LUCÍA AMO KUALI NEJNEMI PAMPA SE IIKXI AMO KUALI ELTOK. Kema eliyaya siuapil, kiasik poliomielitis, se kokolistli tlen tlauel temaua uan kiijtlakoua se keski tlamantli tlen totlakayo. Kema kipixtoya 16 xiuitl, se siuatl katli kitekipanouayaya, kiiljuik: “ToTeotsij mitstlatsakuiltik pampa amo tijneltokak uan amo tijtlepanitak monana, uan yeka nama amo kuali tinejnemi”. Maske panok miak xiuitl, Lucía nojua kiilnamiki kenijkatsa tlauel kiyolkokok tlen kiiljuik.

KEMA DÁMARIS KIMATKI KIPIXTOYA SE TUMOR IPAN ITSONTEKO, itata kiiljuik: “Mitspano ni pampa uelis tijchijki se tlamantli tlen tlauel amo kuali, uan yeka toTeotsij mitstlatsakuiltia”. Dámaris tlauel amo kuali kiyolmatki kema kiiljuijkej nopa.

Ipan miak xiuitl tlen panotok, maseualmej kiijtojtokej toTeotsij tetlatsakuiltia ika kokolistli. Nopa amochtli Usos y costumbres de las tierras bíblicas kiijtoua kema Jesús itstoya, maseualmej moiljuiyayaj “se akajya mokokouayaya pampa ya o se tlen iuikaljuaj tlajtlakolchijtoya, uan yeka kitlatsakuiltiyayaj ika kokolistli”. Uan amochtli Medieval Medicine and the Plague (Pajtli tlen uejkajkia kitekiuiyayaj uan kokolistli) kiijtoua ipan Edad Media, “se keskij maseualmej moiljuiyayaj toTeotsij kintlatsakuiltiyaya katli tlajtlakolchijtoyaj ika kokolistli”. ¿Kintlatsakuiltik toTeotsij ika kokolistli nopa miakej maseualmej katli mijkej ipan Europa ipan siglo 14? ¿O mijkej pampa kinmajki se tlamantli, kej teipa kiitakej ixtlamatinij? Uelis ta nojkia timotlajtlania tlaj toTeotsij kintlatsakuiltia ika kokolistli maseualmej katli tlajtlakolchiuaj. *

XIMOILJUI NI: Tlaj toTeotsij nelia tetlatsakuiltiyaya ika kokolistli uan tlaijiyouilistli, ¿uajka kenke Jesús kinchikajki katli mokokouayayaj? Tlaj toTeotsij kiampa tetlatsakuiltiyaya, uajka Jesús kinextijtoskia amo kitlepanita uan kiixpanotoskia (Mateo 4:23, 24). Jesús amo kema kiijixnamikiskia iTata. Ya kiijtok: “Mojmostla nijchiua tlen kipaktia” uan “tlen noTata nechnauatia, ya nopa nijchiuas” (Juan 8:29; 14:31).

Biblia xitlauak kiijtoua Jehová nochipa “kichiua tlen melauak uan [tlen] kuajkualtsi” (Deuteronomio 32:4). Ma timoiljuikaj ipan ni tlamantli: Jehová amo kema kichiuaskia miakej maseualmej katli amo tleno kichijtokej ma mikikaj kema se avión motepexiuia san pampa kineki kitlatsakuiltis se maseuali katli nopaya yaui. Abraham, katli kuali kitekipanok toTeotsij, kimajtoya amo kema kichiuaskia nopa. Yeka kiijtok: “Axkuali intla tikinmiktis kuajkualmej ininuaya tlen tlauel tlajtlakolchijtokej” (Génesis 18:23, 25). Biblia nojkia kiijtoua toTeotsij “axtlajtlakolchiua, niyon axtlaixpano” yon “axkema kichiua tlen axkuali” (Job 34:10-12).

Kema titlaijiyouiaj amo kiijtosneki toTeotsij techtlatsakuiltia pampa tijchijkej se tlajtlakoli. Jesús kuali kinextik nopa kema ya uan itokilijkauaj kipantijkej se tlakatl katli amo tlachiayaya pampa kiampa tlakatki. Inijuantij kitlajtlanijkej: “Tlamachtijketl, ¿ajkeya itlajtlakol para elki popoyotsi ne tlakatl? ¿Itlajtlakol inana o itata o san ya itlajtlakol?”. Uan Jesús kinnankilik: “Axtlakatki popoyotsi pampa itlajtlakol, yon pampa itlajtlakol inana, yon itata” (Juan 9:1-3).

 Pampa nochi kineltokayayaj tlen amo melauak, itokilijkauaj uelis mosentlachilijkej kema Jesús kiniljuik nopa tlakatl amo kitlatsakuiltijtoyaj pampa kichijtoya se tlajtlakoli o pampa itatauaj tlajtlakolchijtoyaj. Kema Jesús kichijki nopa tlakatl ma tlachia, amo san kichikajki, nojkia kinextik amo eliyaya melauak tlen maseualmej moiljuiyayaj (Juan 9:6, 7). Tijmatij toTeotsij amo kichiua ma titlaijiyouikaj, uan nopa tlauel kinyolchikaua nochi katli mokokouaj.

Biblia techiljuia:

• “Amo ximoiljui para yajaya toTeko tlen mitsyoltilana” (SANTIAGO 1:13). ToTeotsij amo kema kichiua nopa. Uan nojkia, nechka kitlamiltis nochi tlamantli tlen amo kuali tlen kintlaijiyouiltijtok maseualmej ipan miak xiuitl, kej kokolistli, tlaouijkayotl uan mikilistli.

• Jesucristo “kinchikajki nochi tlen mokokouayayaj” (MATEO 8:16). Kema Jesús kinchikajki maseualmej, kinextik tlen kichiuas toTeotsij iTlanauatijkayo ipan nochi Tlaltipaktli.

• “ToTeko kinuachilis nochi ininixayo. Uan ayok kema aki mikis, niyon mokuesos, niyon chokas, niyon mokokos pampa ya panotos nochi ni tlamantli tlen achtouia eltoya ipan nopa achtoui Tlaltipaktli” (APOCALIPSIS [REVELACIÓN] 21:3-5).

Uajka, ¿kenke onka miak tlaouijkayotl uan tlaijiyouilistli ipan nochi Tlaltipaktli? Uan tlaj toTeotsij amo techtlaijiyouiltia, ¿uajka ajkia kichiua ma titlaijiyouikaj? Ipan miak xiuitl tlen panotok, miakej maseualmej kinektokej kimatisej ni tlamantli. Ipan nopa seyok tlamachtili tijnankilisej ni ome tlajtlanili.