Kena. Biblia kiijtok ipan ni tonali miakej maseualmej tlauel amo kuali monejnemiltiskiaj uan yeka amo kuali tiitstoskiaj (2 Timoteo 3:1-5). a Biblia nojkia kiijtok amo nochi maseualmej kiampa eliskiaj pampa toTeotsij kinpaleuiskia miakej ma kichiuakaj kampeka ma moiljuikaj uan ma monejnemiltikaj kej ya kineki (Isaías 2:2, 3).

Ipan ni tlamachtili tijnankilisej ni tlajtlanili:

•  ¿Kenijkatsa kiijtok Biblia monejnemiltiskiaj uan moiljuiskiaj maseualmej ipan ni tonali?

•  ¿Kenke kema maseualmej moiljuiaj san ipan inijuantij kichiua sekinok amo kuali ma itstokaj?

•  ¿Kenke maseualmej nojua kichiuaskiaj tlen tlauel amo kuali?

•  ¿Tlake moneki tijchiuasej kema maseualmej kichiuaj tlen amo kuali?

•  ¿Nochi maseualmej amo kuali monejnemiltiskiaj?

•  ¿Maseualmej nochipa kichijtosej tlen amo kuali?

 Biblia kiijtok se keski tlamantli tlen maseualmej kichiuaskiaj ipan ni tonali, kiampa kichiuaskiaj pampa san moiljuiskiaj ipan inijuantij. Maseualmej kichiuaskiaj san tlen inijuantij kinekiskiaj, san inijuantij moikneliskiaj, san kinekiskiaj mopakilismakasej uan amo kitemoskiaj toTeotsij (2 Timoteo 3:2-4).

 Nochi ni tlajtolpanextili moaxitia ipan ni tonali. Maseualmej san moiljuiaj ipan inijuantij, ipan tlen kinpaleuis, tlen kichiua ma yolpakikaj uan tlen kichijtokej ipan ininnemilis. Uan ni tlamantli tlauel nesi pampa san kintekipachoua tlen kinpano uan nojua tlauel kiampa kichijtiauij. Miakej maseualmej san moiljuiaj ipan inijuantij uan amo kichiuaj tlen kuali yon kichiuaj kampeka kinextisej kuajkuali tlamantli. Amo kitlaskamatij tlen kipiaj yon kintlaskamatiliaj sekinok kema kinpaleuiaj (2 Timoteo 3:2, 3).

 Biblia kiijtok ipan ni tonali maseualmej san moiljuiskiaj ipan inijuantij uan nopa kichiuaskia nojkia ma kichiuakaj sekinok tlamantli tlen amo kuali, kej ni eliskiaj:

•   Kinekiskiaj kipiasej miak tomij. Miakej maseualmej kiikneliaj tomij. Moiljuiaj tlauel kuali itstokej pampa kipiaj miak tomij uan kipiaj miak tlamantli (2 Timoteo 3:2).

•   Moueyimatiskiaj. Miakej maseualmej tlauel motlepanitaj, moueyimatij uan moiljuiaj miak inintlalnamikilis (2 Timoteo 3:2, 4). Nojkia moueyimatij pampa kiijtojtinemij uelij kichiuaj miak tlamantli uan pampa kipiaj tomij.

•   Teistlakauiskiaj. Kampa ueli maseualmej teistlakauiaj uan teijilnamikij (2 Timoteo 3:2, 3). Ni kiijtosneki maseualmej kinistlakauiaj sekinok uan nojkia toTeotsij, uan kiijtouaj tlen amo melauak tlen inijuantij.

•   Tochontikej. Miakej tetlauelkauaj uan kichiuaj san tlen inijuantij kinekij, tlakajkayauaj uan tochontikej (2 Timoteo 3:2-4). Kiampa kinextiaj kema amo kinekij kipatlasej tlen moiljuiaj, kema amo kinekij kisenkauasej se kuesoli o kema amo kinekij kichiuasej tlen kiijtojkej.

•   Mosisiniskiaj. Miakej maseualmej tlauel mosisiniaj uan nima kualanij, yeka kinekij temakilisej uan techiuilisej tlen amo kuali (2 Timoteo 3:3).

•   Tlaijixnamikiskiaj. Jesús kiijtok ipan ni tonali “momiakilisej tlakamej tlen axkintlepanitasej tlen kipiaj tlanauatili” (Mateo 24:12). Nojkia kiijtok miakej tlauel moajkomanaskiaj pampa kinekiskiaj ma mochiua tlen inijuantij kinekij (Lucas 21:9).

•   Amo kinikneliskiaj ininchampoyouaj. Miakej amo kintlepanitaj inintatauaj uan amo teikneliaj, yeka ayokmo kuali itstokej ininuaya ininchampoyouaj pampa amo kuali kinmokuitlauiaj, kinchiuiliaj tlen amo kuali uan kintlaijiyouiltiaj (2 Timoteo 3:2, 3).

•   Kinextiskiaj ome ininixayak kema kiueyichiuaskiaj toTeotsij. Ipan ni tonali tlauel momiakilijtokej maseualmej katli ‘mochiuaj keja kiixmatij toTeko, pero axtle’ (2 Timoteo 3:5). Maske ueliskia kichiuasej tlen toTeotsij kineki, inijuantij kichiuaj tlen tlayakananij kiniljuiaj pampa kinmachtiaj tlen inijuantij kinekij kikakisej (2 Timoteo 4:3, 4).

 Nama miakej maseualmej san moiljuiaj ipan inijuantij, uan nopa kichiuaj miakej ma kipiakaj se kokolistli ipan inintsonteko, amo kuali ma tlalnamikikaj uan tlauel ma motekipachokaj (Eclesiastés 7:7). Se neskayotl, miakej tlauel kinpaktia tomij, yeka kinkajkayauaj uan kintlachtekiliaj sekinok. Katli amo teikneliaj kintlaijiyouiltiaj ininchampoyouaj uan teipa inijuantij tlauel motekipachouaj o kinekij momiktisej. Uan katli tetlauelkauaj o katli amo elij temachmej tlauel kinyolkokouaj sekinok.

 Biblia kiijtoua kenke nama maseualmej tlauel amo kuali tlen kichiuaj:

•   Nama maseualmej san moiljuiaj ipan inijuantij, yeka ayokmo teikneliaj uan amo kiikneliaj toTeotsij (Mateo 24:12).

•   Satanás kimajkajkej ipan Tlaltipaktli (Apocalipsis 12:9, 12). Yeka kichijtok maseualmej san ma moiljuikaj ipan inijuantij (1 Juan 5:19).

 ToTeotsij iTlajtol kiijtoua: “Xikintlauelkaua” (2 Timoteo 3:5). Maske ni amo kiijtosneki timoiyokatlalisej tlen sekinok, kena moneki timomokuitlauisej uan amo timouampojchiuasej ininuaya katli san moiljuiaj ipan inijuantij uan katli amo kichiuaj tlen toTeotsij kipaktia (Santiago 4:4).

 Amo. Biblia kiijtoua itstoskiaj maseualmej katli moyolkokoskiaj “ipampa nochi tlajtlakoli tlen kiitaj sekinok kichiuaj kampa ueli” (Ezequiel 9:4). Kichiuaskiaj kampeka amo moiljuisej san ipan inijuantij uan kikauaskiaj toTeotsij itlanauatiljuaj ma kinyakana. Tlen kichiuaskiaj uan tlen kiijtoskiaj, kinextiskiaj amo kichiuaj kej sekinok (Malaquías 3:16, 18). Se neskayotl, kichiuaskiaj kampeka itstosej ika tlaseuilistli ininuaya sekinok uan amo tlapaleuiskiaj kema mochiuaskia se tlauilankayotl o kema maseualmej mokualaniskiaj (Miqueas 4:3).

 Amo, maseualmej amo nochipa kiampa monejnemiltisej pampa toTeotsij kintsontlamiltis katli amo kinekij kineltokasej (Salmo 37:38). Kichiuas ma onka se “Tlaltipaktli yankuik”, ni kiijtosneki maseualmej katli nochipa itstosej ika tlaseuilistli (2 Pedro 3:13; Salmo 37:11, 29). Timotemachiaj temachtli kiampa panos pampa ipan ni tonali Biblia kinpaleuijtok miakej maseualmej ma kipatlakaj ininnemilis uan ma monejnemiltikaj kej toTeotsij kipaktia (Efesios 4:23, 24).