Tlen kiijkuilok Marcos 12:1-44

Ma kakisti ipan

Neskayotl tlen nopa tokanij katli temiktiaj (1-12)
Dios uan Tlanauatijketl tlen Roma (13-17)
Kitlatsintokiaj tlake panos kema moyolkuisej mijkatsitsij (18-27)
Nopa ome tlanauatili tlen más ipati (28-34)
¿Cristo eli ikone David? (35-37)
Kiniljuia amo ma elikaj kej escribas (37-40)
Nopa ome piltomintsitsij tlen kitlalik se toaui katli ya miktoya iueue (41-44)

12 Uajka pejki kinmachtia ika neskayotl. Kiniljuik: “Se tlakatl kitojki uvas uan kiyaualtsajki. Nojkia, tlaxajki kampa kipatskaskiaj uvas uan kichijchijki se uejkapantik kali. Teipa kintlanejtik* nopa tlali se keskij tokanij, uan yajki seyok altepetl. ² Kema pejkej kitekij uvas, kititlanki se itlatekipanojka kampa nopa tokanij para ma kimakakaj tlen kinamikiyaya kiselis.* ³ Pero nopa tokanij kiitskijkej nopa tlatekipanojketl, kimakilijkej uan amo tleno kimakakej kema kikuepaltijkej. ⁴ Katli iaxka nopa tlali sampa kititlanki seyok itlatekipanojka. Uan ni kikokojkej ipan itsonteko uan san tlemach kiiljuijkej. ⁵ Teipa kititlanki seyok uan kimiktijkej. Uan nojua kintitlanki sekinok; sekij kinmakilijkej uan sekinok kinmiktijkej. ⁶ Nojua itstoya seyok katli ueliskia kititlanis: ikone katli tlauel kiikneliyaya. Uajka nojkia kititlanki pampa kiijtouayaya: ‘Kitlepanitasej nokone’. ⁷ Pero nopa tokanij kiijtojkej: ‘Ya ni katli kikauilisej* nochi. Ma tijmiktikaj, kiampa timoaxkatisej tlen kiselis’. ⁸ Uajka kiitskijkej, kimiktijkej uan kikixtijkej tlen kampa kitoktoyaj uvas. ⁹ ¿Tlake kichiuas katli iaxka nopa tlali? Ualas, kinmiktis nopa tokanij, uan kintlanejtis sekinok kampa kitoktok uvas. ¹⁰ ¿Amo kema inkipojkej ipan iTlajkuilol Dios kampa kiijtoua: ‘Nopa tetl tlen kalchiuanij amo kinejkej kitekiuisej, ya nopa mochijtok nopa ueyi tetl kampa motetonia ome tepamitl’?* ¹¹ ¿Uan amo inkipojkej: ‘Ni tetl iaxka Jehová* uan tojuantij tikitaj nelnelia tlauel yejyektsi’?”. ¹² Kema ikualankaitakauaj kikuamachilijkej kamanaltiyaya tlen inijuantij, kinejkej kiitskisej, pero kinmakasiyayaj nopa miakej maseualmej. Yeka kikajtejkej uan yajkej. ¹³ Uajka kintitlankej se keskij fariseos* uan se keskij katli kipaleuiyayaj Herodes* para ma kitemolikaj kenijkatsa kichiuaskiaj ma motenkuapolo. ¹⁴ Kema asitoj, kiiljuijkej: “Tlamachtijketl, tijmatij ta nochipa tikijtoua tlen melauak, uan amo tijtemoua sekinok kuali ma mitsitakaj pampa amo titechikoita, uan nelnelia titlamachtia iojui Dios.* ¿Kinamiki tijmakasej impuesto* Tlanauatijketl tlen Roma,* o amo? ¹⁵ ¿Moneki titlaxtlauasej, o amo?”. Pero ya kiitak kipixtoyaj ome ininxayak, yeka kiniljuik: “¿Kenke inkitemoliaj ma nimotenkuapolo? Xinechualikilikaj se denario* para nikitas”. ¹⁶ Uajka kiualikilijkej uan ya kintlatsintokik: “¿Ajkia ixayak tlen nikaj nesi uan ajkia itoka tlen nikaj ijkuilijtok?”. Inijuantij kinankilijkej: “Tlanauatijketl tlen Roma”.* ¹⁷ Uajka Jesús kiijtok: “Xijmakakaj Tlanauatijketl tlen iaxka Tlanauatijketl, pero xijmakakaj Dios tlen iaxka Dios”. Uan inijuantij mosentlachilijkej ika tlen kiniljuik. ¹⁸ Uajka ualajkej nopa saduceos,* katli kiijtouaj amo moyolkuisej mijkatsitsij, uan kitlatsintokijkej: ¹⁹ “Tlamachtijketl, Moisés kiijkuilok tlaj se tlakatl miki uan isiua mokaua pero amo kikaua yon se ikone, uajka iikni nopa tlakatl moneki mosiuajtis iuaya iuejpol,* kiampa nopa konemej tlen kinpiasej elisej kej ikoneuaj katli mijki. ²⁰ Itstoyaj chikomej iknimej. Katli achtouiejketl mosiuajtik, pero teipa mijki uan amo kinkajki ikoneuaj. ²¹ Teipa nopa ompaejketl mosiuajtik ika iuejpol, pero nojkia mijki uan amo kinkajki ikoneuaj; uan katli expaejketl nojkia kiampa kipanok. ²² Uan yon se tlen nopa chikomej iknimej kinkajkej ininkoneuaj. Kema nochi iknimej mijkej, nojkia mijki nopa siuatl. ²³ Kema moyolkuisej katli miktokej, ¿ajkia tlen nopa chikomej iknimej elis isiua? Pampa nochi mosiuajtijkej iuaya”. ²⁴ Jesús kinnankilik: “Inmokuapolojtokej, pampa amo inkimatij tlen kiijtoua iTlajkuilol Dios yon kenijkatsa eli iueyichikaualis. ²⁵ Pampa kema moyolkuisej katli miktokej, tlakamej amo mosiuajtisej yon siuamej monamiktisej, pampa elisej kej ángeles katli itstokej iluikak. ²⁶ ¿Amo inkipojkej tlen kiijkuilok Moisés, ipan nopa tlapoualistli kema Dios kinojnotski kampa se xiuitl tlen uitstso? Dios kiijtouayaya moyolkuisej* katli miktokej kema kiiljuik Moisés: ‘Na nieli iDios Abrahán, iDios Isaac uan iDios Jacob’. ²⁷ Ya amo eli ininDios katli miktokej, eli ininDios katli yoltokej. Inmojuantij tlauel inmokuapolojtokej”. ²⁸ Uan se tlen nopa escribas* katli asito, kikajki tlen kiijtouayayaj. Kema kiitak Jesús kuali kinnankilijtoya, kitlatsintokik: “¿Tlake tlanauatili más ipati?”. ²⁹ Jesús kinankilik: “Ya ni eli nopa achtoui: ‘Xijkakikaj inisraeleuanij. Jehová* toDios eli san setsi Jehová.* ³⁰ Xikikneli Jehová* moDios ika nochi moyolo, ika nochi monemilis,* ika nochi motlalnamikilis uan ika nochi mochikaualis’. ³¹ Nopa ompa tlanauatili eli ya ni: ‘Xikinikneli sekinok kej ta timoiknelia’. Amo onka yon se tlanauatili tlen más ipati que ni ome”. ³² Nopa escriba kiiljuik: “Kuali titlanankilik Tlamachtijketl, tikijtok tlen melauak: ‘Ya eli san setsi, uan amo itstok seyok’. ³³ Uan tikiknelisej ika nochi toyolo, ika nochi totlalnamikilis uan ika nochi tochikaualis, uan tikiniknelisej sekinok kej tojuantij timoikneliaj, ya nopa más ipati que nochi ofrendas* tlatlatili uan tlapialmej tlen tijmaktiliaj Dios”. ³⁴ Kema Jesús kiitak kuali kinankilijtoya, kiiljuik: “Nechka tiitstok para tikalakis ipan iTlanauatijkayo Dios”. Uan ayokmo aka kinejki kichiuilis sekinok tlajtlanili.* ³⁵ Jesús nojua tlamachtiyaya ipan teokali uan tlatsintokak: “¿Kenke escribas kiijtouaj nopa Cristo eli ikone David? ³⁶ Kema ichikaualis Dios* kiyakanki David, kiijtok: ‘Jehová* kiiljuik noTeko: “Ximoseui nomanejmak hasta kema nikintlalis moikxitla katli mitskualankaitaj” ’. ³⁷ David kiiljuia ‘noTeko’; uajka, ¿kenijkatsa ueliskia elis ikone?”. Uan nopa miakej maseualmej kitlakakiliyayaj ika pakilistli. ³⁸ Kema tlamachtiyaya, kiniljuik: “Ximomokuitlauikaj tlen nopa escribas katli kinpaktia paxalosej ika ininyoyo uejueueyak uan ma kintlajpalokaj kampa mochiua tiankis,* ³⁹ uan kinpaktia moseuisej tlaixpa kampa tlaueyichiuaj judíos uan moseuisej kampa más kuali kema tlakuaj. ⁴⁰ Kinkuiliaj tlen kipiaj* katli ya mijki ininueue, uan kinekij sekinok kuali ma kinitakaj, yeka uejkauaj momaijtouaj.* Inijuantij más chikauak kintlajtolsenkauasej”. ⁴¹ Uan moseuik kampa nesiyaya nopa pilcajontsitsij kampa kitemaj tomij ipan teokali, uan pejki kiita kenijkatsa maseualmej kitemayayaj tomij; miakej katli tlatominpiayayaj kitemayayaj miak tomij. ⁴² Uajka, ualajki se toaui katli ya miktoya iueue uan amo tleno kipiayaya, uan kitenki ome piltomintsitsij* tlen amo tlauel ipati. ⁴³ Jesús kinnotski itokilijkauaj uan kiniljuik: “Temachtli niinmechiljuia, ni toauitsi katli amo tleno kipia kitenki ipan pilcajontsi más que nochi sekinok. ⁴⁴ Pampa nochi inijuantij temakaj san tlen mokaua, pero ya maske amo tleno kipia, kitenki nochi, nochi tlen kipixtoya tlen ika mopanoltiskia”.