TLAMACHTILI TLEN IKA PEUA: ¿KENIJKATSA KIITA TOTEOTSIJ NOPA TLAUILANKAYOTL?
Kej toTeotsij kiitayaya tlauilankayotl kema itstoyaj nopa achtoui Cristo itokilijkauaj
Kema itstoyaj nopa achtoui Cristo itokilijkauaj, romaeuanij tlauel kintlaijiyouiltiyayaj judíos, kej uejkajkia kintlaijiyouiltijkej israeleuanij. Uelis miakpa kiiljuijkej toTeotsij ma kinmanaui. Teipa kiixmatkej Jesús, uan sekij moiljuiyayaj tlaj yaya eliyaya nopa Mesías, yeka miakej moiljuijkej ‘kinmakixtiskia israelitajmej’ tlen romaeuanij (Luc. 24:21). Inijuantij amo kema kinmanauijkej, uan ipan xiuitl 70, romaeuanij kitsontlamiltijkej Jerusalén uan nopa teokali.
¿Kenke toTeotsij amo kinmanauik kej uejkajkia kichijki? ¿Kenke amo kinkajki ma tlateuikaj uan kiampa momanauiskiaj? ¿Kipatlatoya toTeotsij kej kiitayaya nopa tlauilankayotl? Amo. ToTeotsij amo kinmanauik pampa nopa judíos ayokmo kuali mouikayayaj iuaya, uan amo kineltokakej Jesús eliyaya nopa Mesías (Hech. 2:36). Yeka, toTeotsij ayokmo kinejki ma kitekipanokaj (Mat. 23:37, 38).
ToTeotsij ayokmo kinmanauik judíos yon kimokuitlauik nopa tlali tlen kinmakatoya. Yeka, tlaj tlateuiskiaj ayokmo ueliskiaj kiijtosej toTeotsij kinpaleuiyaya. Kej Jesús kiijtojtoya, toTeotsij ayokmo kinejki israeleuanij ma kitekipanokaj uan ayokmo kinpaleuik. Jehová kintlapejpeniskia sekinok maseualmej katli kitekipanoskiaj uan yaskiaj iluikak, Biblia kintokaxtia “tlen nelia inintlakauaj toTeko” (Gál. 6:16; Mat. 21:43). Katli kintlapejpenik eliyayaj se keskij Cristo itokilijkauaj, yeka teipa kiniljuijkej: “Achtouia axineliyayaj itlakauaj, pero ama kena, inintlakauaj toTeko” (1 Ped. 2:9, 10).
Maske toTeotsij kintlapejpenijtoya Cristo itokilijkauaj kej itekipanojkauaj, amo kinmanauik kema romaeuanij kinteuijkej, yon amo kikajki ma kinteuikaj katli kintlaijiyouiltiyayaj. ¿Kenke? Pampa kej tikitakej ipan nopa tlamachtili tlen panok, san toTeotsij kinamiki kiijtos kema moneki tlateuisej. Uan toTeotsij amo kinteuik romaeuanij yon kinkajki Cristo itokilijkauaj ma tlateuikaj. Ni kinextia ayamo asiyaya nopa tonali kema kitlamiltiskia tlaijiyouilistli uan tlen amo kuali.
Cristo itokilijkauaj monekiyaya kichiasej toTeotsij ma kinmanaui, kej uejkajkia kichijkej itekipanojkauaj katli amo kema kitlauelkajkej. Yeka, tlaj toTeotsij amo kinkauayaya ma tlateuikaj, amo kinamikiyaya yasej tlateuitij. Uan Jesús nojkia kiniljuik itokilijkauaj: “Xikiniknelikaj inmokualankaitakauaj uan xijtlajtlanikaj toTeko ma kinteochiua tlen inmechtlaijiyouiltiaj” (Mat. 5:44). Kema Jesús kiijtok romaeuanij kitsontlamiltiskiaj Jerusalén amo kiniljuik ma tlateuikaj, ya kiniljuik ma cholokaj, uan ya nopa kichijkej (Luc. 21:20, 21).
Uan apóstol Pablo kiijkuilok: “Amo kema ximomakuepakaj [...]. Pampa ijkuilijtok ipan iTlajtol kampa [Jehová] kiijtok: Na noteki para nikinkuepilis tlakamej tlen fiero kichiuaj” (Rom. 12:19). Pablo kiilnamijki tlen uejkajkia toTeotsij tlanauatijtoya uan ijkuilijtoya ipan Levítico 19:18 uan Deuteronomio 32:35. Tikitakej uejkajkia toTeotsij kinpaleuiyaya itekipanojkauaj kema kinteuiyaya ininkualankaitakauaj. Tlen Pablo kiijtok kinextia kema itstoyaj nopa achtoui Cristo itokilijkauaj toTeotsij san kej ipa kiitayaya tlauilankayotl, ya kiitayaya ika nopa ueliskia kinmanauis itekipanojkauaj, kitlamiltis tlaijiyouilistli uan tlen amo kuali. Uan kej uejkajkia kichijki, san ya kiijtoskia kema mochiuaskia uan ajkia tlateuiskia.
Uajka, toTeotsij amo kinnauatik nopa achtoui Cristo itokilijkauaj ma tlateuikaj. Uan, ¿itstokej se keskij ipan ni tonali katli toTeotsij kinpaleuia kema onka tlauilankayotl? ¿Asitok tonali kema kinmanauis itekipanojkauaj? ¿Kenijkatsa kiita nama nopa tlauilankayotl? Ni tijnankilisej ipan nopa seyok tlamachtili.
