Sejse xiuitl, Jehová itlajtoltemakauaj kichiuaj miak videos tlen kinextiaj ipan uejueyi tlanechikolistli. Maske ni videos kichiuaj ipan tlajtoli inglés, onka miak uejueyi tlanechikolistli ipan sekinok tlajtoli. ¿Tlake kichiuaj uan kiampa nochi uelij kikuamachiliaj nopa videos? Kichiuaj grabaciones tlen nopa videos ipan sekinok tlajtoli, nopa kiijtosneki kipatlaj inintoskak tlen achtoui kamanaltiyayaj uan kitlaliaj inintoskak tlen kamanaltij seyok tlajtoli. ¿Tlake kiyolmatij katli kiitaj ni videos?

Ma tikitakaj tlake kiijtojkej se keskij maseualmej katli amo elij Jehová itlajtoltemakauaj uan kiitakej nopa videos ipan inintlajtol, katli itstokej ipan México uan Centroamérica:

• “Amo san nijkuamachilik nopa videos, nojkia nimoiljuik kejuak nopaya niitstoya. Nopa tlamachtili asik ipan noyolo” (se katli yajki ipan ueyi tlanechikolistli ipan tlajtoli popoluca, ipan Veracruz, México).

• “Nimoiljuik kejuak niitstoya ipan noaltepe uan nimonojnotstoya iuaya se nouampo. Nochi ni videos tlauel kuali nijkuamachilik. Nelia tlauel kuali uan amo kej kema se itstok ipan cine” (se katli yajki ipan ueyi tlanechikolistli ipan tlajtoli náhuatl, ipan Nuevo León, México).

• “Kema nikitak nopa videos ipan notlajtol, elki kejuak nimonojnotstoya ininuaya katli nesiyayaj ipan nopa videos” (se katli yajki ipan ueyi tlanechikolistli ipan tlajtoli chol, ipan Tabasco, México).

• “Ni religión kineki nochi maseualmej ma kiyekokaj se keski tlamantli ipan inintlajtol. Amo itstokej sekinok katli kiampa kichiuaj” (se katli yajki ipan ueyi tlanechikolistli ipan tlajtoli cakchiquel, ipan Sololá, Guatemala).

Kema Jehová itlajtoltemakauaj kichiuaj grabaciones amo kintlaxtlauiaj técnicos de audio niyon actores de doblaje. Uan kemantika kichiuaj grabaciones ipan altepemej tlen uejka mokaua uan kampa amo tlauel tlapijpiaj. Uajka, ¿kenijkatsa ueli kichiuaj nopa grabaciones tlen tlauel kuali kakisti?

Ipan xiuitl 2016, Jehová itlajtoltemakauaj tlen itstokej ipan Centroamérica tlapaleuijkej ma kichiuakaj grabaciones ipan tlajtoli español uan ipan sekinok 38 tlajtoli, nopa videos monextik ipan uejueyi tlanechikolistli tlen mochijki ipan 2016. Se 2,500 Jehová itlajtoltemakauaj, kinejkej tlapaleuisej ipan nopa tekitl. Nopa técnicos uan katli kitlajtolkuepkej nopa videos, kichijkej grabaciones ipan sucursal tlen Centroamérica, ipan oficinas kampa tlajtolkuepaj uan nojkia ipan sekij estudios katli amo uejkauaskia kitekiuisej. Nochi ni mochijki ipan kipano 20 altepemej, ipan Guatemala, Honduras, México uan Panamá.

Monejki kichiuasej se ueyi kampeka uan nojkia kuali moiljuisej kenijkatsa kikualchijchiuasej nopa estudios kampa kichiuaskiaj grabaciones. San motekiuik tlamantli tlen onkayaya kampa mochiuaskia nopa grabación, kej yoyomitl uan colchones, kiampa amo kakistiskia tlen pano kalteno uan kema se akajya kamanaltiskia amo kakistiskia konkontik.

Sekij katli kinejkej kichiuasej grabaciones ipan sekinok tlajtoli axkipiayayaj miak tomij yeka monejki kichiuasej se ueyi kampeka uan kiampa asitij kampa mochiuaskia nopa grabación. ¡Sekij uejkajkej 14 horas! Se neskayotl, se tetaj uan ikone ikxinejnenkej se ocho horas uan kiampa asitoj kampa mochiuaskia nopa grabación.

Kema eliyaya pilsiuapiltsi, Naomi kinpaleuiyaya ichampoyouaj kema kikualchijchiuayayaj estudios kampa mochiuaskia grabaciones maske amo uejkauaskia kitekiuisej. Ya kiijtoua: “Tlauel tijnekiyayaj ma asi nopa semana kema kichiuaskiaj grabaciones. Notata tlauel tekitiyaya pampa kinekiyaya nochi kuali ma elto. Kemantika, nonana kintlamakayaya se 30 toikniuaj katli yajtoyaj tlapaleuitoj”. Nama, Naomi tlapaleuia ipan se oficina kampa tlajtolkuepaj ipan México. Ya kiijtoua: “Tlauel niyolpaki pampa tlen nijchiua kinpaleuia sekinok maseualmej ma kikakikaj tlen Biblia tlamachtia ipan inintlajtol. Nelia eli se tekitl tlen kichiua tlauel ma niyolpaki”.

Sejse xiuitl, Jehová itlajtoltemakauaj kichiuaj uejueyi tlanechikolistli ipan nochi Tlaltipaktli. Nochi katli kinekisej uelis yasej. Tlaj nojua tijneki tijmatis, xikita kampa kiijtoua UEJUEYI TLANECHIKOLISTLI TLEN TIJCHIUAJ SEJSE XIUITL.