1, 2. ¿Kenke moneki tijmatisej kenijkatsa tijyolchikauasej katli moyolkokoua pampa mijki se akajya katli tlauel kiikneliyaya? (Xikita nopa achtoui tlaixkopinkayotl).

SUSI, se tosiuaikni kiijtok: “Kema mijki tokone, nechka se xiuitl nelia tlauel timoyolkokojkej”. Uan se toikni kiijtoua kema isiua miktiuetski pejki “tlauel chikauak tlakayokuajkualo”. Tlauel miakej maseualmej kinpano kej ni toikniuaj. Miakej toTeotsij itekipanojkauaj amo moiljuiyayaj tlaj ipan ni tonali mikiskia se akajya katli kiikneliyayaj. Tlaj ta o se katli tikixmati mijki se tlen ichampoyouaj o se iuampo, uelis timotlajtlania: “¿Kenijkatsa uelis nijpaleuis?”.

² Uelis tijkaktokej sekij kiijtouaj: “Kej panotias tonali ayokmo timoyolkokosej”. ¿Nelia tlen kiijtouaj? Se tosiuaikni katli mijki iueue kiijtok: “Nimoiljuia tlen nelnelia techpaleuia ayokmo ma timoyolkokokaj eli tlen tijchiuaj ika nopa tonali tlen tijpiaj”. Kema se akajya moyolkokoua eli sanse kej kema se akajya kipia se kokolistli: moneki panos tonali uan kinextilisej kiikneliaj, kiampa yolik kuali kiyolmajtias. Uajka, ¿kenijkatsa uelis tikinpaleuisej katli moyolkokouaj pampa mijki se akajya katli tlauel kiikneliyayaj?

3, 4. ¿Kenke tijmatij Jehová kikuamachilia tlen tijyolmatij kema miki se akajya katli tlauel tikikneliaj?

³ San toTata Jehová, katli techiknelia, uelis techyolchikauas (xijpoua 2 Corintios 1:3, 4, Icamanal Toteco). Jehová kuali kikuamachilia kenijkatsa tijyolmatij. Yeka kiniljuia itekipanojkauaj: “Na tlen niinmechyolchikaua” (Is. 51:12; Sal. 119:50, 52, 76).

⁴ ToTata, “katli techtlasojtla”, nojkia kiitstok kenijkatsa miktokej se keskij katli tlauel kinikneliyaya, kej Abraham, Isaac, Jacob, Moisés uan tlanauatijketl David (Núm. 12:6-8; Mat. 22:31, 32; Hech. 13:22). Biblia kiijtoua Jehová tlauel kineki ma asi nopa tonali kema kinyolkuis (Job 14:14, 15, TNM). Katli moyolkuisej ayokmo mokokosej uan nochipa yolpaktosej. Ma tikilnamikikaj toTeotsij nojkia kiitak kenijkatsa kimiktijkej iKone “katli ya tlauel kiikneliyaya” (Prov. 8:22, 30, TNM). Amo kema uelis tijkuamachilisej kenijkatsa kiyolmatki Jehová (Juan 5:20; 10:17).

5, 6. ¿Kenijkatsa techyolchikaua Jehová?

⁵ Uelis timotemachisej Jehová nelia techpaleuis. Yeka moneki nimantsi tikiljuisej nochi tlen techpano uan tlen tijyolmatij. Tlauel kuali tijyolmatij pampa Jehová kikuamachilia tlen techpano uan techyolchikaua. ¿Kenijkatsa kichiua?

⁶ Ya techyolchikaua ika itonal (Hech. 9:31). Jesús kiijtok toTeotsij kinmakaskia itonal katli tlauel teyolchikaua “nochi tlen kitlajtlanisej” (Luc. 11:13). Susi, katli tikijtojkej ipan achtoui párrafo, kiijtoua: “Tlauel miakpa timotlankuaketskej iixpa Jehová uan tijtlajtlaniyayaj ma techyolchikaua. Nochipa kema kiampa tijchijkej tijmatkej kenijkatsa nopa tlaseuilistli tlen toTeotsij temaka techpaleuik kuali ma tijyolmatikaj uan amo ma timokuesokaj” (xijpoua Filipenses 4:6, 7).

7, 8. ¿Kenke tijmatij Jesús uelis techyolchikauas?

⁷ Tlen Jesús kichijki uan kiijtok kema itstoya ipan Tlaltipaktli, kinextik kenijkatsa iTata Jehová tlauel teiknelia, kiyolkokoua tlen techpano uan techtlasojtla (Juan 5:19). ToTeotsij kiualtitlanki Jesús pampa kinekiyaya ma kinyolchikaua katli “tlauel moyolkuesouaj” uan katli “chokaj” (Is. 61:1, 2; Luc. 4:17-21). Maseualmej kiitayayaj kenijkatsa Jesús kintlasojtlayaya, kikuamachiliyaya tlen kinpanoyaya uan nelnelia kinekiyaya kinpaleuis (Heb. 2:17).

⁸ Kema Jesús eliyaya telpokatl, nojkia mijkej iuikaljuaj uan iuampoyouaj. Kema kipixtoya 20 xiuitl, * uelis mijki itata José. Jesús tlauel teikneliyaya, yeka tlauel moyolkokok pampa mijki itata, uan nojkia tlauel amo kuali kiyolmatki kema kiitayaya kenijkatsa inana uan iikniuaj moyolkokouayayaj.

9. ¿Kenijkatsa Jesús kinextik kiyolkokouayaya tlen sekinok kinpanoyaya?

⁹ Kema Jesús tlajtolmoyajki kinextik kiyolkokouayaya uan kikuamachiliyaya tlen maseualmej kinpanoyaya. Kej nopa kinextik kema mijki iuampo Lázaro. Maske kimajtoya kiyolkuiskia, kema kiitak María uan Marta tlauel chokayayaj, ya tlauel moyolkokok uan pejki choka (Juan 11:33-36).

10. ¿Kenke tijmatij Jesús nojua kiyolkokoua tlen techpano?

 ¹⁰ ¿Kenijkatsa techpaleuia tijmatisej tlen Jesús kichijki uejkajkia? Biblia kiijtoua: “Jesucristo itstok sanse yaljuaya uan ama uan sanse itstos para nochipa” (Heb. 13:8). Jesús “yajaya tlen ueli temaka yankuik yolistli” uan kimati kenijkatsa tijyolmatij kema timoyolkokouaj. Yeka ueli kinpaleuia katli kinpano se tlaouijkayotl (Hech. 3:15; Heb. 2:10, 18). Uelis timotemachisej nojua kiyolkokoua kema kiita titlaijiyouiaj. Kikuamachilia tlen techpano uan techyolchikaua “kema más moneki” (xijpoua Hebreos 4:15, 16).

11. ¿Tlake textos tlauel mitsyolchikaua?

¹¹ Amo san techyolchikaua kema tikitaj kenijkatsa moyolkokok Jesús kema mijki Lázaro, nojkia onka sekinok textos tlen uelis techyolchikauas. Tijmatij nopa pampa toTeotsij iTlajtol “kiijkuilojkej para techmachtis para uelis tikijiyouisej tlen techpanotiuala”, uan nojkia kiijkuilojkej “para techyolchikauas para ma tijchiakaj nochi tlen techiljuia para tijselisej teipa” (Rom. 15:4). Tlaj miktok se akajya katli tlauel tikikneliyaya, uajka tlauel mitsyolchikauas ni textos:

• “ToTeko itstok ininnechka tlakamej tlen mokuesouaj. Uan kinmakixtia tlen mokuesouaj ika inintlajtlakoljuaj” (Sal. 34:18, 19).

• “NoTeko, kema san nimoyoliljuia tlen miak kuesoli uan san ya nopa nijmati, ta tinechyoltlalia. Tinechchiuilia ma nimotemachi ipan ta uan tinechmaka pakilistli” (Sal. 94:19).

• “ToTeko Jesucristo uan toTeko toTata techiknelia nochi tojuantij uan techyoltlalijtok para nochipa pampa ueyi iyolo ika tojuantij. Yajaya tlen techchiuilia ma tijchiakaj ika pakilistli nochi nopa kuali tlamantli tlen techmakas teipa. Uan ama toTeko toTata uan toTeko Jesucristo ma inmechyolchikauakaj uan ma inmechchiuakaj intemachmej” (2 Tes. 2:16, 17). *

12. ¿Kenijkatsa uelis tikinyolchikauasej sekinok?

¹² Toikniuaj katli itstokej ipan tlanechikoli nojkia uelis tlauel kiyolchikauasej se toikni tlaj mijki se akajya katli tlauel kiikneliyaya (xijpoua 1 Tesalonicenses 5:11). ¿Kenijkatsa uelis tikinyolchikauasej katli tlauel mokuesojtokej? (Prov. 17:22). Moneki tikilnamikisej “onka tonali para timokamatsakuas[ej] uan onka tonali para [tikamanaltisej]” (Ecl. 3:7). Ma tikitakaj tlen kiijtouaj omej tosiuaikniuaj. Dalene, katli ayokmo kipia iueue, kiijtoua: “Katli moyolkokojtokej moneki kiijtosej tlen moiljuiaj uan tlen kiyolmatij. Yeka, tlaj tijnekij tikinpaleuisej, moneki amo tikamanaltisej kema inijuantij kamanaltitosej uan kuali tikintlakakilisej”. Junia, katli iikni momiktik, nojkia kiijtoua: “Maske uelis amo tijkuamachilisej nochi tlen kinpano, tlauel ipati tijnekisej tijkuamachilisej tlen kiyolmatij”.

13. ¿Tlake moneki tikilnamikisej?

¹³ Moneki tikilnamikisej amo nochi kinpano yon kiyolmatij sanse tlamantli, uan yeka amo sanse kinextiaj. Kemantika san katli kiijiyouijtok se tlenijki kuali kimati kenijkatsa kiyolmati, uan uelis kimati ouij kiijtos. Yeka Biblia kiijtoua: “Sejse tlakatl kimati nopa kuesoli o nopa pakilistli tlen kipia ipan iyolo. Uan axaka uelis  kimachilis senkistok tlen seyok kimati” (Prov. 14:10). Uan maske se akajya kiijtos tlen kiyolmati, uelis sekinok amo kikuamachilisej tlake kineki kiijtos.

14. ¿Tlake nojua uelis tijchiuasej uan kiampa tikinyolchikauasej sekinok?

¹⁴ Pampa amo tijkuamachiliaj kuali nochi tlen kiyolmatij, amo tijmatij tlake tikiniljuisej katli tlauel mokuesojtokej. Maske kiampa techpano, Biblia kiijtoua “inintlajtol tlalnamikinij eltok keja se pajtli tlen teyolchikaua uan teseseltia” (Prov. 12:18). Miakej toikniuaj tlauel kinpaleuijtok nopa pilamochtsi Cuando muere un ser querido * ma kimatikaj kenijkatsa kinyolchikauasej sekinok. Maske tijchiuasej miak tlamantli, kemantika moneki ma tijchiuakaj tlen techtlajtolmaka Romanos 12:15: “Xichokakaj ininuaya tlen chokaj”. Gaby, se toikni katli ya mijki iueue, kiijtoua: “Kema nichoka nijnextia tlen nelia nijyolmati. Yeka tlauel nimoyolchikaua kema nouampoyouaj chokaj nouaya. Kema nechpano nopa, amo nijmati noselti niitstok”.

15. ¿Tlake uelis tijchiuasej tlaj tijmatij ouij tikijtosej se tlenijki? (Xikita nopa recuadro “ ¿Tlake uelis tikijtosej uan kiampa tikinyolchikauasej sekinok?”).

¹⁵ Tlaj tijmatij ouij tikijtosej se tlenijki, uajka uelis tikijkuilosej ipan se tarjeta, se correo, ipan se mensaje o ipan se amatlajkuiloli uan tijmakasej katli tijnekij tijyolchikauasej. Uelis tikijkuilosej se texto, tikijkuilosej se tlamantli tlen kuali tlen kinextiyaya katli mijki o tikilnamikisej se tlamantli tlen techpanok iuaya. Junia kiijtoua: “Tlauel nijtlaskamati kema se akajya nechtlajkuiljuilia o kema se tosiuaikni nechtlaneui ma niitsto iuaya, pampa nelia tlauel nechpaleuia. Nopa tlamantli tlen kichiuaj nechpaleuia  ma nikilnamiki itstokej maseualmej katli nechikneliaj uan nechmokuitlauiaj”.

16. ¿Kenijkatsa nojkia uelis tikinyolchikauasej sekinok?

¹⁶ Nojkia tlauel kuali tlaj tikiljuisej toTeotsij ma kinpaleui katli tlaijiyouiaj uan timomaijtosej ininuaya. Uelis tijmatisej ouij tijchiuasej nopa pampa amo tijmatij tlake tikijtosej o pampa uelis tichokasej. Maske ouij, tlaj timomaijtosej ika nochi toyolo uelis tikinyolchikauasej katli moyolkokouaj. Dalene, katli tikijtojkej ipan párrafo 12, kiijtoua: “Kemantika kema tosiuaikniuaj ualauij uan nechyolchikauaj, nikiniljuia ma momaijtokaj. Maske kema kipeualtiaj kakisti kinekij chokasej, teipa moyolchikauaj uan momaijtouaj ika nochi ininyolo. Kema nikita kuali tlaneltokaj, nechikneliaj uan kintekipachoua tlen nechpano, nechpaleuia nojua kuali ma nitlaneltoka”.

17-19. ¿Kenke nojua moneki ma tikinyolchikajtokaj toikniuaj?

¹⁷ Amo nochi maseualmej sanse elij, yeka sekij uejkauaj mokuesojtokej uan sekinok amo tlauel. Yeka amo san moneki tikinpaleuisej kema onmijki katli kiikneliyayaj, kema iuikaljuaj uan iuampoyouaj itstokej iuaya, nojkia moneki tijchiuasej ipan sekinok metstli tlen panotias, kema sekinok ayokmo itstokej iuaya. Proverbios 17:17 kiijtoua se “tokualuampo temachtli techiknelia nochipa. Kema onka tlaouijkayotl techpaleuia keja eliskia se toikni”. Moneki nochipa tikinyolchikajtosej maske uejkauas miak tonali (xijpoua 1 Tesalonicenses 3:7).

¹⁸ Moneki tikilnamiktosej nopa maseuali uelis mokuesos ipan tlen ueli tonali. Uelis pampa kiilnamikis tlake tonali mosenkajkej, se uikatl, se tlaixkopinkayotl, se tlenijki tlen kichiuayayaj o uelis kema kiijnekuis o kikakis se tlenijki o tlen pano ipan se metstli. Se akajya katli mijki isiua o iueue uelis tlauel ouij kimati iselti kichiuas se tlenijki, kej kema yaui ipan se tlanechikolistli o kema moilnamiki Cristo imikilis. Se toikni kiijtoua: “Nijmatiyaya tlauel nechyolkokoskia kema asiskia nopa tonali kema timosenkajkej pampa nosiua amo itstoskia nouaya, uan nelia kiampa nechpanok. Se keskij toikniuaj, tlakamej uan siuamej, kinsentilijkej sekinok nouampoyouaj uan kiampa ipan nopa tonali amo niitstoskia noselti”.

¹⁹ Nojkia kinamiki tikilnamikisej amo san moneki ma tikinyolchikauakaj ipan nopa tonali tlen inijuantij tlauel kipatiitaj. Junia kiijtoua: “Maske amo moneki tikilnamikisej se tonali tlen tlauel ipati, tlauel techyolchikauaj kema techpaleuiaj uan itstokej touaya, uan nelia tlauel se kipatiita”. Uan maske amo uelis tijchiuasej ayokmo ma mokuesokaj o ayokmo ma kimatikaj ininselti itstokej, kena uelis tijchiuasej miak tlamantli uan kiampa tikinyolchikauasej (1 Juan 3:18). Gaby kiilnamiki: “Tlauel nijtlaskamatilia Jehová pampa ueuejtlakamej nechpaleuijkej ika miak tlaiknelili uan amo nechtlauelkajkej kema amo kuali nijyolmatiyaya. Kichijkej ma nijmati kenijkatsa Jehová nochipa kejuak nechnajnauayaya ika miak tlaiknelili”.

20. ¿Kenke techyolchikaua tlen Jehová kitenkajtok kichiuas?

²⁰ Tlauel techyolchikaua tijmatisej Jehová, katli “tlatoktsitsij techyoltlalia”, kitlamiltis nochi tlaijiyouilistli kema katli “miktokej uan tlen kintlalpachojtokej” kikakisej Cristo itoska uan moyolkuisej (Juan 5:28, 29). ToTeotsij kiijtojtok “kitlamiltis mikistli para nochipa” uan “nochi tlaijiyouilistli uan pinaualistli” (Is. 25:8). Kema asis nopa tonali, ayokmo tichokasej “ininuaya tlen chokaj”, pampa nochi tlen itstosej ipan Tlaltipaktli san yolpaktosej ininuaya maseualmej “tlen pakij” (Rom. 12:15).