Tlen kiijkuilok Mateo 8:1-34
-
Jesús kichikaua se katli kipia lepra (1-4)
-
Se katli kinyakana soldados kuali tlaneltoka (5-13)
-
Jesús kinchikaua miakej ipan Capernaúm (14-17)
-
Kenijkatsa timochiuas itokilijka Jesús (18-22)
-
Jesús kichiua ma moketsa se chikauak ajakatl (23-27)
-
Kinnauatia se keskij amo kuali ajakamej ma kalakikaj ipan pitsomej (28-34)
8 Kema temok tlen nopa tepetl, miakej maseualmej kitokilijkej.
2 Uajka asito se tlakatl katli kipixtoya se kokolistli tlen itoka lepra* uan motlankuaketsato iixpa uan kiiljuik: “NoTeko, na nijmati tlaj ta tijneki, uelis tinechchikauas”.*
3 Uajka Jesús kitlalik imax ipani* uan kiiljuik: “Na nijneki, ximochikaua”. Uan nimantsi mochikajki nopa tlakatl.
4 Jesús kiiljuik: “Amo aka xikiljui, san xia ximonextiti iixpa sacerdote uan xijuika nopa ofrenda* kej tlanauatik Moisés, kiampa kiitasej nelnelia timochikajtok”.
5 Kema asito Capernaúm, kinechkauik se tlakatl katli kinyakanayaya soldados* uan kitlajtlanik ma kipaleui.
6 Kiiljuik: “NoTeko, notlatekipanojka amo ueli kiojolinia itlakayo. Uilantok* kalijtik uan tlauel tlaijiyouijtok”.
7 Jesús kiiljuik: “Kema niasiti nopaya, nijchikauas”.
8 Pero nopa tlayakanketl kinankilik: “NoTeko, ¿ajkia nieli na para tikalakis nochaj? San xikijto ma mochikaua, uan katli nechtekipanoua mochikauas.
9 Pampa na nojkia nijchiua tlen nechnauatiaj uan nojkia nikinnauatia nosoldados katli nikinyakana. Se nikiljuia ‘¡Xia!’ uan yaui, uan seyok nikiljuia ‘¡Xiuala!’ uan uala, uan katli nechtekipanoua nikiljuia ‘¡Xijchiua ni!’ uan kichiua”.
10 Kema Jesús kikajki nopa, mosentlachilik uan kiniljuik katli kitokiliyayaj: “Nelia niinmechiljuia, ipan Israel amo nijpantijtok yon se kej ni tlakatl katli tlauel kuali tlaneltoka.
11 Niinmechiljuia miakej ualasej tlen kampa kisa Tonati uan kampa onkalaki uan moseuisej kampa mesa uan tlakuasej sansejko ininuaya Abrahán, Isaac uan Jacob ipan nopa Tlanauatijkayotl tlen eltok iluikak,
12 uan katli Dios* kintlanejtoya ma kalakikaj ipan nopa Tlanauatijkayotl, kinmajkauasej kalixpa kampa tsintlayoua. Nopaya mochokilisej uan tlankochueuechokasej”.*
13 Uajka Jesús kiiljuik nopa tlakatl katli tlayakanayaya: “Xitlakuepili mochaj. Uan pampa titlaneltokak, ma mochiua tlen titlajtlanki”. Uan ipan nopa tlalochtli,* mochikajki itlatekipanojka.
14 Kema Jesús kalajki ichaj Pedro kiitak imona uilantoya pampa totoniayaya.
15 Uajka kiitskilik imax uan ayokmo totonixki.* Uan ya mejki uan pejki kintlachijchiuilia.
16 Ika tiotlak, maseualmej kiualikilijkej Jesús miakej katli kinpixtoyaj amo kuali ajakamej* uan san ika se tlajtoli, kinkixtik nopa ajakamej. Nojkia kinchikajki nochi maseualmej katli tlaijiyouiyayaj.
17 Nochi ni tlamantli panok para ma moaxiti tlen Dios kiijtojtoya ika teokamanalojketl* Isaías: “Ya techkixtilik tokokolis uan tlen techkokouayaya”.
18 Kema Jesús kiitak tlauel miakej maseualmej kiyaualojtoyaj, kiniljuik itokilijkauaj ma panokaj ipan seyok nali.
19 Uan se escriba* kinechkauik uan kiiljuik: “Tlamachtijketl, nias mouaya kampa ta tias”.
20 Jesús kinankilik: “Kayochimej* kipiaj kanke kochisej uan totomej kipiaj inintepasol, pero katli eli iKone se Maseuali* amo kipia yon kanke kitlalis itsonteko”.
21 Uan se itokilijka kiiljuik: “NoTeko, xinechkaua achtoui ma nijtlalpachoti* notata”.
22 Jesús kinankilik: “Ta nochipa xinechtokili, uan xijkaua katli miktokej ma kintlalpachokaj ininmijkauaj”.
23 Kema Jesús tlejkok ipan se barco,* itokilijkauaj yajkej iuaya.
24 Ipan nopa mar, sanima* pejki chikauak tlaajaka uan mokojkoxonia atl hasta kalakiyaya ipan barco. Pero Jesús kochtoya.
25 Inijuantij kinechkauijkej, kiixitijkej uan kiiljuijkej: “¡ToTeko, xitechmanaui! ¡Timikisej!”.
26 Ya kiniljuik: “Intlakamej katli kentsi intlaneltokaj, ¿kenke tlauel inmomajmatijtokej?”. Uajka moketski uan kitlakaualtik ajakatl uan mar, uan ayokmo tleno mojmolinik.
27 Itokilijkauaj momajmatijtoyaj uan kiijtouayayaj: “¿Ajkia eli ni tlakatl? Pampa hasta ajakatl uan mar kichiuaj tlen kiniljuia”.
28 Kema asito seyok nali, ipan inintlal gadaraeuanij, omej tlakamej katli kinpixtoyaj amo kuali ajakamej kinamikitoj Jesús. Inijuantij ualayayaj kampa cementerio uan tlauel mosisiniyayaj, yeka amo aka kinekiyaya panos ipan nopa ojtli.
29 Uan pejkej kuatsajtsij: “¿Tlake tijchiua nikaj, tiiKone Dios? ¿Tiualajtok titechtlaijiyouiltiki maske ayamo asi hora?”.
30 Achi uejka kampa inijuantij itstoyaj, tlakuayayaj miakej pitsomej.
31 Uajka nopa amo kuali ajakamej pejkej kitlajtlaniaj Jesús: “Tlaj titechkixtis, xitechtitlani ma tikalakitij ipan ne pitsomej”.
32 Uan ya kiniljuik: “¡Xiakaj!”. Uajka kiskej tlen nopa tlakamej uan kalajkej ipan pitsomej. Uan nochi nopa pitsomej, momajkajkej ipan tepexitl, uetsitoj ipan mar uan mijkej.
33 Uan katli kinmokuitlauiyayaj nopa pitsomej, cholojtejkej. Yajkej ipan altepetl uan kiijtojkej nochi, nojkia tlen kinpanotoya katli kinpixtoyaj amo kuali ajakamej.
34 Uajka nochi nopa maseualmej yajkej kitemotoj Jesús, uan kema kipantijkej, chikauak kiiljuijkej ma yaui sejkanok.*
Tlen ijkuilijtok tlatsintla
^ O “tijchiuas ma nieli tlapajpaktik”.
^ O “kiitskik”.
^ Kanajya kiijtouaj “tlakajkaualistli”.
^ O “centurión”. Katli kinyakanayaya 100 soldados tlen Roma.
^ Kanajya kiijtouaj “uetstok”, “motektok”.
^ Kanajya kiijtouaj “toTeotsij”.
^ Kiampa kichiuasej pampa tlauel kualantosej uan amo kimatisej tlake kichiuasej.
^ Kanajya kiijtouaj “tlatoktsi”.
^ Kanajya kiijtouaj “kiski totonik”.
^ O “demonios”.
^ O “profeta”.
^ Kanajya kiijtouaj “Zorros”.
^ Xikita katli eli iKone se Maseuali.
^ Kanajya kiijtouaj “nijtokati”.
^ Ni eliyaya se barco pilsiltsi tlen kitekiuiyayaj kema michtlajtlamayayaj.
^ Kanajya kiijtouaj “san moljuit”.
^ Kanajya kiijtouaj “oksejko”, “sejkoyok”.
