Tlen kiijkuilok Lucas 3:1-38
3 Kema Tlanauatijketl* Tiberio tekichijtoya 15 xiuitl, kema Poncio Pilato eliyaya gobernador ipan Judea, Herodes* eliyaya gobernador ipan tlali Galilea, iikni Filipo eliyaya gobernador ipan tlali Iturea uan Traconítide, uan Lisanias eliyaya gobernador ipan tlali Abilene,
2 kema itstoya Anás, nopa sacerdote katli kipiayaya más tlanauatili uan nojkia Caifás, Dios* kimatiltik Juan, ikone Zacarías, se tlamantli ipan uaktok tlali.
3 Uajka yajki ipan nochi pilaltepetsitsij tlen eltoya nechka ueyatl Jordán, teiljuijtinemiyaya ma moatsonpoliuiltikaj para kinextisej moyolkueptoyaj uan kiampa kintlapojpoljuiskiaj inintlajtlakoljuaj.
4 Panok kej ijkuilijtok ipan libro tlen teokamanalojketl* Isaías: “Se akajya chikauak kiijtoua* ipan uaktok tlali: ‘¡Xijkualtlalikaj* iojui Jehová!* Xijchiuakaj kuali ma elto.
5 Nochi kampa tlakomoltipa moneki kitlaltemisej, uan nochi tepemej uan piltepetsitsij moneki kikualtlalisej, nopa ojtli tlen uijuijkoltik moneki moxitlauas uan ojtli kampa tlafiero moneki mokauas tlamaya.
6 Nochi kiitasej kenijkatsa Dios temakixtis’”.*
7 Uajka Juan pejki kiniljuia nopa miakej maseualmej katli yauiyayaj para ma kinatsonpoliuilti: “Inmojuantij inelij ininkoneuaj kouamej,* pampa inkichiuaj tlen amo kuali, ¿ajkia inmechiljuik uelis inmomanauisej kema asis ikualankayo Dios?
8 Achtoui, ika tlen inkichiuaj, xijnextikaj nelnelia inmoyolkueptokej. Amo ximoiljuikaj ‘ToTata eli Abrahán’, pampa niinmechiljuia Dios uelis kichiuas ipan ni tetl ma kisakaj ikoneuaj Abrahán.
9 Nopa hacha ya eltok itsintla nopa kuauitl. Yeka, nochi kuauitl tlen amo temaka itlajka kitsontekisej uan kitlatisej”.
10 Uan nopa miakej maseualmej kitlatsintokiyayaj: “Uajka, ¿tlake moneki tijchiuasej?”.
11 Ya kinnankiliyaya: “Katli kipia ome iyoyo ma kimaka se katli amo kipia, uan katli kipixtok tlen kikuas nojkia kiampa ma kichiua”.
12 Hasta katli tlainamayayaj impuestos ualajkej moatsonpoliuiltikoj, uan kitlatsintokijkej: “Tlamachtijketl, ¿tlake moneki tijchiuasej?”.
13 Juan kinnankilik: “San xitlainamakaj tlen kinamiki”.
14 Nopa soldados nojkia kitlatsintokiyayaj: “¿Tlake moneki tijchiuasej?”. Ya kinnankiliyaya: “Amo aka xijchiualtikaj ma inmechmaka itomij, yon amo aka xikistlakauikaj; san xipakikaj ika tlen inmechtlaxtlauiaj”.
15 Nochi kichixtoyaj Cristo, uan motlatsintokiyayaj tlaj Juan eliskia nopa Cristo.
16 Juan kiniljuik nochi katli nopaya itstoyaj: “Na niinmechatsonpoliuiltia ika atl, pero uala katli kipia más tlanauatili que na, uan amo kinamiki ma nijtojtomili ihuaraches. Ya inmechatsonpoliuiltis ika ichikaualis Dios uan ika tlitl.*
17 Kipixtok imako tlen ika kiajkomajkaua trigo para kikixtilis itlasolo kampa tlayejyektiaj,* uan para kisentilis trigo uan kitlalis kampa kiajokui. Pero itlasolo kitlatis ika tlitl tlen amo uelis seuis”.
18 Nojkia kiniljuik miak tlamantli kej nopa para kinyolchikauas uan nojua kinmatiltiyaya nopa kuali tlamachtili.
19 Pero Juan kiiljuiyaya gobernador Herodes amo kuali tlen kichijtoya pampa mokuilijtoya Herodías, katli eliyaya isiua iikni,* uan nojkia pampa kichijtoya miak tlamantli tlen amo kuali,
20 yeka Herodes nojua kichijki seyok tlamantli tlen más amo kuali: kitsajki Juan.
21 Uajka kema nochi maseualmej moatsonpoliuiltijkej, Jesús nojkia moatsonpoliuiltik. Kema momaijtouayaya,* motlapok iluikaktli
22 uan neski ichikaualis Dios* ualtemok itsonixko* Jesús kej se paloma, uan kakistik Dios kiijtok ipan iluikak: “Ta tieli noKone katli tlauel nimitsiknelia, ta tijchiua ma niyolpaki”.
23 Kema Jesús kipeualtik iteki kipixtoya se 30 xiuitl. Kiijtouayayaj eliyayaikone José,ikone Helí,
24 ikone Matat,ikone Leví,ikone Melquí,ikone Janaí,ikone José,
25 ikone Matatías,ikone Amós,ikone Nahúm,ikone Eslí,ikone Nagái,
26 ikone Maat,ikone Matatías,ikone Semeín,ikone Josec,ikone Jodá,
27 ikone Joanán,ikone Resá,ikone Zorobabel,ikone Sealtiel,ikone Nerí,
28 ikone Melquí,ikone Adí,ikone Cosam,ikone Elmadam,ikone Er,
29 ikone Jesús,ikone Eliezer,ikone Jorim,ikone Matat,ikone Leví,
30 ikone Simeón,ikone Judas,ikone José,ikone Jonam,ikone Eliaquim,
31 ikone Meleá,ikone Mená,ikone Matatá,ikone Natán,ikone David,
32 ikone Jesé,ikone Obed,ikone Boaz,ikone Salmón,ikone Nahsón,
33 ikone Aminadab,ikone Arní,ikone Hezrón,ikone Pérez,ikone Judá,
34 ikone Jacob,ikone Isaac,ikone Abrahán,ikone Taré,ikone Nacor,
35 ikone Serug,ikone Reú,ikone Péleg,ikone Éber,ikone Selá,
36 ikone Cainán,ikone Arpaksad,ikone Sem,ikone Noé,ikone Lamec,
37 ikone Matusalén,ikone Enoc,ikone Jared,ikone Mahalaleel,ikone Cainán,
38 ikone Enós,ikone Set,ikone Adán,ikone Dios.
Tlen ijkuilijtok tlatsintla
^ Ika griego “César”.
^ Kanajya kiijtouaj “toTeotsij”.
^ O “profeta”.
^ Kanajya kiijtouaj “kuatsajtsi”.
^ O “xijkualchijchiuakaj”.
^ O “temanauis”.
^ Kanajya kiijtouaj “okuilimej”.
^ Ni kiijtosneki se keskij kintlapejpenis ika ichikaualis Dios (espíritu santo) uan sekinok kintsontlamiltis ika tlitl.
^ Xikita kampa tlayejyektiaj.
^ O “iuejpol”.
^ Kanajya kiijtouaj “motlatlajtiyaya”.
^ O “espíritu santo”.
^ O “ipani”.
