TLAMACHTILI TLEN IKA PEUA: ¿UELIS SAMPA ITSTOSEJ MIJKATSITSIJ?
¿Tlake techpano kema timikij?
“Nimoiljuiyaya kema se akajya miki ueliskia yas iluikak, kampa tetlaijiyouiltiaj o ipan purgatorio. Nimoiljuiyaya amo kinamikiyaya nias iluikak pampa kemantika amo nijchiuayaya tlen kuali, nojkia amo kinamikiyaya nias kampa tetlaijiyouiltiaj pampa amo nijchiuayaya tlen tlauel amo kuali. Na amo kuali nijkuamachiliyaya tlake eliyaya nopa purgatorio. Amo kema nijpojtoya tlen Biblia kiijtoua, nijmatiyaya san tlen maseualmej kiijtouayayaj.” (Lionel)
“Maske nechmachtijtoyaj nochi tiauij iluikak, amo nijmatiyaya tlaj nelia. Nimoiljuiyaya tlami nochi kema se akajya miki.” (Fernando)
¿Timotlajtlanijtok tlake techpano kema timikij? ¿Tlaijiyouijtokej tochampoyouaj katli ya mijkej? ¿Sampa tikinitasej? ¿Kenke uelis timotemachisej nelia moyolkuisej katli miktokej? Ni uelis tijnankilisej ika Biblia. Achtoui ma tikitakaj kenijkatsa mopantiaj katli miktokej uan teipa tijnankilisej nopa sekinok eyi tlajtlanili.
¿Kenijkatsa mopantiaj katli miktokej?
TLEN BIBLIA KIIJTOUA: “Tlen yoltokej kimatij para se tonali mikisej. Pero tlen miktokej ayok tleno kimatij. Nojkia axkichiaj para kiselisej se tlaxtlauili teipa. Uan ayok aki kinilnamiki. Nochi tlamantli tlen asi momako para tijchiuas, xijchiua ika nochi chikaualistli tlen tijpia. Pampa ipan nopa mijkaostotl * kampa monechkauia para tias, ayok uelis tijchiuas niyon se tekitl, ayok uelis timoyoliljuis kejatsa tijchiuas se tlamantli tlen kuali. Ayok tleno tikixmatis, niyon ayok tijpias tlalnamikilistli” (Ecl. 9:5, 10).
Kema Biblia kiijtoua Seol, kiijtosneki nopa mijkaostotl. Ni kiixnextia katli miktokej amo tlalnamikij uan amo tleno uelij kichiuaj. Ximoiljui tlake kikuamachilik Job kema kitekiuik nopa tlajtoli. San ipan se tonali mijkej nochi ikoneuaj uan kipolok nochi tlen kipixtoya. Teipa kipixki se amo kuali kokolistli. Yeka kiiljuik toTeotsij: “Kuali eliskia intla tinechtlatiskia ipan nopa [...] ostotl” (Job 1:13-19; 2:7; 14:13). Job kimatiyaya kampa kintlalpachouaj katli mikij eliyaya kampa mosiajketsaj uan amo kampa kintlaijiyouiltiaj ika tlitl.
Tlaj tijpouas ipan Biblia kampa kiijtoua katli kinyolkuikej tijmatis kenijkatsa mopantiaj mijkatsitsij (xikita nopa recuadro “ Chikueyij maseualmej tlen Biblia kiijtoua kinyolkuikej”).
Inijuantij amo kiijtojkej mopantiyayaj kampa tlauel yolpaktoyaj o kintlaijiyouiltijtoyaj. Tlaj ya nopa kinpanotoskia, kiijtojtoskiaj. Uan uelis moijkuilojtoskia ipan Biblia, uan kiampa tijmajtoskiaj kanke mopantiyayaj. Biblia amo kiijtoua nopa. Katli kinyolkuikej amo kiijtojkej tlake kinpanotoya pampa amo tleno kinpanok. Kema miktoyaj amo tlalnamikiyayaj, inijuantij kejuak tlauel kuali kochtoyaj. Yeka, kemantika kema se akajya miki Biblia kiijtoua “kochi”. Kema David uan Esteban mijkej Biblia kiijtoua kejuak kochkej (Hech. 7:60; 13:36).
Uajka, ¿tlami nochi kema se akajya miki? ¿Uelis sampa tlachiasej katli kejuak kochtokej?
^ párr. 7 Nopa tlajtoli Seol ika hebreo uan Hades ika griego kiijtosneki “mijkaostotl”, “ostotl” o “kampa mijkatsitsij”. Sekinok kitlajtolkueptokej kej “miktla”, maske nopa amo nelia pampa ipan Biblia amo kana kiijtoua tlaj onka kampa tetlaijiyouiltiaj ika tlitl.
