Tlen kiijkuilok Mateo 13:1-58
-
NESKAYOTL TLEN ITLANAUATIJKAYO DIOS (1-52)
-
Katli tlatoka (1-9)
-
Kenke Jesús tlamachtiyaya ika neskayotl (10-17)
-
Kiixtoma nopa neskayotl tlen tlatojketl (18-23)
-
Trigo uan xiuitl tlen amo kuali (24-30)
-
Iyol mostaza; nopa levadura (31-33)
-
Kema tlamachtiyaya ika neskayotl, kiaxitik se profecía (34, 35)
-
Kiixtoma nopa neskayotl tlen trigo uan xiuitl tlen amo kuali (36-43)
-
Tlen tlauel patiyo tlen kitlatijtoyaj; se perla tlen tlauel patiyo (44-46)
-
Nopa matlatl tlen ika tlajtlamaj (47-50)
-
Tlamantli yankuik uan sosoltik kampa ajoktok tlen pajpatiyo (51, 52)
-
-
Jesús amo kiseliaj ipan ialtepe (53-58)
13 Ipan nopa tonali, Jesús kiski tlen nopa kali uan moseuik iteno mar.
2 Uan asitoj tlauel miakej maseualmej, yeka tlejkok ipan se barco* uan nopaya moseuik, uan nopa maseualmej ijkatoyaj iteno mar.
3 Uajka kinmachtik miak tlamantli ika neskayotl. Kiniljuik: “¡Xitlakakikaj! Se tlatojketl yajki tokato.
4 Uan kema toktiajki, se keski xinachtli tepejki ojteno, uan ualajkej totomej uan kikuajkej.
5 Sekinok tepejki kampa teyo, kampa amo onkayaya miak tlali uan nima ixuak pampa eltoya tlalixkotsi.
6 Pero kema kiski Tonati, nopa tlatoktli tonaltlatlak* uan pilinki pampa amo uejkatla moneljuayotijtoya.
7 Sekij uetski uitstsala, uan nopa uitstli moskaltik uan kiijiyomiktik.
8 Uan sekij tepejki kampa kuali tlali uan pejki temaka itlajka: sekij temakak 100 imiakpa más que tlen kitoktoyaj; sekij 60 uan sekinok 30.
9 Katli kipia inakas, kuali ma tlakaki”.
10 Uajka itokilijkauaj monechkauijkej uan kitlatsintokijkej: “¿Kenke tikinkamanaljuia ika neskayotl?”.
11 Ya kinnankilik: “Inmojuantij inmechkauiliaj xijkuamachilikaj tlen Dios* ayamo tematiltia* tlen nopa Tlanauatijkayotl tlen eltok iluikak, pero inijuantij amo.
12 Pampa katli kipia, nojua más kimakasej, uan kipias tlauel miak; pero katli amo tleno kipia, kikuilisej hasta tlen kipixtok.
13 Yeka nikinkamanaljuia ika neskayotl, pampa maske tlachiaj, amo nelia tlachiaj, uan maske tlakakij, amo nelia tlakakij uan amo tleno kikuamachiliaj.
14 Moaxitia ipan inijuantij tlen kiijtok teokamanalojketl* Isaías: ‘Inmojuantij intlakakisej, pero amo kema inkikuamachilisej. Intlachixtosej pero amo kema inkimatisej tlake inkiitaj.
15 Pampa ininyolo ni maseualmej mochijtok tlauel tetik. Monakastsaktokej uan ijkoptokej, kiampa amo kema tlachiasej ika ininixteyol, yon tlakakisej ika ininnakas, yon kikuamachilisej ika ininyolo, yon tlakuepilisej kampa Dios para ma nikinchikaua’.
16 ”Pero xiyolpakikaj inmojuantij pampa inkiitaj uan inkikakij ni tlamantli.
17 Pampa temachtli niinmechiljuia, miakej teokamanalouanij uan katli kichijkej tlen kuali kinejkej kiitasej tlen inmojuantij inkiitaj, pero amo kiitakej, uan kikakisej tlen inmojuantij inkitlakakilijtokej, pero amo kikajkej.
18 ”Uajka nama xijkakikaj tlake kiijtosneki nopa neskayotl tlen nopa tlakatl katli tokato.
19 Kema se akajya kikaki nopa tlamachtili* tlen iTlanauatijkayo Dios uan amo kikuamachilia, uala Axkualtlakatl uan kiuiuitla tlen kitojkej ipan iyolo. Ya ni eli nopa xinachtli tlen kitojkej ojteno.
20 Nopa xinachtli tlen kitojkej kampa teyo, eli katli kikaki nopa tlajtoli uan nima kiselia ika pakilistli.
21 Pero ipan iyolo amo uejkatla moneljuayotijtok, yeka kineltoka san se keski tonali. Kema kipia kuesoli uan kitlaijiyouiltiaj pampa kineltoka nopa tlajtoli, motepotlamia.*
22 Nopa xinachtli tlen kitojkej uitstsala, eli katli kitlakakilia nopa tlajtoli pero mokuatotonia* ika tlen onka ipan ni tonali* uan kikaua tomij ma kikajkayaua, uan nopa kiijiyomiktia tlajtoli, yeka ayokmo temaka itlajka.
23 Uan nopa xinachtli tlen kitojkej kampa kuali tlali, elij katli kikakij nopa tlajtoli uan kikuamachiliaj tlen kiijtosneki. Inijuantij kena temakaj inintlajka. Sekij temakaj nojua 100 imiakpa; sekij 60 uan sekinok 30”.
24 Uajka kiniljuik ni seyok neskayotl: “Nopa Tlanauatijkayotl tlen eltok iluikak eli kej se tlakatl katli kitojki se kuali xinachtli imilaj.
25 Kema nopa tlakamej kochtoyaj, ualajki katli kikualankaita, kitojki seyok xiuitl tlen amo kuali kampa trigo uan yajki.
26 Kema nopa trigo ixuak uan ijtiyolkiski, nojkia ixuak nopa seyok xiuitl.
27 Uajka itlatekipanojkauaj nopa tlakatl ualajkej uan kiiljuijkej: ‘ToTeko, ¿amo tijtojki kuali xinachtli momila? Uajka, ¿kenke onka amo kuali xiuitl?’.
28 Ya kiniljuik: ‘Ni kichijki se tlakatl katli nechkualankaita’. Itlatekipanojkauaj kitlatsintokijkej: ‘¿Tijneki ma tijuiuitlatij?’.
29 Ya kinnankilik: ‘Amo, pampa uelis nojkia inkiuiuitlasej trigo kema inkiuiuitlasej nopa amo kuali xiuitl.
30 Xijkauakaj ma moskaltikaj sansejko hasta kema tipixkasej, uan kema tijsentilisej, nikiniljuis pixkanij achtoui ma kiuiuitlakaj nopa amo kuali xiuitl uan ma kiijilpikaj para kitlatisej, uan teipa ma kisentilikaj nopa trigo uan ma kitemakaj kampa nikajokui’”.
31 Nojkia kiniljuik ni seyok neskayotl: “Nopa Tlanauatijkayotl tlen eltok iluikak eli kej se iyol mostaza tlen se tlakatl kikuik uan kitojki imila.
32 Ni xinachtli eli más pilsiltsi* que nochi sekinok xinachtli, pero kema moskaltia mochiua más ueyi que nochi sekinok tlatoktli, uan mochiua se ueyi kuauitl, kiampa totomej momanauiaj ipan imakuayo”.
33 Uan kiniljuik seyok neskayotl: “Nopa Tlanauatijkayotl tlen eltok iluikak eli kej levadura* tlen se siuatl kikuik uan kimanelok ika eyi uejueyi tlatlamachiuali* harina. Teipa nochi harina mosonejki”.
34 Jesús kiniljuik nopa miakej maseualmej nochi ni tlamantli ika neskayotl. Ya nochipa kitekiuiyaya neskayotl kema kinkamanaljuiyaya.
35 Kiampa moaxitik tlen Dios kiijtojtoya ika nopa teokamanalojketl, katli kiijtok: “Kema nikamanaltis nijtekiuis neskayotl; nitematiltis tlamantli tlen amo aka kimatiyaya desde kema pejki nochi”.*
36 Teipa, kema kinnauatijtejki* nopa miakej maseualmej, kalajki kalijtik. Itokilijkauaj kinechkauijkej uan kiiljuijkej: “Xitechixtomili nopa neskayotl tlen nopa amo kuali xiuitl tlen elki milaj”.
37 Ya kinixtomilik: “Katli kitojki nopa kuali xinachtli eli iKone se Maseuali.*
38 Nopa milaj elij katli itstokej ipan Tlaltipaktli. Nopa kuali xinachtli elij katli kalakisej ipan nopa Tlanauatijkayotl* tlen eltok iluikak. Nopa amo kuali xiuitl elij ikoneuaj Axkualtlakatl,
39 uan katli kikualankaita uan kitojki nopa amo kuali xiuitl eli Diablo. Kema pixkaj eli kema nechka tlamis tlen mochijtok ipan Tlaltipaktli* uan pixkanij elij ángeles.
40 Uajka, sanse kej kema kiuiuitlaj nopa amo kuali xiuitl uan kitlatiaj, nojkia kiampa panos kema nechka tlamis tlen mochijtok ipan Tlaltipaktli.
41 Katli eli iKone se Maseuali kintitlanis iángeles, uan inijuantij kikixtisej tlen iTlanauatijkayo nochi tlamantli tlen kichiua ma tlajtlakolchiuakaj uan katli kichiuaj tlen amo kuali,
42 uan kinmajkauasej kampa onka ueyi tlitl. Nopaya mochokilisej uan tlankochueuechokasej”.*
43 Ipan nopa tonali, katli kichiuaj tlen kuali kauanisej* kej Tonati ipan iTlanauatijkayo ininTata. Katli kipia inakas, kuali ma tlakaki.
44 ”Nopa Tlanauatijkayotl tlen eltok iluikak eli kej se tlamantli tlen tlauel patiyo tlen kitlatijtoyaj ipan milaj uan se tlakatl kipantik. Ya sampa kitlatik* uan pampa tlauel yolpajki, yajki uan kinamakak nochi tlen kipixtoya uan kikojki nopa tlali.
45 ”Nopa Tlanauatijkayotl tlen eltok iluikak nojkia eli kej se tlanamakaketl tlen kitemouayaya perlas tlen pajpatiyo.*
46 Uan kema kipantik se perla tlen tlauel patiyo, yajki uan nimantsi kinamakak nochi tlen kipixtoya uan kikojki.
47 ”Nopa Tlanauatijkayotl tlen eltok iluikak nojkia eli kej se matlatl tlen kimajkajkej ipan mar uan kinolchok* miakej michimej tlen amo sanse eliyayaj.
48 Kema temik, kiuauatatskej iteno mar, moseuijkej uan michimej katli kuajkualmej kintlalijkej ipan kuachikiuitl, pero katli amo kuajkualmej, kintepejkej.
49 Ya nopa panos kema nechka tlamis tlen mochijtok ipan Tlaltipaktli.* Nopa ángeles ualasej, kiniyokatlalisej katli amo kuajkualmej ika katli kichiuaj tlen kuali
50 uan kinmajkauasej kampa onka ueyi tlitl. Nopaya mochokilisej uan tlankochueuechokasej.*
51 ”¿Inkikuamachilijkej tlake kiijtosneki nochi ni tlamantli? Inijuantij kinankilijkej: “Kena”.
52 Ya kiniljuik: “Uajka xijmatikaj ni: sejse tlamachtijketl katli momachtijtok tlen nopa Tlanauatijkayotl tlen eltok iluikak eli kej se tlakatl katli iaxka se kali, ya kikixtia tlamantli tlen yankuik uan tlen ya sosoltik kampa kiajoktok tlen pajpatiyo”.
53 Kema Jesús tlanki kiniljuia ni neskayotl, yajki sejkanok.*
54 Kema asito ialtepe, pejki tlamachtia kampa tlaueyichiuaj judíos, uan ika tlen kiijtok, maseualmej mosentlachilijkej. Kiijtouayayaj: “¿Kenke ni tlakatl kipia tlalnamikilistli uan chikaualistli para kichiuas ni milagros?
55 ¿Amo ya ikone nopa kuaxinketl?* ¿Amo eli inana katli itoka María? ¿Uan amo elij iikniuaj Santiago, José, Simón uan Judas?
56 Uan isiuaikniuaj,* ¿amo itstokej nochi nikaj touaya? Uajka, ¿kenke ueli kichiua uan kiijtoua nochi ni tlamantli?”.
57 Uan ni kichijki amo ma tlaneltokakaj ipan ya. Pero Jesús kiniljuik: “Se teokamanalojketl ejeliuis* kitlepanitaj, pero ipan ialtepe uan ipan ichaj, amo”.
58 Uan pampa inijuantij amo kuali tlaneltokayayaj, amo kichijki miak milagros nopaya.
Tlen ijkuilijtok tlatsintla
^ Ni eliyaya se barco pilsiltsi tlen kitekiuiyayaj kema michtlajtlamayayaj.
^ Kanajya kiijtouaj “kitlatik Tonati”.
^ Kanajya kiijtouaj “toTeotsij”.
^ Xikita tlen Dios ayamo tematiltia.
^ O “profeta”.
^ O “tlajtoli”.
^ O “ayokmo tlaneltoka”.
^ O “motekipachoua”.
^ Kanajya kiijtouaj “tsikitetsi”.
^ Kanajya kiijtouaj “tlasonejkayotl”.
^ Kanajya kiijtouaj “tlayejyekoli”. Ika griego “tlatlamachiuali sea”. Se sea kipiayaya 7,33 litros.
^ O uelis “kema pejki Tlaltipaktli”. Ni kiijtosneki kema pejkej tlakatij ininkoneuaj Adán uan Eva.
^ Kanajya kiijtouaj “kinmakajki”.
^ Xikita katli eli iKone se Maseuali.
^ Ika griego “ikoneuaj nopa Tlanauatijkayotl”.
^ Kiampa kichiuasej pampa tlauel kualantosej uan amo kimatisej tlake kichiuasej.
^ O “petlanisej”.
^ O “kitlalpachok”.
^ Se piltetsi tlen tlauel patiyo.
^ Kanajya kiijtouaj “kinitskik”.
^ Kiampa kichiuasej pampa tlauel kualantosej uan amo kimatisej tlake kichiuasej.
^ Kanajya kiijtouaj “oksejko”, “sejkoyok”.
^ Kanajya kiijtouaj “carpintero”.
^ Kanajya kiijtouaj “iueltiuaj”.
^ Kanajya kiijtouaj “kampa ueli”.
