¿Timoiljuia teipa kuali tiitstos? Maske nama tlauel ouij kej tiitstokej, miakej mosentlaliaj ipan tlamantli tlen kuali. ¿Nelia uelis timotemachisej teipa kuali tiitstosej? Kena. Biblia kiijtoua teipa tlauel kuali tiitstosej.

•  ¿Tlake kiijtoua Biblia?

•  ¿Nelnelia moaxitis tlen Biblia kiijtoua?

•  ¿Kenijkatsa moaxitis tlen Biblia kiijtoua?

•  ¿Kema moaxitis tlen Biblia kiijtoua?

•  ¿Kenijkatsa uelis mitspaleuis tlen Biblia kiijtoua?

 Maske Biblia ipa kiijtojtoya maseualmej kipiaskiaj uejueyi kuesoli, nojkia kiijtoua asis se tonali kema ayokmo tlaijiyouisej. Ma tikitakaj se keski tlamantli:

•   Tlen kinkuesoua maseualmej: miakej amo kipiaj ininchaj

   Tlen Biblia kiijtoua: “Ipan nopa tonali, kema se tlakatl kichijchiuas ichaj, yajaya itstos ipan ichaj” (Isaías 65:21).

   Tlen panos teipa: Nochi kipiasej ininchaj.

•   Tlen kinkuesoua maseualmej: amo onka tekitl uan amo kipiaj tlen ika mopanoltisej

   Tlen Biblia kiijtoua: “Uan yajuantij kipiasej nopa pakilistli para kitekiuisej nochi tlen kipiaj ipampa ininteki” (Isaías 65:22).

   Tlen panos teipa: Nochi kipiasej tekitl katli nelia kinpaktis kichiuasej.

•   Tlen kinkuesoua maseualmej: kema kinchiuiliaj tlen amo xitlauak

   Tlen Biblia kiijtoua: “Se [...] tlanauatijketl tlen tlanauatis xitlauak. Uan iuaya ualasej itlayakankauaj tlen nojkia tlanauatisej xitlauak” (Isaías 32:1).

   Tlen panos teipa: Nochi maseualmej kinchiuilisej tlen xitlauak. Nochi kipiasej tlen moneki uan amo aka kichikoitasej.

•   Tlen kinkuesoua maseualmej: amo onka tlakualistli uan yeka amo kipiaj chikaualistli

   Tlen Biblia kiijtoua: “Onkas miak trigo ipan nochi nopa tlali, uan hasta nopa kuatinij tlen onka ipan tepetinij [...] temakasej inintlajka” (Salmo 72:16).

   Tlen panos teipa: Nochi kipiasej tlakualistli tlen kinpaleuis, amo aka kochis ika mayantli uan nochi kipiasej chikaualistli.

•   Tlen kinkuesoua maseualmej: itstokej katli kichiuaj tlen amo kuali uan katli tlauel mosisiniaj

   Tlen Biblia kiijtoua: “Sejse tlakatl mosiyajkauas ika pakili itsala se ikuatlatok uan sejse ixokomekamil temakas hasta mokauas. Ayok aka kintemajmatis” (Miqueas 4:4).

   Tlen panos teipa: Yon se maseuali ayokmo majmauis pampa ayokmo itstosej katli amo kuajkualmej, “tlen itstokej xitlauakej iixpa toTeko moaxkatisej nopa tlali” (Salmo 37:10, 29).

•   Tlen kinkuesoua maseualmej: tlauilankayotl

   Tlen Biblia kiijtoua: “Ayok onkas tlateuilistli uan soldados ayok monekis momachtisej para tlateuisej” (Isaías 2:4).

   Tlen panos teipa: Ipan Tlaltipaktli onkas tlaseuilistli (Salmo 72:7). Ayokmo aka tlaijiyouis pampa mochiua tlauilankayotl, ayokmo aka monekis yas momanauiti ipan seyok altepetl yon ayokmo timochokilisej pampa mijki se katli tlauel tikikneliaj.

•   Tlen kinkuesoua maseualmej: kokolistli

   Tlen Biblia kiijtoua: “Ayok kiijtosej para mokokouaj” (Isaías 33:24).

   Tlen panos teipa: Maseualmej ayokmo mokokosej uan nochi kipiasej kuali inintlakayo (Isaías 35:5, 6). Nojkia, Biblia kiijtoua “ayok kema aki mikis” (Apocalipsis 21:4).

•   Tlen kinkuesoua maseualmej: kinempolouaj Tlaltipaktli

   Tlen Biblia kiijtoua: “Ipan nopa tonali elis keja pakis nopa uaktok tlali uan kampa tlatsitsika pampa xochiyouasej keja se yejyektsi xochitl”.

   Tlen panos teipa: Nochi Tlaltipaktli elis se yejyektsi xochimili kampa maseualmej uelis itstosej kej toTeotsij kinekiyaya ma itstokaj (Génesis 2:15; Isaías 45:18).

 Uelis timoiljuia amo. Yeka, timitstlaneuij xikita tlen Biblia tlamachtia tlen panos teipa. ¿Kenke? Tlen Biblia kiijtoua panos teipa amo eli sanse ika tlen maseualmej kiijtouaj pampa Biblia eli toTeotsij iTlajtol. Ma tikitakaj kenke amo eli sanse:

•   Tlen toTeotsij kiijtoua eli temachtli. Biblia kiijtoua toTeotsij amo kema istlakati (Tito 1:2). Nojkia, san toTeotsij uelis kiijtos tlake nelnelia panos teipa (Isaías 46:10). Ipan Biblia kipia miak neskayotl tlen kinextia nelnelia moaxitia tlen toTeotsij kiijtoua. Tlaj nojua tijneki tijmatis, xikita nopa video ¿Kenke uelis timotemachisej nelia tlen kiijtoua Biblia?

•   ToTeotsij ueli kisenkaua nochi kuesoli. Biblia kiijtoua toTeotsij kipia chikaualistli uan “kichiua nochi tlen kineki kichiuas” (Salmo 135:5, 6). Kej tikitaj, ya amo tleno uelis kitsakuilis kichiuas tlen mosentlalijtok. Nojkia, toTeotsij kineki techpaleuis pampa techiknelia (Juan 3:16).

 Yeka, uelis timotlatsintokia: “Tlaj toTeotsij kineki techpaleuis uan ueli kichiua, uajka, ¿kenke nojua titlaijiyouiaj?”. Tlaj tijneki tijmatis kenijkatsa Biblia kinankilia ni tlajtlanili, xikita nopa video ¿Kenke toTeotsij kikaua ma onka tlaijiyouilistli?

 ToTeotsij kichiuas nochi tlen kitenkajtok ika iTlanauatijkayo katli tekichiua iluikak. Ya kitekimakatok Jesús kej itlanauatijka ipan iTlanauatijkayo, uan kimakatok tekiuejkayotl ma kimokuitlaui Tlaltipaktli uan maseualmej. Kema Jesús itstoya ipan Tlaltipaktli kinchikajki kokoyanij, kintlamakak maseualmej, kitlakaualtik ajakatl uan kinyolkuik se keskij maseualmej (Marcos 4:39; 6:41-44; Lucas 4:40; Juan 11:43, 44). Tlen kichijki kinextik tlen teipa kichiuas ipan Tlaltipaktli kema tlanauatijtos ipan toTeotsij iTlanauatijkayo.

 Tlaj nojua tijneki tijmatis kenijkatsa mitspaleuis toTeotsij iTlanauatijkayo, xikita nopa video ¿Tlake nopa toTeotsij iTlanauatijkayo?

 Nechka moaxitis. ¿Kenke kiampa tikijtouaj? Pampa Biblia ipa kiijtojtoya panoskia se keski tlamantli tlen kinextiskia toTeotsij iTlanauatijkayo nechka tlanauatiskia ipan Tlaltipaktli (Lucas 21:10, 11). Nama, nochi tikitaj kenijkatsa moaxitijtok tlen Biblia kiijtojtoya panoskia.

 Tlaj nojua tijneki tijmatis, xikita nopa tlamachtili “¿Kema tekichiuas toTeotsij iTlanauatijkayo ipan Tlaltipaktli?”.

 Se katli kiijkuilok Biblia kiijtok tlen timotemachiaj tijselisej teipa eli “kejuak se tepostli tlen moatsintlanoua” (Hebreos 6:19, TNM). Sanse kej kema nopa tepostli kimajkauaj atitla uan kipaleuia nopa akali amo ma motejtsona kema chikauak tlaajaka, tlen timotemachiaj tijselisej teipa techpaleuia ma tikijiyouikaj tlen nama techpano. Uan tlen Biblia kiijtoua techpaleuia kuali ma tijyolmatikaj uan ma tiyolpakikaj, uan nojkia techpaleuia amo ma timokokokaj (1 Tesalonicenses 5:8).