Nopa carta tlen kintitlanilijkej Cristo itokilijkauaj tlen Roma 1:1-32
1 Na niPablo, se itlatekipanojka Cristo Jesús, katli nechtekimakakej ma nieli apóstol uan nechiyokatlalijkej para ma nitematilti nopa kuali tlamachtili tlen Dios.*
2 Uejkajkia Dios kitenkajki ni kuali tlamachtili ika iteokamanalojkauaj* ipan iTlajkuilol
3 kampa ijkuilijtok tlen iKone, katli tlakatiko kej se maseuali ipan David ichampoyouaj,*
4 pero xitlauak neski para eli Dios iKone pampa Dios ika ichikaualis* kichijki ma moyolkui (kena, toTeko Jesucristo,
5 katli Dios kitekiuia para kinextis ueyi iyolo ika tojuantij* uan ika ya kichijki ma nieli apóstol, kiampa maseualmej tlen nochi altepemej uelis tlaneltokasej uan kichiuasej tlen kineki para kiuejkapantlalisej itoka,
6 uan inmojuantij nojkia initstoyaj ipan nopa altepemej kampa inmechnotskej para inelisej iaxkauaj Jesucristo).
7 Niinmechtlajkuiljuilia inmojuantij katli initstokej Roma, katli Dios inmechiknelia uan inmechiyokatlalijtok para inkitekipanosej:
ToTata Dios uan toTeko Jesucristo ma kipiakaj ueyi ininyolo ika inmojuantij* uan ma inmechpaleuikaj kuali ximouikakaj ininuaya.
8 Achtoui nijtlaskamatilia noDios ika Jesucristo por nochi inmojuantij, pampa ipan nochi Tlaltipaktli kiijtouaj kuali intlaneltokaj.
9 Dios, katli nijtekipanoua ika nochi noyolo pampa nitematiltia nopa kuali tlamachtili tlen iKone, kiitstok nochipa niinmechilnamiki kema nimomaijtoua* uan amo nisiaui kiampa nijchiuas,
10 uan nijtlajtlania, tlaj uelis uan tlaj kineki, nama kena ma nia niinmechpaxaloti.
11 Tlauel nijnektok niinmechitas para niinmechiljuis tlen uelis inmechpaleuis nojua kuali ximouikakaj iuaya Dios uan kiampa niinmechyolchikauas,
12 o para ma timoyolchikauakaj se ika seyok pampa titlaneltokaj.
13 Pero noikniuaj, nijneki xijmatikaj para miakpa nijnejki nias niinmechitati, maske hasta nama amo ueltok nia. Kiampa uelis nikinmachtis maseualmej para ma mochiuakaj Cristo itokilijkauaj nopaya, sanse kej nijchijtok ipan sekinok altepemej.
14 Na nijmati moneki nikinpaleuis griegos uan katli amo elij griegos, katli tlalnamikij uan katli amo tlalnamikij.
15 Yeka, nojkia tlauel nijnektok niinmechmatiltis nopa kuali tlamachtili, inmojuantij katli initstokej ipan Roma.
16 Pampa amo nipinaua nitematiltis nopa kuali tlamachtili. Ika ya nopa, Dios kinextia itetikayo para kinmakixtis nochi katli tlaneltokaj, achtoui judíos uan nojkia griegos.
17 Ipan nopa kuali tlamachtili nesi kenijkatsa Dios kinnextilia katli tlaneltokaj para ya kichiua tlen xitlauak,* uan nopa kinpaleuia nojua kuali ma tlaneltokakaj, sanse kej ijkuilijtok: “Pero katli kichiua tlen xitlauak itstos pampa tlaneltoka”.
18 Kena, ipan iluikak Dios kinextia ikualankayo ika nochi tlakamej katli amo kitlepanitaj uan katli kichiuaj tlen amo kuali, nopa tlakamej katli kitsakuiliaj tlen melauak para amo ma momoyaua.
19 Inijuantij monekiskia ipa kiixmatisej Dios, pampa Dios ya kinnextilijtok miak tlamantli.
20 Pampa nopa yejyektsitsij tlamantli tlen Dios kinextia uan tlen amo nesi, uelis tijkuamachilisej kema tikitaj kenijkatsa kichijchijki Tlaltipaktli. Uelis tijmatisej kenijkatsa eli tlaj tikitaj nochi tlen kichijchijtok. Ni tlamantli kinextia para itetikayo amo kema tlami uan nojkia ya nelnelia eli Dios. Yeka, katli amo tlaneltokaj ipan ya, amo uelis motechtisej.*
21 Maske kiixmatiyayaj Dios, amo kiuejkapantlalijkej kej ininDios yon kitlaskamatilijkej, inijuantij pejkej moiljuiaj ipan inintlalnamikilis tlamantli tlen amo tepaleuia uan ipan ininyolo kinextijkej amo tleno kikuamachiliyayaj.*
22 Maske kiijtouayayaj tlalnamikij, mochijkej uiuitikej
23 uan amo kinejkej kiuejkapantlalisej Dios katli amo miki, inijuantij kiuejkapantlalijkej tlen nesi kej iixkopinka se tlakatl katli kena miki, uan nojkia ininixkopinka totomej, tlapialmej katli kipiaj naui ininikxi uan katli mouauatatsaj.
24 Yeka, Dios kintlauelkajki uan kinkajki ma kichiuakaj nopa tlamantli tlen tlauel sokiyo tlen ininyolo kinejki kichiuas, uan kiampa kichijkej tlen tepinajti ika inintlakayo.
25 Inijuantij kipatlakej tlen melauak tlen Dios ika istlakatili, uan kiueyichijkej uan kitekipanojkej tlen Dios kichijchijki uan amo yaya Katli kichijchijki nochi, katli kinamiki nochipa ma kiueyichiuakaj. Amén.*
26 Yeka Dios kintlauelkajki uan kinkajki fiero ma auilnemikaj, pampa siuamej ayokmo kinejkej motekasej ininuaya tlakamej, inijuantij motejkej ininuaya siuamej, maske Dios amo kiampa kinchijki.
27 Nojkia, tlakamej ayokmo kinejkej motekasej ininuaya siuamej, kej Dios kiixtlalik, pejkej fiero auilnemij ininuaya sekinok tlakamej uan kichijkej tlen tlauel sokiyo maske eli se pinaualistli. Inijuantij kintlatsakuiltijkej kej kinamiki pampa kichijkej tlen tlauel amo kuali.
28 Nopa maseualmej moiljuijkej amo monekiyaya kiixmatisej Dios, yeka ya kinkajki nojua ma moiljuijtokaj tlen fiero para ma kichiuakaj tlen amo kinamiki.
29 Tlauel kinchiuiliyayaj sekinok tlen amo kuali, kichiuayayaj tlen tlauel sokiyo, kinekiyayaj moaxkatisej tlen amo ininaxka, amo kipiayayaj kuali ininyolo; tlauel tekualankaitayayaj,* temiktiyayaj, tlateuiyayaj, tlakajkayauayayaj uan kinekiyayaj kintlaijiyouiltisej sekinok; teijilnamikiyayaj
30 uan tetlaijiljuiyayaj; kikualankaitayayaj Dios; amo tlatlepanitayayaj, moueyimatiyayaj uan motlepanitayayaj; moiljuiyayaj kenijkatsa kichiuasej tlen amo kuali, amo kintlepanitayayaj inintatauaj,
31 amo tlalnamikiyayaj, amo kichiuayayaj tlen kitenkauayayaj, amo teikneliyayaj uan tlauel mosisiniyayaj.*
32 Maske kuali kimatij para Dios kiijtoua katli kichiuaj nopa tlamantli moneki mikisej, inijuantij amo san kichijtinemij tlen fiero, nojkia pakij kema kinitaj katli kiampa kichiuaj.
Tlen ijkuilijtok tlatsintla
^ Kanajya kiijtouaj “toTeotsij”.
^ O “iprofetas”.
^ O “ifamilia”.
^ O “iespíritu santo”.
^ O “techmakas tlateochiualistli tlen amo kinamiki tijselisej”.
^ O “ma inmechmakakaj tlateochiualistli tlen amo kinamiki inkiselisej”.
^ Kanajya kiijtouaj “nimotlatlajtia”.
^ O “tlen kuali”.
^ O “amo uelis kiijtosej amo kiitaj”.
^ Ika griego “ininyolo uiuitik tsintlayouixki”.
^ O “kiampa ma eli”.
^ O “tekokoliyayaj”.
^ O “amo tetlasojtlayayaj”.
