Tlen kiijkuilok Mateo 12:1-50

  • Jesús “kipia tlanauatili ipan sábado” (1-8)

  • Kichikaua imax se tlakatl katli mauipinijtoya (9-14)

  • Itekipanojka Dios katli kiiknelia (15-21)

  • Kinkixtia amo kuali ajakamej ika ichikaualis Dios (22-30)

  • Nopa tlajtlakoli tlen maseualmej amo kintlapojpoljuisej (31, 32)

  • Se kuauitl kiixmatij ika itlajka (33-37)

  • Tlanextilili tlen Jonás (38-42)

  • Kema se amo kuali ajakatl sampa kalaki ipan se maseuali (43-45)

  • Inana uan iikniuaj Jesús (46-50)

12  Ipan se tonali sábado* Jesús panok kampa tlatojtoktoyaj. Uan itokilijkauaj mayankej, yeka pejkej kimatekij tlen nopaya toktoya* uan kikuajkej. 2  Kema fariseos* kiitakej nopa, kiiljuijkej: “¡Xikita! Motokilijkauaj kichiuaj tlen amo kinamiki mochiuas ipan sábado”. 3  Ya kinnankilik: “¿Amo inkipojtokej tlen kichijkej David uan nopa tlakamej katli kipaleuiyayaj kema mayankej? 4  Ya kalajki ichaj Dios,* uan ya uan katli itstoyaj iuaya kikuajkej nopa pantsi tlen kimaktiliaj Dios. Uan nopa amo kinamikiyaya kichiuasej pampa san ueliskiaj kikuasej sacerdotes. 5  Nojkia, ¿amo inkipojkej nopa Tlanauatili kampa kiijtoua maske sacerdotes tekitij sábado ipan teokali amo tlaixpanoj? 6  Niinmechiljuia, nikaj inkipiaj se tlamantli tlen más ipati que nopa teokali. 7  Tlaj inkikuamachilijtoskiaj tlake kiijtosneki ni tlajtoli ‘Nijneki xitetlasojtlakaj, uan amo xinechmakakaj tlapialmej’, uajka amo inkintlajtlakoltijtoskiaj katli amo tleno kichijtokej. 8  Pampa katli eli iKone se Maseuali* kipia tlanauatili ipan sábado”. 9  Kema kistejki kampa itstoya, kalakito kampa tlaueyichiuaj judíos, 10  uan nopaya itstoya se tlakatl katli uipinijtoya* se imax. Uan para kipiasej ika tlake kitlateljuisej Jesús, kitlatsintokijkej: “¿Kinamiki kichikauasej se akajya ipan sábado?”. 11  Ya kinnankilik: “Tlaj inkipiaj se pilborregojtsi uan uetsi kampa tlakoyontok* ipan sábado, ¿amo inkikixtiskiaj kampa kalaktok? 12  ¡Se maseuali más ipati que se pilborregojtsi! Yeka, uelis tijchiuasej tlen kuali ipan sábado. 13  Uajka kiiljuik nopa tlakatl: “Ximomaxitlaua”. Kema momaxitlajki, mokualtilik imax kej nopa seyok. 14  Pero fariseos kiskej uan moiljuijkej kenijkatsa kimiktisej. 15  Kema Jesús kimatki tlen kinekiyayaj kichiuilisej, yajki sejkanok.* Miakej kitokilijkej uan ya nochi kinchikajki. 16  Uajka Jesús xitlauak kinnauatik amo aka ma kiiljuikaj ajkia eliyaya. 17  Kiampa moaxitik tlen Dios kiijtojtoya ika teokamanalojketl* Isaías: 18  “Xikitakaj, ni eli notlatekipanojka, katli nijtlapejpenik; katli nikiknelia, katli kuali nikita. Nijtlalis nochikaualis ipan ya, uan ya kinnextilis maseualmej kenijkatsa kichiuasej tlen kuali. 19  Ya amo tekamaijixnamikis yon tekuatsajtsilis. Uan amo aka kikakis kamanaltitinemi ipan ueyi ojtli. 20  Amo kipostekis nopa akatl tlen ya postektok yon kiseuis nopa mecha tlen san kentsi tlatlatok* hasta kichiuas ma tlatlani tlen kuali. 21  Nelnelia, maseualmej tlen nochi Tlaltipaktli motemachisej ipan ya itoka”. 22  Uajka kiualikilijkej se katli kipixtoya se amo kuali ajakatl* uan amo tlachiayaya yon kamanaltiyaya. Uan Jesús kichikajki, yeka uelki kamanalti uan tlachixki. 23  Nochi nopa miakej maseualmej mosentlachilijkej uan pejkej kiijtouaj: “¿Uelis ya eli iKone David?”. 24  Kema fariseos kikajkej nopa, kiijtojkej: “Ni tlakatl kinkixtia amo kuali ajakamej pampa kipaleuia Belcebú,* katli kinyakana amo kuali ajakamej”. 25  Jesús kimatiyaya tlen moiljuiyayaj, yeka kiniljuik: “Se tlanauatijkayotl ixpoliuis tlaj maseualmej katli itstokej nopaya moteuiaj, uan se pilaltepetsi o katli itstokej ipan se kali, amo kuali itstosej tlaj moteuiaj. 26  Nojkia, tlaj Satanás kikixtia Satanás, iselti moteuia. Tlaj kiampa panoskia, ¿uejkauaskia tlanauatijtos? 27  Uan tlaj na nikinkixtia amo kuali ajakamej pampa nechpaleuia Belcebú, ¿ajkia kinpaleuia inmokoneuaj* ma kinkixtikaj amo kuali ajakamej? Yeka inijuantij inmechtlajtolsenkauasej. 28  Pero tlaj na nikinkixtia amo kuali ajakamej pampa ichikaualis Dios* nechpaleuia, uajka iTlanauatijkayo Dios inmechichtakauiko.* 29  Nojkia, tlaj se akajya kineki kalakis ichaj se tlakatl katli tetik* pampa kineki kitlachtekilis, achtoui moneki kiilpis nopa tlakatl, ¿axke? Kiampa uelis kiichtekilis tlen kipixtok ichaj. 30  Katli amo itstok nouaya, nechijixnamiki; uan katli amo tlaolchoua* nouaya, tlaxoyaua. 31  ”Yeka niinmechiljuia, maseualmej kintlapojpoljuisej tlen ueli tlajtlakoli uan nojkia kema tetlaijiljuiaj, pero katli kiixpanos ichikaualis Dios ika tlen kiijtos, amo kitlapojpoljuisej. 32  Katli kitlaijiljuis katli eli iKone se Maseuali,* kitlapojpoljuisej itlajtlakol; pero katli kitlaijiljuis ichikaualis Dios, amo kitlapojpoljuisej, amo, yon ipan ni tonali* yon teipa. 33  Tlaj inelij se kuali kuauitl, uajka intemakasej se kuali inmotlajka, pero tlaj inelij se kuauitl tlen palantok, uajka intemakasej inmotlajka tlen lochontok. Pampa se kuauitl kiixmatij ika itlajka. 34  Inmojuantij inelij ininkoneuaj kouamej,* ¿kenijkatsa uelis inkiijtosej tlen kuali tlaj inkichiuaj tlen amo kuali? Pampa tlen tikijtouaj, ya nopa eltok ipan toyolo. 35  Se akajya katli yolkuali, kiijtoua tlen kuali pampa ya nopa eltok ipan iyolo; uan se akajya katli amo yolkuali, kiijtoua tlen amo kuali pampa ya nopa eltok ipan iyolo. 36  Niinmechiljuia, ipan nopa Tonali kema Dios tetlajtolsenkauas, maseualmej monekis kiijtosej iixpa Dios nochi amo kuali tlajtoli tlen kiijtojkej. 37  Pampa tlaj tikijtoua tlen kuali, Dios kiijtos tijchiua tlen kuali; pero tlaj tikijtoua tlen amo kuali, mitstlajtolsenkauas”. 38  Uajka se keskij escribas* uan fariseos kiiljuijkej: “Tlamachtijketl, tijnekij xijchiua se milagro”. 39  Uan ya kinnankilik: “Ni maseualmej amo kineltokaj Dios uan amo yolkualmej, nochipa kinekij kiitasej se milagro. Pero amo kiitasej yon se, san kiitasej tlen panok ika teokamanalojketl Jonás. 40  Pampa sanse kej Jonás itstoya eyi tonali uan eyi youali iijtiko nopa ueyi michij, katli eli iKone se Maseuali* itstos tlalijtik eyi tonali uan eyi youali. 41  Kema Dios tetlajtolsenkauas, katli itstoyaj Nínive moyolkuisej ininuaya ni maseualmej uan kiijtosej kinamiki ma kintlatsakuiltikaj. Pampa inijuantij moyolpatlakej kema kikajkej tlen Jonás kinmatiltik. Pero xikitakaj, nikaj itstok se katli más ueyi que Jonás. 42  Uan kema Dios tetlajtolsenkauas, nopa siuatlanauatijketl tlen sur moyolkuis ininuaya ni maseualmej uan kiijtos kinamiki ma kintlatsakuiltikaj. Pampa maske itstoya hasta iyakapaj* Tlaltipaktli, ualajki kikakiko nopa tlalnamikilistli tlen Salomón kipiayaya. Pero xikitakaj, nikaj itstok se katli más ueyi que Salomón. 43  ”Kema se amo kuali ajakatl kisa tlen se maseuali, pano kampa tlauaktok pampa kitemoua kanke mosiajketsas, pero amo kipantia. 44  Uajka kiijtoua: ‘Nitlakuepilis nochaj, kampa nikistejki’. Uan kema asi, kiita amo aka itstok, kipantia tlachpantokej uan tlayejyektlalijtokej. 45  Uajka yaui uan kinuika sekinok chikomej amo kuali ajakamej katli más amo kualmej kej ya, uan kema kalakij ipan nopa maseuali, nopaya mokauaj. Uan nopa maseuali kichiua tlen nojua más amo kuali uan amo kej achtouia. Ya nopa kinpanos ni maseualmej katli amo yolkualmej”. 46  Kema Jesús kinkamanaljuiyaya nopa miakej maseualmej, inana uan iikniuaj itstoyaj kalteno uan kinekiyayaj kamanaltisej iuaya. 47  Uajka se akajya kiiljuik: “Xikita, monana uan moikniuaj ijkatokej kalteno uan kinekij kamanaltisej mouaya”. 48  Ya kinankilik katli kiiljuito: “¿Ajkia eli nonana uan ajkia elij noikniuaj?”. 49  Uan kinmanextik itokilijkauaj uan kiijtok: “¡Xikita! ¡Ni elij nonana uan noikniuaj! 50  Pampa nochi katli kichiua tlen kineki noTata katli itstok iluikak, ya eli noikni, nosiuaikni* uan nonana”.

Tlen ijkuilijtok tlatsintla

^ Xikita sábado.
^ Ni eli se xiuitl tlen kitokayayaj kampa moijkuilok Biblia, tlen ika kichijchiuayayaj pantsi.
^ Xikita fariseos.
^ Kanajya kiijtouaj “toTeotsij”.
^ Ika griego “uaktoya”.
^ O “se ostotl”.
^ Kanajya kiijtouaj “oksejko”, “sejkoyok”.
^ O “profeta”.
^ Kanajya kiijtouaj “tlikuitok”.
^ O “demonio”.
^ Nojkia kiampa kiiljuiaj Satanás.
^ O “inmotokilijkauaj”.
^ O “espíritu santo”.
^ O “san moljuit asiko”, “asiko kema amo inkichiayayaj”.
^ O “kipia chikaualistli”.
^ O “tlasentilia”.
^ Kanajya kiijtouaj “okuilimej”.
^ Xikita escribas.
^ O “tlauel uejka”.
^ Kanajya kiijtouaj “nouelti”.
TRADUCCIÓN DEL NUEVO MUNDO DE LAS SANTAS ESCRITURAS
Mateo 12
náhuatl de la huasteca
Xijpoua Biblia ipan internet.
https://cms-imgp.jw-cdn.org/img/p/1001061103/univ/art/1001061103_univ_sqr_xl.jpg
nwt