Nopa tomij tlen temakaj ika nochi ininyolo motekiuia kema tijchiuaj se keski tlamantli kampa timosentiliaj uan kema tikinpaleuiaj toikniuaj katli kinpano tlaouijkayotl. Tijchiuaj pampa timosentlalijtokej tikinpaleuisej sekinok nojkia ma elikaj Cristo itokilijkauaj (Mateo 28:19, 20, TNM).

 Nopa tomij tlen temakaj amo kema moaxkatia se akajya uan kiampa tlatominpias. Yon se Jehová itlajtoltemajka kitlaxtlauiaj pampa tlajtolmoyaua o pampa tlamachtia ipan tlanechikoli. Nojkia, amo kintlaxtlauiaj katli senkistok tlatekipanouaj, kej katli tlapaleuiaj ipan kali Betel o ipan ueyi Kali Betel, yon Katli kinyakanaj Jehová itlajtoltemakauaj.

•   Mochijchiua amatlajkuiloli: Sejse xiuitl tijtlajtolkuepaj, tijkixtiaj uan tijmoyauaj tlauel miak Biblias uan sekinok amatlajkuiloli, uan amo tijnamakaj. Nojkia, nochi amatlajkuiloli tlen tijkixtiaj motlalia ipan jw.org uan ipan JW Library. Tlen nopaya eltok amo moneki tikixtlauas, uan amo tijkauaj sekinok ma kitlalikaj tlen ueliskia kichiuas ma tijtlanikaj tomij.

•   Kichijchiuaj uan kikualchijchiuaj kali kampa timosentiliaj: Ipan nochi Tlaltipaktli tijchijchiuaj kali kampa timosentiliaj uan tijkualchijchiuaj kema moneki, kiampa toikniuaj kipiaj kampa kiueyichiuasej toTeotsij. Nojkia mochijchiua kali Betel uan kali kampa motlajtolkuepa amatlajkuiloli, uan tijmokuitlauiaj. Miak tekitl ueli mochiua pampa toikniuaj tlapaleuiaj ika nochi ininyolo, kiampa amo motekiuia miak tomij.

•   Kampa kiitaj kenijkatsa mochiuas nochi tekitl: Nopa tomij tlen temakaj ika nochi ininyolo ipan obra mundial, motekiuia kema mochiua se keski tekitl ipan ueyi Kali Betel, kali Betel, kali kampa kitlajtolkuepaj amatlajkuiloli uan nojkia kema toikniuaj tepaxalouaj chijchikuasej metstli.

•   Tlajtolmoyaualistli: Yon se Jehová itlajtoltemajka tlainama kema tlajtolmoyaua o tlamachtia “iTlajtol toTeko” (2 Corintios 2:17). Sanse kej panoyaya ipan achtoui siglo, se keskij toikniuaj katli kinmachtijtokej kuali tlajtolmoyauasej uan senkistok tlajtolmoyauaj, kinpaleuiaj ma kipantikaj se kali kampa itstosej uan ipan tlen moneki (Filipenses 4:16, 17; 1 Timoteo 5:17, 18).

•   Tlamachtili: Ika nopa tomij tlen temakaj ika nochi ininyolo mochiua uejueyi tlanechikolistli. Nojkia mochijchiua tlamachtili tlen Biblia ipan audio uan video. Uan nojkia kinmachtiaj ueuejtlakamej uan katli senkistok tlatekipanouaj, kiampa kuali kichiuasej ininteki.

•   Kema tlasojsoloua se tlenijki: Kema tlasosoloua se tlenijki o kema maseualmej tlasosolouaj, tikinpaleuiaj katli kinpanok ni tlamantli ika tlakualistli, atl uan kampa itstosej. Kema kiampa tijchiuaj tikinpaleuiaj toikniuaj uan sekinok maseualmej (Gálatas 6:10).