Tlen kiijkuilok Mateo 19:1-30
19 Kema Jesús tlanki kiijtoua nochi ni tlamantli, kistejki tlen Galilea uan asito kampa peua Judea, seyok nali ueyatl Jordán.
2 Miakej maseualmej kitokilijkej, uan nopaya kinchikajki katli mokokouayayaj.*
3 Uajka kinechkauijkej se keskij fariseos* katli kinekiyayaj ma motenkuapolo, uan kitlatsintokijkej: “¿Kinamiki se tlakatl ma kikaua isiua ika tlen ueli tlamantli?”.
4 Ya kinnankilik: “¿Amo inkipojtokej kema pejki nochi tlen onka, Dios* kinchijki tlakatl uan siuatl,
5 uan kiijtok ‘Yeka, se tlakatl kikauas itata uan inana, itstos* iuaya isiua uan omej elisej san se inintlakayo’?
6 Uajka ayokmo elij omej, nama elij san se inintlakayo.* Yeka, tlen Dios kisansejkotilijtok, amo aka ma kixelo”.
7 Inijuantij kiiljuijkej: “Uajka, ¿kenke Moisés tlanauatik se tlakatl ma kimaka isiua se amatl kampa nesi kikaua uan ma kikixti?”.*
8 Ya kinnankilik: “Moisés inmechkajki xijmakakaj inmosiua se amatl kampa nesi inkikauaj pampa tlauel inyoltetikej.* Pero achtouia amo kiampa eliyaya.
9 Uan na niinmechiljuia, tlaj se akajya kikaua isiua uan amo pampa motejki iuaya seyok,* uan sampa mosiuajtia, momekatia”.
10 Itokilijkauaj kiiljuijkej: “Tlaj se tlakatl kiampa monekis itstos iuaya isiua, más kuali para amo ma mosiuajti”.
11 Ya kinnankilik: “Amo nochi uelis kichiuasej ni tlamantli, san katli kipiaj nopa yajatili”.*
12 Se keskij tlakamej amo mosiuajtiaj pampa kiampa tlakatkej. Sekinok, kinchijkej* para amo kema ma mosiuajtikaj. Pero sekinok amo mosiuajtiaj pampa kinekij kipaleuisej nopa Tlanauatijkayotl tlen eltok iluikak. Tlaj se akajya amo kineki mosiuajtis, uajka kiampa ma mokaua”.
13 Uajka kiualikilijkej se keskij konemej para ma kinteochiua* uan ma momaijto* por inijuantij. Pero itokilijkauaj kinajuakej.
14 Jesús kiniljuik: “Xikinkauakaj ni konemej. Amo xikintsakuilikaj ma monechkauikaj kampa na, pampa nopa Tlanauatijkayotl tlen eltok iluikak eli ininaxka katli elij kej inijuantij”.
15 Teipa, kitlalik imax ininpani, uan yajki sejkanok.*
16 Uajka kinechkauik se tlakatl uan kitlatsintokik: “Tlamachtijketl, ¿tlake tlamantli tlen kuali moneki nijchiuas para nijpias nemilistli tlen amo kema tlamis?”.*
17 Ya kiiljuik: “¿Kenke tinechtlatsintokia tlake eli kuali? Itstok san setsi katli nelia kuali. Pero tlaj tijneki tiitstos nochipa, moneki nochipa tijchiuas tlen kiijtoua nopa tlanauatili”.
18 Ya kitlatsintokik: “¿Tlake tlanauatili?”. Uan Jesús kinankilik: “Amo xitemikti, amo ximomekati, amo xitlachteki, amo xiteistlakaui,
19 xijtlepanita motata uan monana uan xikinikneli sekinok kej ta timoiknelia”.
20 Nopa telpokatl kiiljuik: “Na nochipa nijneltokatok ni tlanauatili. ¿Tlake nojua nechpoloua nijchiuas?”.
21 Jesús kinankilik: “Tlaj tijneki senkistok tijtekipanos Dios, xia xijnamakati nochi tlen tijpixtok uan xikinmaka nopa tomij katli amo tleno kipiaj, kiampa tijpias tlen tlauel patiyo ipan iluikak. Teipa xiuala uan xinechtokili”.
22 Kema kikajki tlen kiiljuik, nopa telpokatl tlauel moyolkuesok uan yajki, pampa kipixtoya miak tlamantli.
23 Uajka Jesús kiniljuik itokilijkauaj: “Temachtli niinmechiljuia, se akajya katli tlatominpia tlauel ouij kalakis ipan nopa Tlanauatijkayotl tlen eltok iluikak.
24 Sampa niinmechiljuia, amo ouij kalakis se camello ipan iixteyol se uitsmalotl* que se katli tlatominpia kalakis ipan iTlanauatijkayo Dios.
25 Kema itokilijkauaj kikajkej nopa, tlauel mosentlachilijkej uan kiijtojkej: “Uajka, ¿ajkia uelis momanauis?”.
26 Jesús kinixtlachilik uan kiniljuik: “Maseualmej moiljuiaj ni amo uelis mochiuas, pero Dios nochi ueli kichiua”.
27 Uajka Pedro kinankilik: “Xikita, tojuantij tijkajtejkej nochi pampa timitstokilijkej. ¿Tlake tijselisej?”.
28 Jesús kiniljuik: “Temachtli niinmechiljuia, kema asis tonali kema nochi moyankuilis uan katli eli iKone se Maseuali* moseuis ipan iueyi silla kampa tlanauatis, inmojuantij katli innechtokilijtokej, inmoseuisej ipan 12 uejueyi sillas uan inkintlajtolsenkauasej nopa 12 uejueyi familias* tlen Israel.
29 Uan katli kikajtejki ichaj, iikniuaj, isiuaikniuaj,* itata, inana, ikoneuaj o itlal pampa mochiua notokilijka, kiselis 100 ueltas más uan nojkia kiselis nemilistli tlen amo kema tlamis.
30 ”Pero miakej katli tlayakanaj, mokauasej hasta tlatepotsko,* uan miakej katli yauij tlatepotsko, tlayakanasej.
Tlen ijkuilijtok tlatsintla
^ Kanajya kiijtouaj “kokoyanij”.
^ Kanajya kiijtouaj “toTeotsij”.
^ O “mosansejkotilis”.
^ O “san se maseuali”.
^ Kanajya kiijtouaj “ma kikuapeua”.
^ O “intochontikej”.
^ Ika griego pornéia. Xikita auilnemilistli.
^ O “san katli Dios kinkauilia kiampa ma uelikaj kichiuasej”.
^ O “kinkaparojtokej”.
^ Ika griego “ma kitlali imax ininpani”.
^ Kanajya kiijtouaj “ma motlatlajti”.
^ Kanajya kiijtouaj “oksejko”, “sejkoyok”.
^ O “niitstos nochipa”.
^ Kanajya kiijtouaj “akoxa”.
^ Xikita katli eli iKone se Maseuali.
^ O “tribus”.
^ Kanajya kiijtouaj “iueltiuaj”.
^ Kanajya kiijtouaj “tlaika”.
