TLAMACHTILI TLEN IKA PEUA: TA UELIS TIJKUAMACHILIS BIBLIA
¿Kenke moneki tijkuamachilis Biblia?
“Maske amochtli Biblia tlauel kiixmatij, amo nikaj kichijkej, yeka chinos amo tlauel kipatiitaj.”(LIN, CHINA)
“Tlaj amo ueli nijkuamachilia nopa amochtli tlen noreligión Hindú, ¿kenijkatsa uelis nijkuamachilis Biblia?”(AMIT, LA INDIA)
“Nijtlepanita Biblia pampa nopa amochtli ya uejkaj kiijkuilojkej. Uan maske nijmati tlauel monamaka ipan nochi Tlaltipaktli, amo kema nikitstok se.”(YUMIKO, JAPÓN)
Ipan nochi Tlaltipaktli, miakej maseualmej kitlepanitaj Biblia maske kiixmatij san se kentsi o amo kimatij tlake tlamachtia. Ne Asia tlauel miakej amo kiixmatij, uan maske ipan miak altepemej tlauel momoyaua Biblia, miakej nojkia amo kiixmatij.
Uelis timotlajtlania: “¿Kenke nijnekiskia nijkuamachilis Biblia?”. Tlaj tijmatis tlake tlamachtia, uelis mitspaleuis ipan ni tlamantli:
-
Tiitstos ika pakilistli
-
Tijsenkauas kuesoli ika mochampoyouaj
-
Amo tlauel timotekipachos
-
Kuali timouikas ininuaya sekinok
-
Kuali tijtekiuis motomij
Yoshiko, katli eua Japón, kinejki kimatis tlake tlamachtia Biblia, yeka pejki kipoua. ¿Tlake panok? Ya kiijtoua: “Biblia nechpaleuijtok ma niyolpaki uan ma nimotemachi teipa uelis kuali niitstos. Nama kena kuali nijyolmati”. Se tlakatl tlen itoka Amit, nojkia kinejki iselti momachtis Biblia. Ya kiijtoua: “Tlauel nechpaktik. Tlen Biblia kiijtoua nelia kinpaleuia nochi maseualmej”.
Tlauel miakej maseualmej kinpaleuijtok Biblia. ¿Kenke amo tijpoua moselti uan kiampa uelis tikitas kenijkatsa mitspaleuis?
