tlatekipanojketl amo kimati tlen iteko kichiua. Niinmechiljuia innouampoyouaj pampa niinmechiljuijtok nochi tlen nijkaktok kiijtoua noTata.
16 Inmojuantij amo innechtlapejpenijkej, na niinmechtlapejpenik. Niinmechtitlantok xiakaj uan nojua xitemakatokaj inmotlajka, se inmotlajka tlen uejkaua. Kiampa noTata inmechmakas tlen ueli tlamantli tlen inkitlajtlanisej ipan notoka.
17 ”Niinmechnauatia ni tlamantli para ximoiknelikaj se ika seyok.
18 Tlaj katli itstokej ipan Tlaltipaktli inmechkualankaitaj, xikilnamikikaj achtoui na nechkualankaitakej.
19 Tlaj ineliskiaj kej katli itstokej ipan Tlaltipaktli, inijuantij inmechikneliskiaj pampa ineliskiaj ininaxkauaj. Pero amo inelij kej katli itstokej ipan Tlaltipaktli, pampa na niinmechtlapejpenijtok tlen kampa inijuantij, yeka katli itstokej ipan Tlaltipaktli inmechkualankaitaj.
20 Xikilnamiktokaj tlen niinmechiljuik: se tlatekipanojketl amo kipia más tlanauatili que iteko. Tlaj inijuantij nechtlaijiyouiltijtokej, nojkia inmechtlaijiyouiltisej; tlaj inijuantij kineltokatokej notlajtol, nojkia kineltokasej inmotlajtol.
21 Pampa inelij notokilijkauaj, inijuantij inmechchiuilisej nochi ni tlamantli pampa amo kiixmatij katli nechualtitlanki.
22 Tlaj na amo niualajtoskia uan amo nikinkamanaljuijtoskia, amo kintlajtlakoltiskiaj.* Pero nama amo uelis motechtisej para kiijtosej amo inintlajtlakol.
23 Katli nechkualankaita, nojkia kikualankaita noTata.
24 Tlaj na amo nijchijtoskia ininixpa tlen amo aka kichijtok, amo kintlajtlakoltiskiaj, pero nama nechitstokej uan nechkualankaitstokej, uan nojkia kikualankaitstokej noTata.
25 Pero ni panok para ma moaxiti tlen ijkuilijtok ipan ininTlanauatil: ‘Nechkualankaitakej maske amo tleno nijchijki’.
26 Kema na niinmechtitlanilis nopa tlapaleuijketl tlen noTata temakas, nopa ichikaualis Dios* tlen tematiltia tlen melauak uan uala tlen toTata, ya tematiltis tlen na;
27 uan inmojuantij nojkia moneki intematiltisej pampa nochipa initstokej nouaya desde kema pejki nitlamachtia.
