Sejse xiuitl, mikij miakej maseualmej pampa kitekiuiaj drogas o sekinok tlamantli tlen temiktia. Uan pampa onkatok nopa kokolistli COVID-19, nojua tlauel miakej maseualmej kitekiuiaj drogas. Miakej ayokmo kiampa kichiuaj pampa tlauel kinpaleuik tlen Biblia kiijtoua. Tlaj ayokmo tijneki tijtekiuis drogas, Biblia nojkia uelis mitspaleuis. a

Ipan ni tlamachtili tikitasej:

•  ¿Kenke Biblia uelis mitspaleuis ayokmo xijtekiui drogas uan sekinok tlamantli?

•  Naui tlamantli tlen Biblia kiijtoua uelis mitspaleuis

•  Textos tlen Biblia tlen uelis mitspaleuis ayokmo xijtekiui drogas uan sekinok tlamantli

•  Tlen sekinok kinpanok: Biblia kinpaleuik ayokmo ma kitekiuikaj drogas

•  ¿Kiijtoua Biblia uelis timopajtis tlaj ayokmo tijneki tijtekiuis drogas o sekinok tlamantli?

•  ¿Kiijtoua Biblia moneki amo tijtekiuis drogas tlen ika mopajtiaj?

 Katli tlauel momachtiaj kiitstokej maseualmej momatij kichiuaj tlen amo kuali pampa kimatij itstokej ininselti, motetsopaj, tlauel motekipachouaj uan mokuesouaj miak tonali. Biblia uelis mitspaleuis ayokmo kiampa xijyolmati uan nojkia mitspaleuis ximouampojchiua iuaya toTeotsij (Salmo 25:14). Nojkia mitspaleuis xijchiua tlamantli tlen timoiljuiyaya amo kema tiueliskia (Marcos 11:22-24).

1.  1. Xikixmati toTeotsij Jehová b (Juan 17:3). Ya kichijchijki nochi tlen onka uan kipia nochi chikaualistli. Ya nojkia eli moTata katli tlauel mitsiknelia. Jehová kineki ximouampojchiua iuaya uan kineki mitspaleuis ika ichikaualis (Isaías 40:29-31; Santiago 4:8). Uan tlaj tijnechkauis, ya kiijtojtok teipa tlauel kuali tiitstos (Jeremías 29:11; Juan 3:16).

2.  2. Xikiljui Jehová ma mitspaleui. Ximomaijto uan xikiljui Jehová ma mitspaleui ayokmo tijtekiuis drogas uan kiampa tielis “tlatsejtseloltik, pampa keja nopa kipaktia” (Romanos 12:1). Ya mitsmakas itonal o ichikaualis uan kiampa tijpias nopa “ueyi chikaualistli” tlen Jehová temaka (2 Corintios 4:7; Lucas 11:13). Nopa chikaualistli mitspaleuis ayokmo xijtekiui drogas uan xijchiua kuali tlamantli tlen Jehová kipaktia (Colosenses 3:9, 10).

3.  3. Ximoiljui tlen toTeotsij kipaktia (Isaías 55:9). ToTeotsij mitspaleuis xijpatla tlen timoiljuia uan nopa kichiuas ayokmo xijtekiui drogas (Efesios 4:23). Tlen toTeotsij moiljuia eltok ipan Biblia, yeka tlauel mitspaleuis tlaj mojmostla tijpouas (Salmo 1:1-3). Miakej tlauel kinpaleuijtok kema se akajya kinpaleuia ma kikuamachilikaj tlen Biblia tlamachtia (Hechos 8:30, 31). Jehová itlajtoltemakauaj kinmachtiaj sekinok ika Biblia. Nojkia uelis tias kampa timonechikouaj, nopaya timomachtiaj tlen Biblia kiijtoua uan kenijkatsa uelis tijchiuasej ipan tonemilis tlen tijyekouaj.

4.  4. Ximouampojchiua ininuaya katli mitspaleuisej. Mouampoyouaj uelis mitspaleuisej ayokmo xijtekiui drogas o kichiuasej nojua xijtekiui (Proverbios 13:20). Maseualmej katli kiueyichiuaj Jehová uelis elisej kuali touampoyouaj. Uan toTeotsij kineki inijuantij ma elikaj touampoyouaj pampa kimati uelis techpaleuisej (Salmo 119:63; Romanos 1:12). Nojkia, moneki kuali tijtlapejpenis tlen ika timoyolpakiltis pampa kejuak timouika ika nopa maseualmej katli tikinita, tikinkaki o kema tijpoua tlen kichiuaj. Yeka, ayokmo xijchiua tlen uelis kichiuas sampa xijtekiui drogas (Salmo 101:3; Amós 5:14).

 Filipenses 4:13: “Nochi niueli nijchiua ika nopa chikaualistli tlen [toTeotsij] nechmaka”.

 “Nijmatiyaya noselti amo ueliskia nijkauas drogas, yeka nikiljuik toTeotsij ma nechpaleui uan ya nechmakak nopa chikaualistli tlen nechpolouayaya” (Patrizia, eua Italia).

 Joseph Ehrenbogen moskaltik kampa kichiuayayaj tlen tlauel amo kuali uan pejki tlauel tlai, kichichina iyatl, marihuana uan kitekiuiyaya heroína. Miakpa nechka miki uan tlen kipojki ipan Biblia kipaleuik ma kiita ueliskia kipatlas inemilis. Xijpoua tlen kipanok ipan nopa tlamachtili “Aprendí a respetar a las mujeres y a respetar mi vida”.

 Dimitri Kórshunov miakpa kichijki kampeka ayokmo tlais. Tlaj tijneki tijmatis tlake kipaleuik ayokmo ma moiuinti, xikita nopa video “Ayokmo nechpaktik kej nimonejnemiltiyaya”.

 Kena. Biblia kiijtoua: “Se tetikatlakatl axkineki se tepajtijketl, pero se kokoxketl, kena” (Mateo 9:12). Nopa Instituto Nacional sobre el Abuso de Drogas tlen Estados Unidos nojkia kiijtoua: “Katli kitekiuiaj drogas mokokouaj, yeka tlaj se akajya kineki kikauas, moneki ma kipaleuikaj pampa iselti amo uelis”. Maske se akajya tlauel kineki kikauas tlen momajtok kichiua, san toTeotsij uelis kipaleuis ma kikaua. Maske miakej katli ayokmo kitekiuiaj drogas tlauel kinpaleuik kema kichijkej tlen Biblia kiijtoua uan nojkia monejki ma kinpaleui se tepajtijketl. c Se tlakatl katli itoka Allen, kiijtoua: “Kema nijchiuayaya kampeka ayokmo nitlais, tlauel nechkokouayaya notlakayo. Nopa kichijki ma nikita amo san nechpaleuiskia tlen nimomachtiyaya ipan Biblia, nojkia monekiyaya nikiljuis se tepajtijketl ma nechpaleui”.

 Amo. Biblia kiijtoua katli tlauel mokokouaj uelis kitekiuisej tlaili o nojkia uelis kimakasej se akajya katli nechka mikis uan kiampa amo tlauel kikokos itlakayo (Proverbios 31:6; 1 Timoteo 5:23). Maske tepaleuia, moneki tikilnamikisej sekij drogas katli kitekiuiaj kema se akajya tlauel mokokoua, uelis kichiuas nochipa xijneki xijtekiui. Yeka, moneki tijmatis tlake ueliskia mitspanos tlaj tijtekiuis nopa pajtli uan kuali timoiljuis kenijkatsa tijchiuas maske se tepajtijketl mitsiljuik kena uelis tijtekiuis (Proverbios 22:3).