Xitechiljui kenijkatsa mitsiskaltijkej.

Nitlakatki ipan Italia ipan xiuitl 1943. Noikniuaj uan na timoskaltijkej ipan se pilaltepetsi. Notata tekitiyaya ipan mila uan nojkia eliyaya kuaxinketl. Notatauaj techiskaltijkej ipan religión católica.

¿Kenke tijnejki tielis sacerdote?

Kema nieliyaya niokichpil tlauel nechpaktiyaya nias misa uan nijkakis tlen kiijtouayaya nopa sacerdote. Tlauel nechpaktiyaya itoskak uan tlen kichiuayaya ipan iglesia. Nopa kichiuayaya nojkia ma nijneki nielis sacerdote. Kema nikaxitik 13 xiuitl, nonana nechuikak ipan se escuela kampa nopaya mokauayayaj. Nopaya kinmachtiyayaj konemej katli teipa ueliskiaj kintekimakasej kej sacerdotes.

¿Kitekiuiyayaj Biblia kampa mitsmachtiyayaj?

San kemantika. Kema nijpixtoya 15 xiuitl, se notlamachtijka nechmakak se amochtli tlen kipixtoya nopa Evangelios, kampa kiijtoua tlen kichijki Jesús ipan inemilis, uan miakpa nijpojki. Kema nikaxitik 18 xiuitl, niajki altepetl Roma kampa nimomachtiskia ipan se universidad tlen kiyakanayaya nopa papa. Nopona nimomachtik latín, griego, historia, filosofía, psicología uan teología. Maske sejse domingo tiauiyayaj misa uan tijkakiyayaj uan tikompauiyayaj se keski versículos tlen Biblia, amo nelnelia timomachtiyayaj Biblia.

Kema titlayakanayaya ipan nopa seminario, ¿nojkia titlamachtiyaya?

Maske san nitekitiyaya ipan se oficina, nojkia nitlamachtik tlen nopa decretos del Concilio Vaticano II.

¿Kenke timotlajtlanik tlaj nelia tlen tlamachtia nopa Iglesia?

Nikitak eyi tlamantli: nopa Iglesia mokalakiyaya ipan política, nopa sacerdotes uan katli kintokiliyayaj amo kuali monejnemiltiyayaj uan sekij tlamachtili amo eliyaya xitlauak. Nimoiljuiyaya: “¿Kenke toTeotsij nochipa kintlatsakualtiskia katli mikij tlaj Biblia tlamachtia toTeotsij teiknelia? Uan, ¿kineki toTeotsij ma tijtekiuikaj se rosario o miakpa ma tikompauikaj nopa tlajtoli tlen tijtekiuiaj kema timomaijtouaj?”. *

¿Tlake timosentlalik tijchiuas?

Pejki nimochokilia uan nijtlajtlanik toTeotsij ika nochi noyolo ma nechpaleui. Nijkojki se Biblia de Jerusalén, tlen namanok kistoya ipan tlajtoli italiano uan nijpojki. Se domingo ika ijnalok, kema nitlanki nijchiua misa uan nijkuapilouayaya noyoyo, asikoj omej tlakamej kampa niitstoya. Kiijtojkej eliyayaj Jehová itlajtoltemakauaj uan pejkej timokamanaljuiaj. Kipano se hora timokamanaljuijkej tlen Biblia uan tlen kichiuaj ipan nopa religión katli melauak.

¿Kenijkatsa tikinitak Jehová itlajtoltemakauaj?

Tlauel nimosentlachilik pampa kuali tlaneltokayayaj uan amo ouij kimatiyayaj kipantisej textos ipan nopa Biblia católica. Teipa, se Jehová itlajtoltemajka katli itoka Mario pejki nechpaxaloua. Ya kipixki iyolo uan sejse sábado nechpaxalouayaya maske tlatomoniyaya o uetsiyaya atl. Ya nochipa asiyaya nueve ika ijnalok.

¿Uan tlake kiijtouayayaj nopa sekinok sacerdotes kema mitspaxalouayayaj?

Maske nikintlaneuiyaya kema nechmachtiyayaj, yon se tlen inijuantij kinejki momachtis. Na tlauel nechpaktiyaya pampa nijyekojtiauiayaya miak tlamantli tlen tlauel yejyektsitsij. Nijyekok kenke toTeotsij kikaua ma titlaijiyouikaj uan ma pano tlen amo kuali. Ni tlamachtili amo nijkuamachilijtoya.

¿Mitsiljuijkej katli mitsyakanayayaj ayokmo ximomachti Biblia?

Ipan xiuitl 1975 miakpa niajki Roma uan nikinpouilito tlen nimomachtiyaya. Maske katli nechyakanayayaj nechiljuijkej amo melauak tlen nimomachtiyaya, amo aka kitekiuik Biblia. Teipa ipan enero 9, xiuitl 1976, nijchijki se amatlajkuiloli kampa nikijkuilok ayokmo niitstoskia ipan nopa Iglesia uan nijtitlanki Roma. Kema panok ome tonali, nikistejki kampa niitstoya uan niajki ipan se tlanechikoli tlen Jehová itlajtoltemakauaj. Eliyaya se ueyi tlanechikolistli kampa monechikojtoyaj miakej toikniuaj. Tlauel yejyektsi nesiyaya pampa nochi kipixtoyaj ininBiblia uan kitemouayayaj nopa textos tlen kiijtouayaya katli tlamachtiyaya.

¿Tlake kiijtojkej mochampoyouaj?

Miakej tlauel kualankej. Teipa nijmatki se noikni nojkia momachtiyaya ininuaya Jehová itlajtoltemakauaj ipan Lombardía, tlen mokaua ika norte tlen altepetl Italia. Niajki nijpaxaloto, uan Jehová itlajtoltemakauaj katli nopaya itstoyaj nechpaleuijkej ma nijpanti tekitl uan kampa nimokauaskia. Ipan nopa xiuitl, nimochijki se Jehová itlajtoltemajka.

¿Mitsyolkokoua tlen tijchijki?

Amo. Pampa nama nijyolmati niitstok inechka toTeotsij. Biblia nechpaleuijtok kuali nikixmatis uan amo tlen momajtokej kichiuaj uan tlamachtiaj católicos. Yeka, nama kema nikinkamanaljuia maseualmej, nijmati nikinpouilia tlen melauak.