Tlen kiijkuilok Mateo 17:1-27
17 Kema panok chikuasej tonali, Jesús kinuikak Pedro uan nojkia Santiago uan iikni Juan ipan se uejkapantik tepetl, kampa itstoyaj ininselti.
2 Uan ininixpa, Jesús kipatlak kej nesiyaya: ixayak kauanki kej Tonati uan iyoyo petlanki* kej tlauili.
3 Uan monextijkej Moisés uan Elías kamanaltiyayaj iuaya.
4 Uajka Pedro kiiljuik Jesús: “NoTeko, ¡kuali pampa nikaj tiitstokej! Tlaj tijneki, uelis nijchijchiuas eyi pilxajkaltsitsij: se para ta, se para Moisés uan seyok para Elías”.
5 Kema nojua kamanaltiyaya, kintsajki se mixtli tlen tlauiyaya, uan ipan nopa mixtli kakistik se akajya kiijtok: “Ni eli noKone katli tlauel nikiknelia, ya kichiua ma niyolpaki. Xijtlakakilikaj”.
6 Kema kikajkej nopa, itokilijkauaj moixtlapachojkej. Tlauel momajmatijtoyaj.
7 Uajka Jesús kinnechkauik, kinpanitskik uan kiniljuik: “Ximoketsakaj. Amo ximajmauikaj”.
8 Kema moixtlanankej, amo aka kiitakej, san Jesús itstoya.
9 Kema ixtemoyayaj ipan nopa tepetl, Jesús kinnauatik: “Amo aka xikiljuikaj tlen inkiitakej hasta kema katli eli iKone se Maseuali* moyolkuis”.
10 Pero itokilijkauaj kitlatsintokijkej: “Uajka, ¿kenke escribas* kiijtouaj achtoui moneki ualas Elías?”.
11 Ya kinnankilik: “Nopa nelia, achtoui moneki ualas Elías uan kikualtlalis* nochi tlamantli.
12 Pero na niinmechiljuia Elías ya ualajki, pero inijuantij amo kiixmatkej, uan kichiuilijkej san tlen inijuantij kinejkej. Nojkia kiampa kitlaijiyouiltisej katli eli iKone se Maseuali”.*
13 Uajka itokilijkauaj kikuamachilijkej kamanaltiyaya tlen Juan katli teAtsonpoliuiltiyaya.
14 Kema asitoj kampa itstoyaj nopa miakej maseualmej, se tlakatl kinechkauik Jesús, motlankuaketski iixpa uan kiiljuik:
15 “NoTeko, xijtlasojtla nokone, pampa tlapoloua uan tlauel tlaijiyouia. Miakpa uetsi ipan tlitl uan miakpa uetsi ipan atl.
16 Nikinualikilik motokilijkauaj, pero inijuantij amo uelkej kichikauaj”.
17 Jesús kiijtok: “¡Ni maseualmej amo kuali ininyolo uan amo tlaneltokaj! ¿Keski tonali moneki niitstos inmouaya? ¿Keski tonali moneki niinmechijiyouijtos? Xijualikakaj nikaj”.
18 Uajka Jesús chikauak kiajuak nopa amo kuali ajakatl,* uan kiski tlen nopa telpokatl. Uan ipan nopa tlalochtli,* mochikajki.
19 Uajka itokilijkauaj kinechkauitoj Jesús kampa amo aka itstoya uan kitlatsintokijkej: “¿Kenke tojuantij amo tiuelkej tijkixtiaj?”.
20 Ya kinnankilik: “Pampa san kentsi intlaneltokaj. Temachtli niinmechiljuia, tlaj inmotlaneltokilis eli kej se iyol mostaza, uelis inkiiljuisej ni tepetl ‘Xia neka’, uan yas neka; nochi uelis inkichiuasej”.
21 *
22 Kema mosentilijtoyaj ipan Galilea, Jesús kiniljuik: “Katli eli iKone se Maseuali* kitemaktilisej ininmako maseualmej,
23 kimiktisej uan ipan eyi tonali moyolkuis”. Nopa kichijki itokilijkauaj tlauel ma mokuesokaj.
24 Kema asitoj Capernaúm, kinechkauijkej Pedro nopa tlakamej katli tlainamayayaj impuestos para teokali,* uan kitlatsintokijkej: “¿Motlamachtijka amo tlaxtlaua impuesto?”.
25 Ya kinnankilik: “Kena tlaxtlaua”. Uajka kalakito kalijtik uan kema ayamo tleno kiijtouayaya, Jesús kitlatsintokik: “¿Ta tlake tikijtoskia Simón? ¿Ajkia kininamaj tlanauatianij nopa impuestos? ¿Ininkoneuaj o sekinok?”.
26 Ya kinankilik: “Kininamaj sekinok”. Uan Jesús kiiljuik: “Nopa kiijtosneki ininkoneuaj amo moneki tlaxtlauasej impuestos.
27 Uan para amo tikinkualankamakasej, xia mar uan xijmajkaua anzuelo. Kema tijkamatlapos nopa achtoui michij tlen tijkixtis, tijpantis se platatomij.* Xijkui uan xitlaxtlaua impuestos para tiomej”.
Tlen ijkuilijtok tlatsintla
^ O “mokuepki chipauak”.
^ Xikita katli eli iKone se Maseuali.
^ O “kisenkauas”.
^ Xikita katli eli iKone se Maseuali.
^ O “demonio”.
^ Kanajya kiijtouaj “tlatoktsi”.
^ Ni texto san eltok ipan se keski biblias, pero amo eltok ipan amatlajkuiloli tlen uejkajkia moijkuilok ika griego.
^ Xikita katli eli iKone se Maseuali.
^ Ika griego “ome piltomintsitsij tlen kiiljuiaj dracma”. Tlen kitlaniyaya se akajya kema tekitiyaya ome tonali.
^ Ika griego “se estater”. Ipati eliyaya naui dracmas. Tlen kitlaniyaya se akajya kema tekitiyaya naui tonali.
