Miakej maseualmej amo kinekij kineltokasej toTeotsij pampa moiljuiaj ya kichiua ma titlaijiyouikaj.

Miakej katli tlayakanaj ipan religiones kiniljuiaj maseualmej toTeotsij kintlaijiyouiltia. Sekij kiijtouaj...

• ... toTeotsij techtlatsakuiltia kema techtlasojsoljuilia se tlenijki.

• ... konemej mikij pampa toTeotsij kinneki sekinok iluikaeuanij ipan iluikak.

• ... toTeotsij nojkia mokalakia kema mochiua tlauilankayotl.

Uajka, ¿katli tlayakanaj ipan religiones tlamachtiaj tlen amo melauak? ¿Kuali kiita toTeotsij tlen tlamachtiaj?

ToTeotsij amo techtlaijiyouiltia

Tlaj kintlaijiyouiltiskia maseualmej, amo kinextiskia nopa kuajkuali tlamantli tlen Biblia kiijtoua. Pampa nopaya kiijtoua:

“Xitlauak nochi tlen kichiua. [...] Yajaya kichiua tlen melauak uan kuajkualtsi” (DEUTERONOMIO 32:4).

“Uajka inmojuantij tlen intlalnamikij, xinechtlakakilikaj. Nochi inkimatij para toTeko tlen kipia nochi chikaualistli axtlajtlakolchiua, niyon axtlaixpano” (JOB 34:10).

“Nochipa toTeko tlen kipia nochi chikaualistli tetlajtolsenkauas keja kinamiki” (JOB 34:12).

ToTeotsij amo kineki kinitas religiones katli tlamachtiaj tlen amo melauak

Amo kineki kinitas religiones katli tlamachtiaj ya kichiua ma titlaijiyouikaj uan nojkia katli tlapaleuiaj kema onka kualantli uan kema mochiua tlauilankayotl.

“Nopa teokamanalouanij san tlayolmelauaj istlakayotl uan kiijtouaj ya nopa nikijtojtok. Axnikintitlantok, niyon axnikinmakak nopa tlajtoli tlen kiijtouaj uala tlen na [Jehová]. Axnikiniljuijtok niyon se tlajtoli. Tepouiliaj tlen tlanextili tlen axkiitstokej, niyon axkikaktokej. Tepouiliaj uiuiyotl tlen san yajuantij kikixtiaj ipan ininyolo” (JEREMÍAS 14:14).

Jesús amo kineki kinitas religiones katli tlamachtiaj tlen amo melauak

“Miakej tlakamej nechnotsaj: ‘ToueyiTeko’, pero axnochi yajuantij kalakisej kampa toTeko tlen itstok iluikak tlanauatia. San yasej tlen nelia kichiuaj ipakilis noTata tlen itstok iluikak. Kema asis nopa tonal para toTeko tetlajtolsenkauas, miakej tlakamej nechiljuisej: ‘ToueyiTeko, ipan motoka tikiniljuijkej tlakamej motlajtol uan tlachke ualaskia teipa, uan ika motoka tikinkixtijkej iajakauaj Axkualtlakatl tlen kalaktoyaj ipan tlakamej, uan ika motoka tijchijtokej miak chikaualneskayotl’. Uan na nikiniljuis: ‘Xiakaj. Axkema niinmechixmatki. San tlen axkuali inkichijkej’” (MATEO 7:21-23).