Nopa tlajtoli griego anástasis tlen ipan Biblia motlajtolkuepa kej “moyolkuisej”, kiijtosneki “kema se akajya sampa moketsa (motlanana)”. Kema se akajya moyolkui eli kejuak sampa moketsa uan moyolkui kej achtouia eliyaya (1 Corintios 15:12, 13).

 Maske nopa tlajtoli moyolkui amo tijpantiaj ipan Antiguo Testamento, o ipan Escrituras Hebreas, nopaya kena kiijtoua moyolkuisej katli miktokej. Ika tlajtolpanextijketl Oseas, toTeotsij kitenkajki ni: “Pero na niinmechkouas inmojuantij tlen nepa miktla. Kena, niinmechmakixtis” (Oseas 13:14; Job 14:13-15; Isaías 26:19; Daniel 12:2, 13).

 ¿Kanke moyolkuisej katli miktokej? Se keskij maseualmej moyolkuij ipan iluikak pampa tlanauatisej iuaya Jesucristo (2 Corintios 5:1; Apocalipsis 5:9, 10). Biblia kiijtoua inijuantij elij “tlen achtoui moyolkuisej”, ni tlajtoli kiijtosneki teipa nojkia moyolkuisej sekinok maseualmej (Apocalipsis 20:6). Nopa sekinok maseualmej katli moyolkuisej elisej tlauel miakej uan itstosej ipan Tlaltipaktli (Salmo 37:29).

 ¿Tlake pano kema se akajya moyolkui? ToTeotsij kimakatok Jesús miak chikaualistli uan yeka kinyolkuis katli miktokej (Juan 11:25). Uan ika nopa chikaualistli Jesús kinyolkuis “nochi tlakamej tlen miktokej” uan kichiuas sampa ma elikaj kej achtouia eliyayaj uan sampa ma kiilnamikikaj tlen kinpanok (Juan 5:28, 29). Katli moyolkuisej ipan Tlaltipaktli kipiasej ininnakayo uan ininomiyo, amo mokokosej uan kuali eltos inintlakayo (Isaías 33:24; 35:5, 6). Uan katli moyolkuij ipan iluikaktli, inintlakayo eli “keja se tonaltsi” o mochiuaj iluikaeuanij (1 Corintios 15:42-44, 50).

 ¿Ajkia inijuantij moyolkuisej? Biblia kiijtoua ipan Tlaltipaktli moyolkuisej “tlakamej tlen ya miktokej, tlen kuajkualmej uan tlen axkuajkualmej” (Hechos 24:15). Noé, Abraham uan Sara elij se keski tlen nopa maseualmej katli kuajkualmej katli moyolkuisej (Génesis 6:9; Hebreos 11:11; Santiago 2:21). Uan nopa maseualmej katli axkuajkualmej, elij katli amo kema kimatkej tlake tlanauatia toTeotsij uan yeka amo kineltokakej.

 Nopa maseualmej katli amo kinekij kineltokasej toTeotsij uan amo kinekij moyolkuepasej, ayokmo moyolkuisej. Kema nopa maseualmej mikij, ayokmo kema sampa itstosej (Mateo 23:33; Hebreos 10:26, 27).

 ¿Kema moyolkuisej katli miktokej? Biblia kiijtok kema Cristo mokuepaskia peuaskiaj moyolkuisej katli itstoskiaj iluikak, uan ni pejki ipan xiuitl 1914 (1 Corintios 15:21-23). Kema Jesús tekichiuas Mil Xiuitl, ipan Tlaltipaktli moyolkuisej katli miktokej. Uan ipan nopa tonali, ni Tlaltipaktli mochiuas se xochimili (Lucas 23:43; Apocalipsis 20:6, 12, 13).

 ¿Uelis timotemachisej moyolkuisej katli miktokej? Kena. Ipan Biblia kiijtoua kenijkatsa moyolkuikej chiknauij maseualmej uan kiijtoua itstoyaj sekinok katli nojkia kiitakej (1 Reyes 17:17-24; 2 Reyes 4:32-37; 13:20, 21; Lucas 7:11-17; 8:40-56; Juan 11:38-44; Hechos 9:36-42; 20:7-12; 1 Corintios 15:3-6). Ipan Biblia tlauel pankisa kema moyolkuik Lázaro. Ni tlakatl kipiayaya naui tonali miktoya uan Jesús kiyolkuik ininixpa miakej maseualmej (Juan 11:39, 42). Ikualankaitakauaj Jesús nojkia kiitakej tlen panok uan teipa moiljuijkej kenijkatsa kimiktiskiaj Jesús uan Lázaro (Juan 11:47, 53; 12:9-11).

 Biblia kiijtoua toTeotsij kipia miak chikaualistli uan yeka kinyolkuis katli miktokej. Uan pampa ya amo tleno kiilkaua, kiilnamiki kenijkatsa eliyaya sejse maseuali. Nojkia, kipia Nochi Chikaualistli, yeka amo tleno uelis kichiuas amo ma kinyolkui maseualmej (Job 37:23; Mateo 10:30; Lucas 20:37, 38). Jehová amo san ueli kinyolkui katli miktokej, nojkia kiampa kineki kichiuas. “Tlauel tijnekis tikitas tlen tijchijchijki” (Job 14:15; Nueva Versión Internacional). Kiampa kiijtoua Biblia kiyolmatis toTeotsij kema kinyolkuis maseualmej katli itstosej ipan Tlaltipaktli.

Tlen sekinok kineltokaj kema moyolkuisej katli miktokej

 Tlen sekinok kineltokaj: Kema se akajya moyolkui, ialma uan itlakayo sampa mosansejkotiliaj.

 Tlen melauak: Biblia kiijtoua se alma eli itlakayo se maseuali o se tlapiali, amo eli se tlamantli tlen nojua yoltok kema se akajya miki (Génesis 2:7; Ezequiel 18:4). Kema se akajya moyolkui, ialma amo mosansejkotilia ika itlakayo, pampa moyolkui nopa alma o nopa maseuali.

 Tlen sekinok kineltokaj: Se keskij katli kinyolkuisej nima kintsontlamiltisej.

 Tlen melauak: Biblia kiijtoua katli “kichijkej tlen axkuali” moyolkuisej uan kintlajtolsenkauasej (Juan 5:29). Nopa maseualmej kintlajtolsenkauasej ika tlen kichiuasej teipa uan amo ika tlen kichijkej kema ayamo mikiyayaj. Jesús kiijtok: “Tlakamej tlen miktokej nechkakisej na tlen niiKone toTeko Dios. Uan inijuantij tlen nechtlakakilisej, yoltosej” (Juan 5:25). Tlaj katli moyolkuisej kitlakakilisej Jesús itoskak uan kichiuasej tlen tlamachtik, uajka inintoka nojkia ijkuilijtos ipan nopa “amatlapouali tlen [...] kipixki inintoka tlakamej tlen itstosej para nochipa” (Apocalipsis 20:12, 13).

 Tlen sekinok kineltokaj: Katli moyolkuisej sampa kipiasej inintlakayo tlen kipiayayaj achtouia.

 Tlen melauak: Kema se akajya miki, itlakayo palani uan teipa ixpoliui (Eclesiastés 3:19, 20).