Tlen kiijkuilok Judas 1:1-25
1 Na niJudas, niitekipanojka Jesucristo uan iikni Santiago, nikintlajkuiljuilia katli toTata Dios* kinnotstok uan tlauel kiniknelia, uan kinmokuitlauik para ma itstokaj sansejko iuaya Jesucristo:
2 Dios nojua más ma inmechtlasojtla, más ma inmechmaka tlaseuilistli uan más ma inmechikneli.
3 Noikniuaj katli niinmechiknelia, nijchijtoya kampeka niinmechtlajkuiljuilis tlen kenijkatsa Dios techmakixtis.* Pero nikita más moneki niinmechtlajkuiljuilis para niinmechiljuis xijchijtokaj kampeka nojua inkipiasej inmotlaneltokilis, tlen kinmakakej katli Dios kiniyokatlalik* san sampatsi uan ayokmo monejki sampa ma kinmakakaj.
4 Niinmechtlajkuiljuilia pampa nikitstok kampa inmojuantij ichtakatsi kalaktokej se keskij maseualmej, tlen uejkajkia iTlajkuilol Dios kiijtok kinamikiyaya ma kintlatsakuiltikaj.* Ni maseualmej amo tlatlepanitaj uan amo pinauaj tlajtlakolchiuasej* pampa kiijtouaj Dios kinextia ueyi iyolo ika nochi tojuantij,* uan amo nelnelia kineltokaj Jesucristo, katli iyojtsi toTeko.
5 Maske inmojuantij ya inkimatij, nijneki xikilnamikikaj Jehová* kinmakixtik miakej maseualmej ipan Egipto, pero teipa kintsontlamiltik katli amo tlaneltokakej.
6 Uan nopa ángeles katli kikajtejkej ininteki tlen Dios kinmakatoya uan kistejkej kampa kinamikiyaya itstosej, kinilpitok ika cadenas tlen amo kema kotoni kampa tlauel tsintlayoua, para teipa kintlajtolsenkauas ipan nopa ueyi tonali.
7 Nojkia, Sodoma uan Gomorra uan nopa sekinok altepemej tlen nechka eltoya, tlauel auilnemiyayaj* uan kinekiyayaj kichiuasej tlen kinyoltilanayaya maske amo ya nopa kinamikiyaya kichiuasej. Inijuantij kintlatsakuiltijkej ika tlitl tlen amo kema seui, yeka tlen kinpanok techtlalnamiktia para amo kiampa ma tijchiuakaj.
8 Maske ya kimatij nopa, ni maseualmej nochipa san moiljuiaj tlen amo kuali, kisokiuiaj inintlakayo uan inintlakayo sekinok, amo kintlepanitaj katli kipiaj tlanauatili uan kintlaijiljuiaj katli Dios kinuejkapantlalijtok.
9 Pero kema Miguel, katli eli arcángel,* mokamaijixnamijki iuaya Diablo tlen itlakayo Moisés, kiiljuik: “Jehová* ma mitstlakaualti”, uan amo kinejki kiiljuis ya kitlatsakuiltiskia.*
10 Pero nopa maseualmej amo kuali kamanaltij tlen nopa tlamachtili tlen amo kikuamachiliaj. Uan nochi tlen kena kikuamachiliaj, kichiuaj kej tlapialmej tlen amo tlalnamikij pampa nojua kichijtinemij tlen tlauel amo kuali.
11 ¡Tlauel teikneltikej! Pampa kitokilijtokej iojui Caín; kichijtokej tlen amo kuali sanse kej Balaam pampa kinektokej kiselisej se tlenijki, uan kintsontlamiltijtokej pampa tlaijixnamijkej kej Coré.
12 Nopa maseualmej moyolpakiltiaj inmouaya kema inkichiuaj se iljuitl para inkinextisej inmoikneliaj, pero elij kej tetl tlen motlatijtok* atsintla; elij kej katli kinmokuitlauiaj tlapialmej tlen san inijuantij motlamakaj uan amo pinauaj; elij kej mixtli tlen amo kipia atl uan ajakatl ejeliuis* kinuika; elij kej kuatinij tlen amo temakaj inintlajka kema ipoual, tlen kuali uaktok uan tlen kitsinuiuitlatokej;*
13 nopa maseualmej elij kej atl ipan mar tlen tlauel mokojkoxonia uan kimajkaua atenteno tlen sokiyo, pampa amo pinauaj ika tlen kichiuaj; elij kej sitlalimej tlen ejeliuis yauij, katli Dios kintlalijtok kampa tlauel tsintlayoua para nochipa ma itstokaj nopaya.
14 Enoc, katli elki nopa chikompa tlakatl tlen tlakatki teipa tlen Adán, kiijtok tlake kinpanoskia nopa maseualmej: “¡Xikitakaj! Jehová* ualajki ininuaya tlauel miakej iángeles
15 para nochi kintlajtolsenkauas, uan para kinextis nopa maseualmej katli amo tlatlepanitaj nelnelia kichijtokej nochi nopa tlamantli tlen amo kuali, uan nojkia kiijtojkej tlen amo kuali para kitlaijiljuisej”.
16 Nopa maseualmej amo tleno kinpaktia, amo yolpakij ika tlen kipiaj uan san kichiuaj tlen inijuantij kinekij. Tlen kiijtouaj kinextia tlauel moueyimatij uan kinuejkapantlaliaj sekinok pampa kinekij ma kinpaleuikaj.
17 Pero inmojuantij, noikniuaj katli niinmechiknelia, xikilnamikikaj tlen uejkajkia kiijtojkej* iapóstoles toTeko Jesucristo.
18 Inijuantij nochipa inmechiljuiyayaj: “Ipan itlamia tonali itstosej katli san tepinajtisej uan san kichiuasej nopa amo kuali tlamantli tlen kinyoltilana”.
19 Nopa maseualmej kichiuaj ma timoxelokaj; monejnemiltiaj kej tlapialmej pampa amo kipiaj ichikaualis Dios.*
20 Pero inmojuantij, noikniuaj katli niinmechiknelia, xijtemolikaj kenijkatsa más intlaneltokasej, uan xijkauakaj ichikaualis Dios ma inmechyakana kema inmomaijtosej*
21 para uelis inkichijtosej nojua ma inmechiknelijto Dios. Uan xijchixtokaj toTeko Jesucristo ma inmechtlasojtla para uelis inkipiasej nemilistli tlen amo kema tlamis.*
22 Nojkia, nojua xikintlasojtlatokaj katli ayamo kuali tlaneltokaj;
23 uan xikinmakixtikaj para amo ma kintsontlamiltikaj.* Nojua xikinpaleuijtokaj sekinok, pero nojkia moneki ximomokuitlauikaj, kiampa amo inmechmauasej, uan xijkualankaitakaj hasta ininyoyo tlen kisokiuijtokej ika inintlajtlakoljuaj.
24 Dios uelis inmechpaleuis amo xiuetsikaj ipan tlajtlakoli* uan kichiuas kuali ximoketstokaj iixpa, amo xijpiakaj yon se tlajtlakoli uan tlauel xiyolpaktokaj.
25 Yaya katli iyojtsi toDios, katli techmakixtia ika toTeko Jesucristo, san ya kinamiki ma tijueyichiuakaj, san ya eli katli más ueyi, san ya kinamiki kipias chikaualistli uan nochipa kipias tlanauatili: desde achtouia, nama uan para nochipa. Amén.*
Tlen ijkuilijtok tlatsintla
^ Kanajya kiijtouaj “toTeotsij”.
^ O “techmanauis”.
^ O “tlatsejtseloltikej”.
^ O “kintlajtolsenkauasej”.
^ Ika griego asélgueia. Xikita amo pinauaj tlajtlakolchiuasej.
^ O “temaka tlateochiualistli tlen amo kinamiki tijselisej”.
^ Xikita auilnemilistli.
^ O “kitlajtolsenkauaskia”.
^ Kanajya kiijtouaj “miyantok”.
^ Kanajya kiijtouaj “kampa ueli”.
^ Kanajya kiijtouaj “kintsinlonkejtokej”.
^ O “tlen ipa kiijtojtoyaj panoskia”.
^ O “espíritu santo”.
^ Kanajya kiijtouaj “inmotlatlajtisej”.
^ O “initstosej para nochipa”.
^ Ika griego “tlen tlitl”.
^ O “amo inmotepotlamisej”.
^ O “kiampa ma eli”.
