1, 2. ¿Kenke Jehová ayokmo kuali kiitak Saúl? (Xikita nopa achtoui tlaixkopinkayotl).

KEMA Jehová kitlapejpenik Saúl ma eli tlanauatijketl, ya moechkapantlalik (1 Sam. 9:1, 2, 21; 10:20-24). Teipa, kema eliyaya tlanauatijketl pejki moueyimati. Se tonali, filisteaeuanij yajkej kinteuiaj israeleuanij. Tlajtolpanextijketl Samuel kiiljuijtoya Saúl ma kichia pampa achtoui kimakaskia Jehová se tlakajkaualistli. Miakej israeleuanij pejkej majmauij uan kikajtejkej Saúl, yeka amo kichixki Samuel uan pejki temaka nopa tlakajkaualistli maske amo kinamikiyaya ya kichiuas. Yeka Jehová amo kuali kiitak tlen Saúl kichijki (1 Sam. 13:5-9).

² Kema Samuel asito, kiajuak Saúl pampa amo kineltokatoya Jehová. Saúl amo moyolkuepki uan pejki san motechtia ika miak tlamantli uan kintlajtlakoltik sekinok (1 Sam. 13:10-14). Ipan nopa tonali Saúl pejki moueyimati. Yeka Jehová ayokmo kuali kiitak uan kiiljuik kitemoskia seyok tlanauatijketl (1 Sam. 15:22, 23). Maske achtoui eliyaya se kuali tlakatl, teipa ayokmo kiampa elki (1 Sam. 31:1-6).

3. 1) ¿Tlake moiljuiaj miakej maseualmej? 2) ¿Tlake tlajtlanili tijnankilisej?

 ³ Miakej maseualmej moiljuiaj amo moneki moechkapantlalisej tlaj kinekij kuali ma kisa nochi tlen kichiuasej. Kinekij kinextisej inijuantij tlauel ininpati san pampa kinekij ma kintlepanitakaj. Se tlakatl tlen tlauel kiixmatij kiijtok: “Na amo nechixmatij pampa nimoechkapantlalia, uan amo kema nijnekiskia kiampa ma nechixmatikaj”. Uajka, ¿kenke Cristo itokilijkauaj moneki kinextisej moechkapantlaliaj? ¿Tlake kiijtosneki se moechkapantlalis, uan kenijkatsa kinamiki tijnextisej? Tijnankilisej ni tlajtlanili ipan ni tlamachtili, uan ipan nopa seyok tikitasej tlake techpaleuis nojua ma timoechkapantlalikaj maske kemantika ouij.

4. ¿Kenijkatsa se akajya kinextia moueyimati?

⁴ Biblia kiijtoua kema se akajya moueyimati ayokmo kinextia moechkapantlalia (xijpoua Proverbios 11:2). David kiiljuik Jehová: “Xinechpaleui para axnimoueyimatis” (Sal. 19:13). ¿Kenijkatsa se akajya kinextia moueyimati? Kema kichiua se tlenijki tlen amo kinamiki kichiuas o tlen amo kiiljuijtokej ma kichiua, uan uelis kiampa kichiua pampa tlauel mouejkapantlalia o pampa moiljuia yaya kinamiki kichiuas. Maske uelis kemantika kiampa tijchijtokej pampa titlajtlakolejkej, tlaj nochipa kiampa tijchiuaskiaj, uajka nojkia tikixpanosej Jehová kej Saúl kichijki. Salmo 119:21 kiijtoua Jehová “[kinajua] katli moueyimatij”. ¿Kenke kiampa kichiua?

5. ¿Kenke tlauel amo kuali timoueyimatisej?

⁵ Tlauel amo kuali tlaj timoueyimatisej. ¿Kenke kiampa tikijtouaj? Se: tijnextiskiaj amo tijtlepanitaj toTeotsij Jehová, katli eli toTlanauatijka. Ome: tlaj tijchiuaskiaj se tlenijki tlen tojuantij amo kinamiki tijchiuasej, ueliskia kichiuas ma timokualanikaj ininuaya sekinok (Prov. 13:10). Eyi: ueliskia timopinaualtisej kema sekinok kiitasej tijchijkej se tlenijki san pampa timoueyimatij (Luc. 14:8, 9). Yeka Jehová techiljuia ma timoechkapantlalikaj.

6, 7. ¿Kenijkatsa kema amo timoueyimatij tijnextiaj timoechkapantlaliaj?

⁶ Kema se akajya moechkapantlalia kinextia amo moueyimati. Yeka, se toikni katli amo moueyimati kinita sekinok “más uejueyij” uan amo san ya tlauel mopatiita (Filip. 2:3). Se katli amo moueyimati nochipa moechkapantlalia, uan kimati onka se keski tlamantli tlen amo kinamiki o amo uelis kichiuas, uan kimati kemantika mokuapoloua. Nojkia kuali kitlakakilia tlen sekinok kiiljuiaj uan kichiua se keski tlamantli kej inijuantij. Jehová tlauel kuali kinita katli amo moueyimatij.

⁷ Biblia kiijtoua se maseuali katli moechkapantlalia kuali moixmati, uan kimati se keski tlamantli amo uelis kichiuas o amo kinamiki kichiuas. Nopa kipaleuia ma kintlepanita uan ma kinikneli sekinok.

8. ¿Tlake amo kinamiki tijchiuasej tlaj tijnekij nochipa timoechkapantlalisej?

⁸ Tlaj amo timomokuitlauiaj, ueliskia  peuas tijnextisej timoueyimatij maske tojuantij timoiljuiskiaj amo timoueyimatij. ¿Kenijkatsa panoskia ni? Ueliskia peuas timoiljuisej toikniuaj amo tlauel ininpati, uan san tojuantij tlauel timopatiitaskiaj san pampa techmakatokej se keski tekitl ipan tlanechikoli o pampa touampoyouaj tlauel kintekimakatokej (Rom. 12:16). O uelis tijchiuaskiaj miak tlamantli san pampa tijnekij sekinok ma kiitakaj tlen tijchiuaj (1 Tim. 2:9, 10). Uan uelis timoiljuiskiaj kinamiki tikiniljuisej sekinok tlake kichiuasej uan tlake amo (1 Cor. 4:6).

9. ¿Kenke sekij maseualmej tlauel moueyimatkej? Xikijto se neskayotl.

⁹ Tlaj timoiljuijtosej ipan se keski tlamantli tlen tijnekij tijchiuasej, teipa uelis timoueyimatisej. Sekij tlauel moueyimatkej pampa achtouia kinekiyayaj ma kinuejkapantlalikaj, pampa tlauel kinkokoliyayaj sekinok o pampa tlauel mosisiniyayaj. Biblia kiijtoua kej nopa kinpanok se keskij maseualmej, kej Absalón, Uzías uan Nabucodonosor. Pampa tlauel moueyimatkej, Jehová kintlatsakuiltik (2 Sam. 15:1-6; 18:9-17; 2 Crón. 26:16-21; Dan. 5:18-21).

10. ¿Kenke amo kinamiki tikijtosej se akajya kichijki se tlenijki san pampa moueyimati? Xikijto se neskayotl.

¹⁰ Uelis onka seyok tlamantli tlen kichiua maseualmej amo ma moechkapantlalikaj. Ma timoiljuikaj ipan Abimélec uan Pedro (Gén. 20:2-7; Mat. 26:31-35). ¿Kinextijkej moueyimatiyayaj nopa tlakamej? ¿Uelis amo kimatiyayaj se keski tlamantli o amo kuali moiljuijkej achtoui uan yeka nima kichijtiuetskej tlen kinekiyayaj? Tojuantij amo tijmatij tlake moyoliljuiaj maseualmej, yeka amo kinamiki tikijtosej se akajya kichijki se tlenijki san pampa moueyimati (xijpoua Santiago 4:12).

11. ¿Tlake kikuamachilia se toikni katli moechkapantlalia?

¹¹ Se toikni katli moechkapantlalia kikuamachilia tlake moneki kichiuas ipan tlanechikoli. Jehová nochipa kichiua se tlenijki kej kinamiki, yeka tojuantij nojkia techtlalijtok ipan tlanechikoli kampa kinamiki pampa nochi moneki ma tijchiuakaj se tlenijki. Pampa Jehová tlauel techiknelia, nochi techmakatok se keski tlamantli, uan techkaua ma tijtlapejpenikaj kenijkatsa tijtekiuisej o tijnextisej. Tlaj timoechkapantlaliaj, uajka tijtekiuisej tlen techmakatok kej ya kineki (Rom. 12:4-8). Jehová kineki ma tijueyichiuakaj ika nochi nopa tlamantli tlen techmakatok uan nojkia ma tikinpaleuikaj sekinok (xijpoua 1 Pedro 4:10).

12, 13. ¿Tlake moneki tikilnamikisej tlaj mopatlas kej tijtekipanouaj Jehová?

¹² Uelis teipa ayokmo tijchiuasej tlen namantsi tijchiuaj kema tijtekipanouaj Jehová. Ma timoiljuikaj kenijkatsa mopatlatok nochi tlen Jesús kichijtok. Achtouia iselti itstoya iuaya iTata (Prov. 8:22). Teipa kipaleuik iTata kema kinchijchijki iluikaeuanij, kema kichijchijki nochi tlen onka ipan iluikaktli uan kema kinchijchijki maseualmej (Col. 1:16). Teipa kititlankej ipan Tlaltipaktli, kampa tlakatiko kej se maseuali uan yolik moskaltijtiajki (Filip. 2:7). Uan kema ya kimiktijtoyaj, moyolkuik uan sampa yajki iluikak, uan ipan xiuitl 1914 pejki tekichiua ipan toTeotsij iTlanauatijkayo (Heb. 2:9). Teipa, Jesús tlanauatis san mil xiuitl uan Jehová sampa “kipias nochi tlanauatili ika nochi tlen onka” (1 Cor. 15:28).

¹³ Uelis ipan tonemilis nojkia mopatlas miak tlamantli tlen tijchiuaj. Kema tijtlapejpeniaj tijchiuasej se tlenijki, kichiua ma mopatla se keski tlamantli. Se akajya ayokmo iselti itstok  pampa nama ya mosiuajtik o monamiktik. O uelis nama kinpia ikoneuaj. O uelis kipatla se keski tlamantli ipan inemilis pampa kineki nojua tlauel kitekipanos Jehová. Uan kemantika mopatla tlen kichiua pampa uelis ayokmo itstok kej achtouia. Uelis nama kena yajatis kichiuas se keski tlamantli kema kitekipanos Jehová o uelis ayokmo yajatis kichiuas tlen namantsi kichiua. Tlaj titelpokamej o ya tiuejueyij, tlaj timokokouaj o amo, Jehová kimati kenijkatsa uelis nojua kuali tijtekipanosej. Ya amo kema techiljuis ma tijchiuakaj se tlenijki tlen kimati amo tiyajatisej tijchiuasej. Jehová tlauel kipatiita nochi tlen tijchiuaj kema tijtekipanouaj (Heb. 6:10).

14. ¿Kenijkatsa techpaleuis ma tiyolpakikaj tlaj timoechkapantlalisej?

¹⁴ Jesús kichijki ika miak pakilistli nochi tlen Jehová kinauatik, uan tojuantij nojkia uelis tijchiuasej nopa (Prov. 8:30, 31, TNM). Tlaj timoechkapantlaliaj, uajka tiyolpakisej ika nochi nopa tekitl tlen techmakasej ipan tlanechikoli. Uan amo timoiljuijtosej kenke tojuantij amo techmakaj se keski tekitl tlen sekinok kichiuaj. Tojuantij tiyolpaktosej ika tlen tijchiuaj ipan Jehová itlanechikol, pampa yaya techmakatok nopa tekitl. Tlaj timoechkapantlalisej, nojkia techpaleuis ma tikintlepanitakaj toikniuaj uan tijnekisej tikinpaleuisej ika pakilistli. Kiampa tijnextisej tijmatij Jehová nojkia kintekimakatok ipan tlanechikoli (Rom. 12:10).

15. ¿Tlake techmachtia tlen Gedeón kichijki?

¹⁵ Gedeón kuali kinextik kenijkatsa se moechkapantlalis. Kema Jehová kiiljuik ma kinmanaui israeleuanij pampa madiáneuanij kintlaijiyouiltiyayaj, Gedeón kiijtok: “Niuala ipan nopa familia tlen más teikneltsi  ipan nochi iixuiuaj Manasés. Uan ipan noteixmatkauaj nieli tlen más nipilsiltsi” (Juec. 6:15). Maske kiampa kiijtok, Gedeón motemachik ipan Jehová uan kichijki tlen kiiljuijkej. Kinejki kuali kimatis tlake kinekiyaya Jehová ma kichiua, uan kema momaijtok, kiiljuik ma kiyakana (Juec. 6:36-40). Maske amo majmauiyaya, kuali tlalnamikiyaya uan kuali kiitayaya achtoui tlake kichiuas (Juec. 6:11, 27). Kema israeleuanij kinejkej ma eli inintlanauatijka, ya amo kinejki. Kema tlanki kichiua tlen Jehová kinauatijtoya, sampa tlakuepilik ichaj (Juec. 8:22, 23, 29).

16, 17. ¿Tlake kichiua se toikni katli moechkapantlalia kema kineki kipias sekinok tekitl?

¹⁶ ¿Tijnextiskiaj amo timoechkapantlaliaj tlaj tijseliskiaj se tekitl ipan tlanechikoli o tlaj nojua tijnekiskiaj tijchiuasej sekinok tekitl? Amo, pampa Biblia kiijtoua tlauel kuali tlaj se akajya kineki nojua tlauel kitekipanos Jehová uan kinpaleuis toikniuaj, kiampa kinextia nojua kuali tlaneltokatia (1 Tim. 4:13-15). Uajka, ¿kiijtosneki moneki ma techtekimakakaj ipan tlanechikoli uan kiampa kuali tijtekipanosej toTeotsij uan tijnextisej kuajkuali tlamantli? Amo, pampa nochi moneki tijchiuasej kampeka tijnextisej nopa kuajkuali tlamantli uan kiampa nojua kuali tijtekipanosej Jehová uan tikinpaleuisej toikniuaj.

¹⁷ Kema se toikni moechkapantlalia, amo nima kiselijtiuetsi se tekitl, achtoui kuali moiljuia tlake kineki Jehová ma kichiua. Yeka momaijtoua uan kuali moyoliljuia tlaj nelia yajatis kichiuas nopa tekitl. Uelis achtoui moneki kiitas tlaj nojua kipias tonali uan kiampa nojua uelis kichijtos sekinok tlamantli tlen nojkia ipati. Tlaj kiitas amo yajatis, uajka sekinok toikniuaj uelis kipaleuisej ika se keski tekitl. Kema nopa toikni kuali moiljuis ipan nochi ni tlamantli, uelis kiitas amo yajatis kichiuas nopa tekitl tlen kinekij kimakasej. Tlaj tojuantij nelia timoechkapantlaliaj, kemantika monekis amo tijselisej se tekitl.

18. 1) ¿Tlake tijchiuasej kema techmakasej se yankuik tekitl tlaj nelia timoechkapantlaliaj? 2) ¿Kenijkatsa Romanos 12:3 techpaleuia ma timoechkapantlalikaj?

¹⁸ Jehová kineki “ma timoechkapanokaj iixpa” kema tijtekipanouaj (Miq. 6:8). Yeka, tlaj techmakasej se yankuik tekitl, ma tijchiuakaj kej Gedeón uan ma tikiljuikaj Jehová ma techyakana uan ma techpaleui. Kuali ma timoyoliljuikaj ipan tlen Jehová techiljuia ika itlanechikol uan ipan iTlajtol. Moneki tikilnamikisej toselti amo tiueliskiaj tijchiuasej se keski tlamantli, tiuelij tijchiuaj pampa Jehová amo moueyimati uan yeka techpaleuia (Sal. 18:35). Tlaj timoechkapantlaliaj, amo kema timoiljuisej san tojuantij tlauel topati (xijpoua Romanos 12:3).

19. ¿Kenke tlauel moneki timoechkapantlalisej?

¹⁹ Kej tikitstokej ipan ni tlamachtili, tlauel moneki timoechkapantlalisej, pampa san Jehová kinamiki ma tijuejkapantlalikaj o ma tijueyichiuakaj, pampa yaya kichijchijki nochi tlen onka uan pampa yaya kinamiki kinauatis nochi (Apoc. [Rev.] 4:11). Tlaj timoechkapantlalisej, uajka tiyolpaktosej san ika tlen tiuelij tijchiuaj kema tijtekipanouaj Jehová. Nojkia tijtlepanitasej tlen toikniuaj moiljuiaj uan kiyolmatij, kiampa nochipa kuali timouikasej ininuaya. Uan nojkia amo tijpiasej kuesoli, pampa kema tijnekisej tijchiuasej se tlenijki, achtoui kuali timoiljuisej tlake panoskia. Moneki tikilnamikisej Jehová tlauel kuali kinita katli amo moueyimatij. Nochi ni kinextia kenke Cristo itokilijkauaj tlauel moneki ma moechkapantlalikaj. Ipan nopa seyok tlamachtili nojua tikitasej kenijkatsa uelis tijnextisej timoechkapantlaliaj maske kemantika ouij.