1 Timoteo 1:1-20
1 Nejua Pablo, niitatitanil Cristo Jesús porin nechixtalij toTemakixtijkauj Dios uan Cristo Jesús, akin itechkopa tikchiaj tein kuali.
2 Nimitstajkuilouilia Timoteo,* nokoneuj akin tiktekitilia toTekotsin.
Maj toTajtsin Dios uan toTekotsin Jesucristo mitsmakakan tatiochiualis tein amo technamiki, maj mitsiknelikan uan maj mitspaleuikan kuali ximouika iuan Dios.
3 Keman yaya niatiya Macedonia, nimitsyolchikauak ximokaua Éfeso. Axkan no nimitsiluia ximokaua para tikinnauatis sekin maj amo tamachtikan okse taman,
4 maj amo kikakikan tein amo melauak tein tetapouiaj, nion keman ininka tajtouaj ininuejkaujtatuan. Ika nejon sayoj se tonalpoloua, kichiuaj maj oksekin kijtokan teisa tein amo uelis kinextiskej ke melauak uan amo yejua tein Dios techmaka para okachi titakuaujtamatiskej.
5 Niktemaka nejin tanauatil para maj titetasojtakan porin tiyolchipaujkej, porin amo teyi techyolkuejmoloua uan porin yekmelauj titakuaujtamatij.*
6 Kemej sekin amo kichiuaj nejin, tonalpolouaj keman nenkaj motajtolteuiaj.
7 Kinekij tamachtiskej tanauatil, sayoj ke nion kiajsikamatij tein kijtouaj nion tein semi kinekij maj mochiua.
8 Tejuan tikmatij ke iTanauatil Moisés tapaleuia komo se kitakamati kemej moneki.
9 Uan no tikmatij ke tanauatil amo moixtalij para akin yolmelaujkej, ta para akin kitapanauiliaj tanauatil uan taixnamikij, akin amo yolkualmej uan tajtakouaj, akin tekauaj* uan kiixtopeuaj tein yektik, akin kimiktiaj inintat, ininnan oso oksekin,
10 akin auilnemij,* takamej akin kitemouaj auilnemiskej* iniuan inintakaikniuan, akin teichtekij, akin takajkayauaj uan akin moyektenkauaj ika xolopijyot uan para akin kichiuaj tein yeski taman tein ika kiixnamikij tamachtilis tein kuali.*
11 Nejin tamachtilis mokixtia itech kuali tanauatilmej* tein semi kualtsitsin uan kitemaka Dios akin yolpaki. Yejua nechixtalij maj nikteixmatilti nejin kuali tanauatilmej.
12 Niktasojkamatilia toTekotsin Cristo Jesús akin nechmakak chikaualis, porin nechitak ke nitakuaujtamach uan nechmakak se tekit,
13 maski achto nitauijuikaltiaya,* nikintajyouiltiaya itekitikauan Dios uan amo nitetakachiuaya.* Sayoj ke, Cristo nechiknelij porin amo nikmatia tein nikchiuaya uan amo nitakuaujtamatia.
14 Sayoj ke toTekotsin semi nechnextilij itatiochiualis tein amo technamiki uan Cristo semi nechpaleuij maj nitakuaujtamati uan nechtasojtak porin niktojtoka.
15 Nejin tein nikijtojtok melauak uan kinamiki maj senkis se kineltoka: Cristo Jesús ualaj nikan taltikpak para kinmakixtis akin tajtakolejkej, uan nejua akin okachi niueyitajtakolej.
16 Maski nejua okachi niueyitajtakolej, Cristo Jesús nechiknelij uan ijkon kinextij ke nion tepitsin yolijsiui. Nejon tein nechpanok kinpaleuis akin nemiskej nochipaya porin iuan takuaujtamatiskej.
17 Tekiuaj akin nochipa yoltok, akin amo ueli ixpoliui, akin amo ueli tikitaj, Dios akin sayoj setsin kinamiki maj kitakachiuakan* uan maj kiueyitalikan nochipaya. Maj ijkon mochiua.*
18 Nokonetsin Timoteo, nimitsnauatia nejin, uan nikelnamiki tein achto moijtojka ke tikchiuaskia para maj nejon mitspaleui xiksentoka xitateui kemej se soldado akin kimati kuali tateuis,
19 xiksentoka xitakuaujtamati uan maj amo teyi mitsyolkuejmolo. Sekin amo teyi kichiujkej maski kinyolkuejmolouaya teisa, yejua ika amo takuaujtamatkejok. Kinpanok ijkon kemej se barco tein pankalaki.
20 Ijkon kichiujkej Himeneo uan Alejandro, akin nikinmaktilijya Satanás. Nikintatsakuiltij para maj ijkon kimatikan ke amo kuali yetok maj se kiuijuikalti* Dios.
Tajtolmelaualismej
^ Tokayit tein kijtosneki ‘akin kitakachiua Dios’.
^ Oso “titakuaujtamatij uan amo titaixkajkayauaj”.
^ No uelis kiteajsikamatiltis se kikauas Dios uan amo se kiueyichiuasok.
^ Xikonita auilnemilis.
^ Oso “akin motekaj”.
^ Oso “tepaleuia”.
^ Oso “tajtolmej”.
^ Oso “nitatejtelchiuaya”.
^ Oso “amo nitepoujkaitaya”.
^ Oso “kipoujkaitakan”.
^ Oso “Amén”.
^ Oso “kitejtelchiua”.
