“Kema tijtlepanitaj tlen sekinok moiljuiaj, techpaleuia ma tiitstokaj ika tlaseuilistli” (Declaración de Principios sobre la Tolerancia de la UNESCO, 1995).

 Tlaj amo tijtlepanitaj tlen sekinok moiljuiaj, uelis kichiuas ma timokualanikaj ininuaya sekinok. Nopa miakpa kichiua maseualmej ma mochikoitakaj, ma mokualanikaj uan ma moteuikaj.

 Pero maseualmej amo moiljuiaj sanse tlamantli kema kikakij nopa tlajtoli. Miakej moiljuiaj kema se akajya kitlepanita tlen sekinok kitlapejpeniaj, kiijtosneki moneki kuali kiitas tlen sekinok kichiuaj maske amo kuali monejnemiltiaj. Sekij katli kitlepanitaj tlen Biblia kiijtoua, moiljuiaj moneki kitlepanitasej tlen sekinok kitlapejpeniaj uan tlen kineltokaj, maske inijuantij amo kuali kiitaj.

 ¿Uelis kinpaleuis Biblia maseualmej ma kitlepanitakaj tlen sekinok moiljuiaj ipan ni tonali?

Biblia kiijtoua ma titlatlepanitakaj

 Biblia kiijtoua ma tijtlepanitakaj tlen sekinok moiljuiaj. Nopaya kiijtoua: “Ma nochi tlakamej kiitakaj kejatsa inkichiuiliaj tlen kuali aki ueli tlakatl” (Filipenses 4:5). Biblia techiljuia kuali ma tikinnojnotsakaj sekinok, uan ma tikinchiuilikaj tlen kuali uan tlen xitlauak. Katli kichiuaj tlen kiijtoua ni texto, kitlepanitaj tlen sekinok kitlapejpeniaj maske inijuantij amo moyakanaj ika nopa tlamantli o amo kuali kiitaj.

 Ipan Biblia, toTeotsij kinextia kenijkatsa kineki ma timonejnemiltikaj. Nopaya kiijtoua: “TOTEKO techiljuijtok nopa tlen kuali uan tlen kineki ma tijchiuakaj” (Miqueas 6:8). ToTeotsij kiampa kichijki pampa kineki techpaleuis kuali ma tiitstokaj (Isaías 48:17, 18).

 ToTeotsij amo techkaua ma tikintlajtolsenkauakaj sekinok. Biblia kiijtoua: “Itstok san setsi tlen techmaka nopa tlanauatili, [...] inmojuantij, axinkipiaj tekiuejkayotl para inkintlajtolsenkauasej sekinok” (Santiago 4:12). ToTeotsij kikaua sejse ma kitlapejpeni tlake kichiuas. Pero tlaj amo kuali tijtlapejpeniaj tlen tijchiuasej, tojuantij titlaijiyouisej (Deuteronomio 30:19).

Biblia kiijtoua ma tikintlepanitakaj sekinok

 ToTeotsij iTlajtol kiijtoua: “Xikintlepanitakaj nochi tlakamej” (1 Pedro 2:17). Yeka, katli monejnemiltiaj kej Biblia kiijtoua, kintlepanitaj sekinok maske amo kineltokaj sanse tlamantli yon monejnemiltiaj kej inijuantij (Lucas 6:31). Ni amo kiijtosneki nochipa kuali kiitasej o kipaleuisej tlen kineltokaj, tlen moiljuiaj o tlen kitlapejpeniaj sekinok. Katli monejnemiltiaj kej Biblia kiijtoua nochipa kichiuaj kampeka kintlepanitasej sekinok kej Jesús kichijki, uan amo kintlaijiljuiaj yon kinpinajtiaj.

 Se neskayotl, se tonali Jesús kiixmatki se siuatl katli yauiyaya ipan se religión tlen ya amo kuali kiitayaya. Nopa siuatl itstoya iuaya se tlakatl katli amo eliyaya iueue. Maske Jesús amo kuali kiitayaya nopa tlamantli, kinextik kitlepanitayaya nopa siuatl uan kuali kinojnotski (Juan 4:9, 17-24).

 Sanse kej Jesús, Cristo itokilijkauaj kinpaktia kinixtomilisej tlen kineltokaj sekinok maseualmej. Pero kichiuaj “ika tlatlepanitakayotl” (1 Pedro 3:15). Biblia kiniljuia Cristo itokilijkauaj amo ma kinchiualtikaj sekinok ma moiljuikaj sanse kej inijuantij. Uan nojkia kiijtoua moneki “axkitemos para mokamaijixnamikis ika sekinok. Moneki ma kinchiuili nochi tlakamej tlen kuali”, maske sekinok amo kineltokaj sanse tlamantli (2 Timoteo 2:24).

Biblia kiijtoua amo ma titekualankaitakaj

 ToTeotsij iTlajtol kiijtoua: “Xijchiuakaj kampeka xiitstokaj ika yejyektsi ika nochi tlakamej” (Hebreos 12:14). Se akajya katli kineki kuali itstos ininuaya sekinok, kuali monejnemiltia uan nojkia kichiua kampeka amo tekualankaitas (Mateo 5:9). Biblia nojkia kiniljuia Cristo itokilijkauaj ma kiniknelikaj ininkualankaitakauaj uan ma kinchiuilikaj tlen kuali maske kintlaijiyouiltiaj (Mateo 5:44).

 Biblia kiijtoua toTeotsij “axkineki kiitas” o “kikualankamaka” kema maseualmej kichiuaj tlen amo kuali o kema kintlaijiyouiltiaj sekinok (Proverbios 6:16-19). Pero kema Biblia kiijtoua toTeotsij “axkineki kiitas”, kiijtosneki tlen toTeotsij kiyolmati kema maseualmej kichiuaj tlen amo kuali. Biblia kinextia Ya kineki kintlapojpoljuis uan kinpaleuis maseualmej katli kinekij kipatlasej ininnemilis uan kuali monejnemiltisej (Isaías 55:7).

Versículos kampa kiijtoua moneki tikintlepanitasej sekinok

 Tito 3:2: “Tlaneltokanij ma axkintlaijiljuikaj sekinok. Ma axtlakamaijixnamikikaj, pero ma itstokaj ika yejyektsi ika nochi tlakamej uan ma kinnojnotsakaj ika kuali”.

 Mateo 7:12: “Uajka xikinchiuilikaj sekinok, iuikal keja inkinekij sekinok ma inmechchiuiliaj”.

 Josué 24:15: “Xijtlapejpenikaj ama ni tonal ajkeya inkitekipanosej”.

 Hechos 10:34: “Toteko axtechchikoiknelia”.

 Habacuc 1:12, 13: “[ToTeotsij,] axtijneki tikitas tlen axkuali”.

 Romanos 12:19: “Xijkauilikaj Toteko ma kintlatsakuilti. Pampa ijkuilijtok ipan Itlajtol kampa Toteko kiijtok: ‘Na noteki para nikinkuepilis tlakamej tlen fiero kichiuaj, uan kena, nikinkuepilis’ ”.

 Jehová a amo aka kiiljuia ma momakuepa. Ya kichiuas tlen xitlauak ipan nopa tonali tlen kinamiki. Tlaj tijneki tijmatis sekinok tlamantli, xijpoua nopa tlamachtili “¿Alguna vez se hará justicia en el mundo?”.