• ToTeotsij kitlapejpeniskia. “Nijtlalijtok notlanauatijka [...;] nimitsmakas nochi tlaltinij [...]. Kena, tijselis hasta nochi Tlaltipaktli” (Salmo 2:6, 8).

• Kiseliskia David itlanauatijkayo. “Tlakajtok se pilokichpiltsi [...]. ToTeko techmakatok se konetl. [...] Itlanauatilis moskaltijtias [...,] onkas tlaseuilistli tlen axkema tlamis. Yajaya moseuis ipan iueyi silla iuejkapantata David uan tlanauatis para nochipa” (Isaías 9:6, 7).

• Tlakatiskia Belén. “Belén [...,] nopano se tonal tlakatis para na se ueyi Tlanauatijketl [...]. Uan kampa ueli ipan Tlaltipaktli tlauel kiueyitlepanitasej” (Miqueas 5:2, 4).

• Kikualankaitaskiaj uan kimiktiskiaj. “Kiuejkamajkauasej sekinok uan [...] kiitasej para axtleno ipati; Yajaya kikokojkej topampa tojuantij totlajtlakoljuaj. Kitlaijiyouiltijkej ipampa totlaixpanoljuaj” (Isaías 53:3, 5).

• Moyolkuiskia uan kiuejkapantlaliskiaj. “Axtijkauas notlakayo ipan tlakoyoktli, niyon axtijkauas ma palani; onkas ueyi pakili para nochipa nepa kampa monejmatl” (Salmo 16:10, 11).

Amo itstok seyok katli kuali tlanauatis kej Jesús. Ni tijmatij pampa se iluikaejketl kiiljuik María, katli eliskia inana Jesús: “Tlanauatis kampa tlanauatiyaya iuejkapantata David [...] uan axkema tlamis itlanauatilis” (Lucas 1:31-33).

Maske Jesús amo kema tlanauatik kema itstoya ipan Tlaltipaktli, kena kinnauatis maseualmej pampa ya kitekimakatokej kej Tlanauatijketl ipan toTeotsij iTlanauatijkayo tlen eltok iluikak. ¿Kenke elis se kuali Tlanauatijketl? Ma tikitakaj tlake kichijki kema itstoya ipan Tlaltipaktli.

•   Jesús kinpaleuik maseualmej. Kinpaleuik tlakamej, siuamej, telpokamej uan katli ya uejueyij. Ya amo kichikoitak yon se maseuali (Mateo 9:36; Marcos 10:16). Kema se tlakatl katli kipixtoya lepra kiiljuik: “Tlaj tijneki, uelis tinechchikauas”, Jesús kitlasojtlak uan kichikajki (Marcos 1:40-42).

• Jesús technextilik kenijkatsa uelis tijyolpakiltisej toTeotsij. Ya kiijtok: “Axueli inkitekipanosej toTeko intla inkikauiliaj ma inmechyoltilana tomij”. Nojkia kiijtok moneki tikinchiuilisej sekinok kej tojuantij tijnekij ma techchiuilikaj. Nojkia kiijtok toTeotsij amo san kitlachilia tlen tijchiuaj, nojkia tlen timoiljuiaj uan tlen tijyolmatij. Yeka, tlaj tijnekij tijyolpakiltisej toTeotsij, moneki kuali tikitasej tlake tijpiaj toyolijtik (Mateo 5:28; 6:24; 7:12). Jesús xitlauak kiijtok tlaj tijnekij tiyolpakisej, moneki tijmatisej tlake kineki toTeotsij ma tijchiuakaj uan kenijkatsa kinamiki tijchiuasej (Lucas 11:28).

• Jesús techmachtik tlake kiijtosneki tikiniknelisej sekinok. Tlen kiijtouayaya uan tlen kichiuayaya asiyaya ipan ininyolo maseualmej. Biblia kiijtoua: “[Maseualmej] kisentlachiliyayaj ika itlamachtil, pampa yajaya kinmachtiyaya keja se tlen kipia tlanauatili” (Mateo 7:28, 29). Se tonali, kinnauatik: “Xikiniknelikaj inmokualankaitakauaj”. Uan ya kinextik nopa kema nechka mikiskia, pampa kiiljuik iTata: “Xikintlapojpoljui pampa axkimatij tlake kichiuaj” (Mateo 5:44; Lucas 23:34).

Jesucristo nelia tlauel kuali tlanauatis. Kuali kimati kenijkatsa kichiuas iteki, techiknelia uan kineki techpaleuis. ¿Kema peuas tekichiuas?