Tlen kiijkuilok Juan 18:1-40
-
Judas kitemaktilia Jesús (1-9)
-
Pedro kitekiuia se espada (10, 11)
-
Kiuikaj Jesús kampa Anás (12-14)
-
Kema Pedro achtoui kiijtoua amo kiixmati Jesús (15-18)
-
Jesús itstok kampa Anás (19-24)
-
Kema Pedro ika ompa uan ika expa kiijtoua amo kiixmati Jesús (25-27)
-
Jesús itstok kampa Pilato (28-40)
-
“NoTlanauatijkayo amo eli tlen ni Tlaltipaktli” (36)
-
18 Kema Jesús tlanki kiijtoua ni tlamantli, yajki ininuaya itokilijkauaj ipan ne seyok nali atlajtli Cedrón. Nopaya eltoya kampa tlatojtokayayaj uan Jesús kalajki ininuaya itokilijkauaj.
2 Judas, katli kitemaktiliskia, nojkia tlaixmatiyaya nopaya, pampa Jesús momajtoya mosentilia nopaya ininuaya itokilijkauaj.
3 Uajka Judas asito ininuaya miakej soldados uan tlamokuitlauianij katli kintitlantoyaj sacerdotes katli kipiayayaj tlanauatili uan fariseos.* Kiuikayayaj tlikualelemektli,* tlauili uan tepostli tlen ika tlateuiaj.
4 Jesús, katli kimatiyaya nochi tlen kipanoskia, nejnenki se kentsi uan kintlatsintokik: “¿Ajkia inkitemouaj?”.
5 Inijuantij kinankilijkej: “Jesús katli eua Nazaret”. Ya kiijtok: “Na niJesús”. Uan Judas, katli kitemaktiliskia, nojkia itstoya ininuaya.
6 Pero kema Jesús kiniljuik “Na niJesús”, ikannejnenkej uan uetskej tlalchi.
7 Uajka sampa kintlatsintokik: “¿Ajkia inkitemouaj?”. Inijuantij kinankilijkej: “Jesús katli eua Nazaret”.
8 Jesús kinnankilik: “Ya niinmechiljuik na niJesús. Tlaj na innechtemouaj, xikinkauakaj ni tlakamej ma yakaj”.
9 Ni panok para ma moaxiti tlen yaya kiijtojtoya: “Amo nijpolojtok yon se katli tinechmakak”.
10 Uajka Simón Pedro kikixtik se espada* tlen kipixtoya, kiteuik itlatekipanojka sumo sacerdote uan kitsontekilik inakas tlen inejmak. Nopa tlatekipanojketl motokaxtiyaya Malco.
11 Pero Jesús kiiljuik Pedro: “Xikajokui moespada ipan cubierta.* ¿Timoiljuia amo kinamiki nikis* nopa copa tlen noTata nechmakatok?”.
12 Uajka nopa soldados, ininueyitlayakanka* soldados uan nopa tlamokuitlauianij kiitskijkej Jesús uan kiilpijkej.
13 Achtoui kiuikakej kampa Anás pampa eliyaya imontaj Caifás, katli eliyaya sumo sacerdote ipan nopa xiuitl.
14 Ni Caifás elki katli kiniljuijtoya judíos más kuali ma miki san se tlakatl para kinpaleuis nochi maseualmej.
15 Uan Simón Pedro uan seyok itokilijka Jesús, kitokilijtiauiyayaj. Uan nopa seyok itokilijka kiixmatiyaya sumo sacerdote, yeka kalajki iuaya Jesús ipan ikalixpa sumo sacerdote,
16 pero Pedro mokajki kalteno, nechka kampa puerta. Uajka nopa seyok itokilijka, katli kiixmatiyaya sumo sacerdote, kiski para kamanaltis iuaya nopa siuatl katli tlamokuitlauiyaya kampa puerta uan kiuikak Pedro kalijtik.
17 Uajka nopa siuatl katli tlamokuitlauiyaya kampa puerta, kitlatsintokik Pedro: “¿Ta nojkia tieli se itokilijka nopa tlakatl?”. Ya kinankilik: “Amo, na amo nieli”.
18 Katli nopaya tlatekipanouayayaj uan nopa tlamokuitlauianij tlipitstoyaj pampa tlaseseyayaya* uan ijkatoyaj tliteno pampa mototoniyayaj.* Pedro nojkia itstoya ininuaya.
19 Nopa sacerdote katli kipiayaya más tlanauatili* kitlatsintokik Jesús ajkia inijuantij eliyayaj itokilijkauaj uan tlake tlamachtiyaya.
20 Jesús kinankilik: “Nikamanaltitok ininixpa nochi maseualmej. Nochipa nitlamachtik kampa tlaueyichiuaj judíos uan ipan teokali, kampa nochi judíos mosentiliaj, uan amo tleno nikijtok ichtakatsi.
21 ¿Kenke na tinechtlatsintokia? Xikintlatsintoki katli kikajkej tlen nikiniljuik. Nopaya itstokej, inijuantij kuali kimatij tlen nikijtok”.
22 Kema Jesús kiijtok nopa, se tlen nopa tlamokuitlauianij katli nopaya itstoyaj, kiixtlatsinik uan kiiljuik: “¿Kiampa tijnankilia sacerdote katli kipia más tlanauatili?”.
23 Jesús kinankilik: “Tlaj nikijtok se tlamantli tlen amo kuali, xinechiljui; pero tlaj nikijtok tlen melauak, ¿kenke tinechmakilia?”.
24 Teipa Anás kiilpik uan kititlanki kampa nopa sumo sacerdote Caifás.
25 Simón Pedro nojua ijkatoya nopaya uan mototoniyaya. Uajka kitlatsintokijkej: “¿Ta nojkia tieli se tlen itokilijkauaj?”. Ya kiijtok: “Amo, na amo nieli”.
26 Se tlen itlatekipanojkauaj sumo sacerdote, katli eliyaya iuikal* nopa tlakatl katli Pedro kitsontekilijtoya inakas, kiiljuik: “¿Amo nimitsitak iuaya kema tiitstoyaj kampa tlatojtokaj?”.
27 Pero Pedro kiijtok amo kiixmatiyaya, uan nimantsi tsajtsik se kuapele.*
28 Tlauel ijnaltsi kistejkej ichaj Caifás uan kiuikakej Jesús ichaj gobernador, pero inijuantij amo kalajkej ichaj gobernador pampa tlaj kalakiskiaj ayokmo eliskiaj tlapajpaktikej uan ayokmo ueliskiaj kikuasej nopa tlakualistli tlen kikuaj ipan Pascua.
29 Yeka Pilato kiski kampa inijuantij itstoyaj uan kintlatsintokik: “¿Ika tlake inkitlateljuiaj ni tlakatl?”.
30 Inijuantij kinankilijkej: “Tlaj ni tlakatl amo eliskia se tlaixpanoketl amo timitsualikilijtoskiaj”.
31 Uajka Pilato kiniljuik: “Xijuikakaj uan xijtlajtolsenkauakaj kej kiijtoua inmotlanauatil”. Judíos kiiljuijkej: “Tojuantij amo tijpiaj tlanauatili para tijmiktisej se akajya”.
32 Ni panok para ma moaxiti tlen Jesús kiijtojtoya kema kiijtok kenijkatsa mikiskia.
33 Pilato sampa kalajki ichaj, kinotski Jesús uan kitlatsintokik: “¿Ta tiinintlanauatijka judíos?”.
34 Jesús kinankilik: “¿Ta moselti timoiljuik kiampa tinechtlatsintokis o sekinok mitspouilijtokej tlen na?”.
35 Uan Pilato kiiljuik: “¿Timoiljuia na nijudío? Katli itstokej ipan moaltepe uan sacerdotes katli kipiaj tlanauatili mitstemaktilijtokej nomako. ¿Tlake tijchijki?”.
36 Jesús kinankilik: “NoTlanauatijkayo amo eli tlen ni Tlaltipaktli. Tlaj noTlanauatijkayo eliskia tlen ni Tlaltipaktli, notlapaleuijkauaj tlateuijtoskiaj para amo ma nechtemaktilikaj ininmako judíos. Pero noTlanauatijkayo amo eli tlen ni Tlaltipaktli”.
37 Pilato kitlatsintokik: “Uajka, ¿tieli se tlanauatijketl?”. Jesús kinankilik: “Kena, ta tikijtoua nieli tlanauatijketl. Yeka nitlakajtok uan niualajtok ipan Tlaltipaktli: para nitematiltis tlen melauak. Nochi katli kineltokaj tlen melauak, nechtlakakiliaj”.
38 Pilato kitlatsintokik: “¿Tlake eli tlen melauak?”.
Kema kiijtok nopa, sampa kiski kampa itstoyaj judíos uan kiniljuik: “Na amo nikita tlaj ni tlakatl tlaixpanotok.
39 Nojkia, inmojuantij inmomajtokej ma nijkixti se katli tsaktok kema mochiua iljuitl Pascua. ¿Inkinekij ma nijkaua ma yaui inintlanauatijka judíos?”.
40 Inijuantij sampa chikauak kiijtojkej:* “¡Amo, ya amo! ¡Xijkixti Barrabás!”. Uan Barrabás eliyaya se tlachtejketl.
Tlen ijkuilijtok tlatsintla
^ O “antorchas”.
^ Se espada eli kej se machete tlen onkak tlatentili.
^ Kanajya kiijtouaj “ikuetlaxo”.
^ Kanajya kiijtouaj “nikijis”.
^ Katli kinyakanayaya mil soldados tlen Roma.
^ Kanajya kiijtouaj “seseuayaya”.
^ Kanajya kiijtouaj “miskouayayaj”.
^ Ni eliyaya Anás.
^ Kanajya kiijtouaj “iteixmatka”.
^ Kanajya kiijtouaj “kuanaka”.
^ Ika griego “kuatsajtsikej”.
