Nochi tlen tijneltokaj mokixtia ipan Biblia. Yeka mopatlatia se keski tlamachtili kema kuali tijkuamachilia. a

 Biblia techpaleuia tijkuamachilisej kenke kinamiki tijpatlasej se keski tlamachtili. Proverbios 4:18 kiijtoua: “Ininojui tlakamej tlen itstokej xitlauakej eltok yejyektsi keja kema tlanestiuala uan ininyolis mochiuas más yejyektsi mojmostla hasta nesis keja tonati tlen tlauia ika nochi itlatlanex kema tlajkotona”. Kej kema tlanestiuala, ika yolik nesti nochi tlamantli tlen onka, toTeotsij nojkia kichiua ika yolik ma tijkuamachilikaj tlamachtili tlen melauak uan kema kinamiki (1 Pedro 1:10-12). Kej kiijtoua se tlajtolpanextili, toTeotsij kichijtok ma tijkuamachilikaj miak tlamachtili tlen melauak “ipan itlamia tonali” (Daniel 12:4).

 Yeka amo moneki timotekipachosej tlaj tikitaj mopatla se keski tlamachtili. Uejkajkia toTeotsij itekipanojkauaj nojkia amo kuali kikuamachilijkej se keski tlamantli tlen panoskia uan monejki kipatlasej tlen moiljuiyayaj.

•   Moisés kinejki kinmakixtis israeleuanij, maske nojua poliuiyaya 40 xiuitl kema toTeotsij kiijtojtoya kichiuas nopa (Hechos 7:23-25, 30, 35).

•   Apóstoles amo kuali kikuamachilijkej tlajtolpanextili tlen kiijtouayaya Mesías monekiyaya mikis uan moyolkuis (Isaías 53:8-12; Mateo 16:21-23).

•   Se keskij achtoui Cristo itokilijkauaj mokuapolojtoyaj pampa amo kimatiyayaj kema asiskia tonali “tlen toTeko” (2 Tesalonicenses 2:1, 2).

 Kej panotiajki tonali, toTeotsij kinpaleuik itekipanojkauaj ma kipatlakaj tlen kikuamachiliyayaj. Tojuantij nama nojkia tijtlajtlaniaj ika nochi toyolo nojua kiampa ma kichiua (Santiago 1:5).