Biblia kijtoua seki taman tein panoskia uan tein miakej kichiuaskiaj, tein techpaleuiskia maj tikmatikan ke tinentokej itech tonalmej keman “tamitiya tein mochiujtok itech taltikpak” (Mateo 24:3). Biblia kitokaytia “itamian tonalmej” uan “tonalmej keman tatamitiya” (Daniel 8:17, 19; 2 Timoteo 3:1).

 Biblia miak taman kijtojka ke mosenchiuaskia, uan kinextiskia ke tinentokej itech tonalmej keman tatamitiya (Lucas 21:7). Maj tikitakan seki taman:

 Miakkan mochiuaskiaj neteuilismej. Jesús kijtoj ke “seki xolalmej moteuiskej iniuan akin nemij itech okseki xolalmej” (Mateo 24:7). Uan no, itech Apocalipsis 6:4 neteuilis moixnextia kemej aksa akin youi ipanko se caballo, akin kichiuaskia “maj moteuikan uan maj momijmiktikan akin nemij nikan taltikpak”.

 Mayan. Jesús kijtoj ke ‘onkaskia mayan’ (Mateo 24:7). Apocalipsis ika tajtoua okse akin no youi ipanko se caballo akin kichiujtiaskia maj miakkan onka mayan (Apocalipsis 6:5, 6).

 Uejueyi talolinilis. Jesús kijtoj ke ‘taloliniskia miakkan’, tein kijtosneki noyampa taltikpak (Mateo 24:7; Lucas 21:11). Nejon uejueyi talolinilis okachi tetajyouiltiskia uan kichiuaskia maj momikilikan tel miakej.

 Kokolismej oso kokoxkayot. Jesús kijtoj ke miakkan onkaskia “tetsaujkakokolismej” (Lucas 21:11).

 Tein amo kuali. Maski nochipa mochiuani tein amo kuali, Jesús kijtoj ke itech tonalmej keman tatamitiya ‘okachi mochiuaskia tein amo kuali’ (Mateo 24:12).

 Kiteluejueloskiaj taltikpak. Apocalipsis 11:18 kijtoua ke taltikpakneminij ‘kiixpoloskiaj taltikpakʼ. Nejin amo sayoj kijtosneki ke taltikpakneminij kichiuaskiaj tein amo kuali uan takajkayauaskiaj, ta no ke kiuejueloskiaj tein onkak nikan taltikpak.

 Taltikpakneminij okachi amo yolkualmej yeskiaj. Biblia kijtojka keniuj yeskiaj taltikpakneminij: “Amo motasojkamatiskej uan tekauaskej, [...] amo kinekiskej moyektenkauaskej iniuan oksekin, tetakajkayauiliskej, amo motsakuiliskej, kichiuaskej tein tel fiero, kiixtopeuaskej tein kuali, kinchiuiliskej tein amo kuali inintasojikniuan uan amo takakiskej, senkis moueyimatiskej” (2 Timoteo 3:1-4). Kemej tel amo kuali tein kichiuaskiaj, Biblia kijtoua ke nejon tonalmej yeskiaj ‘semi ouijkej uan tamouililmej’.

 Kalyetonij moxeloskiaj. Biblia kijtoua itech 2 Timoteo 3:2, 3 ke miakej ‘amo kintasojtaskiaj ininchankauan’ uan ke konemej ‘amo kintakamatiskiaj inintatuan’.

 Taltikpakneminij amo kitasojtaskiajok Dios. Keman Jesús kijtoj ke ‘miakej amo tetasojtaskiajok’ kijtosnekia ke miakej amo kitasojtaskiajok Dios (Mateo 24:12). Uan 2 Timoteo 3:4 no kijtoua ke itech tonalmej keman tatamitiya nejon taltikpakneminij ‘sayoj kitemoskiaj yejuan moyolpaktiskej uan amo Dios’.

 Kinextiskiaj ke semi taneltokaj. Biblia kijtoua itech 2 Timoteo 3:5 ke taltikpakneminij kijtoskiaj ke kiueyichiuaj Dios, sayoj ke kemej nemiskiaj kinextiskiaj ke amo melauj.

 Okachi moajsikamatiskia tein Biblia kijtojka ke panoskia. Itech amatajkuilol Daniel moijtojka ke itech “tonalmej keman ejkos tamilis” miakej okachi kiajsikamatiskiaj tein Biblia tamachtia. Kemej neskayot, kuali kiajsikamatiskiaj tein moijtojka ke mochiuaskia itech nejin tonalmej (Daniel 12:4).

 Noyampa taltikpak motematiltiskia tein Biblia kijtoua. Jesús kijtoj: “Itech nochi taltikpak moteixmatiltis kuali tanauatilmej tein ika tajtoua iTaixyekanalis Dios” (Mateo 24:14).

 Amo taneltokaskiaj uan takejkeloskiaj. Jesús kijtoj ke miakej amo kineltokaskiaj ke mochiujtokya tein kinextiskia ke amo uejkaua ixpoliuisya tein amo kuali (Mateo 24:37-39). Uan amo sayoj nejon, 2 Pedro 3:3, 4 kijtoua ke takejkeloskiaj uan kijtoskiaj ke nejon amo teyi kinextia.

 Mochiuaskia nochi tein moijtojka. Jesús kijtoj ke itech tonalmej keman tatamitiya mosenchiuaskia nochi tein moijtojka, amo sayoj seki taman (Mateo 24:33).

 Kemaj. Tein mochiujtok itech nochi taltikpak uan tein Biblia kijtojka ke mochiuaskia kinextia ke tonalmej keman tatamitiya peuak itech xiuit 1914, xiuit keman peuak Yekinika Ueyi Neteuilis. Xikonita itech nejin video keniuj tein mochiujtok noyampa taltikpak kinextia ke tinentokej itech tonalmej keman tatamitiya:

 Itech xiuit 1914, itaixyekanalis Dios peuak tekiuajti ompa iluikak. Yekinika, kinkalankixtijkej Satanás uan amokuali ejekamej uan sayoj kinkauanij maj takuejmolokan nikan taltikpak (Apocalipsis 12:7-12). Tein amo kuali tein kichiuaj taltikpakneminij kinextia ke Satanás kinixyekana. Yejua ika, tonalmej keman tatamitiya ‘semi ouijkej uan tamouililmej’ (2 Timoteo 3:1).

 Miakej semi motekipachouaj porin semi ouijkej nejin tonalmej. Semi kintekipachoua ke taltikpakneminij amo ueli moyekuikajok. Uan sekin hasta kimouiliaj maj sayoj tejuan timoixpolokan.

 Sayoj ke sekin, maski semi kintekipachoua tein mochiujtok axkan, kichiaj maj mochiua tein kuali satepan. ¿Keyej? Porin kineltokaj ke amo uejkaua, itaixyekanalis Dios kiixpolos nochi tein amo kuali (Daniel 2:44; Apocalipsis 21:3, 4). Axkan ke kichixtokej maj Dios kichiua tein motenkauak, kinyolseuia tein Jesús kijtoj: “Akin taxikos hasta keman tatamis, makisas” (Mateo 24:13; Miqueas 7:7).