1. ¿Tlake kintlajtolmakak Pablo katli kintlapejpenijtoyaj ika toTeotsij itonal?

APÓSTOL Pablo kiniljuik toikniuaj: “Ayok xijchiuakaj keja ama kichiuaj tlakamej ipan ni Tlaltipaktli” (Rom. 12:2). ¿Kenke xitlauak kintlajtolmakak tlakamej uan siuamej katli kitekipanouayayaj Jehová uan kintlapejpenijtoyaj ika toTeotsij itonal? (Rom. 1:7).

2, 3. 1) ¿Tlake kichiua Satanás pampa kineki ma tijtlauelkauakaj Jehová? 2) ¿Tlake techpaleuis ma tijkixtikaj tlamantli tlen “chikauak” motlatskilijtok ipan totlalnamikilis?

² Pablo kitekipachouayaya tlen kinpanoyaya toikniuaj pampa inintlalnamikilis eliyaya sanse kej maseualmej katli Satanás kinnauatiyaya (Efes. 4:17-19). Tojuantij nojkia uelis techpanos nopa. Satanás, katli tlanauatia ipan Tlaltipaktli, kitekiuia miak tlamantli tlen ika kineki techuejkatlalis tlen Jehová. Se tlamantli tlen kitekiuia eli kema techyololinia ma timosentlalikaj san ipan tojuantij o tlauel ma timopatiitakaj uan ma tijchiuakaj tlen techyoltilana. Uan uelis kitekiuis tlen techpanotok ipan tonemilis, kej techiskaltijkej o techmachtijkej, uan kiampa timoiljuisej kej ya kineki.

³ ¿Uelis tijkixtisej tlamantli tlen “chikauak” motlatskilijtok ipan totlalnamikilis? (2 Cor. 10:4). Ma tikitakaj tlake kiijtok Pablo: “Tijtlanij inintlajtol uan nochi tlalnamikilistli tlen kinchiuiliaj tlakamej ma moueyimatikaj uan kintsakuiliaj para ma axkiixmatikaj toTeko. Uan nochi tlen se tlakatl moyoliljuia, tijyejyekouaj uan tijchiuiliaj para nopa tlanejneuilistli ma mopatla ika tlen Cristo kiijtok para melauak uan para nopa tlakatl ma kineltokas ya” (2 Cor. 10:5). Uajka, Jehová uelis techpaleuis ayokmo ma timoiljuikaj ipan tlen amo kuali yon  ma tijneltokakaj. Sanse kej se pajtli kichiua amo ma moueyili se kokolistli, toTeotsij iTlajtol nojkia uelis techpaleuis amo ma timoiljuikaj kej maseualmej katli Satanás kinnauatia.

4. ¿Tlake tlamantli tijpatlakej ipan tonemilis?

⁴ Ma timoiljuikaj ipan nochi tlamantli tlen tijpatlakej ipan tonemilis kema timomachtijkej toTeotsij iTlajtol uan timosentlalijkej tijtekipanosej Jehová. Miakej tlen tojuantij ayokmo tijchijkej tlamantli tlen amo kuali (1 Cor. 6:9-11). Tlauel tijtlaskamatiliaj Jehová pampa techpaleuik ayokmo ma tijchiuakaj nochi nopa tlamantli.

5. ¿Tlake ome tlamantli kiijtoua Romanos 12:2 moneki tijchiuasej?

⁵ Maske tijchijkej nopa, moneki kuali titlachixtosej. Maske ayokmo tijchijkej se keski tlajtlakoli pampa tijnejkej timoatsonpoliuiltisej, nojua moneki tijchijtosej kampeka uan kiampa amo kema sampa tijchiuasej yon se tlen nopa tlamantli. ¿Kenijkatsa tijchiuaj nopa? Pablo kiijtoua: “Ayok xijchiuakaj keja ama kichiuaj tlakamej ipan ni Tlaltipaktli” (Rom. 12:2). Uajka, moneki tijchiuasej ome tlamantli: 1) amo tijchiuasej kej sekinok maseualmej uan 2) tijyankuilijtiasej o tijpatlatiasej totlalnamikilis.

6. ¿Tlake techmachtia tlen Jesús kiijtok ipan Mateo 12:43-45?

⁶ Kema Pablo kiijtok moneki tijpatlasej totlalnamikilis, amo kinejki kiijtos san tijpatlasej kej tinesij. Moneki nochi tijpatlasej (xikita nopa recuadro “ ¿Timoyolpatlakej o san timoixpatlakej?”). Moneki tijyankuilisej totlalnamikilis, nopa kiijtosneki tijpatlasej tlen techpaktia, tlen tijchiuaj uan tlen tijyolmatij. Yeka, nochi moneki timotlajtlanisej: “¿Tlake tlamantli nijpatlatok pampa nijneki nijchiuas kej Cristo? ¿San se keski tlamantli ayokmo nijchiua? ¿O nelnelia nijpatlatok nochi ipan nonemilis uan kiampa nijnextia nelia nijtekipanoua toTeotsij?”. Tlauel ipati  tijmatisej kenke ni ome tlamantli amo eli sanse. Ipan Mateo 12:43-45, tikitaj se neskayotl tlen Jesús kiijtok uan technextilia tlake moneki tijchiuasej (xijpoua). Nopa neskayotl kinextia se tlenijki tlen tlauel ipati: amo san moneki tijkixtisej tlen totlalnamikilis tlamantli tlen amo kuali; moneki tijpatlasej o timoiljuisej ipan tlamantli tlen toTeotsij kipaktia, kiampa amo kaktok mokauas totlalnamikilis.

7. ¿Kenijkatsa uelis tijpatlasej nochi tlen tijpiaj toyolijtik?

⁷ ¿Nelia uelis tijpatlasej kej tielij o nochi tlen tijpiaj toyolijtik? ToTeotsij iTlajtol kiijtoua: “Ama inkipiaj tlen yankuik inmopani para kiyankuilis inmotlalnamikilis uan inmoyolo para xijtlapejpenikaj para inkichiuasej tlen kuali. Uajka moneki inkinextisej inmonemilis tlen yankuik pampa toTeko inmechchijtok se yankuik tlakatl tlen eltok keja ya. [...] Uan ama uelis inkichijtinemisej tlen xitlauak uan tlen tlatsejtseloltik” (Efes. 4:23, 24). Maske ouij, kena uelis tijpatlasej nochi tonemilis. Amo san moneki ayokmo timoiljuisej ipan tlen amo kuali uan ayokmo tijchiuasej tlen techpaktia, moneki tijpatlasej tlen techyololinia. Nopa kiijtosneki tijpatlasej tlen tlauel tijnekij tijchiuasej, tlen timomajtokej tijchiuaj uan tlen techyoltilana. Yeka, tlauel moneki nochipa tijchijtosej se ueyi kampeka.

8, 9. ¿Kenijkatsa tlen kipanok se toikni kinextia tlauel moneki tijpatlasej nochi tlen tijpiaj ipan toyolijtik?

⁸ Ma tikitakaj tlen kipanok se toikni katli tlauel mosisiniyaya, tlaiyaya uan tlauilanayaya. Kema kipatlak tlen monekiyaya ipan inemilis uan uelki moatsonpoliuiltik, nochi katli kiixmatiyayaj mosentlachiliyayaj. Se tonali, kema nojua namanok moatsonpoliuiltijtoya, toikni kiixnamijki se tlaouijkayotl: se tlakatl katli iuintitoya kitemoto ichaj pampa kinekiyaya kiteuis. Achtoui, toikni amo tleno kichijki. Teipa, kema kikajki nopa tlakatl kitlaijiljuik Jehová, ayokmo moijiyouik, kiski kalteno uan kimakilik. ¿Kenke kiampa kichijki? Maske tlen momachtijtoya ipan Biblia kipaleuijtoya ayokmo ma mosisini, ya ayamo kipatlatoya tlen kiyololiniyaya ipan inemilis. Amo kipatlatoya tlen nelnelia kipixtoya iyolijtik.

⁹ Maske kiampa panok, ya nojua kichijki kampeka (Prov. 24:16). Ueuejtlakamej kipaleuijkej uan ya nojua kuali tlaneltokatiajki, teipa uelki tlatekipanok kej ueuejtlakatl. Se tonali, kema itstoya kalixpa tlen nopa kali kampa mosentiliyayaj, kiixnamijki seyok tlaouijkayotl: sanse kej kipanotoya uejkajkia, se tlakatl katli iuintitoya kimakiliskia seyok ueuejtlakatl. ¿Tlake kichijki toikni? Ika yamanik tlajtoli, kamanaltik iuaya nopa tlakatl, kiyoltlalik uan kipaleuik ma asiti ichaj. ¿Kenke kiampa kichijki? Pampa kipatlatoya tlen kiyololiniyaya ma kichiua se keski tlamantli. Kipatlatoya tlen kipixtoya iyolijtik uan nama ayokmo mosisiniyaya yon moueyimatiyaya. Pampa kipatlak inemilis, kiueyichijki Jehová.

10. ¿Tlake moneki tijchiuasej tlaj tijnekij tijpatlasej nochi tlen tijpiaj toyolijtik?

¹⁰ Tonemilis amo nimantsi mopatlatiuetsis o iselti mopatlas. Uelis tlauel miak xiuitl monekis tijchijtosej se ueyi kampeka (2 Ped. 1:5). Uan amo kiijtosneki ya tijpatlatokej nochi tonemilis san pampa miak xiuitl tijtekipanojtokej toTeotsij. Nojua moneki tijchijtosej se ueyi kampeka tijpatlasej nochi tlen tijpiaj toyolijtik. ¿Tlake uelis techpaleuis? Ma tikitakaj se keski tlamantli tlen tlauel moneki tijchiuasej.

11. ¿Kenijkatsa tlamaijtoli techpaleuis ma tijpatlakaj tlen techyololinia ma tijchiuakaj tlen amo kuali?

¹¹ Achtoui moneki timomaijtosej uan titlajtlanisej sanse kej kichijki katli kiijkuilok se  salmo: “NoTeko Dios, xijchiua para noyolo ma eli yankuik uan tlapajpaktik. Xijchiua para ma nimoyoliljuis san ipan tlamantli tlen kuali, uan para ma nijnekis nijchiuas san tlen xitlauak” (Sal. 51:10). Kinamiki tijmajtosej moneki tijpatlasej tlen techyololinia ma tijchiuakaj se keski tlamantli tlen amo kuali uan tikiljuisej Jehová ma techpaleui. ¿Kenke temachtli tijmatij nelia techpaleuis? Ma tikitakaj tlake kintenkauilik nopa tochontikej israeleuanij katli itstoyaj kema Ezequiel tlajtolpanextiyaya: “Nikinmakas san se ininyolo uan nikinmakas se inintonaltsi tlen yankuik. Uan [...] nikinmakas se ininyolo tlen yamanik” o tlen kikauas toTeotsij ma kiyakana (Ezeq. 11:19). Tlauel techyolchikaua tlen kiijtok. Jehová kinekiyaya kinpaleuis israeleuanij ma moyolpatlakaj, uan nojkia kineki techpaleuis tojuantij.

12, 13. 1) Kej kiijtoua Salmo 119:59, ¿ipan tlake moneki timoyoliljuisej? 2) ¿Tlake moneki timotlajtlanisej?

¹² Nojkia tlauel techpaleuis tlaj timoyoliljuisej ipan tlen tijpouaj. Mojmostla moneki kuali ma tijpouakaj Biblia uan ma timoyoliljuikaj tlake tlamantli tlen timoiljuiaj moneki tijpatlasej (xijpoua Salmo 119:59; Heb. 4:12; Sant. 1:25). Moneki tikitasej tlake tlamantli tlen timoiljuiaj eli sanse kej moiljuiaj o tlamachtiaj maseualmej. Tlaj amo tijnekij timokajkayauasej, moneki tijmatisej tlake tlamantli techpoloua tijpatlasej o tlake techyoltilana uan tijchiuasej kampeka tijkixtisej tlen toyolo.

¹³ Tlaj tijnekij tijmatisej tlake moneki tijpatlasej, moneki timotlajtlanisej: “¿Nijkualankaita se kentsi se akajya o nijkokolia?” (1 Ped. 2:1). “¿Nimoueyimati pampa nitlatominpia, pampa tlauel nimomachtijtok o pampa tlauel nechpaktia nopa altepetl kampa nitlakatki?” (Prov. 16:5). “¿Nikinita sekinok amo tlauel ininpati pampa amo kipiaj tlamantli tlen na nijpia o pampa inintlachialis amo eli sanse kej na?” (Sant. 2:2-4). “¿Nechpaktia tlen onka ipan Tlaltipaktli kampa Satanás tlanauatia?” (1 Juan 2:15-17). “¿Nechpaktia nikitas kampa nesij momekatiaj o tlauel mosisiniaj?” (Sal. 97:10; 101:3; Amós 5:15). Uelis kej tijnankilisej ni tlajtlanili kinextis tlake tlamantli moneki tijpatlasej. Tlaj tijkixtisej ni tlamantli tlen “chikauak” motlatskilijtok ipan totlalnamikilis, tijyolpakiltisej toTata Jehová (Sal. 19:14).

14. ¿Kenke tlauel moneki tikintlapejpenisej kuali touampoyouaj?

¹⁴ Nojkia tlauel moneki tikintlapejpenisej kuali touampoyouaj. Maske kemantika amo tikitaj, tojuantij nojkia peua tijchiuaj kej katli ininuaya timouikaj (Prov. 13:20). Kampa timomachtiaj o kampa titekitij, itstokej maseualmej katli amo techpaleuiaj ma timoiljuikaj kej Jehová moiljuia. Uan ipan tlanechikoli uelis tikinpantisej kuali touampoyouaj, katli techpaleuisej o techyololinisej ma tijnextikaj tlaiknelili uan ma tijchiuakaj tlen kuali (Heb. 10:24, 25).

15, 16. ¿Kenijkatsa Satanás kineki kipatlas totlalnamikilis?

¹⁵ Ma tikilnamikikaj Satanás kineki kipatlas totlalnamikilis. Uan kitekiuia miak tlamantli pampa amo kineki toTeotsij iTlajtol ma techpaleui timoiljuisej kej Jehová.

¹⁶ Satanás nojua kichiua nopa tlajtlanili tlen kichiuilik Eva ipan xochimili Edén: “¿Axinmechiljuijtok Dios...?” (Gén. 3:1). Kampa tlanauatia, miakpa techtlajtlaniaj se keski tlamantli tlen ueliskia kichiuas ayokmo ma tijneltokakaj se keski tlamantli. Uelis techtlajtlaniaj ni: “¿Nelnelia amo kuali kiita kema se tlakatl mosenkaua ika seyok tlakatl o se siuatl ika seyok siuatl? ¿Nelnelia toTeotsij amo inmechkaua iniljuichiuasej ipan Navidad uan kema inkiaxitiaj inmoxiui? ¿Nelnelia inmoTeotsij inmechiljuia amo xijkauakaj ma inmechtlalilikaj estli?  ¿Nelnelia toTeotsij katli teiknelia inmechiljuia amo ximouikakaj ininuaya mochampoyouaj o mouampoyouaj katli kinkixtijtokej tlen tlanechikoli?”.

17. 1) ¿Tlake moneki tijchiuasej kema se akajya techchiuilia tlajtlanili pampa kineki ayokmo ma tijneltokakaj tlen timomachtijtokej? 2) Kej kiijtoua Colosenses 2:6, 7, ¿tlake panos tlaj tijchiuasej nopa?

¹⁷ Moneki kuali tijmajtosej kenke titlaneltokaj ipan se keski tlamantli. Tlaj amo kuali tijmatij kenke amo tijchiuaj se keski tlamantli, teipa uelis timoiljuisej amo nelia tlen timomachtijtokej ipan Biblia uan nopa kichiuas ayokmo kuali ma titlaneltokakaj. Uajka, ¿tlake moneki tijchiuasej? ToTeotsij iTlajtol techiljuia moneki tijpatlasej totlalnamikilis uan kiampa toselti kuali tijmatisej “tlake ipakilis toTeko” uan tlake kineki ma tijchiuakaj (Rom. 12:2). Tlaj nochipa timomachtisej, techpaleuis ma timotemachikaj nelia melauak tlen tijyekojtokej ipan Biblia. Uan nojkia temachtli tijmatisej nelia eli xitlauak Jehová itlanauatiljuaj. Nopa techpaleuis kuali ma motlatskilijto totlaneltokilis kej se ueyi kuauitl katli kuali moneljuayotijtok (xijpoua Colosenses 2:6, 7).

18. ¿Tlake techpaleuis amo tijpiasej totlalnamikilis kej maseualmej katli Satanás kinnauatia?

¹⁸ Amo aka uelis kichiuas kuali ma titlaneltokakaj, nopa san tojuantij uelis tijchiuasej. Yeka, nojua ma tijyankuilikaj totlalnamikilis. Nochipa ma timomaijtokaj uan ma tikiljuikaj Jehová ma techmaka itonal. Kuali ma timoyoliljuikaj ipan tlen tijpouaj uan ma tikitakaj nochipa tlake tijpiaj ipan totlalnamikilis uan kenke tijnekij tijchiuasej se tlenijki. Ma tikintemokaj kuali touampoyouaj; ma timouikakaj ininuaya katli techpaleuisej ma timoiljuikaj ipan tlamantli tlen kuali. Tlaj tijchiuasej nochi ni, amo tijpiasej totlalnamikilis kej maseualmej katli Satanás kinnauatia uan uelis “[tijtlanisej] inintlajtol uan nochi tlalnamikilistli” tlen kiixnamiki toTeotsij itlalnamikilis (2 Cor. 10:5).